పాలి‘ట్రిక్స్’ టీడీపీలో ‘రఘు’ కుంపటి

 భీమవరం, న్యూస్‌లైన్: తెలుగుదేశం పార్టీ వ్యవహారాల్లో భారతీ య జనతా పార్టీ నేత కనుమూరి రఘురామకృష్ణంరాజు తలదూర్చడం జిల్లాలో డెల్టా రాజకీయాలను వేడెక్కిస్తోంది. టీడీపీతో పొత్తు ఉంటుందనే అంచనాతో బీజేపీలో చేరిన రఘురామకృష్ణంరాజు నర్సాపురం లోక్‌సభ స్థానం నుంచి పోటీ చేయడానికి ప్రయత్నిస్తున్న విషయం తెలిసిందే. వాస్తవానికి టీడీపీ అధినేత చంద్రబాబుతో లోపాయికారి ఒప్పందం కుదుర్చుకున్న తర్వాతే ఆయన బీజేపీలో చేరినట్టు ప్రచారం జరుగుతోంది. ఈ నేపథ్యంలో బీజేపీ నేతగా చెలామణి అవుతున్నా టీడీపీలో ఉన్నట్టే ఆ పార్టీ రాజకీయాలను శాసిస్తున్నారని సమాచారం. నర్సాపురం లోక్‌సభ స్థానం పరిధిలోని అసెంబ్లీ స్థానాల్లో టీడీపీ తరఫున పోటీచేసే నాయకులు తనకు అనుకూలంగా ఉండాలనే ఉద్దేశంతో రకరకాలుగా పావులు కదుపుతున్నారని ఆ పార్టీ వర్గాలే చెప్పుకుంటున్నాయి. దీనిలో భాగంగా కొందరు సిట్టింగ్ ఎమ్మెల్యేలను కూడా మార్చాలని చంద్రబాబుపై రఘురామకృష్ణంరాజు ఒత్తిడి తెస్తున్నట్టు సమాచారం. ఈ పరిణామాలకు తెలుగు తమ్ముళ్లు అగ్గిమీద గుగ్గిలమవుతున్నారు. వేరే పార్టీ వ్యక్తి తమ వ్యవహారాల్లో జోక్యం చేసుకోవడం.. ఇందుకు చంద్రబాబు వంత పాడటం వారికి మింగుడు పడటం లేదట.