పదో తరగతి టెన్షన్

విజయనగరం అర్బన్, న్యూస్‌లైన్: పదో తరగతి విద్యార్థుల్లో కలవరం మొదలైంది. ఓ వైపు సిలబస్ పూర్తి కాకపోవడం, మరోవైపు పరీక్షలు దగ్గరపడుతుండడంతో విద్యార్థులు ఆందోళన చెందుతున్నారు. ఈ ఏడాది దాదాపు యాభై రోజుల పాటు సమ్మెలు, ధర్నాల వల్ల విద్యార్థులు తరగతులు నష్టపోయారు. ఉపాధ్యాయులు, ఉన్నతాధికారులు ఎంతగా ప్రయత్నించినా సిలబస్‌ను మాత్రం పూర్తి చేయలేకపోయారు. ఉపాధ్యాయులకు నిర్వహించిన సమావేశాలు కూడా సిలబస్ పూర్తి కాకపోవడానికి కారణమయ్యాయి. అలాగే విద్యా వలంటీర్ల వ్యవస్థను రద్దు చేయడంతో టీచర్ల కొరత ప్రభావం బోధనపై పడింది. వీరి స్థానంలో అకడమిక్ ఇన్‌స్ట్రక్టర్లను నియమిస్తామని చెప్పినా... విద్యా సంవత్సరం మొదలై ఆరునెలలు గడిచిన తర్వాత ఆ ప్రక్రియ మొదలై అరకొరగానే జరిగింది. ఇటీవల 73 మందిని భర్తీ చేసినప్పటికీ ఇంకా సబ్జెక్టు టీచర్లు లేని ఉన్నత పాఠశాలలు 25 వరకు ఉన్నట్లు సమాచారం.