అనుమతిలేని పాఠశాల సీజ్

హైదరాబాద్ : ప్రభుత్వ గుర్తింపు లేకుండా కొనసాగుతున్న పాఠశాలలపై విద్యాశాఖ అధికారులు కొరడా ఝళిపిస్తున్నారు. హైదరాబాద్ జూబ్లీహిల్స్ సమీపంలోని వెంకటగిరిలో కొన్నేళ్లుగా ఓ ప్రైవేట్ స్కూల్ ప్రభుత్వం అనుమతి లేకుండానే కొనసాగుతోంది. పలుమార్లు నోటీసులు జారీ చేసినా యాజమాన్యం స్పందించకపోవడంతో శుక్రవారం ఖైరతాబాద్ జోన్ డిప్యూటీ డీఈఓ వెంకటేశ్వర్లు ఆధ్వర్యంలో సిబ్బంది స్కూల్‌ను సీజ్ చేశారు. గతేడాది కూడా ఈ స్కూల్‌ను సీజ్ చేయగా ఇంతవరకు ప్రభుత్వం నుండి అనుమతి తీసుకోవడంలో యజమాని విఫలమయ్యారు. తాము వేసిన సీల్‌ను అక్రమంగా తొలగిస్తే స్కూల్ యాజమానిపై క్రిమినల్ కేసు నమోదు చేస్తామని అధికారులు తెలిపారు.