సర్పంచ్‌ చేతిని కొరికిన పోలీస్‌

ప్రతీకాత్మక చిత్రం

పనాజీ: గ్రామ సర్పంచి చేతిని కొరికిన పోలీసు కానిస్టేబుల్‌పై శనివారం ఎఫ్‌ఐఆర్‌ నమోదైంది. ఈ సంఘటన గోవాలో చోటుచేసుకుంది. నిందితుడు గెను వెలిప్‌పై పోలీసులు సెక్షన్‌-324(గాయపర్చడం) కింద కేసు నమోదు చేశారు. అక్రమ నీటి కనెక్షన్‌ విషయంలో సర్పంచ్‌, కానిస్టేబుల్‌ ఇద్దరూ గొడవపడినట్లు తెలిసింది. కాటిగోవా సర్పంచి ఉమేష్‌ గోవాన్కర్‌ చేతిని రెండు సార్లు కానిస్టేబుల్‌ గెను వెలిప్‌ కొరికినట్లు ఎఫ్‌ఐఆర్‌ నమోదైంది.

కొరికిన గాటు గుర్తులను, నిందితుడి పంటి గుర్తులను డెంటల్‌ ఫోరెన్సిక్‌ పద్ధతిలో తాము తీసుకున్నామని, రెండింటినీ సరిపోల్చి చూస్తామని, నేరం నిరూపితమైతే నిందితుడిపై చర్యలు తీసుకుంటామని పోలీసు అధికారి రాజేంద్ర ప్రభు దేశాయ్‌ మీడియాకి తెలిపారు.