హాకీ జిల్లా జట్లు ఎంపిక

భీమవరం టౌన్‌ : వచ్చేనెల 7 నుంచి 10వ తేదీ వరకూ నెల్లూరులోని ఏసీ సుబ్బారెడ్డి గ్రౌండ్స్‌లో జరిగే రాష్ట్రస్థాయి హాకీ పోటీల్లో పాల్గొనే జిల్లా సబ్‌ జూనియర్‌ బాలుర టీమ్‌ను భీమవరం సెయింట్‌ మేరీస్‌ హైస్కూల్‌ గ్రౌండ్‌లో ఎంపిక చేశారు. జిల్లాలోని వివిధ పాఠశాలల నుంచి 110 మంది క్రీడాకారులు సెలక్షన్స్‌కు హాజరయ్యారు. అలాగే అనంతపురం జిల్లా ఆర్‌డీటీ గ్రౌండ్‌లో ఈ నెల 29 నుంచి అక్టోబర్‌ 2వ తేదీ వరకూ జరిగే సబ్‌ జూనియర్‌ బాలికల, జూనియర్‌ బాలికల రాష్ట్రస్థాయి హాకీ పోటీల్లో పాల్గొనే పశ్చిమ టీమ్‌లను ఎంపిక చేశారు. 80 మంది క్రీడాకారిణులు సెలక్షన్స్‌కు హాజరయ్యారు. సెయింట్‌ మేరీస్‌ హెచ్‌ఎం సిస్టర్‌ వలసమ్మ జార్జి ఆధ్వర్యంలో జిల్లా టీమ్‌ను జిల్లా హాకీ అసోసియేషన్‌ అధ్యక్షుడు ఆరేటి ప్రకాష్‌ ఎంపిక చేశారు. వ్యాయామ ఉపాధ్యాయులు అల్లు అప్పారావు, పి.దుర్గారావు, డీజెఆర్‌ఎల్‌ శేఖర్‌బాబు, కె.జేమ్స్, నాయుడు పాల్గొన్నారు.