దుకాణంపై దూసుకెళ్లిన లారీ

బిట్రగుంట :   

మృత్యువు రూపంలో దూసుకు వచ్చిన లారీ రోడ్డు పక్కన టీ విక్రయించే దుకాణంపై దూసుకువెళ్లడంతో ఇద్దరు మహిళలు దుర్మరణం చెందారు. ఈ సంఘటన బోగోలు మండలం కప్పరాళ్లతిప్ప వద్ద ఆదివారం తెల్లవారు జామున జరిగింది  ప్రత్యక్ష సాక్షులు, పోలీసుల కథనం మేరకు.. విజయవాడ నుంచి టైల్స్‌ లోడుతో చెన్నై వైపు వెళ్తున్న లారీ తిప్ప సమీపంలోకి వచ్చే సరికి  5.30 గంటల సమయం అయింది. అతివేగానికి తోడు డ్రైవర్‌ నిద్రమత్తులో వాహనం నడపడటంతో అదుపుతప్పి రోడ్డు పక్కనే టీ విక్రయించే దుకాణంపైకి దూసుకువెళ్లింది.  దుకాణం నిర్వాహకురాలు కర్రెద్దుల ప్రమీల (50) అక్కడికక్కడే మృతి చెందింది. ప్రమీలకు సహాయంగా ఉండేందుకు వచ్చిన ఆమె సోదరి పీరిగ నిర్మలమ్మ (53) తీవ్రంగా గాయపడగా స్థానికులు 108 వాహనంలో కావలి ఏరియా ఆసుపత్రికి తరలించగా అక్కడ చికిత్స పొందుతూ మృతి చెందింది. ప్రమాదం జరిగిన వెంటనే లారీడ్రైవర్‌ పరారయ్యాడు. ఈ మేరకు బిట్రగుంట పోలీసులు కేసు నమోదు చేసుకుని దర్యాప్తు చేపట్టారు. మృతదేహాలకు కావలి ఏరియా ఆసుపత్రిలో పోస్టుమార్టం నిర్వహించి కుటుంబ సభ్యులకు అప్పగించారు. 

త్రుటిలో తప్పిన ఘోర ప్రమాదం  

తిప్ప సమీపంలో ప్రమాదం జరిగిన ప్రాంతం నిత్యం రద్దీగా ఉంటుంది. టీ తాగే వాహన చోదకులు, స్థానికులు నిత్యం పదుల సంఖ్యలో ఉంటారు. వీటికి తోడు రోడ్డు పక్కనే చిన్నచిన్న ఇళ్లు కూడా ఉన్నాయి. అదృష్టవశాత్తు ప్రమాదం జరిగిన సమయంలో దుకాణంలో నిర్వాహకులు తప్ప ఎవరూ లేకపోవడంతో ఘోర ప్రమాదం తప్పింది. తెల్లవారుజామున సమయం కావడంతో రోడ్డుపై కూడా వాహనాలు, స్థానికుల సంచారం తక్కువగా ఉంది. ఏ మాత్రం జనసంచారం అధికంగా ఉండే సమయంలో ప్రమాదం చోటు చేసుకున్నా భారీ ప్రాణనష్టం జరిగేదని స్థానికులు తెలిపారు.