ఆరోగ్య వివరాలు ఇచ్చే సూపర్‌ స్టిక్కర్‌!

ఆరోగ్యంగా ఉన్న వారికి పెద్దగా సమస్యల్లేవుగానీ... రోజూ బీపీ, గ్లూకోజ్, హార్ట్‌రేట్‌ వంటివి పరీక్షించుకోవాలనే వారికి మాత్రం బోలెడన్ని ఇబ్బందులు. సూదితో పొడుచుకుని రక్తంలో చక్కెర ఎంత ఉందో తెలుసుకోవాలి. బీపీ కోసం ప్రత్యేక ఏర్పాట్లు చేసుకోవాలి. ఈ సమస్యలేవీ లేకుండా చేసేందుకు స్టాన్‌ఫర్డ్‌ యూనివర్శిటీ శాస్త్రవేత్తలు ఓ వినూత్నమైన పరికరాన్ని అభివృద్ధి చేశారు. ఫొటోలో కనిపిస్తున్న స్టిక్కర్‌ను చర్మానికి అతికించుకుంటే చాలు.. మన ఆరోగ్యానికి సంబంధించిన వివరాలు ఎప్పటికప్పుడు తెలుసుకోవచ్చు. గుండె కొట్టుకునే తీరుకు, ఉఛ్ఛ్వాస, నిశ్వాసలకు అనుగుణంగా మన చర్మంపైభాగం సంకోచ వ్యాకోచాలకు గురవుతుందన్నది మనకు తెలుసు. ఈ అంశాన్ని ఆధారంగా చేసుకుని ఈ స్టిక్కర్‌ పనిచేస్తుంది. కీళ్ల వద్ద అతికించుకుంటే కాలి కదలికలను గుర్తించి సమస్యలను ఏకరవు పెడుతుంది. బాడీ నెట్‌ అని పిలుస్తున్న ఈ సరికొత్త పరికరాన్ని ఉష్ణోగ్రత, ఒత్తిడి వంటి వివరాలను సేకరించేందుకు వాడుకోవచ్చునని గుండె పరిస్థితిని, నిద్రలోపాలను గుర్తించేందుకూ వాడుకోవచ్చునని అంటున్నారు జెనాన్‌ బావ్‌ అనే శాస్త్రవేత్త. ఈ స్టిక్కర్లను స్మార్ట్‌ వస్త్రాలతో కలిపి వాడుకునేలా చేయాలన్నది తన లక్ష్యమని.. తద్వారా స్మార్ట్‌ఫోన్లు, ఫిట్‌నెస్‌ గాడ్జెట్ల కంటే కచ్చితమైన సమాచారం సేకరించగలమని వివరించారు. పరిశోధన వివరాలు నేచర్‌ ఎలక్ట్రానిక్స్‌ తాజా సంచికలో ప్రచురితమయ్యాయి.