కుక్కపిల్లను తప్పించబోయాడు.. అంతలోనే !

మిరుదొడ్డి: ఆటోను ఓవర్టేక్‌ చేస్తున్న ద్విచక్ర వాహనానికి ఓ కుక్కపిల్ల అడ్డు వచ్చింది. దాన్ని తప్పించే క్రమంలో బైక్‌ అదుపుతప్పి కిందపడటంలో వెనుక కూర్చున్న మహిళ అక్కడిక్కడే మృతి చెందింది. ఈ సంఘటన రంగారెడ్డి జిల్లా మిరుదొడ్డి మండలం బేగంపేట వద్ద ఇవాల( గురువారం) చోటుచేసుకుంది. భూంపల్లి గ్రామానికి చెందిన బొల్లి లక్ష్మి(30), అదే గ్రామానికి చెందిన అబ్బుల ఎల్లవ్వతో కలిసి ఖాజీపూర్‌కు చెందిన రాజు అనే వ్యక్తితో భూంపల్లి నుంచి ఖాజీపూర్‌కు బైక్‌పై వెళుతుండగా ఈ ప్రమాదం జరిగింది.

వారు బేగంపేట వద్దకు రాగానే కుక్క అడ్డు రావడంలో అదుపుతప్పి కిందపడ్డారు. ఈ ప్రమాదంలో లక్ష్మి మృతి చెందింది. మరో ఇద్దరికి తీవ్ర గాయాలు కావడంతో  వారిని దుబ్బాక ప్రభుత్వ ఆసుపత్రికి తరలించారు.