TV
మాటిచ్చాడు...మర్చిపోయాడు!
‘‘మనిషిలా ఉండు.. ఇతరులకు సహాయం చెయ్యి’’ అని చెబుతున్నట్లుగా తన సేవాసంస్థకు ‘బీయింగ్ హ్యూమన్’ అని పేరు పెట్టుకున్నారు సల్మాన్‌ఖాన్. ఈ సంస్థద్వారా పలు సేవాకార్యక్రమాలు చేస్తుంటారాయన.సహాయం చేస్తానని ఎవరికైనా మాటిస్తే.. అది నెరవేర్చుకుంటారట. కానీ, ఒక ప్రొఫెసర్ విషయంలో మాత్రం సల్మాన్ మాట తప్పారు. వెనకబడిన వర్గాల కుటుంబాలకు చెందిన పిల్లలకు పాఠశాలలు ఏర్పాటు చేయాలనే సదాశయంతో ఆ ప్రొఫెసర్ నిధి సమకూర్చుకుంటున్నారు. దీనికోసం చర్చ్ గేట్ నుంచి గుర్గావ్ వరకు ప్రతిరోజూ ఆరు గంటలు రైలు ప్రయాణం చేస్తుంటారాయన.
2010లో ఓ సందర్భంలో సల్మాన్‌ఖాన్ కంటపడ్డారు. ఆయన్నుంచి విషయం మొత్తం తెలుసుకుని ‘నేను సహాయం చేస్తా’ అని మాటిచ్చేశారు సల్మాన్‌ఖాన్. ఇది జరిగి నాలుగేళ్లవుతున్నా ఇంకా సహాయం అందలేదని, సల్మాన్ ఈ విధంగా చేయడం బాధపెట్టిందని ఇటీవల ఆ ప్రొఫెసర్ బహిరంగంగా పేర్కొన్నారు. ఈ విషయం సల్మాన్ వరకు వెళ్లింది. పనుల ఒత్తిడితో మర్చిపోయానని, జరిగిన పొరపాటుకి బాధపడుతున్నానని ఆయన పేర్కొన్నారు. ఈ విషయాన్ని గుర్తు చేసినందుకు ధన్యవాదాలు తెలియజేస్తున్నామని, త్వరలో ప్రొఫెసర్‌ని కలిసి, సహాయం చేయబోతున్నామని సల్మాన్ మేనేజర్ పేర్కొన్నారు.
