హీరో శర్వానంద్

జై సింహా సినిమా తరువాత నందమూరి బాలకృష్ణ ఎన్టీఆర్ బయోపిక్‌ను తెరకెక్కిస్తున్న  సంగతి తెలిసిందే. తానే స్వయంగా నిర్మిస్తూ నటిస్తున్న ఈ సినిమా వచ్చే నెల సెట్స్‌ మీదకు వెళ్తోంది. ప్రస్తుతం ప్రీ ప్రొడక్షన్ కార్యక్రమాలు జరుపుకుంటున్న ఈ సినిమాకు నటీనటుల ఎంపిక కూడా జరుగుతోంది. నేనే రాజు నేనే మంత్రి సినిమాతో తిరిగి ఫాంలోకి వచ్చిన తేజ ఈ సినిమాకు దర్శకత్వం వహిస్తున్నాడు.

తాజాగా ఈ సినిమాకు సంబంధించిన మరో ఆసక్తికర విషయం టాలీవుడ్ సర్కిల్స్ లో వినిపిస్తోంది. ఈ సినిమాలో ఎన్టీఆర్‌ పాత్రలో బాలకృష్ణ నటిస్తున్న సంగతి తెలిసిందే. అయితే ఎన్టీఆర్ యువకుడిగా ఉన్న సమయంలో ఉన్న సన్నివేశాల కోసం ఓ యువ నటుడిని ఎంపిక చేశారట చిత్రయూనిట్‌. నటుడిగా మంచి గుర్తింపు తెచ్చుకున్న యంగ్ హీరో శర్వానంద్‌ యంగ్ ఎన్టీఆర్‌గా కనిపించనున్నాడట. 

అయితే ఈ విషయంపై చిత్రయూనిట్ అధికారిక ప్రకటన మాత్రం చేయలేదు. నందమూరి ఫ్యామిలీ నుంచి ఎంతో మంది యువ కథానాయకులు ఉన్నా బాలయ్య శర్వానంద్‌ పేరును పరిశీలిస్తున్నారన్న వార్త ఇప్పుడు టాలీవుడ్‌ సర్కిల్స్‌లో హాట్‌ టాపిక్‌గా మారింది. ఈ సినిమాను బాలయ్యతో కలిసి వారాహి చలన చిత్రం సంస్థ ప్రతిష్టాత్మకంగా నిర్మిస్తోంది. వచ్చే ఏడాది సంక్రాంతి నాటికి సినిమాను విడుదల చేసేలా ప్లాన్ చేస్తున్నారు చిత్రయూనిట్‌.