కత్రినా కోసం ఖాన్స్‌

బాక్సాఫీస్‌ దగ్గర  పోటీపడే బాలీవుడ్‌ ఖాన్స్‌ షారుక్, సల్మాన్‌ సరదాగా డ్యాన్స్‌ ఫ్లోర్‌పై పోటీ పడ్డారు. నువ్వా? నేనా అన్నట్లుండే ఈ ఖాన్స్‌ నువ్వూ నేనూ అంటూ ఓ సాంగ్‌కి చిందేశారు. షారుక్‌ ఖాన్‌ నటించిన లేటెస్ట్‌ చిత్రం ‘జీరో’. ఆనంద్‌ ఎల్‌. రాయ్‌ దర్శకుడు. అనుష్కా శర్మ, కత్రినా కైఫ్‌ హీరోయిన్లుగా నటించారు.

ఇందులో షారుక్‌ మరుగుజ్జు పాత్రను పోషించారు. ఈ సినిమాలో సల్మాన్‌ ఖాన్‌ అతిథి పాత్రలో ‘ఇస్క్‌బాజీ..’ అనే సాంగ్‌లో కనిపించనున్నారు. ఈ పాట వీడియో సాంగ్‌ను మంగళవారం రిలీజ్‌ చేశారు. ‘జీరో’ సినిమాలో కత్రినా తన నిజ జీవిత పాత్రనే పోషించారు. ఆమె కోసం ఈ ఇద్దరు ఖాన్స్‌ సరదాగా పోటీ పడుతున్నట్టుగా ఈ సాంగ్‌ను రూపొందించారు. డిసెంబర్‌ 21న ‘జీరో చిత్రం రిలీజ్‌ కానుంది.