TV
అనిరుధ్‌–విఘ్నేశ్‌ జంట ఓటమి
సాక్షి, హైదరాబాద్‌: అంతర్జాతీయ టెన్నిస్‌ సమాఖ్య (ఐటీఎఫ్‌) పురుషుల ఫ్యూచర్స్‌ టోర్నమెంట్‌లో తెలుగు క్రీడాకారుల పోరాటం ముగిసింది. కోయంబత్తూర్‌లో జరుగుతోన్న ఈ టోర్నీలో హైదరాబాద్‌కు చెందిన అనిరుధ్‌ చంద్రశేఖర్‌–విఘ్నేశ్‌ పెరణమల్లూర్‌ జంట సెమీస్‌లో ఓటమి పాలైంది.
గురువారం జరిగిన డబుల్స్‌ సెమీఫైనల్లో అనిరుధ్‌ – విఘ్నేశ్‌ (భారత్‌) జంట 4–6, 6–7 (2/7)తో అర్జున్‌–శశి కుమార్‌ ముకుంద్‌ (భారత్‌) జోడీ చేతిలో పరాజయం పాలైంది. మరో సెమీస్‌ మ్యాచ్‌లో కాజా వినాయక్‌ శర్మ (ఏపీ)–మోహిత్‌ మయూర్‌ జయప్రకాశ్‌ (భారత్‌) ద్వయం 2–6, 2–6తో టాప్‌ సీడ్‌ చంద్రిల్‌ సూద్‌–లక్షిత్‌ సూద్‌ (భారత్‌) జంట చేతిలో ఓడిపోయింది.
