ముంబై మెరిసింది

ముంబై మెరిసింది

► నితీశ్‌ రాణా, హార్దిక్‌ సూపర్‌ ఇన్నింగ్స్‌
► కోల్‌కతాపై ముంబై ఇండియన్స్‌ విజయం  
ముంబై: సొంతగడ్డపై ముంబై ఇండియన్స్‌ అద్భుతంగా బోణీ చేసింది. 17 ఓవర్ల వరకు మ్యాచ్‌ కోల్‌కతా నైట్‌రైడర్స్‌ వైపే ఉన్నా... నితీశ్‌ రాణా (29 బంతుల్లో 50; 5 ఫోర్లు, 3 సిక్సర్లు) హార్దిక్‌ పాండ్యా (11 బంతుల్లో 29 నాటౌట్‌; 3 ఫోర్లు, 2 సిక్సర్లు)  తుఫాన్‌ ఇన్నింగ్స్‌తో ఒక్కసారిగా పరిస్థితి తారుమారైంది. చివరి 18 బంతుల్లో 49 పరుగులు చేయాల్సిన దశలో ఈ జోడి బౌండరీల వర్షంతో కోల్‌కతాను వణికించింది.

19వ ఓవర్‌లో రాణా అవుట్‌ అయినా... చివరి ఓవర్‌లో కావాల్సిన 11 పరుగులను హార్దిక్‌ ఎలాంటి ఒత్తిడి లేకుండా సాధించాడు. దీనికితోడు కోల్‌కతా చెత్త ఫీల్డింగ్‌ కూడా ముంబైకి ఉపకరించింది. ఫలితంగా ఆదివారం జరిగిన ఈ మ్యాచ్‌లో నాలుగు వికెట్ల తేడాతో ముంబై తొలి విజయాన్ని అందుకుంది. నితీశ్‌ రాణాకు ‘మ్యాన్‌ ఆఫ్‌ ద మ్యాచ్‌’ పురస్కారం దక్కింది. అంతకుముందు టాస్‌ ఓడి బ్యాటింగ్‌కు దిగిన కోల్‌కతా నిర్ణీత 20 ఓవర్లలో ఏడు వికెట్లకు 178 పరుగులు చేసింది. మనీశ్‌ పాండే (47 బంతుల్లో 81 నాటౌట్‌; 5 ఫోర్లు, 5 సిక్సర్లు) కదంతొక్కాడు.  

నితీశ్‌ జోరు
179 పరుగుల లక్ష్య ఛేదనకు బరిలోకి దిగిన ముంబై ఇండియన్స్‌ 19.5 ఓవర్లలో ఆరు వికెట్లకు 180 పరుగులు చేసి నెగ్గింది. ఏడో ఓవర్‌ తర్వాత వరుసగా మూడు ఓవర్లలో పార్థివ్‌ (30; 3 ఫోర్లు, 1 సిక్స్‌), బట్లర్‌ (28; 1 ఫోర్, 2 సిక్సర్లు), కెప్టెన్‌ రోహిత్‌ (2) వికెట్లు కోల్పోవడంతో ముంబై ఇబ్బందుల్లో పడింది. అయితే నితీశ్‌ రాణా మాత్రం ఎలాంటి ఒత్తిడి లేకుండా ఆడాడు. చివరి మూడు ఓవర్లలో నితీశ్‌ రాణా బౌండరీలతో చెలరేగాడు. నితీశ్‌ 19వ ఓవర్‌లో వెనుదిరగడంతో ఆందోళన నెలకొంది. అయితే చివరి ఓవర్‌లో హార్దిక్‌ పాండ్యా మెరవడంతో మరో బంతి మిగిలి ఉండగానే ముంబై విజయం సాధించింది.

స్కోరు వివరాలు
కోల్‌కతా నైట్‌రైడర్స్‌ ఇన్నింగ్స్‌: గంభీర్‌ (సి) మెక్లీనగన్‌ (బి) కృనాల్‌ పాండ్యా 19; లిన్‌ (ఎల్బీడబ్ల్యూ) (బి) బుమ్రా 32; ఉతప్ప (సి) హార్దిక్‌ (బి) కృనాల్‌ 4; మనీశ్‌ పాండే (నాటౌట్‌) 81; యూసుఫ్‌ పఠాన్‌ (సి) హార్దిక్‌ (బి) కృనాల్‌ 6; సూర్యకుమార్‌ (సి) పొలార్డ్‌ (బి) మలింగ 17; వోక్స్‌ (సి) పొలార్డ్‌ (బి) మలింగ 9; నరైన్‌ (ఎల్బీడబ్ల్యూ) (బి) మెక్లీనగన్‌ 1; ఎక్స్‌ట్రాలు 9; మొత్తం (20 ఓవర్లలో 7 వికెట్లకు) 178.
వికెట్ల పతనం: 1–44, 2–48, 3–67, 4–87, 5–131, 6–144, 7–178.
బౌలింగ్‌: మలింగ 4–0–36–2, మెక్లీనగన్‌ 4–0–51–1, బుమ్రా 4–0–39–1, కృనాల్‌ పాండ్యా 4–0–24–3, హర్భజన్‌ 4–0–27–0.
ముంబై ఇండియన్స్‌ ఇన్నింగ్స్‌: పార్థివ్‌ (ఎల్బీడబ్ల్యూ) (బి) కుల్దీప్‌ 30; బట్లర్‌ (ఎల్బీడబ్ల్యూ) (బి) అంకిత్‌ రాజ్‌పుత్‌ 28; నితీశ్‌ రాణా (సి) నరైన్‌ (బి) అంకిత్‌ రాజ్‌పుత్‌ 50; రోహిత్‌ (ఎల్బీడబ్ల్యూ) (బి) నరైన్‌ 2; కృనాల్‌ (సి) ఉతప్ప (బి) అంకిత్‌ రాజ్‌పుత్‌ 11; పొలార్డ్‌ (సి) సబ్‌–రిషి ధావన్‌ (బి) వోక్స్‌ 17; హార్దిక్‌ పాండ్యా (నాటౌట్‌) 29; హర్భజన్‌ (నాటౌట్‌) 1; ఎక్స్‌ట్రాలు 12; మొత్తం (19.5 ఓవర్లలో 6 వికెట్లకు) 180.
వికెట్ల పతనం: 1–65, 2–71, 3–74, 4–97, 5–119, 6–160.
బౌలింగ్‌: బౌల్ట్‌ 3.5–0–47–0; వోక్స్‌ 4–0–34–1, నరైన్‌ 4–0–22–1, కుల్దీప్‌ యాదవ్‌ 4–0–35–1, అంకిత్‌ రాజ్‌పుత్‌ 4–0–37–3.