సెరెనా ‘హ్యాట్రిక్'

సెరెనా ‘హ్యాట్రిక్'

సింగపూర్: డబ్ల్యూటీఏ ఫైనల్స్ సింగిల్స్ టైటిల్‌ను సెరెనా విలియమ్స్ (అమెరికా) సొంతం చేసుకుంది. వరుసగా మూడో ఏడాది సెరెనా ఈ టోర్నీ విజేతగా నిలవడం విశేషం. ఆదివారం జరిగిన సింగిల్స్ ఫైనల్లో సెరెనా 6-3, 6-0 తేడాతో సిమోనా హలెప్ (రొమేనియా)ను చిత్తు చేసింది. గ్రూప్ దశలో హలెప్ చేతిలో ఘోర పరాజయం చవిచూసిన సెరెనా ఫైనల్లో ప్రత్యర్థికి ఎలాంటి అవకాశం ఇవ్వలేదు.

69 నిమిషాల్లో ఈ మ్యాచ్ ముగిసింది. మొదటి సెట్‌లో ఒక దశలో హలెప్ 3-1తో ఆధిక్యంలో నిలిచినా... కోలుకున్న సెరెనా చెలరేగింది. వరుసగా ఐదు గేమ్‌లు గెలిచి సెట్‌ను సొంతం చేసుకున్న ఈ అమెరికా ప్లేయర్, రెండో సెట్‌లో పూర్తి ఆధిక్యం కనబర్చింది. ఓవరాల్‌గా ఐదో డబ్ల్యూటీఏ ఫైనల్స్ టైటిల్ నెగ్గిన సెరెనా, 2014ను నంబర్‌వన్ ర్యాంక్‌తో ముగించనుంది.