ద్రోహులకు బుద్ధి చెబుదాం

తమిళసినిమా: చేయి చేయి కలిపి పోరాడుదాం ద్రోహులకు బుద్ధి చెబుదాం.. లేదా పారద్రోలుదాం అని నటుడు కమలహాసన్‌ పిలుపునిచ్చారు. ఈయన ఇటీవల రాజకీయాలపై తరచూ స్పందిస్తున్న విషయం తెలిసిందే. రాష్ట్రం అవినీతి మయంగా మారిపోయిందంటూ మంత్రులపై ఆరోపణల దాడి చేస్తున్నారు.  ఇటీవల వామపక్ష నాయకులను తాను హీరోలుగా భావిస్తానని పేర్కొన్న కమల్‌ తాజాగా తమిళనాడులో జరుగుతున్న ద్రోహాలను సహించేది లేదంటూ ధ్వజమెత్తారు.

ఈ సందర్భంగా మరోసారి తన రాజకీయరంగ ప్రవేశం తథ్యమనే విధంగా వ్యాఖ్యలు చేశారు. ఆయన వ్యాఖ్యాతగా వ్యవహరిస్తున్న బిగ్‌బాస్‌ రియాలిటీ గేమ్‌ షోలో ఎలిమినేట్‌ అయిన నటుడు శక్తి ఆదివారం తిరిగి పాల్గొన్న సందర్భంగా కమలహాసన్‌ను రాజకీయాల్లోకి రావాలన్న కోరికను వ్యక్తం చేశారు. అందుకు కమల్‌ స్పందిస్తూ ఇకపై తాను రాజకీయాల గురించి వ్యంగ్యంగా మాట్లాడనన్నారు. ఎవరు ఎలా ఉన్నా తాను ఇలాగే ఉంటానని, జరుగుతున్న ద్రోహాలను చూస్తూ చేతులు కట్టుకుని కూర్చోనని అన్నారు.