TV
ఉబెర్ డ్రైవర్ అసభ్య ప్రవర్తన, అరెస్ట్
ప్రయాణికురాలితో అసభ్యంగా ప్రవర్తించిన ఘటనలో ఉబెర్ క్యాబ్ డ్రైవర్ ను పోలీసులు అరెస్ట్ చేశారు.
ముంబై: ప్రయాణికురాలితో అసభ్యంగా ప్రవర్తించిన ఘటనలో ఉబెర్ క్యాబ్ డ్రైవర్ను ముంబై పోలీసులు అరెస్ట్ చేశారు. ఓ విదేశీ మహిళ బాంద్రా నుంచి వెర్సోవాకు క్యాబ్లో వెళ్తుండగా ఈ ఘటన జరిగింది. బుధవారం రాత్రి జరిగిన ఈ ఘటన ఆలస్యంగా వెలుగులోకి వచ్చింది వేదింపులకు పాల్పడిన డ్రైవర్ను షాబాజ్ షేక్(32) గా గుర్తించారు.
బాధితురాలి మిత్రురాలు ఫేస్బుక్లో వెల్లడించిన వివరాల ప్రకారం.. మహిళను క్యాబ్ డ్రైవర్ షాబాజ్ ఆమెను ముందు సీట్లో కూర్చోమని కోరాడు. దానికి నిరాకరించిన ఆ మహిళ వెనుక సీట్లో కూర్చోగా.. సీట్ను క్లీన్ చేయాలనే వంకతో షాబాజ్ ఆమె సమీపంలోకి వెళ్లి అసభ్యంగా ప్రవర్తించాడు. దీంతో సదరు మహిళ వెంటనే కేకలు వేస్తూ క్యాబ్ దిగి వెళ్లిపోయింది. అనంతరం శాంతాక్రజ్ పోలీసులకు ఫిర్యాదు చేసింది. కాగా.. షాబాజ్ను విధుల నుంచి తొలగిస్తున్నట్లు ఉబెర్ ప్రకటించింది. ఇలాంటి ఘటనలపై కఠినంగా వ్యవహరిస్తామని వెల్లడించింది.
