ఏసీబీ దాడిలో పట్టుబడ్డ ఎస్సై

మేడ్చల్ (రంగారెడ్డి) : యాక్సిడెంట్ జరిగి పోలీస్ స్టేషన్లో ఉన్న కారును తిరిగి ఇచ్చేందుకు లంచం అడిగిన పోలీస్ ఆఫీసర్‌ను ఏసీబీ అధికారులు అదుపులోకి తీసుకున్నారు. ఈ సంఘటన రంగారెడ్డి జిల్లా మేడ్చల్ పోలీస్ స్టేషన్లో గురువారం సాయంత్రం జరిగింది. వివరాల్లోకి వెళ్తే.. ఆదిలాబాద్‌కు చెందిన అబ్దుల్ రజాక్ కారు జూన్ 4వ తేదీన మేడ్చల్ పరిధిలో యాక్సిడెంట్కు గురైంది.

అప్పటినుంచి ఆ కారు పోలీస్ స్టేషన్లోనే ఉంది. అది తిరిగి ఇవ్వడానికి మేడ్చల్ ఎస్సై రాములు రూ.10 వేలు లంచం డిమాండ్ చేశాడు. దీంతో రజాక్ ఏసీబీ అధికారులను ఆశ్రయించాడు. రంగంలోకి దిగిన ఏసీబీ అధికారులు ఎస్సై లంచం తీసుకుంటుండగా రెడ్ హ్యాండెడ్‌గా పట్టుకున్నారు.