లేని పోస్టులోకి సీనియర్‌ ఐపీఎస్‌ బదిలీ!

సాక్షి, హైదరాబాద్‌: రాష్ట్రంలో ఇటీవలి ఐపీఎస్‌ల బదిలీల్లో జరిగిన ఓ పరిణామం తాజాగా వెలుగులోకి వచ్చింది. రోడ్‌ సేఫ్టీ, రైల్వే డీజీగా పనిచేస్తున్న సీనియర్‌ ఐపీఎస్‌ కృష్ణప్రసాద్‌ను రోడ్‌ సేఫ్టీ అథారిటీ డీజీగా నియమిస్తూ ప్రభుత్వం ఉత్తర్వులు వెలువరించింది. రాష్ట్రంలో ఈ పోస్టు ఇప్పటివరకు లేదని సాధారణ పరిపాలన విభాగం (జీఏడీ) అధికారులు తెలిపారు. ఉమ్మడి రాష్ట్రంలో ఆ పోస్టు ఉండేదని, అది కూడా ఏపీకి అలాట్‌ అయ్యిందన్నారు. లేని పోస్టులోకి సీనియర్‌ అధికారిని నియమించడంపై ఐపీఎస్‌ వర్గాల్లో చర్చ జరుగుతోంది. జీఏడీ కింద పనిచేసే దీనికి ఉమ్మడి రాష్ట్రంలో సచివాలయంలోనే కార్యాలయం ఉండేది.

ప్రస్తుతం రాష్ట్ర ప్రభుత్వంలో ఈ పోస్టు, ఆఫీస్‌ లేకపోవడంతో డీజీ కృష్ణప్రసాద్‌ తన పాత చాంబర్‌లోనే కొనసాగుతున్నారు. మరోవైపు కృష్ణప్రసాద్‌ స్థానంలో అదనపు డీజీపీ సందీప్‌ శాండిల్యను ప్రభుత్వం   నియమించింది. అయితే కృష్ణప్రసాద్‌కు పోస్టు, ఆఫీస్‌ కేటాయిస్తేగానీ సందీప్‌ శాండిల్య జాయిన్‌ అయ్యే పరిస్థితి కనిపించడం లేదు.