TV
తెలంగాణ గుండెల్లో వైఎస్ఆర్: షర్మిల
హైదరాబాద్ : తెలంగాణ ప్రజలకు మేలు చేసినవారిలో వైఎస్ రాజశేఖరరెడ్డిని మించిన నాయకుడు లేరని వైఎస్ షర్మిల అన్నారు. తెలంగాణ వైఎస్ఆర్ సీపీ విస్తృతస్థాయి సమావేశంలోఆమె బుధవారం మాట్లాడుతూ వైఎస్ఆర్ను మించిన నాయకుడు తెలంగాణలో లేరన్నారు. ముఖ్యమంత్రిగా ప్రమాణ స్వీకారం చేసిన వెంటనే వైఎస్ఆర్ ...ఉచిత విద్యుత్ ఫైలుపై తొలి సంతకం పెట్టిన విషయాన్ని ఈ సందర్భంగా షర్మిల గుర్తు చేశారు. తెలంగాణలో 17 లక్షల పంపుసెట్లకు ఉచిత విద్యుత్ అందించారన్నారు.
ఆ ఒక్క పథకమే కాదని, ఇంకా చాలా పథకాలను ఆయన ప్రవేశపెట్టారని వైఎస్ షర్మిల తెలిపారు. తెలంగాణ ప్రాంత ప్రజల్లో తమకు అన్యాయం జరుగుతోందన్న బాధ ఉందని, దాన్ని తొలగించాలనే ఆలోచన చేశారన్నారు. తెలంగాణ ప్రజలకు నేనున్నాను అని వైఎస్ఆర్ భరోసా ఇచ్చారని వైఎస్ షర్మిల అన్నారు. వైఎస్ఆర్ చనిపోయినప్పుడు వేలాది గుండెలు ఆగిపోయాయని, చనిపోయిన వారిలో ఎక్కువమంది తెలంగాణవారే ఉన్నారని ఆమె తెలిపారు. వైఎస్ఆర్ చనిపోయినా తెలంగాణ ప్రజల గుండెల్లో ఆయన నిలిచిపోయారని షర్మిల అన్నారు. వైఎస్ జగన్ నాయకత్వంలో పనిచేస్తూ వైఎస్ఆర్ ఆశయాలను సాధిద్దామని షర్మిల అన్నారు.
