రిలయన్స్‌పై రూ. 5 వేల కోట్ల వడ్డింపు!

న్యూఢిల్లీ: రిలయన్స్ ఇండస్ట్రీస్(ఆర్‌ఐఎల్)పై మరో భారీ జరిమానా వడ్డనకు కేంద్రం రంగం సిద్ధం చేస్తోంది.  కేజీ-డీ6 క్షేత్రాల్లో ముందుగా చెప్పినదానికంటే 2012-13లో చాలా తక్కువ గ్యాస్‌ను ఉత్పత్తిచేసినందుకుగాను... 78.1 కోట్ల డాలర్ల(దాదాపు రూ.5 వేల కోట్లు) అదనపు జరిమానా విధించాలని నియంత్రణ సంస్థ డెరైక్టరేట్ జనరల్ ఆఫ్ హైడ్రోకార్బన్స్(డీజీహెచ్) తేల్చిచెప్పిన సంగతి తెలిసిందే. దీనిపై న్యాయ మంత్రిత్వ శాఖ సలహా కోరినట్లు చమురు శాఖ కార్యదర్శి వివేక్ రే గురువారం ఇక్కడ విలేకరులతో చెప్పారు. ‘2010-11, 2011-12 ఆర్థిక సంవత్సరాల్లో కూడా గ్యాస్ ఉత్పత్తి తగ్గిపోయినందుకుగాను ఆర్‌ఐఎల్‌కు 100.5 కోట్ల డాలర్ల(సుమారు రూ.6,500 కోట్లు) జరిమానా విధిస్తూ చమురు శాఖ నోటీసు జారీచేసింది. అయితే, ముకేశ్ అంబానీ సారథ్యంలోని రిలయన్స్ ఆర్బిట్రేషన్(మధ్యవర్తిత్వం) చర్యలు చేపట్టడం జరిగాయి. తాజా కేసులో అదనపు జరిమానా విధించాలని డీజీహెచ్ జూలైలో చేసిన సూచనలపై ఏ విధంగా చర్యలు తీసుకోవాలన్న దానిపైనే న్యాయ సలహా కోరాం’ అని వివేక్ వెల్లడించారు.