సాక్షి, అమరావతి:  దేశవ్యాప్తంగా ‘అటల్‌ టింకరింగ్‌ ల్యాబ్స్‌ (ఏటీఎల్‌)’ సద్వినియోగం చేసు­కోవడంలో ఆంధ్రప్రదేశ్‌ ముందంజలో ఉందని యునిసెఫ్, టీసీఎస్‌ ప్రతినిధులు ప్రశంసించారు. శుక్రవారం న్యూఢిల్లీ, హైదరాబాద్‌ నుంచి వచ్చిన యునిసెఫ్, టీసీఎస్‌ ప్రతినిధులు ఎన్టీఆర్‌ జిల్లాలో మొవ్వ, పెనమలూరులోని జిల్లా పరిషత్‌ ఉన్నత పాఠశాలలను సందర్శించారు. దీన్లోభాగంగా అటల్‌ టింకరింగ్‌ ల్యా­బ్స్, హబ్, స్పోక్స్‌ మోడల్‌తో పాటు ప్రభుత్వం అమలు చేసిన స్టెమ్‌ ఆధారిత కార్యక్రమాలను పరిశీలించి సంతృప్తి వ్యక్తం చేశారు. అనంతరం విజయవాడలో పాఠశాల విద్య కమిషనర్‌ ఎస్‌.సురేశ్‌ కుమార్‌తో భేటీ అయ్యారు. ఈ సందర్భంగా కమిషనర్‌ మాట్లాడుతూ.. రాష్ట్రవ్యాప్తంగా 713 అటల్‌ టింకరింగ్‌ ల్యాబ్‌లను హబ్, స్పోక్‌ మోడల్‌గా రూపొందించామన్నారు. విద్యా­ర్థులను సాంకేతికత విజ్ఞానం వైపు ప్రోత్సహించడానికి ‘సంకల్పం’ ప్రాజెక్ట్‌ను అమ­లు చేస్తున్నామన్నారు. అటల్‌ టింకరింగ్‌ మారథాన్, సీడ్‌ ది ఫ్యూచర్, సైన్స్‌ ఫెయిర్, ఇన్‌స్పైర్‌ తదితర పోటీల్లో విద్యార్థులు అద్భుత ప్రతిభ చూపుతున్నారన్నారు. ఇలాంటి సమయంలో అటల్‌ టింకరింగ్‌ ల్యాబ్స్‌ పనితీరుపై యునిసెఫ్‌ డాక్యుమెంటరీ రూపొందించడం సంతోషంగా ఉందన్నారు. ఈ కార్యక్రమంలో న్యూఢిల్లీ నుంచి వచ్చిన యునిసెఫ్‌ ప్రతినిధు­లు అరేలియా ఆర్డిటో (చీఫ్‌ ఆఫ్‌ ఎడ్యుకేషన్‌), ప్రమీల (విద్యా నిపుణురాలు), హైదరాబా­దు నుంచి శేషగిరి మధుసూదన్‌ (విద్యా నిపుణులు), శిఖా రాణా (విద్యాధికారి), టీసీఎస్‌ నుంచి విమల్, విపుల్, శ్రీనివాస్‌ విశ్వ­నాథ, ఏపీ యునిసెఫ్‌ కన్సల్టెంట్‌ టి.సుదర్శన్, రాష్ట్ర నోడల్‌ అధికారి డా.జిఆర్‌ భాగ్యశ్రీ, సమ­గ్ర శిక్ష ఎస్పీడీ బి.శ్రీనివాసరావు, ఎస్సీఈఆర్టీ డైరెక్టర్‌ డాక్టర్‌ బి.ప్రతాప్‌ రెడ్డి తదితరులున్నారు. 


 న్యూఢిల్లీ: యువ ఆవిష్కర్తలను ప్రోత్సాహించేందుకు నీతి ఆయోగ్ దేశంలో 10 అటల్ టింకరింగ్ ప్రయోగశాల(ఏటీఎల్)లను ఏర్పాటు చేయడానికి ఆమోదం తెలిపింది. దీని కోసం ప్రముఖ టెక్నాలజీ సంస్థ ఇంటెల్‌తో రెండేళ్ల ఒప్పదం కుదుర్చుకుంది. కేంద్ర ప్రభుత్వం ప్రతిష్టాత్మకంగా చేపట్టిన అటల్ ఇన్నోవేషన్ మిషన్(ఎఐఎం)లో భాగంగానే వీటిని ఏర్పాటు చేయనుంది.
 
 ముఖ్యంగా 12-18 ఏళ్ల వయస్సున్న విద్యార్థుల్లో కొత్త ఆవిష్కరణలకు ఉపయోగపడే గణన ఆలోచన, సంయోజిత అభ్యాసం వంటి నైపుణ్యాలను అభివృద్ధి చేయడమే దీని(ల్యాబ్‌ల ఏర్పాటు) లక్ష్యం. అందుకోసం ప్రభుత్వం సుమారు రూ.100 కోట్లను వెచ్చించి ఐదేళ్లలో దేశమంతటా 500 ఏటీఎల్ స్కూళ్లను ఏర్పాటు చేయనుంది.
 
 నూతన ఆవిష్కరణలకు కావాల్సిన వస్తువులు, పరికరాలను ఇక్కడ అందుబాటులో ఉంచనున్నారు. విద్యార్థుల్లో ఒకరి నుంచి మరొకరికి జ్ఞానమార్పిడి జరగడానికి ఈ ఏటీఎల్ కేంద్రాలు ఉపయోగపడతాయని నీతి ఆయోగ్ సీఈఓ అమితాభ్ కాంత్ అభిప్రాయపడ్డారు.