ఏటీఎంలలో ఉంచేందుకు బ్యాంకులకు నగదు కొరత
  ఆర్‌బీఐ నుంచి తగ్గిన నగదు విడుదల
  కాల్‌మనీ ఘటనా ఓ కారణం!
  సొమ్ము డ్రా చేసుకునేందకు ఖాతాదారుల అవస్థలు
  
  తాడేపల్లిగూడెం : ఏటీఎంలకు  వాడుకలో ఉన్న పేరు ఎనీ టైం మనీ అని. వాస్తవానికి ఏటీఎం అంటే ఆటోమేటిక్ టెల్లర్ మెషీన్. ప్రస్తుతం ఏటీఎంల పరిస్థితి ఎనీ టైం మూత అన్న విధంగా ఉంది. ఆర్థిక సంవత్సరం ముగింపు కావటంతో రిజర్వ్ బ్యాంక్ నుంచి ఈ త్రైమాసకానికి(జనవరి నుంచి మార్చి వరకు)  బ్యాంకులకు విడుదల చేసే నగదుపై నియంత్రణ విధించారు. ఫలితంగా బ్యాంకుల్లో లిక్విడ్ క్యాష్ నిల్వలు తగ్గాయి. ఆ ప్రభావం ఏటీఎంలపై పడింది. ఆయా బ్యాంకులు రోజు వారీ లావాదేవీలకు అనుగుణంగా ఏటీఏంలలో నగదును ఉంచుతాయి.
  
   బ్యాంకులకు వరుసగా సెలవులు ఉన్నట్టయితే ఏటీఎంలనుంచి నగదు విత్ డ్రా చేసుకునేవారికి అసౌకర్యం కలగకుండా ముందు పనిదినాన ఎక్కువ సొమ్మును ఏటీఎంలలో ఉంచుతారు. సుమారు 15 రోజులుగా చాలా ఏటీఎంలలో సంబంధిత బ్యాంకులు నగదు పెట్టలేక వాటికి  తాళాలు వేసి ఉంచుతున్నాయి. జిల్లాలో సుమారు 440 బ్యాంకు శాఖల ద్వారా రోజుకు వెయ్యి కోట్ల రూపాయల వరకు నగదు లావాదేవీలు జరుగుతున్నట్టు అంచనా. సంబంధిత బ్యాంకు బ్రాంచి ఉన్న పట్టణాలు అయితే ఆ బ్యాంకుకు చెందిన ఒకటి నుంచి నాలుగు వరకు ఏటీఎంలు ఉంటున్నాయి. బ్యాంకు బ్రాంచిలు లేని గ్రామాలు, పట్టణాల్లో కూడా ఏటీఎంలు ఉన్నాయి. ఇప్పుడు గ్రామాల్లో కూడా ఆర్థిక లావాదే వీలకు ఏటీఎంలపై ఆధారపడటం ఎక్కువైంది. ఎవ్వరికైనా సొమ్ములు ఇవ్వాలంటే ఏటీఎం దగ్గరకు రా.. డ్రా చేసి ఇస్తాను అనే పరిస్థితి ఉంది.  
  
  ఆర్‌బీఐ నుంచి తగ్గిన నగదు కేటాయింపులు
  ప్రస్తుత ఆర్థిక సంవత్సరంలో బ్యాంకుల లావాదేవీలకు నుగుణంగా రిజర్వుబ్యాంకు నుంచి నగదును సంబంధిత బ్యాంకులకు కేటాయిస్తారని  బ్యాంకు అధికారులు తెలిపారు. ఆర్థిక సంవత్సరాంతం వచ్చే సరికి ఈ కేటాయింపులను రిజర్వు బ్యాంకు నియంత్రిస్తుంది. దీంతో ఆర్థిక సంవత్సరంలో చివరి నెల అయిన మార్చిలో బ్యాంకులకు నగదు కేటాయింపులు గణనీయంగా తగ్గాయి. దీంతో అన్ని ఏటీఎంలలో సొమ్ములు ఉంచలేని పరిస్థితి  కొన్ని రోజులుగా జిల్లాలో ఏర్పడింది. ఈ కారణంగా కొన్ని  ఏటీఎంలను చాలా రోజలపాటు మూసేస్తున్నారు కూడా.
  


 విజయవాడ సిటీ :నగరంలోని ఏటీఎం (ఆటోమేటిక్ టెల్లర్ మెషీన్) కౌంటర్లలో బ్యాటరీలు దొంగిలిస్తున్న ముగ్గురిని సెంట్రల్ క్రైంస్టేషన్ (సీసీఎస్) పోలీసులు బుధవారం అరెస్టు చేశారు. వారి నుంచి రూ.2.37 లక్షల విలువైన 66 బ్యాటరీలను స్వాధీనం చేసుకున్నారు. అరెస్టయిన వారిలో నగరానికి చెందిన కాళ్ల సుబ్రహ్మణ్యం, షేక్ అహ్మద్ ఆలీ, షేక్ మహ్మద్ వలీ ఉన్నారని సీసీఎస్ పోలీసులు తెలిపారు.
  
  జరిగిందిలా..
  మొదటి నిందితుడైన సుబ్రహ్మణ్యం వృత్తిరీత్యా ఎలక్ట్రీషియన్. కొంతకాలం పాటు ఏటీఎంలకు ఎలక్ట్రీషియన్‌గా పని చేశాడు. వ్యసనాలకు లోనై సంపాదించిన సొమ్ము జల్సాలకు చాలక పోవడంతో దొంగతనాలు చేయాలని నిర్ణయించుకున్నాడు. ఏటీఎంలలో బ్యాటరీలను దొంగిలించి అమ్మగా వచ్చిన సొమ్ముతో జల్సాలు చేశాడు. ఆ తర్వాత తన స్నేహితులైన షేక్ అహ్మద్ ఆలీ, షేక్ అహ్మద్ వలీతో కలిసి బ్యాటరీల చోరీ ప్రారంభించాడు. మూడు నెలల వ్యవధిలో నగరంలోని మాచవరం, సత్యనారాయణపురం, పటమట, పెనమలూరు, సూర్యారావుపేట, అజిత్‌సింగ్‌నగర్, కృష్ణలంక పోలీసు స్టేషన్ల పరిధిలో పలు ఏటీఎంలలో బ్యాటరీలు దొంగిలించారు. పశ్చిమగోదావరి జిల్లా నిడదవోలు, తాడేపల్లిగూడెం, పెంటపాడు, తూర్పుగోదావరి జిల్లా ధవళేశ్వరంప్రాంతాల్లో వీరు చోరీలకు పాల్పడ్డారు. మొత్తం 66 బ్యాటరీలు చోరీ చేశారు.
  
  ఇలా
  ఏటీఎంలలో వరుసగా బ్యాటరీలు అపహరణకు గురవుతుండడంపై సీసీఎస్ పోలీసులు దృష్టి సారించారు. ఏసీపీ (క్రైం) గుణ్ణం రామకృష్ణ పర్యవేక్షణలో ఎస్సై వి.అప్పారావు సిబ్బందితో కలిసి పలు ప్రాంతాల్లో నిఘా ముమ్మరం చేశారు. సూర్యారావుపేటలోని చెరుకుపల్లి వారి వీధిలో అనుమానాస్పదంగా సంచరిస్తున్న సుబ్రహ్మణ్యం ముఠాను అదుపులోకి తీసుకుని విచారణ చేయగా, నేరాలు అంగీకరించారు. వారిని అరెస్టు చేసి, సొత్తు స్వాధీనం చేసుకున్నారు.