బెంగళూరు: ప్రీమియర్‌ బ్యాడ్మింటన్‌ లీగ్‌ (పీబీఎల్‌) నాలుగో సీజన్‌లో బెంగళూరు రాప్టర్స్‌ ఫైనల్‌కు చేరింది. తొలి సెమీఫైనల్లో బెంగళూరు 4–2తో అవధ్‌ వారియర్స్‌ను ఓడించింది. సెమీస్‌లో తొలి మ్యాచ్‌ మిక్స్‌డ్‌ డబుల్స్‌ను అవధ్‌ ‘ట్రంప్‌’గా ఎంచుకుంది. మథియాస్‌ క్రిస్టియన్సెన్‌–అశ్విని పొన్పప్ప (అవధ్‌) జోడీ 15–7, 15–10తో మార్కస్‌ ఎలిస్‌–లారెన్‌ స్మిత్‌ జంటపై గెలుపొంది 2–0తో ముందంజ వేసింది. అయితే, పురుషుల తొలి సింగిల్స్‌లో సాయి ప్రణీత్‌ 15–9, 15–4తో లి డాంగ్‌ కుయెన్‌ను, రెండో సింగిల్స్‌లో శ్రీకాంత్‌ 15–7, 15–10తో సన్‌ వాన్‌ హోను ఓడించడంతో స్కోరు 2–2తో సమమైంది. తమ ‘ట్రంప్‌’ మ్యాచ్‌ పురుషుల డబుల్స్‌లో అహసాన్‌–సెటియవాన్‌ జంట 15–14, 15–9తో యాంగ్‌ లీ–క్రిస్టియన్సెన్‌ జోడీపై నెగ్గడంతో బెంగళూరు 4–2తో విజయాన్ని ఖాయం చేసుంది. నేడు జరిగే రెండో సెమీస్‌లో హైదరాబాద్‌ హంటర్స్‌తో ముంబై రాకెట్స్‌ తలపడుతుంది.     

బెంగళూరు: ప్రీమియర్‌ బ్యాడ్మింటన్‌ లీగ్‌ (పీబీఎల్‌– 4)లో అవధ్‌ వారియర్స్‌ సెమీఫైనల్లోకి ప్రవేశించింది. సోమవారం జరిగిన పోరులో వారియర్స్‌ 4–3తో చెన్నై స్మాషర్స్‌పై విజయం సాధించింది. పురుషుల డబుల్స్‌లో లీ యంగ్‌–క్రిస్టియన్సెన్‌ ద్వయం 15–8, 15–6తో క్రిస్‌ అడ్‌కాక్‌–సుమిత్‌ రెడ్డి (చెన్నై) జంటపై అలవోక విజయం సాధించింది. ఈ మ్యాచ్‌ అవధ్‌కు ‘ట్రంప్‌’ కావడంతో 2–0 ఆధిక్యంలోకి వెళ్లింది. పురుషుల సింగిల్స్‌ తొలి పోరులో లీ డాంగ్‌ క్యున్‌ (వారియర్స్‌) 15–7, 15–13తో వీ ఫెంగ్‌ చోంగ్‌ (చెన్నై)పై గెలుపొందగా, చెన్నైకి ‘ట్రంప్‌’ అయిన మహిళల సింగిల్స్‌లో సుంగ్‌ జీ హ్యున్‌ 15–13, 15–8తో బీవెన్‌ జాంగ్‌ (వారియర్స్‌)ను ఓడించింది. దీంతో అవధ్‌ ఆధిక్యం 3–2కు తగ్గింది. మిక్స్‌డ్‌ డబుల్స్‌లో క్రిస్‌ అడ్‌కాక్‌–గ్యాబ్రియెల్‌ అడ్‌కాక్‌ (చెన్నై)జోడీ 15–13, 9–15, 15–14తో క్రిస్టియన్సెన్‌–అశ్విని పొన్నప్ప (వారియర్స్‌) జంటపై నెగ్గడంతో స్కోరు 3–3తో సమమైంది. నిర్ణాయక పురుషుల సింగిల్స్‌ రెండో మ్యాచ్‌లో సన్‌ వాన్‌ హో (వారియర్స్‌) 15–6, 15–6తో రాజీవ్‌ ఉసెఫ్‌ (చెన్నై)పై గెలిచి అవధ్‌కు విజయాన్నందించాడు. ఇప్పటికే ముంబై రాకెట్స్, హైదరాబాద్‌ హంటర్స్‌ సెమీస్‌ బెర్తులు సాధించాయి. నేడు బెంగళూరు రాప్టర్స్‌తో ముంబై రాకెట్స్‌ తలపడుతుంది. 

అహ్మదాబాద్‌: ప్రీమియర్‌ బ్యాడ్మింటన్‌ లీగ్‌ (పీబీఎల్‌)లో అవధ్‌ వారియర్స్‌ 6–(–1)తో అహ్మదాబాద్‌ స్మాష్‌ మాస్టర్స్‌ను చిత్తుచేసింది. అవధ్‌ ‘ట్రంప్‌’ అయిన మహిళల సింగిల్స్‌లో బీవెన్‌ జాంగ్‌ 10–15, 15–11, 15–11తో కిర్‌స్టీ గిల్మోర్‌ (అహ్మదాబాద్‌)పై గెలుపొందగా, పురుషుల డబుల్స్‌లో లీ యంగ్‌–క్రిస్టియాన్సన్‌ (అవధ్‌) జంట 15–12, 10–15, 15–6తో నందగోపాల్‌–సాత్విక్‌ సాయిరాజ్‌ ద్వయంపై నెగ్గింది.పురుషుల సింగిల్స్‌లో సన్‌ వాన్‌ హో (అవధ్‌) 15–7, 8–15, 15–10తో అక్సెల్‌సన్‌ను ఓడించడంతో 4–0తో రెండు మ్యాచ్‌లు మిగిలుండగానే వారియర్స్‌ విజయం ఖాయమైంది. రెండో పురుషుల సింగిల్స్‌ను అహ్మదాబాద్‌ ‘ట్రంప్‌’గా ఎంచుకోగా... సౌరభ్‌ వర్మ 8–15, 12–15తో లీ డాంగ్‌ క్యున్‌ (అవధ్‌) చేతిలో చిత్తుగా ఓడాడు. చివరగా జరిగిన మిక్స్‌డ్‌ డబుల్స్‌లో సాత్విక్‌ సాయిరాజ్‌–సిక్కి రెడ్డి జోడీ 15–13, 10–15, 12–15తో క్రిస్టియాన్సన్‌–అశ్విని పొన్నప్ప జంట చేతిలో ఓడింది. నేడు జరిగే మ్యాచ్‌ల్లో ముంబై రాకెట్స్‌తో చెన్నై స్మాషర్స్, బెంగళూరు రాప్టర్స్‌తో నార్త్‌ ఈస్టర్న్‌ వారియర్స్‌ తలపడతాయి. 

ముంబై: ప్రీమియర్‌ బ్యాడ్మింటన్‌ లీగ్‌ (పీబీఎల్‌) నాలుగో సీజన్‌లో రసవత్తర పోరుకు పుణే సెవెన్‌ ఏసెస్, అవధ్‌ వారియర్స్‌ జట్లు తెరతీశాయి. విజేతగా నిలిచేందుకు ఇరు జట్లు ఆఖరి మ్యాచ్‌ దాకా పోరాడాల్సి వచ్చింది. చివరకు మిక్స్‌డ్‌ డబుల్స్‌ మ్యాచ్‌తో అవధ్‌ వారియర్స్‌ 4–3తో పుణేపై గెలిచింది. అవధ్‌ వారియర్స్‌ ‘ట్రంప్‌’ మ్యాచ్‌ అయిన పురుషుల సింగిల్స్‌లో ప్రపంచ ఐదో ర్యాంకర్‌ సన్‌ వాన్‌ హో 15–14, 15–7తో లెవెర్‌డెజ్‌ (పుణే)పై గెలుపొందాడు. దీంతో 2–0తో అవధ్‌ ఆధిక్యంలోకి రాగా, పురుషుల డబుల్స్‌లోనూ అవధ్‌ ద్వయం క్రిస్టియన్సెన్‌–లీ యంగ్‌ 15–12, 15–14తో మథియస్‌ బో–ఇవనోవ్‌ (పుణే) జంటను ఓడించింది. దీంతో 3–0తో వారియర్స్‌  విజయానికి దగ్గరైందనిపించింది. కానీ ఆ తర్వాతే అసలు ఆట మొదలైంది. రియో ఒలింపిక్స్‌ చాంపియన్‌ కరోలినా మారిన్‌ బరిలోకి దించిన పుణే... మహిళల సింగిల్స్‌ను ‘ట్రంప్‌’ మ్యాచ్‌గా ఎంచుకుంది. ఇందులో మాజీ ప్రపంచ నంబర్‌వన్‌ 15–13, 15–9తో బీవెన్‌ జాంగ్‌ (అవధ్‌)పై అలవోక విజయం సాధించింది. అవధ్‌ ఆధిక్యం 3–2కు తగ్గింది. రెండో పురుషుల సింగిల్స్‌లో లక్ష్య సేన్‌ (పుణే) 15–11, 15–8తో లీ డాంగ్‌ క్యున్‌ (అవధ్‌)కు షాకిచ్చాడు. దీంతో ఇరుజట్లు 3–3తో సమ ఉజ్జీగా నిలిచాయి. నిర్ణాయక మిక్స్‌డ్‌ డబుల్స్‌లో క్రిస్టియన్సెన్‌–అశ్విని పొన్నప్ప 15–8, 11–15, 15–12తో ఇవనోవ్‌–జాయెర్స్‌ఫెల్డ్‌ (పుణే) జంటపై గెలవడంతో అవ«ద్‌ వారియర్స్‌ బోణీ కొట్టింది.  నేటి నుంచి హైదరాబాద్‌లో...  హైదరాబాద్‌లో నేటి నుంచి వరుసగా నాలుగు రోజుల పాటు పీబీఎల్‌ మ్యాచ్‌లు జరుగనున్నాయి. గచ్చిబౌలిలోని ఇండోర్‌ స్టేడియంలో ఐదు మ్యాచ్‌లను నిర్వహిస్తారు. మంగళ, బుధ, గురువారాల్లో రోజుకో మ్యాచ్‌ (రాత్రి 7 గంటల నుంచి), శుక్రవారం రెండు మ్యాచ్‌లు (సాయంత్రం 4 నుంచి; రాత్రి 7 నుంచి) జరుగుతాయి. నేడు జరిగే తొలి మ్యాచ్‌లో చెన్నై స్మాషర్స్‌తో హైదరాబాద్‌ హంటర్స్‌ ఆడుతుంది. స్టార్‌ ప్లేయర్‌ సింధు ఇపుడు సొంత ప్రేక్షకుల మధ్య హైదరాబాద్‌ తరఫున బరిలోకి దిగడంతో ప్రేక్షకుల జేజేలతో స్టేడియం హోరెత్తనుంది. ఆసక్తిగలవారు గచ్చిబౌలి స్టేడియం వద్ద ఏర్పాటు చేసిన కౌంటర్‌లో లేదా ఆన్‌లైన్‌లో (https:// insider.in/badminton&in&hyderabad) టికెట్లు లభిస్తాయి.   డిసెంబర్‌ 25:    హైదరాబాద్‌(vs) చెన్నై  డిసెంబర్‌ 26:    ఢిల్లీ(vs)అహ్మదాబాద్‌  డిసెంబర్‌ 27:    నార్త్‌ ఈస్టర్న్‌(vs)ముంబై  డిసెంబర్‌ 28:    అహ్మదాబాద్‌(vs)బెంగళూరు  హైదరాబాద్‌(vs) అవధ్‌   

లక్నో: వరుసగా మూడు విజయాలు సాధించి జోరు మీదున్న అవధ్‌ వారియర్స్‌కు ప్రీమియర్‌ బ్యాడ్మింటన్‌ లీగ్‌ (పీబీఎల్‌)లో తొలి పరాజయం ఎదురైంది. ముంబై రాకెట్స్‌తో గురువారం జరిగిన మ్యాచ్‌లో అవధ్‌ వారియర్స్‌ 1–4తో ఓడిపోయింది. పురుషుల సింగిల్స్‌లో కిడాంబి శ్రీకాంత్‌ 15–13, 13–15, 15–4తో సన్‌ వాన్‌ హో (ముంబై)పై... మహిళల సింగిల్స్‌లో సైనా నెహ్వాల్‌ 8–15, 15–10, 15–13తో బీవెన్‌ జాంగ్‌ (ముంబై)పై గెలిచారు. అయితే మిక్స్‌డ్‌ డబుల్స్‌లో క్రిస్టినా పెడర్సన్‌–తాంగ్‌ చున్‌ మాన్‌ (అవధ్‌) జంట... మహిళల డబుల్స్‌లో హెండ్రా సెతియవన్‌–చిన్‌ చుంగ్‌ జోడీ... పురుషుల సింగిల్స్‌లో హర్షిత్‌ అగర్వాల్‌ ఓడిపోవడంతో అవధ్‌ వారియర్స్‌కు ఓటమి ఖాయమైంది.   

లక్నో: ప్రీమియర్‌ బ్యాడ్మింటన్‌ లీగ్‌ (పీబీఎల్‌)లో అవధ్‌ వారియర్స్‌ జట్టు వరుసగా రెండు పరాజయాల తర్వాత తమ ఖాతాలో మరో విజయాన్ని జమ చేసుకుంది. అహ్మదాబాద్‌ స్మాష్‌ మాస్టర్స్‌తో  జరిగిన మ్యాచ్‌లో అవధ్‌ 4–3తో గెలిచింది. మిక్స్‌డ్‌ డబుల్స్‌ తొలి మ్యాచ్‌లో క్రిస్టినా–తాంగ్‌ చున్‌ మాన్‌ 14–15, 15–12, 15–14తో కామిల్లా–లా చుక్‌ హిమ్‌ జంటపై గెలిచి అవధ్‌కు 1–0 ఆధిక్యం అందించారు. పురుషుల సింగిల్స్‌ ‘ట్రంప్‌’ మ్యాచ్‌లో కశ్యప్‌ 11–15, 15–13, 15–14తో సౌరభ్‌ వర్మను ఓడించడంతో అవధ్‌ ఆధిక్యం 3–0కు పెరిగింది. మూడో మ్యాచ్‌గా జరిగిన పురుషుల సింగిల్స్‌ మరో మ్యాచ్‌లో ప్రణయ్‌ 15–8, 15–11తో శ్రీకాంత్‌ను ఓడించడంతో అహ్మదాబాద్‌ ఖాతా లో తొలి పాయింట్‌ చేరింది. మహిళల సింగిల్స్‌ తమ ‘ట్రంప్‌’ మ్యాచ్‌లో తై జు యింగ్‌ 15–5, 15–14తో సైనాపై నెగ్గడంతో అహ్మదాబాద్‌ స్కోరును 3–3తో సమం చేసింది. నిర్ణాయక ఐదో మ్యాచ్‌గా జరిగిన పురుషుల డబుల్స్‌ మ్యాచ్‌లో సెతియవాన్‌–తాంగ్‌ చున్‌ మాన్‌ ద్వయం 15–14, 15–10తో నందగోపాల్‌–రెగినాల్డ్‌ (అహ్మదాబాద్‌) జంటను ఓడించి అవధ్‌కు 4–3తో విజయాన్ని ఖాయం చేసింది.  


 * తొలి మ్యాచ్‌లో అవధ్ వారియర్స్‌పై గెలుపు
 * సింగిల్స్‌లో గురుసాయిదత్, రుత్విక విజయం
 * గాయంతో బరిలోకి దిగని సైనా నెహ్వాల్
 * ప్రీమియర్ బ్యాడ్మింటన్ లీగ్
 ముంబై: సొంతగడ్డపై తొలి మ్యాచ్‌లోనే ముంబై రాకెట్స్ మెరిసింది. స్టార్ ఆటగాళ్లతో కూడిన అవధ్ వారియర్స్‌పై అద్భుత విజయం సాధించింది. ప్రీమియర్ బ్యాడ్మింటన్ లీగ్ (పీబీఎల్)లో శుభారంభం చేసింది. స్థానిక సర్దార్ పటేల్ స్టేడియంలో శనివారం జరిగిన తొలి లీగ్ మ్యాచ్‌లో ముంబై రాకెట్స్ జట్టు 2-1 పాయింట్ల తేడాతో అవధ్ వారియర్స్‌ను ఓడించింది.
 
 వరుసగా మూడు మ్యాచ్‌ల్లో నెగ్గిన ముంబై రాకెట్స్ విజయాన్ని ఖరారు చేసుకోగా... నామమాత్రమైన తర్వాతి రెండు మ్యాచ్‌ల్లో వారియర్స్ నెగ్గినా  ఫలితం లేకపోయింది. కొత్త నిబంధన ‘ట్రంప్ మ్యాచ్’ రెండు జట్లకు కలసి రాలేదు. అవధ్ వారియర్స్ తొలుత పురుషుల డబుల్స్ మ్యాచ్‌ను ‘ట్రంప్ మ్యాచ్’గా ఎంచుకొని ఓడిపోగా... ముంబై రాకెట్స్ రెండో పురుషుల సింగిల్స్ మ్యాచ్‌ను ‘ట్రంప్ మ్యాచ్’గా పేర్కొని ఓటమి పాలైంది. ఆదివారం జరిగే మ్యాచ్‌ల్లో బెంగళూరు టాప్‌గన్స్‌తో హైదరాబాద్ హంటర్స్; ముంబై రాకెట్స్‌తో చెన్నై స్మాషర్స్ తలపడతాయి.
  
 ఇద్దరు తెలుగు తేజాల మధ్య జరిగిన పురుషుల సింగిల్స్ తొలి మ్యాచ్‌లో ప్రపంచ 47వ ర్యాంకర్ గురుసాయిదత్ (ముంబై) 14-15, 15-10, 15-8తో ప్రపంచ 34వ ర్యాంకర్ సాయిప్రణీత్ (అవధ్ వారియర్స్)ను ఓడించాడు.  
  పురుషుల డబుల్స్ పోటీలో మథియాస్ బో-వ్లాదిమిర్ ఇవనోవ్ (ముంబై రాకెట్స్) ద్వయం 15-11, 15-11తో కాయ్ యున్-హెంద్రా గుణవాన్ (అవధ్ వారియర్స్) జంటపై గెలిచింది. మూడో మ్యాచ్‌గా జరిగిన మహిళల సింగిల్స్‌లో తెలుగు అమ్మాయి గద్దె రుత్విక శివాని (ముంబై) 15-13, 15-10తో మరో తెలుగు అమ్మాయి గుమ్మడి వృశాలి(వారియర్స్)ని ఓడించడంతో ముంబై విజయం ఖరారైంది.
 
 వాస్తవానికి ఈ మ్యాచ్‌లో వృశాలి బదులుగా సైనా నెహ్వాల్ ఆడాలి. అయితే గాయం కారణంగా సైనా తొలి లీగ్ మ్యాచ్‌కు దూరం కావడంతో ఆమె స్థానంలో వృశాలి బరిలోకి దిగింది. నాలుగో మ్యాచ్‌గా జరిగిన మరో పురుషుల సింగిల్స్ మ్యాచ్‌లో ప్రపంచ 33వ ర్యాంకర్ తనోంగ్‌సక్ సెన్‌సోమ్‌బున్‌సుక్ (అవధ్ వారియర్స్) 15-12, 14-15, 15-14తో ప్రపంచ 20వ ర్యాంకర్ హెచ్‌ఎస్ ప్రణయ్ (ముంబై రాకెట్స్)పై సంచలన విజయం సాధించడంతో అవధ్ వారియర్స్ ఖాతాలో తొలి విజయం చేరింది. చివరిదైన మిక్స్‌డ్ డబుల్స్ మ్యాచ్‌లో బోదిన్ ఇసారా-క్రిస్టినా (వారియర్స్) జంట 15-9, 14-15, 15-14తో కామిల్లా జుల్-ఇవనోవ్ (ముంబై) జోడీని ఓడించింది.
  
 వైభవంగా ఆరంభం
 కొత్త రూపుతో.. సరికొత్త ఆటతీరుతో అభిమానులను అలరించాలని చూస్తున్న ప్రీమియర్ బ్యాడ్మింటన్ లీగ్ (పీబీఎల్) శనివారం వైభవంగా ఆరంభమైంది. తారల నృత్యాలతో పాటు బాలీవుడ్ మధుర గీతాలతో ప్రారంభోత్సవ వేడుకలు అందరినీ ఆకట్టుకున్నాయి. ప్రపంచ టాప్ స్టార్స్ బ్యాడ్మింటన్ క్రీడాకారులతో పాటు బాలీవుడ్ ప్రముఖులు పాల్గొన్నారు. ముందుగా శ్రీలంక బ్యూటీ, హిందీ నటి జాక్వెలిన్ ఫెర్నాండెజ్ పలు హిట్ గీతాలకు స్టెప్పులేసి హుషారు తెచ్చింది.
 
 అనంతరం సంగీత ద్వయం సలీం, సులేమాన్ చక్‌దే ఇండియా, బాండ్ బాజా బరాత్ తదితర సినిమాల్లోని పాటలను మరోసారి ప్రేక్షకులకు వినిపించారు. వీరే స్వరపర్చిన పీబీఎల్ అధికారిక గీతం ‘హల్లా మచాదే’ను కూడా ఆలపించి అందరిలో ఉత్తేజాన్ని నింపారు. అయితే ఈ లీగ్ బ్రాండ్ అంబాసిడర్ అక్షయ్ కుమార్ తొలి రోజు హాజరుకాలేదు. రెండో రోజు ఆదివారం రానున్నట్టు నిర్వాహకులు తెలిపారు. ‘పీబీఎల్‌కు అందరికీ స్వాగతం పలుకుతున్నాను. ఫ్రాం చైజీలకు, యజమానులకు, మద్దతుదారులకు ఈసందర్భంగా కృతజ్ఞతలు తెలుపుకుంటున్నాను. అందరం కలిసి లీగ్‌ను సక్సెస్ చేయాలి’ అని పీబీఎల్ చైర్మన్ అఖిలేశ్ దాస్‌గుప్తా కోరారు.