న్యూఢిల్లీ: తొలగింపుకు గురైన ఓ ఐఏఎస్‌ అమెరికాలో ఓ యూనివర్సిటీ ప్రొఫెసర్‌గా చేరి, తిరిగి 17 ఏళ్ల తర్వాత భారత్‌ వచ్చి తనకు ఉద్యోగం ఇప్పించాలని ప్రధాని మోదీని కోరిన ఘటన ఇటీవల జరిగింది. 1984 బ్యాచ్‌కు చెందిన ఐఏఎస్‌ అధికారి రాజేష్‌ సింగ్‌ ఉత్తరప్రదేశ్‌లో పోస్టింగ్‌ అందుకున్నాడు. పీహెచ్‌డీ కోసం రెండేళ్లకాలానికి ప్రభుత్వ అనుమతితో 1996లో అమెరికా వెళ్లారు. తర్వాత భారత్‌కు రాలేదు. ఉత్తరాఖంఢ్‌లో ఆయనకు పోస్టింగ్‌ వచ్చింది. తర్వాత 2001 ఆగస్టు 12 వరకూ సెలవులు కోరుతూ దరఖాస్తు చేసుకోగా ప్రభుత్వం ఓకే చెప్పింది. మళ్లీ 2001 డిసెంబర్‌ 31 వరకూ సెలవులు పొడిగించుకున్నారు. మళ్లీ ఆరునెలలు కావాలంటూ దరఖాస్తు చేసుకోగా, ప్రభుత్వం తిరస్కరించింది. విధుల్లో చేరాలని యూపీ ప్రభుత్వం ఆదేశించింది. ఎంతకీ తిరిగి రాకపోవడంతో, చట్టం ప్రకారం  ఐదేళ్లకు మించి విధులకు దూరంగా ఉండటంతో విధుల నుంచి 2003లో తొలగించారు. తనను విధుల్లో చేర్చుకోవాలంటూ 2017లో మోదీకి ఆయన లేఖ రాశారు. మోదీ దాన్ని తిరస్కరించడంతో, సెంట్రల్‌ అడ్మినిస్ట్రేటివ్‌ ట్రిబ్యునల్‌ను ఆశ్రయించారు. అక్కడా తిరస్కరణే ఎదురైంది. కొద్ది రోజుల పాటు సెలవులు పెడితేనే వివరణ ఇచ్చుకోవాల్సి ఉంటుందని, అలాంటిది సంవత్సరాల తరబడి సెలవులు ఎలా పెడతారని ట్రిబ్యునల్‌ మొట్టికాయలు వేసింది.


 న్యూఢిల్లీ: విధులు సరిగా నిర్వర్తించని, అవినీతి ఆరోపణలున్న అఖిల భారత స్థాయి అధికారులను కేంద్ర ప్రభుత్వం ఉద్యోగాల నుంచి తొలగిస్తోంది. తాజాగా ఒక ఐఏఎస్, ఇద్దరు ఐపీఎస్‌ అధికారులను ఉద్యోగాల నుంచి తీసేసింది. 1991 బ్యాచ్‌ ఏజీఎంయూటీ (అరుణాచల్‌ ప్రదేశ్, గోవా, మిజోరాం, కేంద్ర పాలిత ప్రాంతాలు) కేడర్‌కు చెందిన ఐఏఎస్‌ అధికారి నరసింహను నియామకాల కేబినెట్‌ కమిటీ ఆమోదం తర్వాత బుధవారం తొలగించారు. ఇదే కేడర్‌కు చెందిన 1998 బ్యాచ్‌ ఐపీఎస్‌ అధికారి మయాంక్‌ చౌహాన్, 1992 బ్యాచ్‌ ఛత్తీస్‌గఢ్‌ కేడర్‌ అధికారి రాజ్‌కుమార్‌ దేవాంగన్‌లను కేంద్ర హోం శాఖ మంగళవారమే తొలగించింది.