సాక్షి, హైదరాబాద్‌: జీహెచ్‌ఎంసీలోని కోటిమందికి వివిధ రకాల సేవలందించాల్సిన బల్దియాలో ఉన్నతాధికారుల నిష్క్రియాపరత్వంతో గందరగోళ పరిస్థితులు నెలకొన్నాయి. డిప్యుటేషన్ల నుంచి వివిధ అంశాల్లో పట్టింపు లేకపోవడంతో కొందరు ఆడింది ఆటగా సాగుతోంది. డిప్యుటేషన్లు ముగిసినా బల్దియా నుంచి వెళ్లని వారితోపాటు.. ఎవరు ఎక్కడ ఏంచేసినా చెల్లుతుందనే  అభిప్రాయాలు నెలకొన్నాయి. బాధ్యతల వికేంద్రీకరణ పేరిట జోన్ల అధికారులకు పూర్తిస్థాయి అధికారాలివ్వడంతో  అధికార వికేంద్రీకరణ బదులు అవినీతి వికేంద్రీకరణ జరుగుతోంది. కఠిన చర్యలు లేకపోవడంతో మహిళలను వేధించేవారి ఆగడాలకు అడ్డేలేకుండాపోయింది. జాయింట్‌ కమిషనర్ల  పోస్టుల పేరిట కొందరిని ఖాళీగా కూర్చోబెట్టి జీతాలిస్తున్నారు. అయిదేళ్ల డిప్యుటేషన్‌ ముగిసినా మాతృశాఖకు వెళ్లకుండా.. పొడిగింపును కమిషనర్‌ అడ్డుకున్నా.. మరోమార్గంలో తిష్టవేసేందుకు కొందరు అధికారులు పావులు కదుపుతున్నారు. ఇలా.. చెబుతూపోతే.. ఇంకా ఎన్నో.. ఎన్నెన్నో..   కదలరు.. వదలరు.. ► ఇటీవల ఒకరి డిప్యుటేషన్‌ అయిదేళ్ల కాలం ముగిసిపోయింది. తిరిగి పొడిగింపునకు ప్రయత్నించారు. కమిషనర్‌ నిక్కచ్చిగానే ససేమిరా కాదన్నారు. కానీ.. మరో మార్గంలో జీహెచ్‌ఎంసీలోనే మరో విభాగం నుంచి సదరు అధికారి డిప్యుటేషన్‌ కోసం ఒక అడిషనల్‌ కమిషనర్, విభాగాధిపతి,  మరికొందరు ప్రయత్నాలు చేసి సఫలమయ్యారంటే ఏమనుకోవాలి? కాగల కార్యం గంధర్వులు తీర్చినట్లు.. సదరు పోస్టులో మరొకరిని అప్పటికే  ప్రభుత్వం నియమించడంతో ఆ అంకానికి తాత్కాలికంగా తెరపడినా.. ఏం జరగనుందో వేచి చూడాల్సిందే.  ► మరో విభాగంలోని ఓ అధికారి అయిదేళ్ల డిప్యుటేషన్‌ ముగిసినా ఇంకా కొనసాగుతున్నారు. పై పెచ్చు పొడిగింపు వచ్చిందని ప్రచారం చేసుకుంటున్నట్లు తెలిసింది. కేవలం దరఖాస్తు చేసుకున్నట్లు సమాచారం. సదరు ఫైల్‌ కదలదు. వీరు కదలరు. అయినా పట్టించుకున్నవారే లేరు.   సారు.. చాలా బిజీ..  ► ఇక దోమల విభాగం తీరే ప్రత్యేకం. ఫాగింగ్‌ మెషిన్లు, డ్రోన్లు,  ఇంటర్నెట్‌ ఆఫ్‌ థింగ్స్,  మస్కూట్స్‌ పేరిట జరుగుతున్న దోపిడీకి అంతేలేకుండాపోయింది. ఈ విభాగంలో ‘కలెక్షన్‌’ చేసి పెట్టేవారికి   రెండు జోన్ల బాధ్యతలు అప్పగిస్తుంటారనేది అంతా తెలిసిన విషయమే.   ► ఇక జోనల్‌స్థాయిలోని అధికారులు జోన్లను  తమ రాజ్యాలుగా భావిస్తున్నారనే ఆరోపణలున్నాయి. ప్రజలకు సేవ కోసం ప్రభుత్వం సదుపాయాలు కల్పిస్తే.. వారు ఎవరికీ ఫోన్లు ఎత్తరు. ‘సారు చాలా బిజీ’ అనే అర్థంలో స్వీయ సందేశంతో ఆటోమేటిక్‌ మెసేజ్‌లు మాత్రం వెళ్తాయి.   ►    ఇక వీరి పర్యవేక్షణలో పనిచేసే వారు సైతం తామూ తక్కువేమీ తీసిపోలేదన్నట్లు..డిప్యూటీ కమిషనర్లయినా, వైద్యాధికారులైనా, ఇంజినీర్లయినా, మరొకరయినా సరే  జోన్లు, సర్కిళ్లలో ఉండరు. ప్రజలెవరైనా తమ సమస్యల కోసం అక్కడకు వెళ్తే సీట్లలో ఉండరు.  ఫీల్డ్‌ అంటారు. లేకుంటే  హెడ్డాఫీసుకు వెళ్లారంటారు. కానీ ఎక్కడా ఉండరు. మరి ఎక్కడుంటారో తెలియదు. జోనల్‌ పెద్దసారుకు అనుకూలంగా ఉంటే చాలు.. ఎక్కడున్నా పనిచేసినట్లే. గదిలో కునుకు తీస్తున్నా బాగా పనిచేసినట్లే లెక్క. పైవారితో ‘లెక్క’ సరిగ్గా ఉంటే అంతా భేషే!  ► వికేంద్రీకరణ పేరిట అధికారాలతోపాటు  జీతాలు, బిల్లుల చెల్లింపులు, తదితరమైనవన్నీ జోన్లలోనే జరుగుతున్నాయి. పనుల తనిఖీలు, పర్యవేక్షణలు చేసే పెద్దసారుతో  సవ్యంగా ఉంటే చాలు. ప్రధాన కార్యాలయం అలంకార ప్రాయం. బల్దియా బాస్‌ నామ్‌కే వాస్తే అన్న అభిప్రాయం బలంగా నెలకొంది.   గోడు వెళ్లబోసుకున్న బాధితురాలు..  ►  కొంతకాలం క్రితం ఓ డిప్యూటీ కమిషనర్‌ మహిళలతో కలిసిన ఫొటోలు వైరల్‌ కావడంతో అతడికి స్థానచలనం కలిగించారు. డిప్యూటీ కమిషనర్‌ కాస్తా జాయింట్‌ కమిషనర్‌గా మారారు. అంతే తప్ప ఎలాంటి చర్యలు తీసుకోలేదు.   ►  ఓ స్టాటిస్టికల్‌ ఆఫీసర్‌.. మహిళా కంప్యూటర్‌ ఆపరేటర్‌ను వేధిస్తున్న విషయం తెలిసినా.. సంబంధిత విభాగం ఉన్నతాధికారులు పట్టించుకోలేదు. పైగా తప్పుచేసిన వారిని రక్షించే ప్రయత్నాలు చేశారనే ఆరోపణలు వెల్లువెత్తాయి. బాధితురాలు మేయర్‌ను కలిసి గోడు వెళ్లబోసుకుంటే కానీ  విషయం బయటకు రాలేదు.   ఏళ్లకేళ్లుగా పొడిగింపు..  ►  బల్దియాలోకి ఒకసారి వస్తే.. పాతుకుపోతారనే  ప్రచారం ఉంది. లక్ష డబుల్‌బెడ్రూం ఇళ్లు నిర్మిస్తున్నప్పుడు అవసరమని దాదాపు 250 మంది ఇంజినీర్లను ఔట్‌సోర్సింగ్‌పై తీసుకున్నారు. దాదాపు 90 శాతం పనులు పూర్తయ్యాయి. కేవలం పది శాతం పనుల కోసం మళ్లీ అంతమంది పొడిగింపు కోసం ప్రయత్నిస్తున్నారు. వారిలో చాలామంది బల్దియాలోని వారికి ఏదో రకంగా దగ్గరివారే. అందుకే పని చేయకున్నా, పని లేకున్నా జీతం వస్తోంది. అలా ఏళ్లకేళ్లు పొడిగింపునిస్తుంటారు.   ► కమిషనర్‌ స్వీయనిర్ణయాలు తీసుకోక, బల్దియాలో పాత కాపులైన ఒకరిద్దరు అధికారులు చెప్పిందే వేదమన్నట్లు నడుచుకుంటున్నారన్న ఆరోపణలున్నాయి. సచివాలయం స్థాయిలోని ఉన్నతాధికారులకు,  సంబంధిత మంత్రులకు వారు దగ్గరవడమే కారణమని బల్దియాలో గుసగుసలు వినిపిస్తున్నాయి.  

సాక్షి, ప్రొద్దుటూరు (కడప) : ఏపీ ఎస్పీడీసీఎల్‌ అధికారులు ప్రకటించిన జేఏఓల పదోన్నతుల్లో తనకు  అన్యాయం జరిగిందని వైఎస్సార్‌ జిల్లా ప్రొద్దుటూరు డివిజనల్‌ కార్యాలయంలో పనిచేస్తున్న దివ్యాంగుడు బి. సుధాకర్‌ ఆవేదన వ్యక్తం చేశారు. ఆయన ఆదివారం సాక్షి తో మాట్లాడారు. 2006లో రిక్రూట్‌మెంట్‌ ద్వారా 88 మార్కులతో  తాను విద్యుత్‌ సంస్థలో జూనియర్‌ అకౌంట్స్‌ ఆఫీసర్‌గా ఓపెన్‌ కేటగిరీలో ఉద్యోగం పొందానని పేర్కొన్నారు. ఈ నెల 21 తేదీన ఎస్పీడీసీఎల్‌ అధికారులు సర్కిల్‌ పరిధిలో పనిచేస్తున్న 12 మంది జేఏఓలకు అసిస్టెంట్‌ అకౌంట్స్‌ ఆఫీసర్లుగా (ఏఏఓ) పదోన్నతులు కల్పించారని తెలిపారు. జీఓఎంఎస్‌ నంబర్‌42, 2011 అక్టోబర్‌ 19 తో పాటు సుప్రీంకోర్టు జడ్జిమెంట్‌ సివిల్‌ అప్పీల్‌ నంబర్‌.9096 ఆఫ్‌ 2013 ప్రకారం దివ్యాంగుల కోటాలో తనకు పదోన్నతి కల్పించాల్సి ఉందన్నారు. అయితే అధికారులు ఇందుకు  భిన్నంగా తనకంటే తక్కువ మార్కులు పొందిన మరో అధికారికి పదోన్నతి కల్పించారన్నారు. రిక్రూట్‌ మెంట్‌లో 75 మార్కులు పొందిన అతనికి ఎస్సీ రిజర్వేషన్‌ ద్వారా ఉద్యోగం ఇచ్చిన అధికారులు ప్రస్తుతం అదే రోస్టరు ద్వారా పదోన్నతి కల్పించకుండా దివ్యాంగుల కోటాలో ఎలా పదోన్నతి కల్పిస్తారని ప్రశ్నించారు. పదోన్నతి గురించి దాదాపు రెండేళ్లుగా సీఎండీ కార్యాలయం చుట్టూ తిరుగుతున్నా ఎవరూ పట్టించుకోలేదన్నారు. ఇప్పటికైనా ఉన్నతాధికారులు విచారణ జరిపి తనకు న్యాయం చేయాలని కోరారు. 


 – ప్రజాప్రతినిధుల పంచన అక్రమార్కులు
 – అరకొర పనుల్లో కూడా నాణ్యతకు తిలోదకాలు
 – చర్యలు తీసుకోని ఉన్నతాధికారులు
 
 ఒక డీఈ రాయదుర్గానికి బదిలీపై వెళ్లారు. ఆ స్థానంలో డిప్యూటేషన్‌పై ఉన్న డీఈ నేటికి అక్కడే విధుల్లో కొనసాగుతున్నారు. శాఖ ఉన్నతాధికారులు డిప్యూటేషన్‌పై వెళ్లిన డీఈని తన స్థానానికి పంపకుండా చోద్యం చూస్తున్నారు. ఇక ఎస్‌ఈ పీఏగా విధులు నిర్వహించాల్సిన వ్యక్తి తాడిపత్రి, శింగనమల ప్రాంతాలకు డీఈగా వ్వవహరిస్తున్నారు. ఇది కేవలం ఏ ఇద్దరి, ముగ్గురి సమస్య కాదు...ఈ శాఖలో కాసులు కోసం ఎక్కడిదాకైనా వెళతారనడానికి ఇవే నిదర్శనం.
 
 అనంతపురం సిటీ : పంచాయతీరాజ్‌శాఖలో మళ్లీ డిప్యూటేషన్‌ల గోల మొదలైంది. స్వయానా ముఖ్యమంత్రి కుమారుడు నారా లోకేష్‌ ప్రాతినిధ్యం వహిస్తున్న శాఖ గాడితప్పుతోంది. అధికారులు ఇష్టారాజ్యంగా వ్యవహరిస్తున్నారు. నేతల పంచన చేరి అందిన కాడికి  దండుకుంటున్నారు. అక్రమ మార్గాల్లో జేబులు నింపుకునే ప్రయత్నాల్లో పడ్డారు. ‘అనంత’లో ఈ దోపిడీ తారస్థాయికి చేరింది. పాలకుల స్వార్థం, కొందరు అధికారుల కక్కుర్తి వెరసి నిర్మాణాల్లో నాణ్యతకు తిలోదకాలిచ్చేస్తున్నారు.  ప్రధానంగా ఉద్యోగుల్లో బలమైన సామాజిక వర్గానిదే ఇక్కడ పెత్తనం సాగుతోంది. సామాన్య ఉద్యోగులు నోరు మెదపలేని దయనీయ పరిస్థితులు నెలకొన్నాయి.
 
 నేతల పంచన అక్రమార్కులు
 ప్రజాప్రతినిధుల పంచన చేరి కొందరు ఉన్నతాధికారులపై ఒత్తిడి తెస్తూ కావాల్సిన చోటుకు డిప్యూటేషన్‌పై వెళ్లేందుకు తీవ్ర ప్రయత్నాలు చేస్తున్నారు.  ఈ క్రమంలో కింది స్థాయి సిబ్బంది మధ్య తీవ్ర విభేదాలు చోటు చేసుకుంటున్నాయి. ఎంతగా అంటే ఒకరినొకరు కొట్టుకునేందుకు వెనకాడని స్థాయికి దిగజారిపోయాయి. ఇదే అదనుగా భావించిన కొందరు జూనియర్, సీనియర్‌ అసిస్టెంట్‌లు కూడా డిప్యూటేషన్‌లపై వెళ్లాలని పట్టుబడుతుండటం గమనార్హం. ఉన్నతాధికారులు కూడా ఇలాంటి వారిపై చర్యలు తీసుకోవాల్సింది పోయి పట్టీపట్టనట్లు వ్యవహరిస్తున్నారు.  కొంతమంది అధికారులు నేతల పంచన చేరి పనుల్లో పర్సేంటేజీల శాతాన్ని ఎక్కువ మొత్తంలో పంచుకుతినేందుకు అలవాటుపడ్డారు. వీరు పనులు ఎక్కడ జరిగితే...అక్కడికి వాలి పోతారు. ఏ స్థానానికి వెళ్లాలన్నా స్థానిక నేతలను ప్రసన్నం చేసుకోవడమే వీరికి పెట్టుబడి. అనంతరం టెండర్లు వేయించడం మొదలు.. పనులను అతి తక్కువ ఖర్చులో ఎలా ముగించాలో కూడా వారే నేతలకు సూచిస్తారు. కాకపోతే వాటాల్లో తేడాలుంటాయి. తాజాగా ఈ డిప్యూటేషన్‌ల విషయంలో ఓ ప్రజాప్రతినిధి డీఈ స్థాయి అధికారిని కార్యాలయానికి వచ్చి మరీ బెదిరించారని తెలిసింది. తాను సూచించిన వారిని డిప్యూటేషన్‌ పంపకపోతే పరిణామాలు తీవ్రంగా ఉంటాయని హెచ్చరించినట్లు సమాచారం.
 
 నాణ్యతకు తిలోదకాలు
 ఈ శాఖ పరిధిలో జరుగుతున్న, జరిగిన రహదారుల నిర్మాణాల్లో అనేక అక్రమాలు జరిగినట్లు ఆరోపణలున్నాయి. ఏడాది క్రితం వేసిన రహదారులు కూడా గుంతలు పడి ప్రయాణానికి అసౌకర్యంగా మారాయి. కోట్లాది రూపాయల నిధులను ఇలా దుర్వినియోగం చేస్తూ పబ్బం గడుపుకునే సిబ్బంది పనితీరుపై ఉన్నతాధికారులు చర్యలు తీసుకోవడం లేదు. కలెక్టర్‌ స్థాయి అధికారులు ఈ శాఖవైపు దృష్టి సారించడం అరుదుగా ఉంటుంది. ఇక ఏసీబీ, విజిలెన్స్‌ అధికారుల పనితీరు కూడా ఈ శాఖపై పెద్దగా ప్రభావితం చేయడం లేదు. చాలా విషయాల్లో విజిలెన్స్‌ అధికారులను సైతం సర్దుబాటు చేసిన ఆరోపణలున్నాయి.
 
 కొసమెరుపు:
 డిప్యూటేషన్‌లను రద్దు చేయాలని తాజాగా రాష్ట్ర ప్రభుత్వం ఈ శాఖలకు స్పష్టమైన ఆదేశాలు జారీ చేసింది. ఈ ఆదేశాలు చేసి రెండు నెలలు కూడా గడవక ముందే మళ్లీ డిప్యూటేషన్‌ల గోల మొదలు కావడం కొసమెరుపు.


 – ఆర్‌డబ్ల్యూఎస్, పీఆర్‌లో నేతల పెత్తనం
 – అడుగులకు మడుగులొత్తే వారికే ప్రాధాన్యత
 – మానసిక ఒత్తిడితో ఆత్మహత్యకు పాల్పడుతున్న ఉద్యోగులు
 – పంచాయతీరాజ్‌ శాఖలో ఒకే జేఈ మూడు చోట్ల విధులు
 – ఆదాయం తెచ్చి పెడితే కోరిన చోటుకు డిప్యూటేషన్‌  
 
 అనంతపురం సిటీ : గ్రామీణ రక్షిత మంచినీటి విభాగం (ఆర్‌డబ్ల్యూఎస్‌), పంచాయతీరాజ్‌ (పీఆర్‌) శాఖలో అధికార పార్టీ నేతల పెత్తనం పెరిగిపోయింది. తమకు కావలసిన వారిని కోరుకున్న చోటుకు డిప్యూటేషన్‌పై పంపాల్సిందే. మాట వినకుంటే ఉన్నతస్థాయి అధికారులకైనా ప్రత్యక్ష నరకం చూపుతున్నారు. తాజాగా ఈ శాఖలోని ఓ ఉన్నతాధికారి తనకు అనుకూలంగా పనులు చేసి పెట్టలేదన్న కారణంగా ఓ ప్రజాప్రతినిధి నేరుగా కార్యాలయానికి వచ్చి తీవ్రస్థాయిలో మందలించినట్లు తెలిసింది. మానసిక ఒత్తిడికి గురై కొందరు అధికారులు, ఉద్యోగులు ఆత్మహత్య చేసుకుంటున్న ఘటనలూ లేకపోలేదు. జిల్లా  పరిషత్‌ సీఈఓ పర్యవేక్షణలో జరగాల్సిన డిప్యూటేషన్‌లను ఆయా శాఖల ఉన్నతాధికారులు తమ చేతుల్లోకి తీసుకుంటున్నారు. ఆదాయం తెచ్చిపెడితే కోరిన చోటుకు డిప్యూటేషన్‌ వేస్తున్నారనే ఆరోపణలు ఉన్నాయి. అత్యవసరమైతే తప్ప సీఈఓ స్థాయి అధికారి ఈ డిప్యూటేషన్‌లలో సిబ్బందిని విధులకు పంపరాదు. కానీ ఈ రెండు శాఖల్లో నిబంధనలు అమలు కావడం లేదు. ప్రధానంగా పంచాయతీరాజ్‌ శాఖలో లోపాయికారి ఒప్పందాలు చాలా ఎక్కువని ఉద్యోగులు వాపోతున్నారు.
 
 విధులక్కడ.. జీతమిక్కడ
 పంచాయతీరాజ్‌ శాఖలో ఐదేళ్లు పదవి కాలం పూర్తయిన వారికి తప్పని సరి బదిలీ ఉంటుంది. కాగా, ఉన్నతాధికారికి సన్నిహితంగా.. రాజకీయ నేతల అడుగులకు మడుగులు ఒత్తే వారికి కోరుకున్న చోటుకు పోస్టింగ్‌ ఇస్తున్నారన్న ఆరోపణలు ఉన్నాయి. తాడిపత్రిలో డీఈ అసలు స్థానాన్ని వదిలేసి రాయదుర్గంలో విధులు నిర్వహిస్తున్నారు. జీతం తీసుకుంటోంది మాత్రం తాడిపత్రిలోనే... ఇందులో మరో విశేషం ఏమిటంటే అనంతపురం ఎస్‌ఈ ఆఫీసులో విధులు నిర్వహించే అధికారిని తాడిపత్రికి డిప్యూటేషన్‌పై పంపారు.
 
 జేఈ ఒకరే.. విధులు మూడు చోట్ల
 గుత్తిలో విధులు నిర్వహించాల్సిన జేఈ మడకశిరతో పాటు కదిరిలో కూడా జేఈగా కొనసాగుతున్నారు. జీతం గుత్తిలోనే తీసుకుంటున్నారు. ఇదెలా సాధ్యమని తోటి ఉద్యోగులు మండి పడుతున్నారు. ఎవరు చేతులు తడిపితే వారికి ఉన్నతాధికారులు జీ హుజూర్‌ అంటున్నారని విమర్శిస్తున్నారు. కణేకల్‌ జేఈగా విధులు నిర్వహిస్తున్న వ్యక్తి పుట్లూరులో జీతం తీసుకుంటున్నారు. ఇక ధర్మవరంలో విధులు నిర్వహించాల్సిన వ్యక్తి పెద్దవడుగూరులో డిప్యూటేషన్‌పై కొనసాగుతున్నారు.  
 
 డిప్యూటేషన్ల విషయమై పంచాయతీరాజ్‌ ఎస్‌ఈ సుబ్బారావును వివరణ కోరగా.. తాను కొత్తగా వచ్చానని, ఎవరెవరు ఎక్కడెక్కడ విధులు నిర్వహిస్తున్నారనే వివరాలు పూర్తిగా తెలియదని చెప్పారు.
 
 రెండ్రోజుల క్రితం యథాస్థానాలకు పంపాం - ఆర్‌డబ్ల్యూఎస్‌ ఎస్‌ఈ, హరేరామ్‌నాయక్‌
 రెండు రోజుల క్రితం 28 మంది డిప్యూటేషన్‌లను రద్దు చేసి యథాస్థానాలకు పంపాం. మొదటి నుంచి పోస్టింగ్‌ ఎక్కడకు వస్తే అక్కడికే అధికారులను పంపాం. వారికున్న ఇబ్బందుల రీత్యా విధులకు వెళ్లలేని స్థితిలో ఉంటే సర్కిల్‌ కార్యాలయంలోనే అవకాశం కల్పించాం. మా వద్ద డిప్యూటేషన్‌పై వెళ్లిన వారు లేరు.