మా బాబు వయసు 12 ఏళ్లు. వాడు ఇంకా రాత్రిపూట నిద్రలో పక్కలోనే మూత్ర విసర్జన చేసుకుంటున్నాడు.  వాడి సమస్య కారణంగా తోటి పిల్లలతో కలిసి బయటకు  ఎక్కడికీ వెళ్లలేకపోతున్నాడు. ఫంక్షన్లకు కూడా అటెండ్‌ కాలేకపోతున్నాం. మా వాడి విషయంలో తగిన సలహా ఇవ్వండి. పిల్లలు రాత్రిపూట నిద్రలో మూత్రవిసర్జన చేసే సమస్యను వైద్యపరిభాషలో నాక్టర్నల్‌ అన్యురిసిస్‌ అంటారు. సాధారణంగా 95 శాతం మంది పిల్లల్లో ఐదారేళ్లు వచ్చేసరికి నిద్రలో మూత్రవిసర్జనపై నియంత్రణ (బ్లాడర్‌ కంట్రోల్‌) సాధిస్తారు. కానీ 4 శాతం మంది పిల్లల్లో ఇది కొద్దిగా ఆలస్యం కావచ్చు. చాలా కొద్దిమందిలో అంటే 1 శాతం మందిలో పెద్దయ్యాక కూడా నిద్రలో మూత్రవిసర్జనపై నియంత్రణ లేకపోవడం చూస్తుంటాం. అయితే ఇది అబ్బాయిల్లో ఎక్కువ. యాభైశాతం మందిలో ఇది కుటుంబంలో ఎవరికైనా ఉంటే వాళ్ల పిల్లల్లోనూ ఈ సమస్య కనిపిస్తుంది. ఇలాంటి సమస్య ఉన్న 20 శాతం మంది పిల్లల్లో సాధారణంగా యూరినరీ ట్రాక్‌ అబ్‌నార్మాలిటీస్‌ దీనికి కారణం కావచ్చు. ఇంకా నిద్రకు సంబంధించిన రుగ్మతలు (స్లీప్‌ డిజార్డర్స్‌), యాంటీ డైయూరెటిక్‌ హార్మోన్‌ (ఏడీహెచ్‌) లోపాలు, మానసికమైన కారణాలు , కొన్ని సందర్భాల్లో అడినాయిడ్స్‌ వల్ల నిద్ర సంబంధమైన సమస్యలు (స్లీప్‌ ఆప్నియా) వంటివి ఉన్నప్పుడు కూడా రాత్రివేళల్లో తెలియకుండానే మూత్రవిసర్జన చేస్తుంటారు. పిల్లల్లో ఈ సమస్య ఉంటే  మూత్రపరీక్షలతో పాటు హార్మోనల్‌ ఎస్సే చేయించడం అవసరం. వాటిని బట్టి ఇది హార్మోన్లకు సంబంధించిన సమస్యా, కాదా అని తెలుసుకోవచ్చు. ఇలాంటి పిల్లల విషయంలో తీసుకోవాల్సిన జాగ్రత్తలు... ►నిద్రలో మూత్రవిసర్జన చేసే పిల్లలను కించపరచడం, శిక్షించడం వంటివి అస్సలు చేయకూడదు. ►సాయంత్రం ఆరు గంటల తర్వాత ద్రవాహారం చాలా తక్కువగా ఇవ్వడం, నాలుగు దాటాక కెఫిన్, చక్కెర ఉన్న పదార్థాలు పూర్తిగా ఇవ్వకపోవడం అవసరం. ►పడుకునేముందు ఒకసారి మూత్రవిసర్జన చేయించడం, నిద్రపోయిన గంటలోపు లేపి మళ్లీ ఒకసారి మూత్రవిసర్జన చేయించాలి. చికిత్స : ఇటీవల అందుబాటులోకి వచ్చిన అలారం వంటి పరికరాలతో బ్లాడర్‌పై నియంత్రణ సాధించేలా ప్రాక్టీస్‌ చేయించాలి. దీంతోపాటు డెస్మోప్రెసిన్, ఇమెప్రమిన్‌ వంటి కొన్ని మందులు బాగా పనిచేస్తాయి. ►అలాంటి పిల్లలను కొన్ని స్ప్రేల సహాయంతో సామాజిక ఉత్సవాలకు నిర్భయంగా తీసుకెళ్లవచ్చు. అలాంటి చర్యల వల్ల పిల్లల్లో ఆత్మస్థైర్యం పెరుగుతుంది. ►ఈ సమస్యకు హార్మోన్‌లోపాలు కారణం అయితే  3–6 నెలలపాటు మందులు వాడటం వల్ల ఈ సమస్యను 50 శాతం మందిలో సమర్థంగా అదుపు చేయవచ్చు. ►సమస్య అదుపులోకి రాకపోతే పిల్లల డాక్టర్ల ఆధ్వర్యంలో చికిత్స చేయించాలి. డా. రమేశ్‌బాబు దాసరి సీనియర్‌ పీడియాట్రీషియన్, రోహన్‌ హాస్పిటల్స్, విజయనగర్‌ కాలనీ, హైదరాబాద్‌


 నా వయసు 62. గత ఐదేళ్ల నుంచి షుగర్, బీపీ వ్యాధులున్నా,  కంట్రోల్‌లోనే ఉంటున్నాయి. గత కొద్దికాలంగా మూత్రంలో మంట, ఎక్కువసార్లు మూత్రవిసర్జన చేయాల్సి రావడం జరుగుతోంది. ఉదయం లేవగానే మూత్రం వచ్చినట్లు ఉంటుందిగాని... మూత్రవిసర్జన కోసం చాలాసేపు పడుతోంది. ఇలా మూత్రం సరిగా రాకపోతే మంచిదికాదని, కిడ్నీ సమస్య రావచ్చని ఫ్రెండ్స్ చెప్పారు. దీనికితోడు నా కాళ్లకు వాపులు వచ్చాయి. దాంతో నాకు కిడ్నీ చెడిపోయిందేమోనని ఆందోళనగా ఉంటోంది. తగిన సలహా ఇవ్వగలరు.
  - ఎస్.కె.బి., చెన్నై
  
  వయసు పెరిగిన వాళ్లలో ముఖ్యంగా చలికాలంలో మూత్రం ఎక్కువసార్లు వస్తుంటుంది. మీరు చెబుతున్నట్లుగా ఇలా మూత్రం ఎక్కువగా వస్తూ, ధార సరిగా రాకపోవడం ప్రోస్టేట్‌గ్రంథి వాపును సూచిస్తోంది. అల్ట్రాసౌండ్ స్కానింగ్ పరీక్ష చేయించుకోండి. ఆ పరీక్ష ద్వారా మూత్రాశయ సామర్థ్యం, విసర్జన తర్వాత ఎంత మూత్రం మిగులుతోందన్న విషయాలను తెలుసుకోవాల్సి ఉంటుంది. అలాగే ప్రోస్టేట్ పరిమాణం కూడా తెలుసుకోవాల్సి ఉంటుంది.
 
 సాధారణంగా ప్రోస్టేట్ గ్రంథి పరిమాణం 20 గ్రాములు ఉంటుంది. ఒకవేళ ఆ పరిమాణం 40 గ్రాముల కంటే ఎక్కువగా ఉండి, విసర్జన తర్వాత మూత్రాశయంలో 50 ఎం.ఎల్. కంటే ఎక్కువగా మూత్రం మిగిలిపోతుంటే, అంత మంచి సూచన కాదు. అందుకే ఈ పరీక్షలు చేయించుకుని, డాక్టర్‌ను సంప్రదించండి. ఇక కిడ్నీ పనితీరు సరిగా ఉందో లేదో తెలుసుకోవడానికి క్రియాటినిన్, బ్లడ్ యూరియా అనే సాధారణ పరీక్షలు చేయించుకోండి. మీకు షుగర్ కూడా ఉందని చెబుతున్నారు.
 
 ఇలా షుగర్ ఉన్నవాళ్లలో పురుషాంగం చివరన ఉండే రంధ్రం మూసుకుపోవడం వల్ల కూడా మీరు చెబుతున్న లక్షణాలు కనిపించవచ్చు. అందుకే మీరు పై పరీక్షలు చేయించుకుని, యూరాలజిస్ట్‌ను కలవండి. మీ సమస్యను బట్టి చికిత్స చేయాల్సి ఉంటుంది. అయితే పైన పేర్కొన్న సమస్యలేమీ ఆందోళనకరమైనవి కావు. కాబట్టి నిర్భయంగా, నిశ్చింతగా ఉండండి.
  
  నా వయసు 25. రెండు నెలల క్రితం ఒక వేశ్యతో కలిశాను. ఆ తర్వాత మూత్రంలో విపరీతమైన మంట వచ్చింది. రెండు రోజుల క్రితం కుడి వృషణం బాగా వాచి, తీవ్రమైన నొప్పి వస్తోంది. అయితే జ్వరం, పురుషాంగం మీద కురుపులు వంటి లక్షణాలేమీ లేవు. నాకు ఎయిడ్స్ వచ్చే అవకాశం ఉందా? ఆందోళనగా ఉంది. తగిన సలహా చెప్పగలరు.
  -వి.వి.ఆర్., హైదరాబాద్
  
  యుక్తవయసులో ఉన్నవారు సెక్స్ కోరికలు తీర్చుకోవడానికి వేశ్యల వద్దకు వెళ్లడం ఎంతమాత్రమూ మంచిది కాదు. ఇలా వారి వద్దకు వెళ్తే చర్మవ్యాధులు మొదలుకొని, మూత్రంలో ఇన్ఫెక్షన్... శరీరంలోని ఏ భాగంలోనైనా ఇన్ఫెక్షన్ వరకు అనేక వ్యాధులు రావచ్చు. వీటినే ఎస్‌టీడీస్... (సెక్సువల్లీ ట్రాన్స్‌మిటింగ్ డిసీజెస్) అంటారు. మీరు చెప్పిన లక్షణాలను బట్టి మీకు మూత్రంలో ఇన్ఫెక్షన్ (యూరినరీ ట్రాక్ట్ ఇన్ఫెక్షన్) వచ్చి ఉంటుంది. అది ఒక్కోసారి వృషణాలకూ పాకవచ్చు. దాంతో ఇలాంటి లక్షణాలు కనిపించవచ్చు. అయితే మీరు చెబుతున్న లక్షణాలేవీ హెచ్‌ఐవీకి సూచన కాదు. అయినప్పటికీ మీరు ఒకసారి ఎస్‌టీడీస్‌లన్నింటి కోసం తగిన నిర్ధారణ పరీక్షలు చేయించుకోవడం అవసరం. కంప్లీట్ యూరిన్ ఎగ్జామినేషన్, యూరిన్ కల్చర్, హెచ్‌ఐవీ, హెపటైటిస్, వీడీఆర్‌ఎల్ వంటి పరీక్షలు చేయించుకోవాలి. వాటితోపాటు హెచ్‌ఐవీ లేదని రిపోర్టు వస్తేనే మీరు సురక్షితంగా ఉన్నారని భావించవచ్చు. ఎస్‌టీడీలను నివారించగలిగే కండోమ్ వంటి సురక్షితమైన విధానం పాటించకుండా సెక్స్ చేయడం మంచిది కాదు. అయితే కండోమ్ అన్నది ఎస్‌టీడీలను నివారించడానికి కాదు. మన సమాజంలో పెళ్లికి ముందు శారీరకంగా కలవడం అన్నది ఇతరత్రా అనేక సమస్యలకు దారితీయవచ్చు. పైన పేర్కొన్న అన్ని పరీక్షలూ చేయించుకుని, డాక్టర్‌ను కలిసి తగిన చికిత్స తీసుకోండి. మీ వయసు 25 అంటున్నారు కాబట్టి ఆర్థికంగా మీ కాళ్ల మీద మీరు నిలబడి, త్వరగా పెళ్లి చేసుకోండి.
  
  మా బాబుకు 12 ఏళ్లు. ఒకరోజు అకస్మాత్తుగా ఎడమవైపు వృషణంలో నొప్పి, వాపు వచ్చింది. డాక్టర్ దగ్గరికి వెళ్తే డాప్లర్ అల్ట్రాసౌండ్ స్క్రోటమ్ పరీక్ష చేశారు. వృషణం పూర్తిగా చెడిపోయింది, తీసివేయాలని చెప్పి అప్పటికప్పుడు ఆపరేషన్ చేసి తీసేశారు. ఇప్పుడు బాబుకు ఒకటే వృషణం ఉంది. మరి వాడు పెద్దయ్యాక సెక్స్ కోసం గాని, పిల్లలు పుట్టడానికి గాని ఏమైనా ఇబ్బంది ఉంటుందా?
  - జి.కె.ఎమ్., నెల్లూరు
  
  మీరు చెబుతున్న విషయాన్ని బట్టి మీ బాబుకు టెస్టిక్యులార్ టార్షన్ (వృషణం తిరగబడటం) జరిగి ఉండవచ్చు. ఇలా వృషణం తిరగబడితే ఆరుగంటల్లోపు ఆపరేషన్ చేయించుకుంటే, వృషణాన్ని కాపాడుకోవచ్చు. సమయం మించిపోతే మాత్రం దాన్ని తీసేయాల్సి ఉంటుంది. అందువల్ల చిన్నపిల్లల్లో అకస్మాత్తుగా వృషణం నొప్పి వస్తే, వెంటనే డాప్లర్ స్కాన్ చేయించి, యూరాలజిస్ట్‌ను కలవాలి. మీ బాబు విషయంలో ఒక వృషణం మాత్రమే ఉంది కాబట్టి అది కూడా మళ్లీ తిరగబడకుండా ఫిక్స్ (ఆర్కిడోపెక్సీ) చేయాల్సి ఉంటుంది. ఒక్క వృషణం ఉన్నా కూడా భవిష్యత్తులో సెక్స్ సామర్థ్యానికి ఎలాంటి సమస్యా ఉండదు. పిల్లలు పుట్టే అవకాశం నార్మల్‌గానే ఉంటుంది. కాబట్టి మీరు నిశ్చింతగా ఉండండి. అయితే మీ బాబు విషయంలో అతడి రెండోవృషణాన్ని ఫిక్స్ చేశారో లేదో తెలుసుకోవడం ముఖ్యం. ఒకసారి యూరాలజిస్ట్‌ను కలిసి, తగు సలహా, చికిత్స తీసుకోండి.
  
  డాక్టర్ వి.చంద్రమోహన్, యూరోసర్జన్, ఆండ్రాలజిస్ట్,
  ప్రీతి యూరాలజీ - కిడ్నీ హాస్పిటల్, కెపిహెచ్‌బి, హైదరాబాద్