కర్నూలు, ఆదోని: ఓ బాలికను కిడ్నాప్‌ చేయడంతోపాటు బలవంతంగా పెళ్లి చేసుకుని.. మూడు నెలల పాటు లైంగికంగా దాడి చేసిన ఘటన ఆలస్యంగా వెలుగులోకి వచ్చింది. కామాంధుడి బారి నుంచి  తప్పించుకున్న బాధితురాలు(15ఏళ్లు)  పోలీసులను ఆశ్రయించింది. విలేకరులతో తనకు జరిగిన అన్యాయాన్ని చెప్పుకొని విలపించింది. వివరాలు బాలిక మాటల్లోనే.. ‘‘ మాది ఎమ్మిగనూరు పట్టణం గాంధీనగర్‌.. మా అమ్మ 2015లో హెచ్‌ఐవీతో మృతి చెందింది. అమ్మ నుంచి నాకు కూడా వ్యాధి సోకింది. విషయం తెలియడంతో నాన్న ఎంతో కుమిలిపోయారు. ఏం చేయాలో దిక్కుతోచలేదు. ఆదోని స్వచ్ఛంద సంస్థ నిర్వాహకులు నాన్నను సంప్రదించి.. హెచ్‌ఐవీకి చికిత్స అందిస్తూ చదివిస్తామన్నారు. దీంతో నేను ఆదోని పట్టణంలోని ఓ పాఠశాలలో 8వ తరగతిలో చేరాను.  నాన్న ఆరోగ్యం దెబ్బతిన్న విషయం తెలిసి ఎమ్మిగనూరుకు వచ్చాను. మా వీధిలోనే ఉన్న శంకర్‌ అనే యువకుడు నన్ను ప్రేమిస్తున్నానంటూ వెంటపడ్డాడు. నాకు హెచ్‌ఐవీ ఉందని చెప్పినా వినలేదు. మూడు నెలల క్రితం రాత్రి 7.30గంటల సమయంలో నేను పాలప్యాకెట్టు కోసం బయటకు రాగానే  మధు, యువరాజ్‌తో వచ్చిన శంకర్‌ నన్ను సైకిల్‌మోటార్‌పై బలవంతంగా ఆదోనికి తీసుకొచ్చాడు. ఓ ఇంట్లో బంధించి బలవంతంగా పెళ్లిచేసుకున్నాడు. నాకు హెచ్‌ఐవీ ఉందని చెప్పినా వినలేదు. గురువారం ఇంట్లో ఎవరూ లేని సమయంలో పారిపోయి వచ్చి నాన్నకు కబురు పెట్టారు. నా జీవితాన్ని సర్వ నాశనం చేసిన శంకర్, మధు, యువరాజ్, బంధువు ఆంజనేయపై కఠిన చర్యలు తీసుకోవాలి’ అని బాలిక డిమాండ్‌ చేశారు. బాధిత బాలికను షీటీం పోలీసులు విచారించారు.  ఏం జరిగిందో విచారించి కేసు నమోదు చేస్తామని ఆదోని త్రీ టౌన్‌ సీఐ శ్రీరాములు తెలిపారు.  

సాక్షి, సిటీబ్యూరో: ఆరేళ్ల చిన్నారిని కబలించిన మృగాళ్ల  పైశాచికత్వం  బాల్యంపై వాలిన రాబందుల రెక్కల దుర్మార్గానికి పరాకాష్ట. ఎప్పుడు ఏ వీధిలో, ఏ రోడ్డుపైన  ఎక్కడ ఏ చిన్నారి బలవుతుందో  తెలియని దుస్థితి. పిల్లల సంరక్షణ తల్లిదండ్రులు, సమాజానికి సవాల్‌గా మారింది. అల్వాల్‌ పోలీస్‌స్టేషన్‌ పరిధిలో గురువారం చోటుచేసుకున్న ఉదంతం  యావత్‌ సమాజాన్ని  కదిలించింది. మెరుపు మెరిసినా, వాన కురిసినా, ఆకాశంలో హరివిల్లులు విరిసినా తమకోసమేనని మురిసే పాలబుగ్గల చిట్టితల్లులు  రాబందుల రాక్షసత్వానికి బలవుతున్నారు. నగరంలో వరుసగా చోటుచేసుకుంటున్న అమానవీయ ఉదంతాలు ఆందోళన కలిగిస్తున్నాయి. పిల్లల సంరక్షణ కోసం చేసిన చట్టాలన్నీ చట్టబండలుగానే మిగులుతున్నాయి. లైంగిక వేధింపులు, అత్యాచారాలు, హత్యలు నిత్యకృత్యంగా మారాయి. ఎంతో సంతోషంగా హోలీ ఆడుకుంటున్న చిన్నారిని  తమ పశుత్వానికి  బలితీసుకున్న ఉదంతం వంటి అనేక సంఘటనలు తరచూ జరుగుతూనే ఉన్నాయి. ఒకవైపు బాల్యవివాహాలు, మరోవైపు అత్యాచారాలు, ఇంకోవైపు   గుదిబండలా మారిన  బాలకార్మిక వ్యవస్థ  రేపటి తరం పట్ల  శాపంగా పరిణమించాయి.  తెలిసిన వాళ్లే కాలయములు... పిల్లలపై అత్యాచారాలు, లైంగిక వేధింపులకు పాల్పడుతున్నవారిలో ఎక్కువ శాతం ఆ కుటుంబాలకు తెలిసిన వారు, బాగా పరిచయం ఉన్నవాళ్లు, లేదా అదే బస్తీలో నివసిస్తున్న వారే కావడం గమనార్హం.ఈ ఏడాది జనవరి నుంచి ఇప్పటి వరకు నగరంలోని వివిధ ప్రాంతాల్లో సుమారు 42 లైంగికదాడి ఘటనలు నమోదయ్యాయి. ఇవి పోలీసుల దృష్టికి వచ్చినవి మాత్రమే. అయితే వయోబేధం మరిచి లైంగికపరమైన చర్యలకు పాల్పడే  సంఘటనలు వందల్లోనే ఉంటాయని  సామాజిక కార్యకర్తలు, స్వచ్చంద సంస్థలు పేర్కొంటున్నారు. భార్యాభర్తలు ఇద్దరూ ఉద్యోగ, ఉపాధి నిమిత్తం బయటికి వెళ్లిన సమయంలో  ఇళ్లల్లో  ఒంటరిగా ఉండే చిన్నారులను లక్ష్యంగా చేసుకొని  తాగుబోతులు, తెలిసిన వాళ్లు  ఇలాంటి దుర్మార్గాలకు పాల్పడుతున్నారు. ఆ కుటుంబాలకు బాగా పరిచయం ఉన్న వారు కావడం, ప్రతి రోజు ఏదో ఒక సమయంలో  వారి ఇంటికి  వచ్చి పోతుండటం వల్ల  చిన్నారులు పెద్దగా సందేహించకుండానే  అమాయకంగా  ఈ పశువుల బారిన పడుతున్నారు. తరచూ తమ తల్లిదండ్రులతో  మాట్లాడుతుండడంతో వారిని తమకు ఎంతో దగ్గరి వారుగా భావిస్తున్నారు. ఆ దుర్మార్గులు సైతం పిల్లలకు చాక్లెట్లు, తినుబండారాలు ఆశ చూపించి  వంచిస్తున్నారు. గతేడాది నవంబర్‌ నుంచి ఇప్పటి వరకు కూకట్‌పల్లి హౌసింగ్‌బోర్డు ప్రాంతంలో  5 కేసులు నమోదయ్యాయి. బాధితుల్లో ఒకరు ఐదేళ్ల చిన్నారి. అలాగే సనత్‌నగర్‌  పోలీస్‌స్టేషన్‌ పరిధిలో  నాలుగేళ్ల  పాపతో పాటు మరో చిన్నారిపైనా  దాడి జరిగింది. జీడిమెట్ల, చందానగర్, జగద్గిరిగుట్ట, మైలార్‌దేవ్‌పల్లి, బాలానగర్, మియాపూర్, తదితర ప్రాంతాల్లో  ఎంతోమంది  చిన్నారులు దుర్మార్గుల పశువాంఛకు సమిధలయ్యారు. ‘‘ ఎక్కడా ఎలాంటి అనుమానం రాదు. బాగా తెలిసినవాళ్లే అయి ఉంటారు. కానీ అదను చూసి కాటేస్తారు. ఎలాంటి పరిచయస్తులైనా సరే పిల్లలను వారి దగ్గరకు వెళ్లనీయకుండా తల్లిదండ్రులే జాగ్రత్తలు తీసుకోవాలి.’’ అని ప్రముఖ మనస్తత్వ నిపుణులు డాక్టర్‌ లావణ్య సూచించారు. చిన్నారులు తమను తాము రక్షించుకొనేలా తల్లిదండ్రులు వారికి  కొన్ని మెళకువలు నేర్పించాలన్నారు. తల్లి కాకుండా ఇతరులు ఎవరైనా పిల్లల శరీర భాగాలను ముట్టుకోవడానికి వీల్లేదని, అలాంటి పరిస్థితులు ఎదురైనప్పుడు  వారి నుంచి విడిపించుకొనేలా  పిల్లలకు శిక్షణనివ్వాలన్నారు. ‘పోక్సో’ ఉన్నా లేనట్లే... ప్రొటెక్షన్‌ ఆఫ్‌ చిల్డ్రన్‌ ఫ్రమ్‌ సెక్సువల్‌ అఫెన్సెస్‌ (పోక్సో) చట్టాన్ని 2012లో రూపొందించారు. ఈ చట్టం ప్రకారం నిందితులను కఠినంగా శిక్షించేందుకు అవకాశం ఉంది. అయితే చాలా వరకు ఈ చట్టం కింద నమోదయ్యే కేసులు బలహీనంగా ఉంటున్నాయని, నేరస్తులు  తేలిగ్గా తప్పించుకొనేందుకు అవకాశం కల్పించేలా నమోదవుతున్నాయని  బాలల హక్కుల సంఘం  అధ్యక్షులు అచ్యుతరావు  తెలిపారు. మరోవైపు  ఈ చట్టం కింద నమోదయ్యే కేసుల్లో బాధిత కుటుంబాలను తరచూ పోలీస్‌స్టేషన్‌లకు రప్పించడం, మానసిక ఒత్తిడికి గురి చేయడం  వంటివి చోటు చేసుకుంటున్నాయన్నారు. ‘అత్యాచారాలకు గురైన చిన్నారులకు వైద్య సదుపాయంతో పాటు, మానసిక నిపుణుల ద్వారా కౌన్సిలింగ్‌ ఇప్పించాలి. పిల్లల భావి జీవితానికి ఎలాంటి ఆటంకాలు ఏర్పడకుండా అన్ని రక్షణ చర్యలు తీసుకోవాలి. తగిన పరిహారం అందజేయాలి.  ఒక్క పోలీసులే కాకుండా  స్త్రీ శిశు సంక్షేమ శాఖ, రెవిన్యూ శాఖ, తదితర విభాగాలకు చెందిన అధికారులు, స్థానిక ప్రజాప్రతినిధులు సమన్వయంతో పని చేసి, బాధిత కుటుంబాలకు భరోసాను ఇవ్వాలి, అయితే ఇలాంటి  పునరావాస, పరిహార చర్యలు ఏవీ చోటుచేసుకోవడం లేదని, పోలీసులు కేసులు నమోదు చేయడం వరకే పరిమితమవుతున్నాయి’ అని అచ్యుతరావు ఆందోళన వ్యక్తం చేశారు.

సాక్షి ప్రతినిధి, చెన్నై: సినిమా చాన్సులు పేరిట మాయమాటలు చెప్పి బాలికపై లైంగికదాడికి పాల్పడిన చెన్నైకి చెందిన ఎంబీఏ పట్టభద్రుడిని పోలీసులు అరెస్టు చేశారు. చెన్నై ముగప్పేర్‌కు చెందిన 17 ఏళ్ల బాలిక పదో తరగతితో చదువు ముగించి సినిమాల్లో వేషాలకోసం ప్రయత్నాలు సాగిస్తోంది. చెన్నై పెరియమేడులోని ఒక సినీ దర్శకుని వద్ద గత రెండు వారాలుగా నటనపై శిక్షణ పొందుతోంది. ఈనెల 2వ తేదీన శిక్షణకని ఇంటి నుంచి బయలుదేరిన బాలిక మరలా ఇంటికి చేరుకోలేదు. బాలిక తండ్రి దర్శకుని వద్దకు వచ్చి విచారించగా తన స్నేహితునితో మహాబలిపురంలో ఉన్నానని, తనను వెతకవద్దని పేర్కొంటూ బాలిక నుంచి ఎస్‌ఎమ్‌ఎస్‌ వచ్చిన సంగతిని తెలిపాడు. బాలిక తండ్రి ఇచ్చిన ఫిర్యాదు మేరకు సెల్‌ఫోన్‌ సిగ్నల్స్‌ ఆధారంగా మహాబలిపురంలోని ఒక లాడ్జిలో బాలిక ఒక యువకుడితో కలిసి ఉండగా పట్టుకున్నారు. పోలీసుల కథనం ప్రకారం.. సినిమా చాన్స్‌ల కోసం టిక్‌టాక్‌ యాప్‌లో సదరు బాలిక కొన్ని సన్నివేశాల నటనను పొందుపరచింది. వాటిని చూసిన తిరువెర్కేడుకు చెందిన దయాళన్‌ (31) అనే యువకుడు సినిమా చాన్స్‌లు ఇప్పిస్తానని నమ్మబలికాడు. మహాబలిపురం వస్తే ఒక సినిమా దర్శకుడిని పరిచయం చేస్తానని ఈనెల 2వ తేదీన పిలుచుకువెళ్లాడు. ఇదే అదనుగా బాలికపై లైంగికదాడికి పాల్పడ్డాడు. బాలిక మైనర్‌ కావడంతో దయాళన్‌ను పోక్సో చట్టం కింద సోమవారం అరెస్ట్‌ చేశారు.

ముక్కుపచ్చలారని పసికందులను ముచ్చటగా లాలించాల్సిన వారు.. రాబందుల్లా మారి పొడుచుకుతింటున్నారు. చాకెట్ల ఆశ చూపి మభ్యపెడుతున్న రాక్షసులు.. చిన్నారులపై రక్కసి మూకల్లా ఎగబడుతున్నారు. కమ్మని కథలు చెప్పి ఆడించాల్సిన తాతయ్యలు.. కామాంధులుగా మారి కర్కశంగా వ్యవహరిస్తున్నారు. మద్యం మత్తులో మదమెక్కిన ఆకతాయిలు.. కళ్లెం తెగిన ఆంబోతుల్లా విచక్షణ మరిచి చిన్నారుల జీవితాలను చిదిమేస్తున్నారు. ఆటపాటలతో నవ్వించాల్సిన వారే.. తమ శరీరాలతో వికృత ఆటలాడుతుంటే.. ఏం జరుగుతుందో తెలియక, అంతులేని బాధను తట్టుకోలేక లైంగిక దాడి బాధితులు విలవిలలాడుతున్నారు. కామాంధుల పశు వాంఛకు బలవుతున్న ఎందరో బాలికలు.. అమ్మో.. మృగాళ్లంటూ బిక్కుబిక్కుమంటూ వెక్కి వెక్కి ఏడుస్తున్నారు. రెంటచింతల మండలం తుమృకోటలో మంగళవారం రాత్రి ఏడేళ్ల బాలికపై యువకుడు లైంగిక దాడికి ఒడిగట్టాడు. ఈ ఘటనపై నిరసనలు మిన్నంటాయి. సాక్షి, గుంటూరు:మానవ మృగాలు రెచ్చిపోయి అచ్చోసిన ఆంబోతుల్లా రోడ్లపై పడుతున్నారు. మద్యం మత్తులో ఒకరు.. పర్‌వర్షన్‌కు గురై మరికొందరు కామాంధులుగా మారి చిన్నారుల జీవితాలను ఛిద్రం చేస్తున్నారు. ముక్కుపచ్చలారని చిన్నారులకు మాయమాటలు చెప్పి ఏమారుస్తూ కుత్సితమైన కామవాంఛలు తీర్చుకుంటున్నారు. తాత, బాబాయ్, సోదరుడు, మామయ్య, బావ వరుసలు అయ్యే వారితో పాటు, ఇళ్ల పక్కన నివాసం ఉంటూ నమ్మకంగా చిన్నారుల జీవితాలతో చెలగాటం ఆడుతున్న మృగాళ్లు చిన్నారుల తల్లిదండ్రులను శోకసంద్రంలోకి నెడుతున్నారు. నొప్పిగా ఉంది నన్ను వదిలేయ్‌ తాతా... ప్లీజ్‌ మామయ్య... భరించలేకపోతున్నానంటూ ఆ చిన్నారులు రోదించినా... పాషాణం లాంటి ఆ మానవ మృగాల మనస్సులు ఏమాత్రం చలించడం లేదు. సభ్య సమాజం  సిగ్గుతో తలదించుకునేలా జరుగుతున్న ఇటువంటి ఘటనలతో ఆడపిల్లల తల్లిదండ్రులు భయంతో వణికిపోతున్నారు. తమ చిన్నారులను ఆడుకునేందుకు బయటకు  పంపేందుకు కూడా హడలిపోతున్నారు. మైనర్‌ బాలికలు, మహిళల రక్షణ కోసం పోలీసులు సబల, జ్వాల వంటి కార్యక్రమాలు పెట్టినా మైనర్‌ బాలికలపై అత్యాచారాలు ఆగడం లేదు. చిన్నారులపై జరుగుతున్న వరుస ఘటనలు ఎలా అడ్డుకోవాలో తెలియక పోలీసులు సైతం తలలు పట్టుకుంటున్నారు. 10 నెలల్లో 20కు పైగా ఘటనలు జిల్లాలో పది నెలల వ్యవధిలో 20 మందికిపైగా చిన్నారులపై మృగాళ్లు లైంగిక వేధింపులు, అత్యాచార ఘటనలకు పాల్పడిన విషయం తెలిసిందే. ఈ ఘటనల్లో నిందితులపై కేసు నమోదు చేసి జైలుకు పంపారు తప్ప, బాధిత కుటుంబాలను ప్రభుత్వం పట్టించుకున్న దాఖలాలు లేవు. దాచేపల్లి ఘటనలో ప్రజల నుంచి పెద్దఎత్తున ఆందోళనలు రావడంతో శాంతి భద్రతల సమస్యతోపాటు, ప్రభుత్వానికి చెడ్డ పేరు వస్తుందనే కారణంతో ప్రభుత్వం ఎట్టకేలకు స్పందించింది. నిందితుడు ఆత్మహత్య చేసుకుని మృతిచెందడానికి కూడా ప్రజల్లో పెల్లుబికిన ఆగ్రహావేశాలే కారణంగా చెప్పవచ్చు. జిల్లాలో జరిగిన పలు సంఘటనలు పరిశీలిస్తే.. జిల్లాలోని మాచర్ల మండలం కొత్తూరు గ్రామంలో ఐదేళ్ల  చిన్నారిపై 35 ఏళ్ల వయస్సు ఉన్న కేతావత్‌ బాలునాయక్‌ అనే మృగాడు అత్యంత కిరాతకంగా అత్యాచారానికి పాల్పడిన ఘటన 2018 మార్చి 22వ తేదీన జరిగింది. మానవ మృగం దాడికి తట్టుకోలేక తీవ్ర రక్తస్రావంతో ఆచిన్నారి లోకాన్నే వదిలేసిన ఘటన రాష్ట్రవ్యాప్తంగా తీవ్ర సంచలనం కలిగించింది. బెల్లంకొండ పోలీసుస్టేషన్‌ పరిధిలో తొమ్మిదేళ్ల వయస్సు ఉన్న మూగ, చెవుడు బాలికపై 30 ఏళ్ల వయస్సు ఉన్న షేక్‌ ఘన్‌సైదా అనే కామాంధుడు అత్యాచారానికి ఒడిగట్టిన ఘటన గత ఏడాది ఏప్రిల్‌ 20న జరిగింది.  కొల్లూరు పోలీసు స్టేషన్‌ పరిధిలో ఏడేళ్ల వయస్సు చిన్నారిపై 25 ఏళ్ల వయస్సు ఉన్న జొన్నకూటి గోపి అనే మృగాడు లైంగిక దాడికి పాల్పడిన ఘటన గత ఏడాది ఏప్రిల్‌ 21వ తేదీన ఆ కుటుంబంలో తీవ్ర విషాదాన్ని నింపింది. నరసరావుపేట పట్టణంలోని బీసీ కాలనీలో ఏడేళ్ల వయస్సు ఉన్న చిన్నారిపై ఇంటి పక్కనే నివశించే షేక్‌ మౌలాలి అనే 55 ఏళ్ల వ్యక్తి లైంగిక దాడికి పాల్పడిన ఘటన గత ఏడాది ఏప్రిల్‌ 14వ తేదీన జరిగింది. పిట్టలవానిపాలెం మండలం చందోలు పోలీసు స్టేషన్‌ పరిధిలో నాలుగేళ్ల వయస్సు ఉన్న చిన్నారిపై 20 ఏళ్ల వయస్సు ఉన్న చెట్టుపల్లి ప్రవీణ్‌ అనే యువకుడు లైంగిక దాడికి పాల్పడిన ఘటన గత ఏడాది ఏప్రిల్‌ 1వ తేదీన చోటు చేసుకుంది. దాచేపల్లి పట్టణంలో తొమ్మిదేళ్ళ బాలికపై అన్నం సుబ్బయ్య అనే 55 ఏళ్ళ వృద్ధుడు అత్యాచారానికి పాల్పడిన ఘటన 2018 మే 2వ తేదీన రాష్ట్రవ్యాప్తంగా సంచలనం కలిగించడంతోపాటు, దీనిపై జిల్లా వ్యాప్తంగా ప్రజలు తీవ్రంగా స్పందించి రోడ్లపై భారీ ఆందోళనకు దిగడంతో ప్రభుత్వం దిగి వచ్చింది. నిందితుడు సైతం భయంతో ఉరివేసుకుని మృతిచెందాడు. ముఖ్యమంత్రి చంద్రబాబు సైతం జీజీహెచ్‌లో చికిత్స పొందుతున్న బాలికను పరామర్శించి కుటుంబానికి ఆర్థిక సహాయం అందించారు. రాష్ట్రంలో ఇలాంటి సంఘటనలకు పాల్పడేవారికి భూమి మీద అదే చివరి రోజు అవుతుందంటూ హెచ్చరికలు కూడా చేశారు. అయితే ఆయన హెచ్చరించిన రెండు రోజులకే చుండూరు మండలం మోదుకూరులో ఏడేళ్ల వయస్సు ఉన్న చిన్నారిపై 25 ఏళ్ల వయస్సు ఉన్న మృగాడు అత్యాచారానికి పాల్పడిన ఘటన వెలుగులోకి రావడంతో జిల్లాలో తీవ్ర అలజడి రేగింది. ఆ తరువాత పాతగుంటూరులో మైనర్‌ బాలికపై అత్యాచార యత్నం చేసిన యువకుడిని తమకు అప్పగించాలంటూ పోలీస్‌స్టేషన్‌పై దాడి చేసి విధ్వంసానికి పాల్పడిన సంఘటన అందరికీ తెలిసిందే. చిన్నారిపై కిరాతకంగా... ఈ దుర్ఘటనలు మరువకముందే రెంటచింతల మండలం తుమృకోట గ్రామంలో ఏడేళ్ల మైనర్‌ బాలిక మంగళవారం రాత్రి 8.30 గంటల సమయంలో బహిర్భూమికి వెళ్లడాన్ని గమనించిన  అదే ప్రాంతానికి చెందిన మిర్యాల జయరాం(27) పుల్‌గా మద్యం తాగి బాలిక నోరు మూసి సమీపంలోని నిర్జీవ ప్రదేశానికి తీసుకెళ్లి అత్యాచారానికి పాల్పడ్డాడు. కేకలు వేస్తున్న బాలికను అత్యంత కిరాతకంగా రాయితో దవడపై కొట్టగా రెండు పళ్లు ఊడిపడ్డాయి. తమ కుమార్తె ఎంతసేపటికీ తిరిగి రాకపోయేసరికి బాలిక తల్లి బాలిక కోసం వెతుకుతుండగా రాత్రి 9.45 గంటల సమయంలో బాలిక తీవ్ర రక్త స్రావంతో ఏడ్చుకుంటూ ఒళ్లంతా గాయాలతో ఇంటికి వచ్చి జరిగిన సంఘటనను వివరించింది. ఆడపిల్లను కనడమే పాపమా..? ఆడపిల్లలను కన్న తల్లిదండ్రుల పరిస్థితి దారుణంగా మారింది. జిల్లాలో జరుగుతున్న వరుస ఘటనలు వారికి నిద్ర లేకుండా చేస్తున్నాయి. ఆటోలో పిల్లలను బడికి పంపాలన్నా, ఇంటి బయట ఆడుకునేందుకు పంపాలన్నా, బంధువుల ఇళ్లల్లో వదిలి వెళ్లాలన్నా.. భయపడాల్సిన దుస్థితి దాపురించింది. చిన్న, పెద్ద, బంధువులు, స్నేహితులు అనే తారతమ్యం లేకుండా ప్రతి ఒక్క మగాడిని అనుమానించాల్సిన పరిస్థితి ఏర్పడిందని ఆడపిల్లల తల్లిదండ్రులు వాపోతున్నారు. ఆడపిల్ల అర్థరాత్రి ఒంటరిగా తిరగడం మాట అటుంచి, పట్టపగలు ఇంటి బయటకు వెళ్లేందుకు కూడా భయపడాల్సిన పరిస్థితులు తలెత్తడం సభ్య సమాజం సిగ్గుతో తలదించుకోవాల్సిన విషయమని పలువురు వ్యాఖ్యానిస్తున్నారు.

గుంటూరు జిల్లా : తెనాలి ప్రభుత్వాసుపత్రిలో మోతుకూరు బాధిత బాలికను సీపీఐ రాష్ట్ర కార్యదర్శి రామకృష్ణ, జిల్లా కార్యదర్శి జంగాల అజయ్ సోమవారం పరామర్శించారు. అనంతరం విలేకరులతో మాట్లాడుతూ.. దాచేపల్లి ఘటన మరువక ముందే మరో బాలికపై అత్యాచార ఘటన వెలుగు చూడటం బాధాకరమన్నారు. ఏపీ సీఎం నారా చంద్రబాబు నాయుడు మాటలు ఆపి చేతలలో పని చూపించాలని హితవు పలికారు. ప్రభుత్వం ప్రచార ఆర్బాటాలు  వదిలి,  వాస్తవ పరిస్థితులపై దృష్టి సారించాలని సూచించారు. మానసిక వైద్యులు, మహిళా సంఘాలతో సమావేశం ఏర్పాటు చేయాలని, అత్యాచారాల నివారణపై వారి సలహాలు, సూచనలు స్వీకరించాలని కోరారు. ప్రభుత్వం దృష్టి సారించకపోతే సీపీఐ ఆధ్వర్యంలోనే సమావేశం ఏర్పాటు చేస్తామని చెప్పారు. గుంటూరు జిల్లాలో ఇటీవల జరిగిన దాచేపల్లి కీచక ఉదంతాన్ని మరువకముందే మోదుకూరులో ఏడేళ్ల బాలికపై లైంగిక దాడి జరిగిన విషయం తెలిసిందే. బావ వరుసయ్యే నిందితుడు నాగుల్‌మీరా(24) చాక్లెట్లు కొనిపెడతానని తీసుకెళ్లి అఘాయిత్యానికి పాల్పడ్డాడు. చిన్నారి చెప్పిన వివరాలతో నిందితుడిని పోలీసులు అదుపులోకి తీసుకున్నారు.


 అహ్మదాబాద్: శిశువుపై పశువులాగా రెచ్చిపోయాడు ఓ కామాంధుడు. పసికందుపై అఘాయిత్యానికి పాల్పడ్డాడు. ఈ ఘటన గుజరాత్‌లోని పఠాన్ జిల్లా ఛనాస్మా తాలూకాలోని ఇటోడా గ్రామంలో మంగళవారం రాత్రి జరిగింది. ఇటోడా గ్రామానికి చెందిన ఆరు నెలల శిశువుపై భవాన్‌జీ ఠాకూర్(32) అత్యాచారం చేశాడు. ధర్పూర్ ప్రభుత్వ ఆసుపత్రిలో చికిత్స పొందుతున్న శిశువు పరిస్థితి విషమంగా ఉంది. తమకు పరిచయస్తుడైన ఠాకూర్ వద్ద చిన్నారిని వదిలి తల్లిదండ్రులు గ్రామ శివారులో జరిగిన ఓ ఆధ్యాత్మిక కార్యక్రమానికి వెళ్లారు. వారు ఇంటికి తిరిగి వచ్చేసరికి బాలిక విపరీతంగా ఏడుస్తోంది. చిన్నారిని పరిశీలించగా తీవ్ర రక్తస్రావమవుతోంది. వెంటనే ఆసుపత్రికి తరలించారు. నిందితుడు పరారీలో ఉన్నాడు.
  
  నర్సరీ విద్యార్థినిపై అటెండర్ అత్యాచారం
  సాక్షి, బెంగళూరు: బెంగళూరులోని ఓ ప్రైవేటు స్కూల్‌లో నర్సరీ చదువుతున్న మూడేళ్ల బాలిక కు అక్కడ అటెండర్‌గా పనిచేసే నాగరాజ్ (27) చాక్లెట్ ఆశ చూపించి అత్యాచారానికి పాల్పడ్డాడు. గత నెల 26న స్కూల్లో ఈ దారుణం జరిగింది. కాగా, మహారాష్ట్రలోని  నాగ్‌పూర్‌లో సోమవారం రాత్రి ఓ ఉపాధ్యాయినిని ఐదుగురు కిడ్నాప్ చేసి సామూహిక అత్యాచారానికి పాల్పడ్డారు.