సాక్షి, సంగారెడ్డి: నా భర్త ప్రతీ రోజు మద్యం సేవించి నన్ను కొడుతున్నాడు. మానసికంగా వేధిస్తున్నాడు. ఇంట్లో వస్తువులు అమ్ముకొని ఇబ్బంది పెడుతున్నాడు. పుట్టింటి నుండి అదనపు కట్నం తీసుకురమ్మని అత్తింటి వారి వేధింపులు ఎక్కువయ్యాయి. నాకు న్యాయం చేయండి అని హత్నూర మండలానికి చెందిన ఓ వివాహిత ఎస్పీ చంద్రశేఖర్‌ రెడ్డికి విన్నవించింది. పోలీస్‌ గ్రీవెన్స్‌ సెల్‌లో భాగంగా జిల్లా నలుమూలల నుండి వచ్చిన ఫిర్యాదులను సోమవారం ఎస్పీ చంద్రశేఖర్‌రెడ్డి స్వయంగా స్వీకరించారు. సమస్యల పరిష్కారం కోసం సంబంధిత అధికారులకు ఆదేశాలు జారీ చేశారు. వాటిలో కొన్ని ముఖ్యమైనవి ఇలా ఉన్నాయి.    ‘నా భార్య అత్యాచారం, హత్యకు గురైన కేసులో ఎస్సీ, ఎస్టీ చట్ట ప్రకారం ప్రభుత్వం రూ.8.50 లక్షలను మంజూరు చేసింది. నా మానసిక స్థితి బాగోలేకపోవడంతో మరో వ్యక్తి నా బ్యాంకు అకౌంట్‌ నుండి డబ్బులను తీసుకున్నాడు. నా డబ్బు నాకు వచ్చేలా చూడండి’ అని కంది మండలానికి  చెందిన ఓ ఫిర్యాదుదారుడు కోరారు.  ‘నాకు 2008లో వివాహం జరిగింది. నా భర్త అదనపు కట్నం కోసం వేధించడంతో కేసు నమోదు చేయించాం. కోర్టు నా భర్తకు, మామకు జైలు శిక్ష వేసింది. కోర్టు ఆదేశాల ప్రకారం నేను భర్త ఇంట్లోనే ఉంటున్నా. కానీ కోర్టు ఆదేశాలకు వ్యతిరేకంగా మరో అమ్మాయిని పెళ్లి చేసుకొని నన్ను వేధిస్తున్నాడు. ఇంటి నుండి వెళ్లగొట్టడానికి ప్రయత్నిస్తున్నాడు. నాకు న్యాయం చేయాల’ని కంది మండలానికి చెందిన ఫిర్యాదుదారురాలు కోరారు.   


 తహశీల్దార్‌తో ఫిర్యాదుదారుల వాగ్వాదం.. తోపులాట..
  
 రైల్వేకోడూరు అర్బన్: రైల్వేకోడూరు ఎంపీడీఓ కార్యాలయంలో సోమవారం నిర్వహించిన గ్రీవెన్స్‌సెల్ కార్యక్రమం రసాభాసగా మారింది. మైసూరువారిపల్లె పంచాయతీ సర్వే నెంబర్ 1596, 1582లో తమకు రెండు ఎకరాల 12 సెంట్ల భూమి ఉందని, ఆ భూమిలో దారి ఏర్పాటు విషయం గురించి బీసీ పుల్లయ్య అనే వ్యక్తితో పాటు అతని కుమారులు బాబు, రమేష్ తహశీల్దార్ గౌరీశంకర్‌రావుతో వాదనకు దిగారు. మూడేళ్లుగా తహశీల్దార్ కార్యాలయం, ఆర్డీఓ, కలెక్టర్ కార్యాలయాల చుట్టూ తిరుగుతున్నా పట్టించుకోలేదని ఆగ్రహం వ్యక్తం చేశారు.
 
 ఆదివారం తమ పొలం పక్కనే ఉన్న నూకా వెంకటయ్య తమ పొలంలో ఉన్న రాళ్లను జేసీబీతో తొలగించినా మీరెందుకు పట్టించుకోలేదని అడిగారు. దీనిపై తహశీల్దార్ మాట్లాడుతూ భూమి సమస్య కోర్టులో ఉన్నందున పోలీసు స్టేషన్‌లో కేసు పెట్టాలని సూచించారు. ఇంతలో తహశీల్దార్ తనకు కడపలో మీటింగ్ ఉందంటూ బయలుదేరేందుకు సిద్ధపడగా వారు అడ్డగించారు. ఈ సందర్భంగా మాటామాటా పెరిగి తోసుకున్నారు. ఈ సమయంలో బాధితుడు బీసీ పుల్లయ్య కిందపడిపోయాడు. తహశీల్దార్ కొట్టడంతో తమ తండ్రి కిందపడిపోయాడంటూ తీవ్ర ఆగ్రహానికి గురైన అతని కుమారులు తహశీల్దార్‌పై పాదరక్షతో దాడి చేసేందుకు ప్రయత్నించారు. అక్కడున్న సిబ్బంది వారిని విడదీశారు.
 
 అయితే అక్కడే ఉన్న సర్వేయర్ త్యాగరాజు ప్రజలను కొట్టే అధికారం మీకు ఎక్కడ ఉందని తహశీల్దార్‌ను నిలదీశారు. వైఎస్సార్‌సీపీ పట్టణ అధ్యక్షుడు రమేష్, నియోజకవర్గ అధికార ప్రతినిధి మందల నాగేంద్ర కూడా తహశీల్దార్‌తో వాదనకు దిగారు. ఇంతలో పోలీసులు అక్కడకు చేరుకుని బీసీ పుల్లయ్య, అతని కుమారులను పోలీసు స్టేషన్‌కు తీసుకెళ్లారు. అనంతరం వారు పోలీసు స్టేషన్‌లో తహశీల్దార్‌పై ఫిర్యాదు చేయగా కోర్టునుంచి అనుమతి వచ్చిన తరువాత కేసు నమోదు చేస్తామన్నారు.
  
 బాధితుల నిరసన
  అనంతరం బాధితులు తమకు న్యాయం చేయాలంటూ  స్థానిక గాంధీ విగ్రహం వద్ద నిరసనకు దిగారు. విషయం తెలుసుకున్న ఎమ్మెల్యే కొరముట్ల శ్రీనివాసులు నిరసన తెలియజేస్తున్న వారిని పరామర్శించారు. ఉన్నతాధికారులతో మాట్లాడి మీకు న్యాయం చేస్తానని వారికి హామీ ఇచ్చారు. కాగా, సాయంత్రం తహశీల్దార్ గౌరిశంకర్‌రావు, ఎంపీడీఓ కృష్ణయ్య, మండల అధికారులు, ఎన్‌జీఓ సంఘం సభ్యులంతా కలిసి స్థానిక పోలీసుస్టేషన్‌కు వెళ్లి ఫిర్యాదు చేశారు. ఈ సందర్భంగా ఎన్‌జీఓ సంఘం అధ్యక్షుడు ఓబులేసు, అసోసియేట్ అధ్యక్షుడు చంద్రమౌళిరాజు మాట్లాడుతూ తహశీల్దార్‌కు పూర్తివ ుద్దతు ఇస్తున్నట్లు  తెలిపారు.
  
 నేను కొట్టలేదు: తహశీల్దార్
  ఈ సందర్భంగా తహశీల్దార్ గౌరిశంకర్‌రావు విలేకరులతో మాట్లాడుతూ గ్రీవెన్స్‌సెల్‌లో అధికారులందరూ ఉన్నప్పటికీ వారు అసభ్య పదజాలంతో మాట్లాడారని, ఒక మండల మెజిస్ట్రేట్‌ను ఇలా మాట్లాడటం సమంజసం కాదన్నారు. తాను బయటకు వెళ్తుంటే పుల్లయ్య అడ్డుపడ్డాడని తెలిపారు. కడపకు మీటింగ్‌కు వెళ్లాలని పక్కకు జరగమని అతన్ని తోశానని, అంతే తప్ప తాను కొట్టలేదని స్పష్టం చేశారు.