సాక్షి, సిటీబ్యూరో: బెంగళూరు కుట్ర కేసులో వాంటెడ్‌గా ఉన్న హైదరాబాదీ అసద్ ఖాన్‌ను సౌదీ అరేబియా ఏజెన్సీలు అదుపులోకి తీసుకునేలా చేయడంలో సఫలీకృతం కావడంతో జాతీయ దర్యాప్తు సంస్థ (ఎన్‌ఐఏ) నిషిద్ధ ఉగ్రవాద సంస్థ హర్కత్ ఉల్ జిహాద్ ఏ ఇస్లామీ (హుజీ)పై పట్టు బిగిస్తోంది. బెంగళూరు కుట్ర కేసులో వాంటెడ్‌గా ఉండి రియాద్, సౌదీ అరేబియా తదితర దేశాల్లో తలదాచుకున్న మిగిలిన నిందితుల కోసం వేట ముమ్మరం చేసింది. వీరిలో ఐదుగురు హైదరాబాద్‌కు చెందిన వారే కావడం గమనార్హం. కొందరు ఉగ్రవాదులపై ఇక్కడా కేసులు నమోదై, వాంటెడ్‌గా ఉన్నారు.
 
 బెంగళూరు పోలీసులు 2012 ఆగస్టు 29న ఈ కుట్రను ఛేదించారు. సౌదీ అరేబియా, పాకిస్థాన్‌ల్లో తలదాచుకున్న లష్కరేతొయిబా (ఎల్‌ఈటీ) ఉగ్రవాదులు హర్కత్ ఉల్ జిహాద్ ఏ ఇస్లామీ (హుజీ)కి సపోర్ట్ చేస్తూ దీనికి వ్యూహరచన చేశారు. తెలంగాణతో పాటు కర్ణాటక మహారాష్ట్రల్లో ఉన్న క్యాడర్ ద్వారా హైదరాబాద్, బెంగళూరు, హుబ్లీ, నాందేడ్ ల్లో ఉన్న ఓ వర్గానికి చెందిన ప్రముఖ రాజకీయ నాయకులు, పోలీసు అధికారులు, జర్నలిస్టుల్ని టార్గెట్ చేశారు.
 
 మత కలహాలు సృష్టించడమే ధ్యేయంగా సౌదీ అరేబియా, రియాద్‌ల్లోనే ఈ కుట్ర మొత్తం ఊపిరిపోసుకుందని ఎన్‌ఐఏ తేల్చింది. హత్యలతో పాటు దోపిడీలు, బందిపోటు దొంగతనాలు చేయడం ద్వారా ‘మాల్-ఇ-ఘనీమట్’ (యుద్ధానికి అవసరమైన నిధులు) సమీకరించడానికీ వీరు కుట్రపన్నారన్నది ఎన్‌ఐఏ అభియోగం. ఈ కేసులో వాంటెడ్‌గా ఉండి, విదేశాల్లో తలదాచుకున్న వారిని పట్టుకోవడానికీ కేంద్ర హోమ్ మంత్రిత్వ శాఖ ద్వారా చర్యలు ముమ్మరం చేసింది. ఈ కుట్రలో హైదరాబాద్‌కు చెందిన ఏడుగురి పాత్రను ఎన్‌ఐఏ నిర్థారించింది.
 
 వీరిలో ఒబేదుర్ రెహ్మాన్ ఇప్పటికే అరెస్టు కాగా... అసద్ ఖాన్ అలియాస్ అబు సూఫియాన్‌ను సౌదీ అరేబియా ఏజెన్సీలు అదుపులోకి తీసుకున్నాయి. మిగిలిన ఐదుగురి కోసం గాలింపు ముమ్మరం చేశాయి. ఈ ఐదుగురిలో ఇక్కడ నమోదైన కేసుల్లోనూ వాంటెడ్‌గా ఉన్న ఉగ్రవాదులు ఉన్నారు. బెంగళూరు కేసులో 16వ నిందితుడిగా ఉన్న మహ్మద్ భాయ్ అలియాస్ అబ్దుల్ మరీమ్ అలియాస్ అబ్దుల్ బారీ అలియాస్ అబు హంజా, 19వ నిందితుడిగా ఉన్న మహ్మద్ అబ్దుల్ మజీద్, 20వ నిందితుడిగా ఉన్న అబ్దుల్ రెహ్మాన్ అలియాస్ ఫర్హాతుల్లా ఘోరీ, 23వ నిందితుడిగా ఉన్న సాదిఖ్ బిన్ ఉస్మాన్ అలియాస్ అబు హంజాలా అలియాస్ సాబేర్, 26వ నిందితుడిగా ఉన్న ఫుర్ఖాన్ భాయ్ అలియాస్ అబ్దుల్లా అలియాస్ మసూద్ అలియాస్ అబు సాద్‌లపై హైదరాబాద్‌ల్లోనూ కేసులున్నాయి.
 
 వీరు బెంగళూరు మాడ్యుల్‌కి ఆర్థిక, స్థానిక, శిక్షణ సహకారాలు అందించారనేది ఆరోపణ. ఈ ఐదుగురూ హైదరాబాద్‌కు సంబంధించిన ఇంద్రసేనారెడ్డి హత్యకు కుట్ర, దిల్‌సుఖ్‌నగర్ సాయిబాబా  ఆలయం వద్ద పేలుడు, సికింద్రాబాద్‌లోని గణేష్ టెంపుల్ పేల్చివేత కుట్ర తదితర కేసుల్లో వాంటెడ్‌గా ఉన్నారు. ఎన్‌ఐఏ అధికారులు వీరిని కూడా బెంగళూరు కేసులో దేశానికి రప్పించగలిగితే హైదరాబాద్ కేసుల్లోనూ అరెస్టు చేయాలని అధికారులు యోచిస్తున్నారు.


 సాక్షి, హైదరాబాద్: హైదరాబాద్ దిల్‌సుఖ్‌నగర్ బాంబు పేలుళ్ల కేసులో నిందితుడైన జియా ఉర్ రెహమన్ అలియాస్ వఖాస్‌ను దేశ సరిహద్దులు దాటించిన పాకిస్తానీ మహమ్మద్ నసీర్ నగర పోలీసులకు దొరికిపోయాడు. ముష్కరుల నుంచి ప్రమాదం పొంచి ఉందన్న ఇంటెలిజెన్స్ బ్యూరో హెచ్చరికల నేపథ్యంలో హైదరాబాద్‌ను జల్లెడపడుతున్న సిటీ పోలీసులకు నిషేధిత ఉగ్రవాద సంస్థ హర్కత్ ఉల్ జిహాదీ అల్ ఇస్లామి(హుజి)తో సంబంధమున్న పాకిస్తానీ మహమ్మద్ నసీర్‌తో పాటు ఫైజల్ మహమ్మద్ (బంగ్లాదేశ్), జోయ్‌నల్ అబెదిన్ (బంగ్లాదేశ్), జియా ఉర్ రెహ్మాన్ (మయన్మార్)ని అరెస్టు చేశారు.
 
 అక్రమంగా వలస వచ్చి హైదరాబాద్‌లో నివాసముంటున్న వీరికి నివాస వసతి కల్పించడంతో పాటు విదేశాలకు వెళ్లేందుకు పాస్‌పోర్టులు సమకూర్చి సాయం చేస్తున్న హైదరాబాద్ వాసులు మహమ్మద్ మసూద్ అలీ ఖాన్(చంచల్‌గూడ), సోహైల్ పర్వేజ్ ఖాన్ (బాలాపూర్,సైబరాబాద్)లను కూడా నగర టాస్క్‌ఫోర్స్ పోలీసులు అదుపులోకి తీసుకున్నారు. వీరి వద్ద నుంచి నాలుగు భారత పాస్‌పోర్టులు, ఒక బంగ్లాదేశ్ పాస్‌పోర్టు, సిమ్ కార్డులున్న తొమ్మిది సెల్‌ఫోన్లు, జిహాదీ సాహిత్యం, ఓటరు గుర్తింపు కార్డులు, ఆధార్ కార్డులు, బర్త్ సర్టిఫికెట్‌లు, పాస్‌పోర్టు డెలివరీ ఎన్వెలప్‌లు, అఫిడవిట్లు... ఇలా సుమారు వంద ఐడీ ప్రూఫ్‌లు స్వాధీనం చేసుకున్నారు.
 
 సిట్ ఏసీపీ డి.హరికుమార్ ఈ కేసును దర్యాప్తు చేస్తున్నారు. పరారీలో ఉన్న మరికొందరు నిందితులను పట్టుకునేందుకు ముమ్మర గాలింపు చేపట్టారు. సెంట్రల్ క్రైమ్ స్టేషన్ (సీసీఎస్)లో శుక్రవారం జరిగిన విలేకరుల సమావేశంలో జాయింట్ పోలీసు కమిషనర్ టి.ప్రభాకర్‌రావు కేసు వివరాలను వెల్లడించారు. ప్రధాన నిందితుడు మహమ్మద్ నసీర్ పుట్టింది బంగ్లాదేశ్ అయినా జీవనోపాధి కోసం పాకిస్తాన్‌కు వెళ్లి స్థిరపడ్డాడు. అంతకుముందే పాకిస్తాన్ వెళ్లి స్థిరపడిన బంధువైన అబ్దుల్ జబ్బర్‌కు మరింత సన్నిహితుడయ్యాడు నసీర్. ప్రస్తుతం బంగ్లాదేశ్‌లో ఉంటున్న జబ్బార్ హుజీకి సానుభూతిపరుడిగా వ్యవహరిస్తున్నాడు. నసీర్‌కు జిహాదీ సాహిత్యాన్ని ప్రచారం చేస్తూ చట్టవ్యతిరేక కార్యకలాపాలు నిర్వహించేందుకు భారత్‌కు పంపించాడు.
  
 దాడుల్లో దొరికారు...
 రెండు నెలల క్రితం తెలంగాణకు వచ్చి మెదక్ జిల్లా జహీరాబాద్‌లో ఉంటున్న ఫైజల్ మహమ్మద్, జోయ్‌నల్ అబెడిన్, జియా ఉర్ రెహ్మాన్‌లను మసూద్ ఆలీ ఖాన్‌కు పరిచయం చేశాడు నసీర్. మసూద్ ఆలీఖాన్ ఇంట్లోనే షెల్టర్ కూడా ఇప్పించేలా ఏర్పాటు చేశాడు. ఓటరు గుర్తింపు కార్డులు, ఆధార్ కార్డులతో పాటు జాబ్ వీసాలపై ఇతర దేశాలకు వెళ్లి చట్టవ్యతిరేక కార్యకలపాలు నిర్వహించేందుకు భారత్ పాస్‌పోర్టులను కూడా సమకూర్చారు. ఈ క్రమంలోనే హైదరాబాద్ టాస్క్‌ఫోర్స్ పోలీసులు అనుమానం వచ్చి దాడులు చేయగా వీరంతా పట్టుబడ్డారు.
  
 వఖాస్‌కు సహకరించిన నసీర్..
 హుజి నేత అబ్దుల్ జబ్బర్ ఆదేశాల మేరకు దిల్‌సుఖ్‌నగర్ బాంబు పేలుళ్లలో నిందితుడైన జియా ఉర్ రెహ్మాన్ అలియాస్ వఖాస్‌ను పశ్చిమ బెంగాల్‌లో కలుసుకుని.. భారత సరిహద్దును దాటించి బంగ్లాదేశ్‌కు పంపించానని నసీర్ కేసు విచారణలో అంగీకరించినట్లు పోలీసులు చెబుతున్నారు. అయితే మళ్లీ భారత్‌కు వచ్చిన వఖాస్... బిహార్ నుంచి రాజస్థాన్‌కు వచ్చాడు. ఈ సమాచారం అందుకున్న ఎన్‌ఐఏ అధికారులు గతేడాది జనవరిలో అతన్ని రాజస్థాన్‌లో అదుపులోకి తీసుకున్నారు.
 
 ప్రస్తుతం దిల్‌సుఖ్‌నగర్ బాంబు పేలుళ్ల కేసులో విచారణ కోసం చర్లపల్లి జైలులోనే ఉన్నాడు. హైదరాబాద్ టాస్క్‌ఫోర్స్ అడిషనల్ డిప్యూటీ పోలీసు కమిషనర్ ఎన్.కోఠి రెడ్డి పర్యవేక్షణలో ఇన్‌స్పెక్టర్ మల్లేశ్, ఎస్‌ఐలు కె.వెంకటేశ్వర్లు, జాకీర్ హుస్సేన్, డి.వెంకటేశ్వర్లు తదితర సిబ్బంది దాడుల్లో పాల్గొన్నారు. కాగా, ఈ కేసును విచారించేందుకు నేషనల్ ఇన్వెస్టిగేషన్ ఏజెన్సీ(ఎన్‌ఐఏ) రంగంలోకి దిగే అవకాశముందని తెలుస్తోంది.
  
 ఐదేళ్ల క్రితమే భారత్‌కు...
 నసీర్ 2010లో భారత్‌లో అడుగుపెట్టాడు. అప్పటి నుంచి వివిధ ప్రాంతాల్లో మకాం మారుస్తూ వచ్చిన నసీర్... ఇప్పుడు హైదరాబాద్ బాలాపూర్‌లోని జల్‌పల్లిలో ఉంటున్నాడు. ఈ క్రమంలోనే అక్కడే ఉపాధ్యాయుడిగా పనిచేస్తున్న సొహైల్ పర్వేజ్ ఖాన్‌తో నసీర్‌కు స్నేహం ఏర్పడింది. చెంచల్‌గూడలో ఎంఎం జిరాక్స్ సెంటర్ నిర్వహిస్తున్న తన బావ మసూద్ ఆలీ ఖాన్‌ను నసీర్‌కు పరిచయం చేశాడు. తన పరిచయస్తులను విదేశాలకు పంపించేందుకు పాస్‌పోర్టులను రూపొందించి ఇవ్వాలని మసూద్‌ను కోరాడు.అంగీకరించిన మసూద్... ఇప్పటివరకు దాదాపు 15 మందికి పాస్‌పోర్టులు ఇప్పించి విదేశాలకు వెళ్లేందుకు సహకరించాడు.