ఈ తరంవారు దూరమవుతున్న సంస్కృతి, సంప్రదాయాలను గుర్తు చేసేందుకు, నడవడిక, క్రమశిక్షణ అలవర్చేందుకు ఒక చక్కటి అవకాశం శాస్త్రీయ నృత్యం. మానసిక పరివర్తన మెరుగుపడేందుకు, ఏకాగ్రత పెరిగేందుకూ ఇది ఎంతో ఉపయోగకరం. మదిలోని హావాభావాలన్నీ కళ్లల్లో ఒలకబోస్తూ చేసే నృత్యరూపకాలు.. చూసే వారి మదికి ఎంతో ప్రశాం తతనిస్తాయి. ప్రతి భంగిమలో ఓ నేపథ్యం, ఓ యోగాసనం ఇలా ఎన్నో దాగున్నాయి. అందుకేనేమో తల్లిదండ్రులంతా వారి పిల్లలను శాస్త్రీయ నృత్యం అభ్యసించేలా ప్రోత్సహిస్తున్నారు. ఈ ఆసక్తిని గమనించి పలు ప్రైవేటు పాఠశాలల్లోనూ ప్రత్యేకంగా నృత్యశిక్షణ తరగతులు నిర్వహిస్తున్నారు.
  
 - క్రమశిక్షణకు కేరాఫ్ శాస్త్రీయ నృత్యం
 - నేటితరం పిల్లల్లో పెరుగుతున్న ఆసక్తి
 - ప్రోత్సహిస్తున్న తల్లిదండ్రులు
 న్యూఢిల్లీ: భారతీయ నాట్యం ఒక కళే కాదు... క్రమశిక్షణ గల జీవితానికి ఒక ఒక కొలమానం. కూచి పూడి, భరతనాట్యం, జానపదాలు ఏవైనా సరే ఏకాగ్రత, క్రమశిక్షణతో చేయడం వల్ల పిల్లల భవిష్యత్ బంగారు బాటకు అవి పునాది అవుతాయి. శాస్త్రీయ నృత్యకళపై ప్రజల్లో ఆసక్తి పెరుగుతోంది. తాము నేర్వని కళను పిల్లలకు నేర్పించాలన్న తపన పెరుగుతోంది. ఇటీవల పలు విద్యాసంస్థల్లో నిర్వహిస్తున్న కార్యక్రమాలే ఇందుకు తార్కాణాలు. విద్యార్థులు కూడా ఈ నృత్యాలను నేర్చుకోవడానికే ఇష్టపడుతున్నారు. నగరంలోని పలు విద్యాసంస్థలు ప్రత్యేకంగా డ్యాన్స్‌మాస్టర్లను ఏర్పాటు చేసి నృత్యశిక్షణ కోసం తరగతులు నిర్వహిస్తున్నారు.
  
 ప్రైవేటు పాఠశాలలేకాదు మున్సిపల్ కార్పొరేషన్ ఆధ్వర్యంలో నడుస్తున్న ప్రభుత్వ పాఠశాల ల్లోనూ విద్యార్థులు, తల్లిదండ్రుల ఆసక్తిమేరకు డ్యాన్స్ క్లాస్‌లు నిర్వహిస్తున్నారు. పేద, మధ్య తరగతి పిల్లలకు తరగతి గదుల్లో నిర్వహిస్తున్న డ్యాన్స్ క్లాస్‌లు ఎంతో ఉపయోగకరంగా ఉంటున్నాయి. సంపన్నవర్గాల పిల్లల డ్యాన్స్ మాస్టర్లు నిర్వహించే ప్రత్యేక తరగతులకు హాజరై విద్య నేర్చుకుంటున్నా రు. అందుకు కారణం డ్యాన్స్ వల్ల ఎన్నో ప్రయోజనాలుండడమే... అందుకే ఇప్పుడు అందరిలో భారతీయ నృత్యంపై ఆసక్తి పెరిగింది. ఇందుకు కారణాలేమిటనే విషయమై పలువురు తమ అభిప్రాయాలను వ్యక్తం చేశారు. వివరాలు వారి మాటల్లోనే...
  
 దేవతలంతా మెచ్చిన కళ
 నాట్యం భగవంతుడు మెచ్చిన కళ. 64 కళలల్లో ప్రతి ఒక్క దేవతా స్వరూపం ఈ కళను ఎంతో ఇష్టపడ్డారని పురాణ ఇతిహాసాలు తెలియజేస్తున్నాయి. నేను 1997 లో నృత్యశిక్షణా తరగతులు ప్రారంభించాను. ఇప్పటిదాకా 200 మందికి పైగా శిక్షణ అందించాను. వారు జిల్లా, రాష్ట్ర, జాతీయ స్థాయిలోనూ రాణించారు. ప్రస్తుతం నా వద్ద ముగ్గురు ఇంజనీరింగ్ విద్యార్థినీ విద్యార్థులు, 86 మంది బాల బాలికలు శిక్షణ పొందుతున్నారు. పిల్లలతో పాటు పెద్దలూ నేర్చుకోవడానికి ఉత్సాహం చూపుతున్నారు. మానసిక వైకల్యం ఉన్న పిల్లలకు శాస్త్రీయ నృత్యం నేర్పిస్తే ఉపయోగం ఉంటుందని వైద్యులూ సూచిస్తున్నారు.
  - భార్గవకుమార్, నృత్యజ్యోతి ఫైన్ ఆర్ట్స్ డెవలప్‌మెంట్ అసోసియేషన్
  
 వ్యక్తిత్వం అలవడుతుంది
 శాస్త్రీయ నృత్యం వల్ల భారతీయ సంస్కృతి, సంప్రదాయాల గురిం చి అవగాహన పెరుగుతుంది. ఫలితంగా మంచి నడవడిక, క్రమశిక్షణ గల జీవితం అలవడుతుంది. నేను 2000 సంవత్సరం నుంచి శాస్త్రీయ నృత్యంలో శిక్షణ ఇస్తున్నాను. సెయింట్ జోసఫ్ స్కూల్‌లో ఇప్పటి వరకు 400 మంది పిల్లలకు నృత్యరీతులలో శిక్షణ ఇచ్చాను. ఇంటి వద్ద కూడా పిల్లలతో పాటు పెద్దలు కూడా నృత్యంలో శిక్షణ తీసుకుంటున్నారు. పలువురు డాక్టర్లు, గృహిణిలు సైతం నృత్యం నేర్చుకోవడానికి వస్తున్నారు. నాట్యం వల్ల పిల్లల్లో మానసిక పరివర్తన వస్తుంది.
  - ఎస్. కరీముల్లా, నటరాజ నృత్య కళామందిరం
  
 ప్రయోజనాలివీ...
 పిల్లల్లో మానసిక పరివర్తన వస్తుంది.భారతీయ ఇతిహాసాలను నృత్యరూపక ప్రదర్శన చేయడం వల్ల సంస్కృతి, సంప్రదాయాల గురించి తెలుస్తుంది.తల్లిదండ్రులు, పెద్దలపై గౌరవభావం పెరుగుతుంది.నాట్యంలో యోగా దాగుంది, తద్వారా ఆరోగ్యం సిద్దిస్తుంది.శారీరక,మానసిక వ్యాయా మం చేకూరుతుంది. ఏకాగ్రత పెరిగి చదువులో రాణిస్తారు.కళలు, సంప్రదాయంపై అభిరుచి పెరుగుతుంది.


 మసాకో ఓనో... జపాన్ యువతి. ఇది కాదు ఆమె పరిచయం. ఆమె పేరు ‘హండ్రెడ్ మోస్ట్ రెస్పెక్టెడ్ అండ్ అవుట్‌స్టాండింగ్ జపనీస్ ఇన్ ద వరల్డ్’ అనే జాబితాలో నమోదైంది. ‘న్యూస్‌వీక్’ మ్యాగజైన్ 2008, 2009లో ప్రకటించిన జాబితా అది. అయితే... అంతకంటే ముందే ఆమె భారతదేశానికి బాగా తెలుసు, ఆమెకు భారతదేశం ఇంకా బాగా తెలుసు. ఇటీవల హైదరాబాద్‌లోని తాజ్ వివాంతా హోటల్‌లో నిర్వహించిన సాంస్కృతిక కార్యక్రమంలో జిడ్డు కృష్ణమూర్తి తత్వం ఆధారంగా ‘ఎసెన్స్ ఆఫ్ లైఫ్’ అనే థీమ్‌తో ఒడిస్సీ నాట్యం చేసి మరోసారి అందరినీ పలకరించింది. ఒడిస్సీ నాట్యం నేర్చుకున్న విదేశీ వనితగా మనకు చిరపరిచితురాలు షరోన్‌లోవన్. అదే బాణీని అనుసరించిన మరో విదేశీ వనిత మసాకో ఓనో. ఈమె కూడా ఒడిస్సీ నాట్యాన్ని ఖండాంతరాలకు విస్తరింపచేస్తోంది. తాజాగా జిడ్డు కృష్ణమూర్తి ఫిలాసఫీకి అభినయరూపం ఇచ్చి ప్రదర్శనలిస్తోంది. ఆమెతో ఇంటర్వ్యూ...
  
  మీరు పుట్టింది, పెరిగింది ఎక్కడ?
  జపాన్ రాజధాని నగరం టోక్యోలో.
  
  భారతీయ నాట్యం మీద ఆసక్తి ఎలా కలిగింది?
  టోక్యోలో ఇండియన్ డాన్స్ ఫెస్టివల్స్ జరిగేవి. ఆ సందర్భంగా భరతనాట్యం వంటి చాలా నాట్యాలను చూశాను. అప్పుడు నాకు ఇండియన్ డాన్స్ ఫార్మ్‌లో ఏదో ప్రత్యేకత ఉందనిపించింది. అప్పటికే నాకు వెస్టర్న్ క్లాసికల్ బాలే, హిప్‌హాప్ వంటి డాన్సులు బాగా వచ్చు. కానీ ఇండియన్ డాన్స్ మీద లోతుగా అధ్యయనం చేయాలనుకున్నాను.
  
  మొదటి సారి ఇండియాకి ఎప్పుడు వచ్చారు?
  1996లో. డాన్సు నేర్చుకోవడానికి వచ్చి భారత్ అంతా పర్యటించాను. బెంగళూరులోని ‘నృత్యగ్రామ్’లో చేరి ఒడిస్సీ నాట్యసాధన ప్రారంభించాను. ఒడిస్సీలో నా మొదటి గురువు ప్రతిమా గౌరి.
  
  ఒడిస్సీతోపాటు ఇతర భారతీయ కళలను కూడా నేర్చుకున్నారా?
  యోగ, కలరిపయట్టు మార్షల్ ఆర్ట్, మయూర్‌భంజ్ డాన్సులు నేర్చుకున్నాను, కానీ యోగ, ఒడిస్సీ నేర్చుకున్నంతగా మిగిలిన వాటిని సాధన చేయలేదు.
  
  జిడ్డు తత్వం మీద ఒడిస్సీ నాట్యం చేయడం కొత్త ప్రయోగంగా అనిపించిందా?
  గొప్ప ప్రయోగమే, సంప్రదాయ నాట్యాన్ని సమకాలీన అంశాల ఇతివృత్తంతో ప్రయోగం చేస్తుంటాం. కానీ ఇది జీవిత సారాన్ని తెలియచేసే ఫిలాసఫీ ఆధారంగా నాట్యరీతిని రూపొందించడం గొప్ప అనుభూతి.
  
  ఇతర నాట్యరీతులకు,  భారతీయ నాట్యరీతులకు మధ్య మీరు గమనించిన వ్యత్యాసం?
  భారతీయ నాట్యరీతులలో భౌతిక ముద్రలతోపాటు మనసును కూడా లగ్నం చేయాలి. ఈ డాన్సులను ఫ్యాషన్‌గా చేస్తే సరిపోదు, పాషన్‌తో చేయాలి.
  
  ఒడిస్సీ నాట్యాన్ని టోక్యోలోనే సాధన చేస్తున్నారా?
  టోక్యోతోపాటు భువనేశ్వర్‌లోనూ చేస్తున్నాను. ఒరిస్సా రాజధాని భువనేశ్వర్‌లో ‘మోపా’ స్థాపించాను. ఇది ఒడిస్సీ డాన్స్ స్కూల్. మోపా అంటే ‘మసాకో ఓనో పెర్‌ఫార్మింగ్ ఆర్ట్స్’. దీని శాఖ టోక్యోలో కూడా ఉంది. మోపా ద్వారా ఒడిస్సీ నాట్యంలో శిక్షణ ఇస్తున్నాను. దీనితోపాటుగా ‘ముద్ర’ ఫౌండేషన్ అనే చారిటీ కూడా పనిచేస్తోంది. నాట్యం నేర్చుకోవాలనే ఆసక్తి ఉండి, ఫీజులు చెల్లించలేని వారికి ఈ ఫౌండేషన్ ద్వారా నేర్పిస్తున్నాం.
  
  భువనేశ్వర్, టోక్యో... రెండు చోట్ల శిక్షణ తరగతులను నిర్వహిస్తున్నారా?
  అవును, ప్రతి రెండు నెలలకోసారి టోక్యో, భువనేశ్వర్‌ల మధ్య ప్రయాణిస్తుంటాను. భువనేశ్వర్‌లో ‘మోపా’ని నేనే స్వయంగా నిర్వహిస్తుంటాను. టోక్యో శాఖను మా కుటుంబ సభ్యులు చూసుకుంటారు.
  
  భారతీయ నాట్యంతోపాటు ఇక్కడి వస్త్రధారణ కూడా అలవాటైనట్లుంది!?
  నిజమే, నాకు చుడీదార్ ఇష్టం. అలాగే ఇక్కడి భోజనం కూడ. సౌత్ ఇండియాలో చేసే రసం చాలా బాగుంటుంది. ప్లెయిన్ రైస్, రసం కాంబినేషన్ నాకు చాలా ఇష్టం. ఒరిస్సాలో చేసే చేపల కూర కూడ.
  
  మసాకో ఓనో అంటే అర్థం?
  సులభంగా సాధించలేనిది, ఆత్మీయమైనది అని!
  
  భారతీయ నాట్యాన్ని ఇప్పటి వరకు ఏయే దేశాల్లో ప్రదర్శించారు?
  ఇండియా, జపాన్‌లతోపాటుగా అమెరికా, కెనడా, ఇటలీ, స్వీడన్, ఆస్ట్రేలియా, ఫ్రాన్స్, మలేసియా, సింగపూర్, థాయ్‌లాండ్, ఇండోనేసియా, శ్రీలంక దేశాల్లో ప్రదర్శనలిచ్చాను, వర్క్‌షాపులు నిర్వహించాను.
  
   - వాకా మంజులారెడ్డి, సాక్షి ఫీచర్స్ ప్రతినిధి
  ఫొటోలు: ఠాగూర్
  
  జిడ్డు కృష్ణమూర్తి తత్వం గురించి ఎప్పుడు తెలుసుకున్నారు?
  నా స్కూల్ ఏజ్‌లో... బహుశా సెవెన్త్ లేదా ఎయిత్ క్లాసుల్లో ఉన్నప్పుడు మా నాన్నగారి లైబ్రరీలో చూశాను. అది జిడ్డు కృష్ణమూర్తి తత్వానికి జపనీస్ వెర్షన్ పుస్తకం. అప్పుడు సరదాగా చేసిన ప్రయత్నం తప్ప సీరియస్‌గా చదవలేదు. డాన్సు నేర్చుకోవడానికి ఇండియాకి వచ్చిన తర్వాత బెంగళూరు లైబ్రరీలో ఇంగ్లిష్ వెర్షన్ చూశాను. అప్పుడు కొంత చదివాను. జిడ్డు తత్వాన్ని అధ్యయనం చేసింది మాత్రం ఈ డాన్సు ఫార్మ్ కోసమే. ఆయన తత్వాన్ని చదివిన తర్వాతనే ‘ఎసెన్స్ ఆఫ్ లైఫ్’ డాన్స్ కొరియోగ్రఫీ చేసుకున్నాను.
  


 విశాఖకల్చరల్,న్యూస్‌లైన్: భారతీయ నృత్య వైభవం నగరంలో సాక్షాత్కరించింది.  అఖిల భారతీయ శాస్త్రీయ నృత్యోత్సవాల ప్రారంభ కార్యక్రమంగా ప్రముఖ కథక్ నృత్య కళాకారిణి, రాష్ట్రపతి ప్రణబ్ ముఖర్జీ తనయ శర్మిష్ఠా ముఖర్జీ కథక్ ప్రవాహ్‌లో ఓలలాడిన నృత్యకళాభిమానులు తదుపరి అంశంగా జొన్నలగడ్డ సూర్యఈశ్వర ప్రసాద్ చేసిన భజన్ నృత్యంతో పరవశించారు. నటరాజ్ మ్యూజిక్ అండ్ డాన్స్ అకాడమీ ఆధ్వర్యంలో కళాభారతిలో గురువారం 6వ అఖిలభారత శాస్త్రీయ నృత్యోత్సవాలు ఆరంభమయ్యాయి.
 
 ఉత్సవాల తొలి ప్రదర్శనగా భారత రాష్ట్రపతి కుమార్తె శర్మిష్ఠా ముఖర్జీ కథక్ నృత్యం ప్రదర్శించారు. కథక్ ప్రవాహ్ పేరున గంటపాటు ఆమె ప్రదర్శించిన నృత్య విన్యాసాలు ప్రేక్షకులను రంజింపజేశాయి. శర్మిష్ఠతో పాటు ఆమె బృంద సభ్యులు తృప్తీ సన్యాల్, శివానీ మల్హోత్రా, దివ్యలు నృత్య సహకారం అంచిందారు. రెండవ అంశంగా జొన్నలగడ్డ సూర్యఈశ్వర ప్రసాద్ భజన్ నృత్యం కళా ప్రియులను అలరించింది. మరాఠీ అభంగ్, పాండురంగ భజన కీర్తనలతో నాట్యం ఆరంభమైంది. అన్నమాచార్య కృతులు, రామదాసు కీర్తనలు అలరించాయి.
 
 ఈ సందర్భంగా శర్మిష్ఠకు నాట్యశ్రీ బిరుదు ప్రదానం చేశారు. ముందుగా జరిగిన ప్రారంభ సభలో బి.విక్రమ్‌గౌడ్ స్వాగతం పలికారు.  కార్యక్రమంలో గీతం యూనివర్సిటీ అధ్యక్షుడు ఎంవీవీఎస్ మూర్తి, ఎమ్మెల్యే మళ్ల విజయప్రసాద్, విజయ నిర్మాణ్  ఎస్. విజయకుమార్, లా కాలేజీ ప్రిన్సిపాల్ ఎ.సుబ్రహ్మణ్యం, శ్రీధర్ బిత్రా, ఒ.నరేష్‌కుమార్, సుదీప్తా, కె.ఎస్.కోటేశ్వరరావు, యు.నాగభూషణం పాల్గొన్నారు.