ప్రపంచ వ్యాప్తంగా పలు దేశాల్లో అత్యధిక వేతనాలు పొందుతున్న సీఈవోల్లో భారత సంతతికి చెందినవారి సంఖ్య క్రమంగా పెరుగుతోంది. పాలో ఆల్టో నెట్‌వర్క్స్ సీఈఓ, భారత సంతతికి చెందిన నికేశ్‌ అరోరా 2023లో అమెరికాలో అత్యధిక వేతనం పొందిన సీఈవోగా రెండో స్థానంలో నిలిచారు.బ్రాడ్‌కామ్‌ సీఈవో హాక్ టాన్ 162 మిలియన్‌ డాలర్ల వేతనంతో అగ్రస్థానంలో ఉండగా రెండో స్థానంలో ఉన్న నికేశ్‌ అరోరా వేతనం 151.43 మిలియన్‌ డాలర్లు (సుమారు రూ.1,260 కోట్లు). వాల్ స్ట్రీట్ జర్నల్ ప్రచురించిన విశ్లేషణ ప్రకారం.. అత్యధిక వేతనం పొందిన టాప్ 500 సీఈవోలలో 17 మంది భారతీయ సంతతి వ్యక్తులు ఉన్నారు.అడోబ్‌కు చెందిన శంతను నారాయణ్ అత్యధిక వేతనం పొందుతున్న భారతీయ సంతతికి చెందిన సీఈవోగా రెండవ స్థానంలో ఉన్నారు. మొత్తం మీద 11వ ర్యాంక్‌ను పొందారు. నారాయణ్ వేతనం 44.93 మిలియన్‌ డాలర్లు. ఇక మెటా సీఈవో మార్క్ జుకర్‌బర్గ్ 24.40 మిలియన్‌ డాలర్ల వేతనం పొందగా ఆల్ఫాబెట్ సీఈవో భారత్‌లో జన్మించిన సుందర్ పిచాయ్ 8.80 మిలియన్‌ డాలర్లు వార్షిక వేతనం అందుకున్నారు.ఢిల్లీ ఎయిర్ ఫోర్స్ పబ్లిక్ స్కూల్‌లో చదువుకున్న నికేశ్‌ అరోరా మొట్టమొదటిసారిగా గూగుల్‌లో చీఫ్ బిజినెస్ ఆఫీసర్‌గా అంతర్జాతీయ దృష్టిని ఆకర్షించారు. 2014లో సాఫ్ట్‌బ్యాంక్‌కు నాయకత్వం వహించారు. సైబర్‌ సెక్యూరిటీ కంపెనీ అయిన పాలో ఆల్టో నెట్‌వర్క్స్‌కు 2018 నుంచి నాయకత్వం వహిస్తున్నారు. ఆయన వేతనం ముఖ్యంగా షేర్లు, ఈక్విటీ అవార్డులతో కూడి ఉంటుంది.

వాషింగ్టన్‌: భారత సంతతికి చెందిన జడ్జి రూపాలీ హెచ్‌.దేశాయ్‌ చరిత్ర సృష్టించారు. అమెరికాలో అత్యంత శక్తిమంతమైన నైన్త్‌ సర్క్యూట్‌ అపీల్స్‌ కోర్ట్‌ జడ్జిగా నియమితురాలయ్యారు. దక్షిణాసియా నుంచి ఈ ఘనత సాధించిన తొలి జడ్జి ఆమే. 44 ఏళ్ల రూపాలీ నియామకానికి సెనేట్‌ 67–29 ఓట్లతో ఆమోదముద్ర వేసింది. అత్యంత ప్రతిభావంతురాలైన రూపాలీ నామినేషన్‌కు భారీ మద్దతు లభించడం ఆశ్చర్యం కలిగించలేదని సెనేట్‌ జ్యుడీషియరీ కమిటీ చైర్‌పర్సన్‌ డిక్‌ డర్బిన్‌ కొనియాడారు. శాన్‌ఫ్రాన్సిస్కో కేంద్రంగా పని చేసే నైన్త్‌ సర్క్యూట్‌ అమెరికాలోని 13 పవర్‌ఫుల్‌ అపీల్‌ కోర్టుల్లో అతి పెద్దది. 9 రాష్ట్రాలు, 2 ప్రాంతాలు దీని పరిధిలోకి వస్తాయి. రూపాలీ 1978లో కెనడాలో జన్మించారు. అమెరికాలో న్యాయవాదిగా, న్యాయ నిపుణురాలిగా 16 ఏళ్ల అనుభవం ఆమె సొంతం. అరిజోనా వర్సిటీ నుంచి న్యాయ శాస్త్రంలో మాస్టర్స్‌చేశారు. మెరిట్‌ స్టూడెంట్‌గా పేరు తెచ్చుకున్నారు. 2007 నుంచి కాపర్‌స్మిత్‌ బ్రోకెల్‌మన్‌ లా సంస్థలో పార్టనర్‌గా ఉన్నారు. 2021లో కీలకమైన అమెరికన్‌ లా ఇన్‌స్టిట్యూట్‌లో మెంబర్‌గా చేరారు.  గత అమెరికా అధ్యక్ష ఎన్నికల్లో అరిజోనా రాష్ట్రంలో జో బైడెన్‌ గెలుపును సవాలు చేస్తూ డొనాల్డ్‌ ట్రంప్‌ వేసిన కేసులో ట్రంప్‌కు వ్యతిరేకంగా సమర్థంగా వాదనలు విన్పించి ఆకట్టుకున్నారు.

న్యూజిలాండ్‌ పోలీసు విభాగంలో సీనియర్‌ సార్జెంట్‌ హోదాకు చేరుకున్న భారతదేశపు మొట్టమొదటి మహిళ మణిదీప్‌ కౌర్‌. సంప్రదాయ కుటుంబంలో పుట్టి పెరిగి ఏ మాత్రం పరిచయం లేని ప్రపంచంలో ఆఫీసర్‌ స్థాయికి ఎలా చేరిందో తెలుసుకోవాలంటే మణిదీప్‌ కౌర్‌ కథ తెలుసుకోవాలి. సంప్రదాయ పంజాబీ కుటుంబంలో పుట్టి పెరిగింది మణిదీప్‌ కౌర్‌. పద్దెనిమిదో ఏట పెళ్లి చేసేశారు ఇంట్లో. పెళ్లయిన ఏడాదికే మొదటి బిడ్డ. అర్ధంతరంగా ఆగిపోయిన కాలేజీ చదువు. ఇద్దరు పిల్లలు, బాధ్యతారాహిత్యంగా ఉండే భర్త. ప్రతిరోజూ గొడవల కాపురం. విసిగి వేసారి తొమ్మిదేళ్ల వైవాహిక జీవితానికి విడాకులిచ్చి పుట్టింటికి చేరింది ఇద్దరు పిల్లలను వెంటేసుకొని. ఆర్థికంగా ఎవరిమీదా ఆధాపడకుండా బతకాలన్న ఆశ ఆమెను ఇంటి నుంచి బయటకు అడుగుపెట్టేలా చేసింది. సేల్స్‌ ఉమన్‌గా ఉద్యోగంలో చేరింది. ఇంటింటికీ వెళ్లి మా టెలిఫోన్‌ సేవలకు మారమని కస్టమర్లను ఒప్పించే పని అది. ఇంగ్లీషు మాట్లాడటం రాదు. అందుకని, చెప్పవలసిన నాలుగు మాటలను కాగితంపై రాసుకొని, కస్టమర్లకు ఇచ్చేది. పని చేసే చోట న్యూజిలాండ్‌లో టాక్సీ నడుపుకునైనా బాగా బతకచ్చనే మాటలు వింది. టాక్సీ డ్రైవర్‌గా! అలా, 27 ఏళ్ల వయసులో ఇద్దరు పిల్లలను తల్లిదండ్రుల వద్ద వదిలి, న్యూజిలాండ్‌కి ప్రయాణమైంది. ఆక్లాండ్‌లోని వైఎంసిఎ మహిళల లాడ్జిలో బస. టాక్సీడ్రైవర్‌గా జీవనం. ఆ లాడ్జిలో జాన్‌పెగ్లర్‌ అనే రిటైర్డ్‌ పోలీస్‌ ఆఫీసర్‌ నైట్‌టైమ్‌ రిసెప్షనిస్ట్‌గా పనిచేసేవాడు. రోజూ వచ్చేటప్పుడు, వెళ్లేటప్పుడు పెగ్లర్‌తో మాటలు కలిశాయి. కొన్ని రోజుల్లోనే ఇద్దరికీ సంభాషణ పెరిగింది. మణిదీప్‌ పెగ్లర్‌ని ‘కివి డాడ్‌’ అని పిలిచేది. అతను తను పోలీసాఫీసర్‌గా సాధించిన విజయాలు, చూసిన జీవిత కథలను చెబుతుండేవాడు. మాటల మధ్యలో ఒకరోజు పెగ్లర్‌తో ‘పోలీస్‌ ఆఫీసర్‌ను కావాలంటే ఏం చేయాలి..’ అని అడిగింది. దాంతో పోలీస్‌ ఫోర్స్‌లోకి వెళ్లేందుకు మణిదీప్‌కు పెగ్లర్‌ దారి చూపించాడు. కానీ, అందులో ఇమడటం ఆమెకు అంత సులభం కాలేదు. సంప్రదాయ అడ్డుగోడలను తనకై తాను తొలగించుకోవాల్సి వచ్చింది. కాళ్లు కనిపించేలా స్విమ్మింగ్‌ డ్రెస్‌ వేసుకొని ఈత నేర్చుకోవడం వంటిది అందులో ఒకటి. ఫిట్‌గా ఉండటానికి 20 కేజీల బరువు తగ్గాల్సి వచ్చింది.   తిరస్కారానికి గురైనా మానని ప్రయత్నం 2002లో పిల్లలను న్యూజిలాండ్‌కు తెప్పించుకుంది. రెండేళ్ల శిక్షణ తర్వాత మణిదీప్‌ మొదటిసారి పోలీసు యూనిఫామ్‌ ధరించింది. సమయం గడిచేకొద్దీ ఎంత కష్టమైనా సరే కమాండింగ్‌ చేసే పొజిషన్‌కు రావాలనుకుంది. ముందు సెటిలర్స్‌ బాధితులకు మద్దతునిచ్చే సీనియర్‌ కానిస్టేబుల్‌. తరువాత, ప్రమోషన్ల కోసం ప్రతీసారీ అప్లై చేసుకుంటూనే ఉంది. ప్రతిసారీ రిజెక్ట్‌ అయ్యేది. కానీ, ఏ మాత్రం పట్టించుకోకుండా మళ్లీ మళ్లీ ప్రయత్నించింది. మణిదీప్‌ కౌర్‌కు సీనియర్‌ సార్జంట్‌ బ్యాడ్జ్‌ ఇస్తున్న అధికారులు ‘న్యూజిలాండ్‌ వలస వచ్చినవారికి వారికి తమ జాతి ప్రజల తరపున పోలీసు బలగాలలో ప్రాతినిధ్యం వహించడం ఎంత ముఖ్యమో పెగ్లర్‌ చెప్పడం నాకు బాగా గుర్తు. అందుకే, నా ప్రయత్నాన్ని కొనసాగిస్తూనే ఉండేదాన్ని. అలా ప్రయత్నం ఫలించి సీనియర్‌ సార్జెంట్‌ పదోన్నతి లభించింది’ అని ఆనందంగా చెబుతుంది మణిదీప్‌ కౌర్‌. న్యూజిలాండ్‌ పోలీసు విభాగంలో సీనియర్‌ సార్జెంట్‌ హోదాకు చేరుకున్న భారతదేశపు మొదటి మహిళ మణిదీప్‌ కౌర్‌. ఇప్పుడు ఆమె వయసు 52 ఏళ్లు. ఆమె పిల్లలు ఇద్దరూ పెద్దవారయ్యారు. మనవరాళ్ళు కూడా ఉన్నారు. కుటుంబ సభ్యులతో మణిదీప్‌ కౌర్‌ ‘మా అమ్మానాన్నలు, పిల్లలు, మా సిబ్బంది, అధికారులతో సహా చుట్టూ ఉన్న ప్రతి ఒక్కరూ జీవితంలో ఎదగడానికి నాకు సహాయం చేశారు. మీరూ మీ చుట్టూ గమనించండి, సహాయపడే వ్యక్తులు ఎప్పుడూ ఉంటారు. అవకాశాల కోసం వెతకండి. సాధించాల్సిన వాటిని చేరుకోండి. మీలో ఒక వైవిధ్యం చూపడానికి వాటిని పట్టుకోండి, అప్పుడు మీరు ప్రపంచానికే ఒక వైవిధ్యం చూపచ్చు’ అంటోంది మణిదీప్‌ కౌర్‌. ‘ఈ దేశాన్ని వలసదారుల పిల్లలు సమస్యలను ఎదుర్కోవాల్సిన అవసరం లేనంత సురక్షితంగా మార్చడం నా విధుల్లో ముఖ్యమైనది’ అనే ఈ సార్జెంట్‌ది ఎన్నో షేడ్స్‌ ఉన్న స్ఫూర్తినిచ్చే కథ. ఆమె వైవాహిక జీవితం దెబ్బతింది. భర్త నుంచి పిల్లలను తెచ్చుకోవడానికి పోరాడింది. బతుకు తెరువుకై పిల్లలను కొంతకాలం విడిచిపెట్టాల్సి వచ్చింది. తల్లి మాత్రమే ఊహించగల భయంకరమైన నొప్పి అది. పరాయిదేశంలో జీవించి, ప్రతిరోజూ కష్టపడి, అనేక అసమానతలు ఉన్నప్పటికీ ధైర్యంగా ముందడుగే వేసింది. ఇక మరో దారిలేక జీవితమే ఆమె దారిలోకి వచ్చింది. ఆమెను రోల్‌ మోడల్‌గా నిలిపింది.

వాషింగ్టన్‌: అదో అరుదైన దృశ్యం.. చరిత్ర సృష్టించిన అపురూపమైన సందర్భం. అగ్రరాజ్యానికి తొలి మహిళా ఉపాధ్యక్షురాలు, తొలి నల్లజాతీయురాలు, తొలి ప్రవాస భారతీయురాలు ఇలా ఎన్నో ప్రత్యేకతల్ని సొంతం చేసుకున్న కమలా హ్యారిస్‌ జాతినుద్దేశించి ప్రసంగించినప్పుడు వెన్నెల కాంతులతో పోటీ పడే తెల్ల రంగు దుస్తుల్లో మెరిసిపోయారు. మహిళా హక్కుల కోసం ఉద్యమించడమే తన లక్ష్యమని చెప్పడానికే ఆ రంగు దుస్తులు వేసుకున్నారు. అమెరికాలో 1913లో ఏర్పాటైన రాజకీయ సంస్థ ది నేషనల్‌ వుమెన్‌ పార్టీ తెలుపు, వంగపండు, బంగారం రంగుల్ని మహిళా ఉద్యమానికి ప్రతీకగా ఎంచుకుంది. అందులో తెలుపురంగు స్వచ్ఛతకి ప్రతిబింబంగా నిలుస్తుంది. అలా తెల్లరంగులో రాజహంసలా ఈ దేశానికి తాను తొలి మహిళా అధ్యక్షురాలిని అని, కానీ తాను చివరి మహిళని కాదు అంటూ ఉద్వేగ భరిత ప్రసంగాన్ని చేశారు. స్ఫూర్తిని నింపే వీడియో అగ్రరాజ్యానికి ఉపాధ్యక్షురాలిగా ఎన్నికైన భారత సంతతికి చెందిన కమలా హ్యారిస్‌ ఇటీవల తన మేనకోడలిని ఒళ్లో కూర్చోబెట్టుకొని ముచ్చటించిన ఒక వీడియో వైరల్‌గా మారింది. ఆ వీడియోలో నాలుగేళ్ల చిన్నారి అమరా అజాగు తనకు అమెరికాకు అధ్యక్షురాలు కావాలని చెప్పింది. దానికి కమల నువ్వు కూడా అధ్యక్షురాలివి కావొచ్చని అయితే దానికి చాలా కష్టపడాలని, 35 సంవత్సరాలు నిండాలని చెప్పి ఆ చిన్నారిలో స్ఫూర్తిని నింపారు. అదే స్ఫూర్తిని కమల తనలో తాను చాలా ఏళ్లుగా నింపుకుంటూ వస్తున్నారు. ఆ కష్టపడే తత్వం, తల్లి చెప్పిన మాటల్ని జీవితంలో తుచ తప్పకుండా ఆచరించడం, అంతులేని ఆత్మవిశ్వాసం ఆమెని ఉపాధ్యక్ష పీఠానికి దగ్గర చేశాయి. నల్ల జాతీయురాలినని చెప్పడానికి గర్వపడతా కమల తండ్రి డేవిడ్‌ హ్యారిస్‌ జమైకా దేశస్తుడు. తల్లి శ్యామలా గోపాలన్‌ భారతీయురాలు. చెన్నైకి చెందిన కేన్సర్‌ పరిశోధకురాలు, పౌరహక్కుల ఉద్యమకారిణి. చిన్నతనంలో తల్లిదండ్రులు విడిపోవడంతో తల్లి సంరక్షణలోనే పెరిగారు. ఆమె గుణాలు పుణికిపుచ్చుకొని జాతి వివక్షపై ధిక్కార స్వరం, వలసవాదులపై ఉదారవాదం, చట్టసభల్లో ప్రశ్నించే తత్వం, అద్భుతమైన నాయకత్వ లక్షణాల్ని సొంతం చేసుకున్నారు. ‘‘అమెరికా మమ్మల్ని నల్లజాతివారిగానే చూస్తుందని మా అమ్మకి బాగా తెలుసు. అందుకే నన్ను, మా చెల్లెల్ని ఆత్మవిశ్వాసంతో పెంచారు. నల్లజాతీయురాలినని చెప్పుకోవడానికి నేను గర్వపడతాను’’అని కమలా హ్యారిస్‌ తన ఆటోబయోగ్రఫీ ది ట్రూత్స్‌ వి హోల్డ్‌లో రాసుకున్నారు. తన సహచర లాయర్‌ డగ్లస్‌ ఎమాఫ్‌ను పెళ్లాడారు. డగ్లస్‌కు మొదటి భార్య ద్వారా ఇద్దరు పిల్లలున్నారు. వారిని సొంత పిల్లల్లా పెంచారు. సమర్థవంతమైన నాయకురాలు న్యాయశాస్త్రంలో పట్టా తీసుకొని డిస్ట్రిక్ట్‌ అటార్నీగా. రాష్ట్ర అటార్నీ జనరల్‌గా తన సత్తా చాటారు. అద్భుతమైన వాక్పటిమతో మంచి లాయర్‌గా పేరు తెచ్చుకున్నారు. 2016లో డెమొక్రాటిక్‌ పార్టీ తరఫున సెనేట్‌కి ఎన్నికై జాతీయ రాజకీయాల్లోకి వచ్చారు. తొలుత అమెరికాకి అధ్యక్షురాలు కావాలని కలలు కన్నారు. జో బైడెన్‌తో పోటీ పడి గత ఏడాది చివర్లో రేసు నుంచి తప్పుకున్నారు. ఆ తర్వాత కొద్ది నెలలకే బైడెన్‌కు మద్దతుగా నిలిచి ఉపాధ్యక్ష పదవిని చేజిక్కించుకున్నారు. ఒక సెనేటర్‌గా ఆమెలో నాయకత్వ లక్షణాలు ప్రపంచానికి ఎప్పుడో తెలిశాయి. ఇంటెలిజెన్స్, జ్యుడీషియరీ విభాగాల్లో మంచి పట్టున్న ఆమెకు మొదటి రోజు నుంచే ప్రభుత్వాన్ని నడిపించగల సామర్థ్యం ఉంది. నా ఫోన్‌ రింగ్‌ ఆగలేదు అగ్రరాజ్యం ఉపాధ్యక్షురాలిగా ఎన్నికై కమలా హ్యారిస్‌ చరిత్ర తిరగరాయడంతో భారత్‌లోని ఆమె స్వగ్రామంలో సంబరాలు అంబరాన్నంటాయి. ఢిల్లీలో ఉంటున్న ఆమె మేనమామ గోపాలన్‌ బాలచంద్రన్‌ కమల విజయం పట్ల ఆనందం వ్యక్తం చేశారు. కమల విజయం సాధించిన దగ్గర్నుంచి తన ఫోన్‌ రింగ్‌ అవుతూనే ఉందని ఆయన చెప్పారు.   తొలి మహిళనే కానీ... మీరు ఆశను, ఐక్యతను, మర్యాదను, శాస్త్రీయతను, నిజాన్ని ఎన్నుకున్నారు. అమెరికా తదుపరి అధ్యక్షుడిగా జో బైడెన్‌ను ఎన్నుకున్నారు. ఆయన గాయాలను మాన్పే శక్తి ఉన్న వ్యక్తి. నేను ఉపాధ్యక్ష పదవికి ఎన్నికైన తొలి మహిళనే కావచ్చు. కానీ చివరి స్త్రీని మాత్రం కాను. ఎందుకంటే ఈ ఎన్నికలను, ఈ కార్యక్రమాన్ని చూస్తున్న చిన్నారులకు వారి ముందున్న అవకాశాలు స్పష్టంగా కనిపిస్తున్నాయి.    – కమలా హ్యారీస్‌

వాషింగ్టన్‌: అత్యంత ఉత్కంఠ రేకెత్తించిన అమెరికా అధ్యక్ష ఎన్నికల్లో డెమొక్రాటిక్‌ అభ్యర్థి జోసెఫ్‌ రాబినెట్‌ బైడెన్‌ జూనియర్‌(77)నే చివరికి విజయం వరించింది. ఆయన అమెరికా సంయుక్త రాష్ట్రాల 46వ అధ్యక్షుడిగా శ్వేతసౌధంలో అడుగు పెట్టేందుకు మార్గం సుగమమైంది. ఉపాధ్యక్ష పదవిని చేపట్టనున్న తొలిమహిళగా, భారత సంతతికి చెందిన కమలా హ్యారిస్‌ రికార్డుసృష్టించనున్నారు. శనివారం జరిగిన ఓట్ల లెక్కింపులో సొంత రాష్ట్రం పెన్సిల్వేనియా రాష్ట్రంలో జో బైడెన్‌ విజయం సాధించారు. ఈ గెలుపుతో ఆయనకు మరో 20 ఎలక్టోరల్‌ ఓట్లు దక్కాయి. ఎలక్టోరల్‌ కాలేజీలోని 538ఓట్లకుగాను మ్యాజిక్‌ ఫిగర్‌ 270 కాగా, 284 ఓట్లు బైడెన్‌ ఖాతాలో జమయ్యాయి. జార్జియా(16,) నార్త్‌ కరోలినా(15) అలాస్కా(3) వంటి రాష్ట్రాల్లో కౌంటింగ్‌ జరుగుతోంది. ఈ ఫలితాలు ఎలా ఉన్నప్పటికీ తుది ఫలితాలపై ఎటువంటి ప్రభావం చూపదు. దీంతో బైడెనే తదుపరి అధ్యక్షుడని సీఎన్‌ఎన్, వాషింగ్టన్‌ పోస్ట్‌ తదితర ప్రముఖ వార్తా సంస్థలు ప్రకటించాయి. ‘జోసెఫ్‌ ఆర్‌.బైడెన్‌ జూనియర్‌ అమెరికా 46వ అధ్యక్షుడిగా శనివారం ఎన్నికయ్యారు. దేశంలో సాధారణ రాజకీయ పరిస్థితులను నెలకొల్పుతాననీ, ఆరోగ్యం, ఆరి్థక సంక్షోభాలను ఎదుర్కొంటున్న సమయంలో జాతీయ ఐక్యతను సాధిస్తానని ఆయన హామీ ఇచ్చారు. ట్రంప్‌ హయాంలో వైట్‌ హౌస్‌లో నాలుగేళ్ల పాటు సాగిన గందరగోళానికి ఆయన ముగింపు పలికారు’ అని న్యూయార్క్‌ టైమ్స్‌ పేర్కొంది. అధ్యక్షుడిగా ఎన్నికైనట్లు తెలిసిన వెంటనే బైడెన్‌ ట్విట్టర్‌ ద్వారా స్పందించారు. ‘అమెరికా, ఈ గొప్ప దేశానికి నాయకత్వం వహించడానికి నన్ను ఎన్నుకోవడం గౌరవంగా భావిస్తున్నా.  మీరు నాకు ఓటేసినా వేయకున్నా అందరు అమెరికన్లకు అధ్యక్షుడిగా వ్యవహరిస్తా. నా లక్ష్యం చాలా కష్టమైంది. అయినప్పటికీ నాపై ఉంచిన నమ్మకాన్ని నిలబెడతా’ అని పేర్కొన్నారు. ‘ఈ ఎన్నికలు జో బైడెన్‌ కంటే నా కంటే కూడా దేశానికే ఎక్కువ అవసరం. ఇవి అమెరికా ఆత్మ గౌరవానికి సంబంధించినవి. అందుకోసం మనం పోరాడుదాం. లక్ష్యం సాధించేందుకు అందరం కలిసి పనిచేయడం ప్రారంభిద్దాం’ అని కమలా హ్యారిస్‌ ట్విట్టర్‌లో పేర్కొన్నారు. గోల్ఫ్‌ క్లబ్‌కు ట్రంప్‌ ఇప్పటి వరకు ఎన్నికల్లో అక్రమాలంటూ పలు ఆరోపణలు చేస్తున్న ప్రస్తుత అధ్యక్షుడు డొనాల్డ్‌ ట్రంప్‌ కథ ముగిసిట్లేనని భావిస్తున్నారు. శనివారం ట్రంప్‌..వర్జీనియా రాష్ట్రం స్టెర్లింగ్‌లో ఉన్న తన సొంత ట్రంప్‌ నేషనల్‌ గోల్ఫ్‌ క్లబ్‌కు వెళ్లిపోయారు. ఈ ఓటమితో అమెరికా చరిత్రలో రెండో ప్రపంచ యుద్ధం తర్వాత రెండో విడత ఎన్నిక కాలేని మూడో అధ్యక్షుడిగా ఆయన చరిత్రకెక్కారు. గడిచిన 25 ఏళ్లలో 1992లో జార్జి హెచ్‌. బుష్‌ తర్వాత ఇలా పరాజయం మూటగట్టుకున్న ఏకైక అధ్యక్షుడు కూడా ట్రంప్‌నే. బోసిపోయిన వైట్‌హౌస్‌ ఎన్నికల ఫలితాల ప్రభావం అధ్యక్షభవనంపై పడింది. సాధారణంగా అక్కడ కనిపించే హడావుడి ఒక్కసారిగా మాయమైంది. శ్వేతసౌధం లాన్లలో మాత్రమే కొద్దిపాటి మీడియా సిబ్బంది కనిపించారు. బైడెన్‌ మద్దతు దారులు రాజధాని వాషింగ్టన్‌తోపాటు, న్యూయార్క్, షికాగో, అట్లాంటా తదితర ప్రాంతాల్లో వీధుల్లోకి వచ్చి సంబరాలు జరుపుకున్నారు. కాంగ్రెస్‌ నేత రాహుల్‌ గాం«దీ, కెనడా ప్రధానమంత్రి ట్రూడో తదితరులు బైడెన్, కమలాహ్యారిస్‌లను అభినందించారు. ఎన్నికల్లో అక్రమాలంటూ మరోసారి ట్రంప్‌ ఎన్నికల్లో అక్రమాలు జరిగాయంటూ శనివారం మరోసారి ట్రంప్‌ ఆరోపణలు చేశారు. ‘పెన్సిల్వేనియా లాంటి చోట్ల ఓట్ల లెక్కింపు కేంద్రాల్లోకి మా పరిశీలకులను రానివ్వలేదు. లోపల ఏం జరుగుతోందో తెలుసుకునేందుకు వీల్లేకుండా చేశారు. జరక్కూడనివి జరిగిపోయాయి. చట్టబద్ధమైన పారదర్శకత కనిపించలేదు. రాత్రికి రాత్రే ఫలితాలు మారిపోయాయి. అక్కడ ఏం జరిగిందో తెలియదు’అని పేర్కొన్నారు. వాస్తవానికి భారీ మెజారిటీతో మేమే ఈ ఎన్నికల్లో గెలిచాం అంటూ ప్రకటించుకున్నారు. ‘అధ్యక్ష పదవి తనదే నంటూ జోబైడెన్‌ చెప్పుకోవడం తప్పు. అలా నేను కూడా చెప్పుకోగలను. ఎన్నికల ఫలితాలపై కోర్టుల్లో వేసిన పిటిషన్లపై ఇప్పుడిప్పుడే ప్రొసీడింగ్‌ మొదలయ్యాయని పేర్కొన్నారు. ఎన్నికల రోజున రాత్రి 8 గంటల తర్వాత కూడా అక్రమంగా వేల సంఖ్యలో ఓట్లను స్వీకరించారన్నారు. ట్రంప్‌ ట్వీట్లను ట్విట్టర్‌ సంస్థ ఫ్లాగ్‌ చేసి చూపింది. వాషింగ్టన్‌లో వైట్‌హౌస్‌ వద్ద సంబరాలు


 వెల్లింగ్టన్: న్యూజిలాండ్కు చెందిన భారత సంతతి మహిళ ఓ హోటల్ భవనంపై నుంచి పడి మృతి చెందింది. కేషియా హందా (31) అనే మహిళ ఇస్తాన్బుల్లో సెప్టెంబర్ 19న గ్రాండ్ హోటల్ డి లాండ్రెస్ హోటల్లో ఏర్పాటు చేసిన టెర్రస్ పార్టీలో పాల్గొంది. పార్టీలో భాగంగా రెండు భవనాలను కలుపుతూ తాత్కాలికంగా 10 మీటర్ల వంతెనను నిర్మించారు.
 
 ఈ నేపథ్యంలో ఆమె వంతెన పైభాగంలో డాన్స్ చేస్తూ ప్రమాదవశాత్తూ జారిపడిపోయినట్టు అక్కడి హుర్రియత్ డెయిలీ న్యూస్ వెల్లడించింది. ఆస్ట్రేలియా బ్రిస్బేన్ సిటీలో పనిచేస్తున్న హందా.. ప్రపంచంలో జరిగే పలు డాన్స్ పార్టీల్లో తరచూ పాల్గొనేదంటూ ఆమె స్నేహితులు తెలిపారు. కాగా, సెప్టెంబర్ 16న జరిగిన సాల్సా పార్టీలో పాల్గొన్న ఆమె ...ఇద్దరు స్నేహితులతో కలిసి వచ్చి హోటల్ను తనిఖీ చేసినట్టు వారు పేర్కొన్నారు.