జూన్ 29 ఆదివారం: ఈ ఆదివారం మూడు ముఖ్యమైన పండుగల ప్రారంభానికి వేదిక కానుంది. పూరీ జగన్నాథ రథయాత్ర, ఆషాఢ బోనాలు, రంజాన్ నేటినుంచే ఆరంభం అవుతాయి.
  
  బోనాలు ప్రారంభం: తెలంగాణప్రాంత సంస్కృతి, సంప్రదాయాలను ప్రతిబింబించే సిసలైన సంప్రదాయ వేడుక బోనాల పండుగ నేటినుంచి ఆరంభమవుతోంది. గ్రామదేవతలకు లక్షలాది భక్తులు ప్రతి ఆషాఢంలోనూ భక్తిశ్రద్ధలతో బోనాలు సమర్పించుకుని చల్లంగ చూడమని మొక్కే ఈ పండుగ ప్రారంభ సందర్భంగా భక్తులంతా ఊరేగింపుగా వెళ్లి అమ్మవారికి ప్రీతిపాత్రమైన బోనాలను సామూహికంగా సమర్పిస్తారు.
  
  పూరీ జగన్నాథ రథయాత్ర: జగత్తుకే నాథుడిగా కీర్తించబడే పూరీ జగన్నాథస్వామికి, ఆయన సోదరుడు బలభద్రుడికి,  సోదరి సుభద్రకు ప్రతి ఆషాఢ శుద్ధ విదియరోజున అంగరంగవైభవంగా రథయాత్ర జరుగుతుంది. హైదరాబాద్ జూబిలీహిల్స్‌లో ఉన్న పూరీ నమూనా దేవాలయంతో సహా నగరంలో పలుచోట్ల ఈ వేడుకలు భక్తిశ్రద్ధలతో జరగనున్నాయి.
  


 పూరి: ప్రపంచ ప్రఖ్యాత పూరీ జగన్నాథ రథయాత్రకు అవసరమైన కలపకు కొరత ఏర్పడినట్టు ఆలయ వర్గాలు వెల్లడించాయి. ఏటా అంగరంగ వైభవంగా నిర్వహించే మూడు రథాలతో కూడిన యాత్రకు దేశం సహా విదేశాల నుంచి యాత్రికులు హాజరవుతున్న విషయం తెలిసిందే. షెడ్యూల్ ప్రకారం ఈ ఏడాది జూన్ 29న ఈ రథాల తయారీ ప్రారంభం కావాల్సి ఉంది. ఈ క్రమంలో రథాలను రూపొందించేందుకు ఆలయ వర్గాలు సమాయత్తమయ్యాయి. అయితే, వీటి కోసం వాడే ప్రధాన దుంగలకు కొరత ఏర్పడింది.
  
  ఈ అంశంపై చర్చించేందుకు రెవెన్యూ డివిజనల్ కమిషనర్ ఎస్.కె. వశిస్ట్ అధ్యక్షతన అధికారులు గురువారం భేటీ అయ్యారు. సమావేశం అనంతరం కమిషనర్ మాట్లాడుతూ.. రథ చక్రాలను రూపొందించేందుకు కనీసం 42 భారీస్థాయి దుంగలు అవసరం కాగా, ఒడిశా ప్రభుత్వం ఇప్పటి వరకు కేవలం 28 దుంగలనే సరఫరా చేసిందన్నారు. ఏటా రూపొందించే రథాల కోసం వెయ్యి పైగా భారీ వృక్షాలను నరికివేయడంపై పర్యావరణ ప్రేమికులు సహా ఉద్యమ కారులు తీవ్ర అభ్యంతరం వ్యక్తం చేస్తున్నారు.