మెగాస్టార్ చిరంజీవి చిన్నల్లుడు, శ్రీజ భర్త కళ్యాణ్ హీరోగా ఎంట్రీ ఇచ్చేందుకు రెడీ అవుతున్న సంగతి తెలిసిందే. జతకలిసే ఫేం రాకేష్ శశి దర్శకత్వంలో తెరకెక్కుతున్న ఈ సినిమా రొమాంటిక్ ఎంటర్‌టైనర్‌గా రూపొందనుంది. కళ్యాణ్ అరంగేట్రం కోసం మెగా ఫ్యామిలీ భారీ కసరత్తులే చేస్తోంది. ఇప్పటికే కథా కథనాలను ఫైనల్ చేసిన చిత్రయూనిట్, ప్రస్తుతం నటీనటులను ఎంపిక చేస్తోంది. కళ్యాణ్ సరసన హీరోయిన్ గా లై ఫేం మేఘా ఆకాష్ ను ఫైనల్ చేశారన్న టాక్ వినిపిస్తోంది. మేఘా ప్రస్తుతం నితిన్‌ హీరోగా కృష్ణ చైతన్య దర్శకత్వంలో తెరకెక్కుతున్న సినిమాలో నటిస్తోంది. తొలి సినిమాతోనే నటిగా మంచి మార్కులు సాధించిన మేఘా ఆకాషే, కళ్యాణ్‌కు సరైన జోడి అని భావిస్తున్నారట మెగా టీం. ప్రస్తుతానికి మేఘా ఎంపికపై మెగా టీం నుంచి ఎలాంటి సమాచారం లేదు. త్వరలోనే పూర్తి వివరాలు అధికారికంగా ప్రకటించేందుకు రెడీ అవుతున్నారు చిత్రయూనిట్.


  ఒక అమ్మాయి, అబ్బాయి... కారులో ఒక్క రోజు ప్రయాణం. ఇంకేముంది? ఇద్దరి మనసులు కలిశాయి. ప్రేమలో పడ్డారు. ఆ ప్రయాణం వారి జీవి తాల్లో ఊహించని ట్విస్ట్ ఇచ్చింది. ఆ తర్వాత ఏమైంది? అనే కథాంశంతో రూపొందిన చిత్రం ‘జత కలిసే’. ‘రాజుగారి గది’ ఫేమ్ అశ్విన్, తేజస్విని జంటగా యుక్త క్రియేషన్స్ పతాకంపై రాకేశ్  శశి దర్శకత్వంలో నరేశ్ రావూరి నిర్మించిన ఈ చిత్రానికి సాయికార్తీక్ స్వరాలందించారు. ఈ చిత్రం పాటలను దర్శకుడు రాజమౌళి ఆవిష్కరిం చారు.
  
   అనంతరం ఆయన మాట్లాడుతూ -‘‘ట్రైలర్ చాలా ఇంట్రెస్టింగ్‌గా ఉంది. ఇలాంటి మంచి సినిమాను ప్రేక్షకులు ఆదరించాలని కోరుకుంటున్నా’’ అని చెప్పారు. దర్శకుడు మాట్లాడుతూ - ‘‘సరదాగా సాగిపోయే రోడ్ జర్నీ ఇది. నా ఫస్ట్ సినిమా వారాహి బ్యానర్‌లో విడుదల కావడం ఆనందంగా ఉంది. తప్పకుండా అందరికీ నచ్చే సినిమా ఇది’’ అని అన్నారు. ఈ వేడుకలో సంగీత దర్శకుడు ఎమ్.ఎమ్. కీరవాణి, దర్శకుడు ఓంకార్, నిర్మాతలు అనిల్ సుంకర, సాయి కొర్రపాటి, హీరో అశ్విన్ బాబు తదితరులు పాల్గొన్నారు.