ప్రముఖ ప్రొఫెషనల్ నెట్‌వర్కింగ్ సైట్ లింక్డ్‌ఇన్.. జాబ్‌ కోసం వెతుకుతున్న యూజర్లకు సహాయం చేయడానికి ఆర్టిఫిషియల్ ఇంటెలిజెన్స్ (AI) ఆధారిత సాధనంపై పని చేస్తోంది. ‘ఏఐ కోచ్’ పేరుతో పిలుస్తున్న ఈ  కొత్త టూల్‌ ఉద్యోగార్థులకు మరింత సమర్థవంతమైన పద్ధతిలో ఉద్యోగాలను కనుగొని దరఖాస్తు చేసుకోవడానికి సహాయం చేస్తుంది. ఈ విషయాన్ని లింక్డ్‌ఇన్‌ యాప్ రీసెర్చర్‌ నిమా ఓవ్జీ ట్విటర్‌లో షేర్‌ చేశారు. లింక్డ్‌ఇన్ ఏఐ కోచ్‌పై పని చేస్తోందని, ఇది జాబ్‌లకు దరఖాస్తు చేయండం, నైపుణ్యాన్ని పెంచుకోవడం, వృత్తిపరమైన నెట్‌వర్క్‌ను విస్తరించే మార్గాలను అన్వేషించడంలో ఉద్యోగార్థులకు సహాయపడుతుందని అందులో రాసుకొచ్చారు.  ఓవ్జీ షేర్ చేసిన లింక్డ్‌ఇన్‌ ఏఐ కోచ్‌ స్క్రీన్‌షాట్‌ను చూస్తే ఇంచుమించు మైక్రోసాఫ్ట్ బింగ్ చాట్‌బాట్‌ను పోలి ఉంది. ఇందులో ఏఐ కోచ్ ఎలా పని చేస్తుంది.. కంపెనీల వర్క్‌ కల్చర్‌ ఎలా ఉంటుంది.. తదితర వివరాలను మీరు ఏఐ కోచ్‌ నుంచి ఆరా తీయవచ్చు. ఇది మైక్రోసాఫ్ట్ యాజమాన్యంలోని కంపెనీ అయినందున దాని ఏఐ సాంకేతికతతోనే దీన్ని రూపొందించే అవకాశం ఉంటుంది. ఇదీ చదవండి ➤ బ్యాంకు ఉ‍ద్యోగాలు చేదయ్యాయా? అలా చేరుతున్నారు.. ఇలా మానేస్తున్నారు! ప్రస్తుతం అన్నింట్లోనూ ఏఐ ఆధారిత సాధనాలు వస్తున్నాయి. వివిధ పనుల కోసం ప్రత్యేకంగా వీటిని అభివృద్ధి చేస్తున్నారు. ఈ నేపథ్యంలో ఉద్యోగ అన్వేషణలోనూ ఇవి సహాయం చేయనున్నాయి. ఈ దిశలో ‘ఏఐ కోచ్‌’ ఒక ప్రధాన అడుగు కాబోతోంది. ఇది ఉద్యోగార్థుల సమయం, శ్రమను ఆదా చేస్తుంది.  మైక్రోసాఫ్ట్ ఇప్పటివరకు తన బింగ్ చాట్‌ను మైక్రోసాఫ్ట్ ఆఫీస్ సూట్ యాప్‌లు, ఎడ్, గిట్‌హబ్‌లకు పరిచయం చేసింది. మైక్రోసాఫ్ట్  ముఖ్యమైన ఉత్పత్తులలో లింక్డ్‌ఇన్ కూడా ఒకటి కావడం వల్ల ‘ఏఐ కోచ్’ ద్వారా ఇందులోనూ ఏఐ టెక్నాలజీని పరిచయం చేయబోతోందని చెప్పవచ్చు. #Linkedin is working on LinkedIn Coach! It's an AI ASSISTANT that helps you apply for JOBS, learn new SKILLS, and find more ways to CONNECT with your network! pic.twitter.com/jKBrPmEFJt — Nima Owji (@nima_owji) July 27, 2023

సాక్షి, అమరావతి: ఐఏఎస్, ఐపీఎస్, ఐఎఫ్‌ఎస్‌ తదితర సర్వీసుల్లో పోస్టుల భర్తీకి యూనియన్‌ పబ్లిక్‌ సర్వీస్‌ కమిషన్‌ (యూపీఎస్సీ) నిర్వహించిన సివిల్స్‌–2022 పరీక్షల తుది ఫలితాల్లో తెలుగు రాష్ట్రాల అభ్యర్థులు సత్తా చాటారు. జాతీయస్థాయిలో మూడో ర్యాంకుతో పాటు 50 వరకు ర్యాంకులు సాధించి రికార్డు సృష్టించారు. సివిల్స్‌–2022 తుది ఫలితాలను యూపీఎస్సీ మంగళవారం విడుదల చేసింది. ఐఏఎస్, ఐపీఎస్, ఐఎఫ్‌ఎస్, తదితర సర్వీసుల పోస్టులకు సంబంధించి మొత్తం 933 మందిని ఎంపికి చేసినట్లు తెలిపింది. జనరల్‌ – 345, ఈడబ్ల్యూఎస్‌ – 99, ఓబీసీ – 263, ఎస్సీ – 154, ఎస్టీ – 72 మంది ఎంపికయ్యారు. వీరితో పాటు కన్సాలిడేటెడ్‌ రిజర్వు లిస్టులో ఆయా కేటగిరీల నుంచి 178 మంది ఎంపికైనట్లు యూపీఎస్సీ వెల్లడించింది. మొత్తంగా 1,022 మందిని ఆయా పోస్టులకు ఎంపిక చేసినట్లు తెలిపింది. వీరిలో ఐఏఎస్‌కు 180 మంది, ఐఎఫ్‌ఎస్‌కు 38 మంది, ఐపీఎస్‌కు 200 మందిని కేటాయించారు. ఇతర కేంద్ర సర్వీసెస్‌లకు సంబంధించి గ్రూప్‌–ఏ కేటగిరీలో 473 మంది, గ్రూప్‌–బి సర్వీసెస్‌లో 131 మంది ఎంపికైనట్టు యూపీఎస్సీ పేర్కొంది.  తెలుగు రాష్ట్రాల అభ్యర్థులకు అధిక ర్యాంకులు సివిల్స్‌ ఫలితాల్లో టాప్‌ ర్యాంకుల్లో తొలి 4 ర్యాంకులు అమ్మాయిలే కైవసం చేసుకున్నారు. ఆలిండియా ఫస్ట్‌ ర్యాంకును ఇషితా కిషోర్‌ సాధించగా గరిమ లోహియా, నూకల ఉమా హారతి, స్మృతి మిశ్రాలు వరుసగా రెండు, మూడు, నాలుగు ర్యాంకులు దక్కించుకున్నారు. ఆంధ్రప్రదేశ్, తెలంగాణల నుంచి దాదాపు 50 మందికి ర్యాంకులు వచ్చినట్టు తెలుస్తోంది. తెలుగు రాష్ట్రాల అభ్యర్థులు 22, 33, 40, 200, 217, 222, 285, 384, 410, 460, 510, 558, 583, 593, 640, 759, 801, 827, 885 ర్యాంకులు సాధించి విజయకేతనం ఎగురవేశారు. జీవీఎస్‌ పవన్‌ దత్తా 22, తరుణ్‌ పట్నాయక్‌ 33, అజ్మీరా సంకేత్‌ 35, శ్రీసాయి ఆశ్రిత్‌ శాఖమూరి 40, హెచ్‌ఎస్‌ భావన 55, సాయి ప్రణవ్‌ 60, ఆవుల సాయికృష్ణకు 94వ ర్యాంకు దక్కాయి. వీరితోపాటు నిధిపాయ్‌ 110, అనుగు శివమారుతీరెడ్డి 132, రాళ్లపల్లి సంపత్‌కుమార్‌ 157, కమతం మహేశ్‌కుమార్‌ 200, రావుల జయసింహారెడ్డి 217, సాహిత్య 243, అంకుర్‌ కుమార్‌ 257, బొల్లం మహేశ్వర్‌రెడ్డి 270, చల్లా కళ్యాణి 285, పాలువాయి విష్ణువర్దన్‌రెడ్డి 292, సాయికృష్ణకు 293వ ర్యాంకు వచ్చాయి. 11.35 లక్షల మంది దరఖాస్తు  సివిల్స్‌ ప్రిలిమినరీ పరీక్షకు 11.35 లక్షల మంది దరఖాస్తు చేయగా వారిలో 5.73 లక్షల మంది (50.51 శాతం) మంది మాత్రమే గతేడాది జూన్‌ 5న జరిగిన ప్రిలిమ్స్‌ పరీక్షకు హాజరయ్యారు. వారిలో 130,90 మంది మెయిన్స్‌ పరీక్షలకు అర్హత సాధించారు. వీరికి సెప్టెంబర్‌ 16 నుంచి 25 వరకు పరీక్షలు నిర్వహించారు. వీరిలో 2,529 మంది ఇంటర్వ్యూలకు అర్హత సాధించగా చివరకు 933 మంది ఎంపికయ్యారు. కాగా సివిల్స్‌కు తెలుగు రాష్ట్రాల నుంచి 80,707 మంది హాజరయ్యారు. వారిలో 500 మంది వరకు మెయిన్స్‌కు అర్హత సాధించారు. ఇంటర్వ్యూలకు 100 మంది వరకు ఎంపికవ్వగా వారిలో 50 మంది వరకు ర్యాంకులు సాధించగలిగారని ఆయా కోచింగ్‌ సంస్థల నిర్వాహకులు తెలిపారు.      ర్యాంకుల వారీగా తెలుగు రాష్ట్రాల అభ్యర్ధులు 3    ఎన్‌. ఉమా హారతి 22    జీవీఎస్‌ పవన్‌ దత్తా 33    తరుణ్‌ పట్నాయక్‌ మాదల 40    సాయి ఆశ్రిత్‌ శాఖమూరి 54    రిచా కులకర్ణి 60    మలియె శ్రీ ప్రణవ్‌ 78    ఉత్కర్‌‡్షకుమార్‌ 87    అయాన్‌ జైన్‌ 94    ఆవుల సాయి కృష్ణ 110    నిధి పాయ్‌ 132    అనుగు శివమూర్తిరెడ్డి 157    రాళ్లపల్లి వసంతకుమార్‌ 189    షేక్‌ హబీబుల్లా 217    రావ్ల జయసింహారెడ్డి 243    కాసిరాజు పవన సాయి సాహిత్య 270    బొల్లం ఉమామహేశ్వరరెడ్డి 285    చల్లా కల్యాణి 292    పలువాయి విష్ణువర్థన్‌రెడ్డి 293    గ్రంధి సాయికృష్ణ 297    షివిన్‌ చౌదరి 311    వీరగంధం లక్ష్మీ సునీత 313    కె.ఎన్‌.చందన్‌ జాహ్నవి 346    ఎన్‌.చేతన్‌రెడ్డి 384    తెప్పలపల్లి సుశ్మిత 409    ఇషాన్‌ అగర్వాల్‌ 410    డొంగ్రె రేవయ్య 414    చంద్రశేఖర్‌ శంకల 426    సీహెచ్‌. శ్రవణ్‌కుమార్‌రెడ్డి 459    చాణక్య ఉదయగిరి 464    సి.సమీరారాజా 469    బొడ్డు హేమంత్‌ 480    గోపీకృష్ణ. బి 510    భువన ప్రణీత్‌ పప్పుల 548    దామెర్ల హిమవంశీ 558    రుత్విక్‌ సాయి కొట్టే 559    డి.మనోజ్‌ 583    యర్రంశెట్టి ఉషారమణి 630    ఎస్‌.దీప్తి చౌహాన్‌ 640    తుమ్మల సాయికృష్ణారెడ్డి 742    రామ్‌దేని సాయినాధ్‌ 759    జి.అక్షయ్‌ దీపక్‌ 805    మన్నం సుజిత్‌ సంపత్‌ 817    సాహిల్‌ మీనా 846    బెండుకూరి మౌర్యతేజ్‌ 866    నాగుల కృపాకర్‌ సీఎం వైఎస్‌ జగన్‌ అభినందనలు సివిల్స్‌ పరీక్షల్లో 200లోపు ర్యాంకులు సాధించిన తెలుగు రాష్ట్రాల ప్రతిభావంతులకు ముఖ్యమంత్రి వైఎస్‌ జగన్‌మోహన్‌రెడ్డి అభినందనలు తెలిపారు. 933 మందితో కూడిన తుది జాబితాలో చోటు దక్కించుకున్న తెలుగు అభ్యర్థులందరికీ సీఎం శుభాకాంక్షలు తెలియజేశారు. వారు కెరీర్‌లో ఉజ్వలంగా ఉండాలని ఆకాంక్షించారు.  ర్యాంకర్ల అభిప్రాయాలు దత్తా.. సత్తా  అన్నమయ్య జిల్లా రైల్వేకోడూరుకు చెందిన డాక్టర్‌ పవన్‌ దత్తా సివిల్స్‌లో 22వ ర్యాంక్‌ సాధించి సత్తా చాటాడు. దత్తా తల్లిదండ్రులు ప్రభుత్వ ఉద్యోగులు. ఎంబీబీఎస్‌ చదివిన పవన్‌ దత్తా హైదరాబాద్‌లో డాక్టర్‌గా పనిచేస్తున్నాడు. ఈ సందర్భంగా పవన్‌ దత్తా మాట్లాడుతూ గ్రామీణ ప్రజలకు ఉన్నత ఆరోగ్య సేవలు, పేద విద్యార్థులకు సాంకేతిక సేవలు అందించాలనే లక్ష్యంతో ముందుకు సాగుతానని తెలిపాడు. అంబికా జైన్‌కు 25వ ర్యాంక్‌ కర్నూలు జిల్లా ఎమ్మిగనూరుకు చెందిన లలిత్‌కుమార్‌ అంబికా జైన్‌ (25) సివిల్స్‌లో 69వ ర్యాంక్‌ సాధించారు. పట్టణానికి చెందిన జైన్‌ ఎలక్ట్రికల్‌ షాపు యజమాని లలిత్‌కుమార్, అనితల కుమార్తె అంబికా జైన్‌ అత్యుత్తమ ర్యాంకుతో మెరిసింది. అంబిక.. ఢిల్లీ సౌత్‌ ఏషియన్‌ యూనివర్సిటీలో ఇంటర్నేషనల్‌ రిలేషన్స్‌లో ఎంఏ చేశారు. గతేడాది మొదటి ప్రయత్నంలోనే సివిల్స్‌లో 128వ ర్యాంక్‌ సాధించి ఐపీఎస్‌కు ఎంపికయ్యారు. అయినా ఐఏఎస్‌ కావాలనే పట్టుదలతో ఈ ఏడాది మళ్లీ ప్రయత్నించి 69వ ర్యాంక్‌తో లక్ష్యాన్ని చేరుకున్నారు.  33వ ర్యాంకుతో మెరిసిన తరుణ్‌  తూర్పు గోదావరి జిల్లా రాజమహేంద్రవరం మోడల్‌ కాలనీకి చెందిన తరుణ్‌ పట్నాయక్‌ 33వ ర్యాంకుతో సత్తా చాటాడు. ఐఐటీ గౌహతిలో బీటెక్‌ మెకానికల్‌ ఇంజనీరింగ్‌ చదివిన తరుణ్‌ సివిల్స్‌కు సొంతంగా సిద్ధమయ్యాడు. తరుణ్‌ తండ్రి రవికుమార్‌ ఎల్‌ఐసీ రూరల్‌ బ్రాంచ్‌లో క్లరికల్‌ స్టాఫ్‌గా పనిచేస్తుండగా తల్లి శారదా రాజ్యలక్ష్మి గృహిణి. తరుణ్‌ గౌహతి ఐఐటిలో మెకానికల్‌ ఇంజనీరింగ్‌ చదివారు. సివిల్స్‌కు సొంతంగానే ప్రిపేరయ్యారు. గతేడాది 99వ ర్యాంకు సాధించిన అతడు ఈసారి 33వ ర్యాంకుతో మెరిశాడు. ఐఏఎస్‌ కావాలన్నదే తన లక్ష్యమని తరుణ్‌ తెలిపాడు. వసంత్‌కు 157వ ర్యాంకు ఏలూరు జిల్లా భీమడోలు మండలం గుండుగొలనుకు చెందిన రాళ్లపల్లి వసంతకుమార్‌ 157వ ర్యాంకుతో మెరిశాడు. సివిల్స్‌ 2021 పరీక్షల్లో 170వ ర్యాంకు సాధించిన వసంతకుమార్‌ అప్పట్లో ఐపీఎస్‌కు ఎంపికయ్యారు. ప్రస్తుతం హైదరాబాద్‌లో శిక్షణ పొందుతున్నారు. ఐఏఎస్‌ సాధించాలన్న సంకల్పంతో మరోసారి ప్రయత్నం చేయగా 157వ ర్యాంకు సొంతం చేసుకున్నారు. వసంత్‌ అన్న జగన్‌సాయి ప్రస్తుతం ఐఏఎస్‌కు ఎంపికై శిక్షణలో ఉన్నారు. వసంతకుమార్‌ తండ్రి రాళ్లపల్లి భీమేశ్వరరావు విద్యుత్‌ శాఖలో అసిస్టెంట్‌ ఇంజనీర్‌గా విధులు నిర్వర్తిస్తున్నారు. తల్లి అనసూయ గృహిణి.  సిక్కోలు బిడ్డకు 285వ ర్యాంకు  శ్రీకాకుళం జిల్లా రూరల్‌ మండల పరిధిలోని వప్పంగి గ్రామానికి చెందిన చల్లా కళ్యాణి 285వ ర్యాంకుతో సత్తా చాటింది. ఇప్పటికే గ్రూప్‌–1 పరీక్షల్లో విజయం సాధించిన ఆమె ప్రస్తుతం విశాఖపట్నంలోని ట్రెజరీ విభాగంలో శిక్షణ తీసుకుంటోంది.  పల్నాడు యువకుడికి సివిల్స్‌లో 292వ ర్యాంక్‌  పల్నాడు జిల్లా వెల్దుర్తి మండలం శిరిగిరిపాడుకు చెందిన పాల్వాయి విష్ణువర్ధన్‌రెడ్డి 292వ ర్యాంక్‌ సాధించి సత్తా చాటాడు. గోవాలోని బిట్స్‌ పిలానీలో బీటెక్‌ ఈఈఈ పూర్తిచేశాక ఇండియన్‌ ఫారెస్ట్‌ సర్వీసెస్‌ (ఐఎఫ్‌ఎస్‌)– 2020లో 3వ ర్యాంక్‌ సాధించాడు. అయితే ఐఏఎస్‌ సాధించాలనే లక్ష్యంతో సివిల్స్‌కు సిద్ధమయ్యాడు. తన ఐదో ప్రయత్నంలో 292వ ర్యాంక్‌ సాధించి విజయకేతనం ఎగురవేశాడు. విష్ణువర్ధన్‌రెడ్డిని ప్రభుత్వ విప్‌ పిన్నెల్లి రామకృష్ణారెడ్డి, తదితరులు అభినందించారు. విష్ణువర్ధన్‌రెడ్డి తండ్రి నరసింహారెడ్డి విజయవాడలో ఒక ప్రైవేటు కోచింగ్‌ అకాడమీ డైరెక్టర్‌గా, తల్లి పద్మావతి ప్రభుత్వ ఉపాధ్యాయినిగా పనిచేస్తున్నారు.  లక్ష్మీ సుజితకు 311వ ర్యాంకు బాపట్ల జిల్లా మార్టూరుకు చెందిన వీరగంధం లక్ష్మీసుజిత 311వ ర్యాంకు సాధించి సత్తా చాటింది. ఆమె తండ్రి స్థానికంగా విద్యా సంస్థను నిర్వహిస్తున్నారు. ఒక ప్రైవేట్‌ యూనివర్సిటీలో బీటెక్‌ కంప్యూటర్‌ సైన్స్‌ చదివిన సుజిత సాఫ్ట్‌వేర్‌ ఇంజనీర్‌ ఉద్యోగానికి రాజీనామా చేసి సివిల్స్‌కు సిద్ధమైంది. కాగా ఐఏఎస్‌ సాధించడమే లక్ష్యంగా వచ్చే ఏడాది మళ్లీ సివిల్స్‌ రాస్తానని సుజిత తెలిపింది.  ఐదో ప్రయత్నంలో విజయకేతనం పట్టుదల ఉంటే ఏదైనా సాధించొచ్చని నిరూపించింది.. ప్రకాశం జిల్లా ఒంగోలుకు చెందిన బొల్లిపల్లి వినూత్న. ఆమె ఐదో ప్రయత్నంలో 462వ ర్యాంకు సాధించింది. వినూత్న తల్లిదండ్రులు ఇద్దరూ ప్రభుత్వ ఉద్యోగులే. బీటెక్‌ మెకానికల్‌ ఇంజనీరింగ్‌ పూర్తిచేసిన వినూత్న కాగ్నిజెంట్‌ కంపెనీలో పనిచేస్తూ ఢిల్లీలో సివిల్స్‌ కోచింగ్‌ తీసుకుంది. తొలి ప్రయత్నంలో ప్రిలిమ్స్, రెండో ప్రయత్నంలో మెయిన్స్, మూడో ప్రయత్నంలో ఇంటర్వ్యూలో విఫలమైంది. నాలుగో ప్రయత్నమూ నిరాశపరిచింది. అయితే పట్టు వదలకుండా ఐదోసారి విజయకేతనం ఎగురవేసింది. ఐఏఎస్‌ రాసే క్రమంలో గ్రూప్‌–1 రాసి ఇంటర్వ్యూకు ఎంపికయ్యానని.. అయితే దానికి హాజరుకానని వినూత్న వెల్లడించింది. తన లక్ష్యం ఐఏఎస్‌ అని స్పష్టం చేసింది.   స్టీల్‌ప్లాంట్‌ ఉద్యోగి కుమారుడికి 469 ర్యాంకు విశాఖ స్టీల్‌ప్లాంట్‌ ట్రాఫిక్‌ విభాగం ఉద్యోగి బొడ్డు సత్తిబాబు కుమారుడు హేమంత్‌ 469వ ర్యాంకు సాధించారు. బాంబే ఐఐటీలో ఎలక్ట్రికల్‌ ఇంజనీరింగ్‌ పూర్తి చేసి సివిల్స్‌కు సిద్ధమయ్యారు. ఈ ర్యాంకు ద్వారా ఐఆర్‌ఎస్‌ వస్తుందని.. మళ్లీ సివిల్స్‌ రాసి ఐఏఎస్‌ సాధించడమే తన లక్ష్యమని హేమంత్‌ తెలిపారు.  నవీన్‌ చక్రవర్తికి 550వ ర్యాంకు పల్నాడు జిల్లా తాళ్లచెరువు గ్రామానికి చెందిన రేపూడి నవీన్‌ చక్రవర్తి 550వ ర్యాంకు సాధించాడు. తల్లిదండ్రులిద్దరూ ప్రభుత్వ ఉపాధ్యాయులు. విజయవాడ సిద్ధార్థ మెడికల్‌ కాలేజీ,లో ఎంబీబీఎస్‌ పూర్తి చేసిన నవీన్‌ సివిల్స్‌పై ఆసక్తితో అటు మళ్లాడు. తొలి ప్రయత్నంలో విజయం సాధించలేకపోయిన ఆయన రెండో ప్రయత్నంలో విజయం సాధించాడు. ఐఏఎస్, ఐపీఎస్, ఐఆర్‌ఎస్‌లలో ఏది వచ్చినా స్వీకరిస్తానని తెలిపాడు. కోనసీమ జిల్లా యువతికి 583వ ర్యాంక్‌ డాక్టర్‌ బీఆర్‌ అంబేడ్కర్‌ కోనసీమ జిల్లా మామిడికుదురు మండలం ఈదరాడకు చెందిన యర్రంశెట్టి ఉమా శ్రీలక్ష్మీరమణి 583వ ర్యాంకుతో సత్తా చాటింది. నూజివీడు ట్రిపుల్‌ ఐటీలో ఇంజనీరింగ్‌ చదివిన ఆమె క్యాంపస్‌ సెలక్షన్స్‌లో సాఫ్ట్‌వేర్‌ ఇంజనీర్‌గా ఉద్యోగం సాధించింది. శ్రీలక్ష్మీరమణి తండ్రి యర్రంశెట్టి కాశీవిశ్వేశ్వరరావు కొబ్బరికాయల వ్యాపారి. కాగా యానాం మున్సిపల్‌ కమిషనర్‌ ద్విజ్‌ గోయల్‌ 71వ ర్యాంకు సాధించారు. గోయల్‌ సొంత పట్టణం ఉత్తరప్రదేశ్‌లోని మీరట్‌.  సంతోష్‌కు 607వ ర్యాంకు శ్రీకాకుళం జిల్లా బూర్జ మండలం ఖండ్యాం గ్రామానికి చెందిన భవిరి సంతోష్‌కుమార్‌ 607వ ర్యాంకు సాధించారు. ఈయన స్వగ్రామం ఖండ్యాం అయినప్పటికీ మండలంలోని అలుదు గ్రామంలో తాతయ్య విశ్రాంత ఉపాధ్యాయుడు గతేడాది సివిల్స్‌లోనూ 607వ ర్యాంకే ఈసారి కూడా అదే ర్యాంక్‌ వచ్చింది. సంతోష్‌ తండ్రి రాజారావు విశ్రాంతి ఉపాధ్యాయుడు, తల్లి ఉమాకుమారి గృహిణి. విశాఖ ఆంధ్రా మెడికల్‌ కళాశాలలో ఎంబీబీఎస్, హైదరాబాద్‌లోని రైల్వే కళాశాలలో డెర్మటాలజీలో పీజీ పూర్తి చేశాడు. ప్రస్తుతం ఛత్తీస్‌గఢ్‌లోని ప్రభుత్వ డెర్మటాలజిస్టుగా పనిచేస్తున్నాడు. సివిల్స్‌ సాధించాలని ఇప్పటికే ఐదుసార్లు పరీక్ష రాయగా ఆరో ప్రయత్నంలో 607వ ర్యాంకు సాధించారు.  రవికిరణ్‌కు 694వ ర్యాంకు  కృష్ణా జిల్లా బాపులపాడు మండలం రంగన్నగూడెంకు చెందిన పుసులూరి రవికిరణ్‌ 694వ ర్యాంకు సాధించాడు. గతంలో ఇండియన్‌ కార్పొరేట్‌ లా సర్వీస్‌ (ఐసీఎల్‌ఎస్‌)కు ఎంపికయ్యాడు. ప్రస్తుతం ఢిల్లీలోని కేంద్ర కార్పొరేట్‌ ఎఫైర్స్‌ శాఖలో ఉద్యోగం చేస్తున్నారు. ఐఏఎస్‌ సాధించడమే లక్ష్యంగా మరోసారి ప్రయత్నిస్తానని రవికిరణ్‌ తెలిపాడు.   ఎన్టీఆర్‌ జిల్లా యువకుడికి 805వ ర్యాంక్‌ సివిల్స్‌ తుది ఫలితాల్లో ఎన్టీఆర్‌ జిల్లా నందిగామకు చెందిన మన్నం సుజిత్‌ సంపత్‌కు 805వ ర్యాంక్‌ లభించింది. ఈ సందర్భంగా సుజిత్‌ మాట్లాడుతూ ఐఏఎస్‌ అవ్వాలన్నదే తన కోరికన్నారు. నాలుగేళ్ల శ్రమ ఫలితంగా మంచి ర్యాంక్‌ వచ్చిందని తెలిపారు. ఐఏఎస్‌ అయ్యేంతవరకు శ్రమిస్తూనే ఉంటానన్నారు. సుజిత్‌ను నందిగామ ఎమ్మెల్యే డాక్టర్‌ మొండితోక జగన్‌మోహన్‌రావు, ఎమ్మెల్సీ డాక్టర్‌ మొండితోక అరుణ్‌ కుమార్‌ తదితరులు అభినందనలు తెలిపారు. కడప కుర్రాడికి 866వ ర్యాంకు కడప ప్రకాష్‌నగర్‌కు చెందిన నాగుల కృపాకర్‌ 866వ ర్యాంకు సాధించాడు. తిరుపతి శ్రీ వేంకటేశ్వర యూనివర్సిటీలో బీటెక్‌ ఈఈఈ పూర్తి చేశాక సివిల్స్‌కు సిద్ధమయ్యాడు. వరుసగా ఐదుసార్లు ప్రయత్నించినా విజయం సాధించలేకపోయాడు. అయినా నిరాశ చెందకుండా ఆరో ప్రయత్నంలో 866వ ర్యాంకు సాధించాడు. తనకు ఐపీఎస్‌ లేదా ఐఆర్‌ఎస్‌ వచ్చే అవకాశం ఉందని కృపాకర్‌ తెలిపాడు. రానున్న రోజుల్లో మరింత మంచి ర్యాంకు సాధించేందుకు ప్రిపరేషన్‌ కొనసాగిస్తానని తెలిపాడు.  

సాక్షి, అమరావతి: టెక్‌బీ శిక్షణ కోసం ఏపీ నుంచి ఈ ఏడాది 1,500 మంది ఇంటర్‌ విద్యార్థులను ఎంపిక చేయనున్నట్లు హెచ్‌సీఎల్‌ టెక్నాలజీస్‌ ప్రకటించింది. ఇందుకోసం ఈనెల 25న విజయవాడలో వాక్‌ ఇన్‌ డ్రైవ్‌ నిర్వహిస్తున్నట్లు ఆ సంస్థ వైస్‌ ప్రెసిడెంట్‌ సుబ్బరామన్‌ తెలిపారు. ఈ వివరాలను గురువారం విజయవాడలో ఆయన మీడియాకు వెల్లడించారు. 2021లో మ్యాథమెటిక్స్‌ లేదా బిజినెస్‌ మ్యాథమెటిక్స్‌తో 12వ తరగతి(ఇంటర్మీడియట్‌) పూర్తి చేసినవారు.. అలాగే 2022లో 12వ తరగతికి హాజరవుతున్న విద్యార్థులు దరఖాస్తు చేసుకోవచ్చని సూచించారు. వాక్‌ ఇన్‌ డ్రైవ్‌లో ఎంపికైన విద్యార్థులకు 12 నెలల పాటు శిక్షణ అందించడంతో పాటు ఇంటర్న్‌షిప్‌ చేసే అవకాశం కూడా కల్పిస్తామని చెప్పారు. టెక్‌బీ శిక్షణ పూర్తి చేసిన వారికి ఏడాదికి రూ.1.70 లక్షల నుంచి రూ.2.20 లక్షల వేతనంతో ఉద్యోగం లభిస్తుందన్నారు. హెచ్‌సీఎల్‌ టెక్నాలజీస్‌ వద్ద పనిచేస్తూనే బిట్స్‌ పిలానీ, శాస్త్ర, అమిటీ వంటి ప్రతిష్టాత్మక యూనివర్సిటీల్లో అండర్‌ గ్రాడ్యుయేట్‌ డిగ్రీని కూడా పూర్తి చేసే అవకాశం కల్పిస్తామని చెప్పారు. అర్హత కలిగిన వారు ఆన్‌లైన్‌ కెరీర్‌ ఆప్టిట్యూడ్‌ టెస్ట్‌(హెచ్‌సీఎల్‌ క్యాట్‌)కు హాజరవ్వాల్సి ఉంటుందని, ఇందులో ప్రతిభ కనబరిచిన వారిని ఇంటర్వ్యూకు పిలుస్తామని తెలిపారు. ఈ శిక్షణ కార్యక్రమానికి రూ.లక్ష ఫీజు ఉంటుందని, దీనికి పన్నులు అదనమని పేర్కొన్నారు. ఫీజును నెలవారీ వాయిదాల్లో తీర్చే విధంగా రుణ సౌకర్యం కూడా కల్పిస్తామని పేర్కొన్నారు. 2017లో ప్రారంభించిన టెక్‌బీ కార్యక్రమం ద్వారా ఇప్పటి వరకు 7,000 మంది విద్యార్థులకు ఉపాధి కల్పించినట్లు వెల్లడించారు. మరింత సమాచారం కోసం www.hcltechbee.com వెబ్‌సైట్‌ను సందర్శించాలని సూచించారు. 

సనత్‌నగర్‌: రాష్ట్ర ప్రభుత్వం ఉద్యోగాలు భర్తీ చేయనున్న నేపథ్యంలో బేగంపేట బ్రాహ్మణవాడీలోని స్వామి రామానందతీర్థ మెమోరియల్‌ కమిటీలో పీవీ నరసింహారావు స్మారక గ్రంథాలయంలో ఉద్యోగార్థులు చదువుకునేందుకు అనుకూలమైన వాతావరణం కల్పించనున్నట్లు ఎమ్మెల్సీ, కమిటీ చైర్‌పర్సన్‌ వాణీదేవి తెలిపారు. కమిటీ ప్రాంగణంలోని ఎమ్మెల్సీ క్యాంప్‌ కార్యాలయంలో సోమవారం ఆమె మాట్లాడుతూ.. పోటీ పరీక్షలకు ప్రిపేర్‌ అవుతున్న విద్యార్థులకు ఇక్కడి గ్రంథాలయంలో అవసరమైన సమాచారం, పుస్తకాలను అందుబాటులో ఉంచుతామన్నారు.   గ్రంథాలయంలో చదువుకునేందుకు అనువైన వాతావరణం కల్పించినట్లు తెలిపారు. ఉదయం 8 నుంచి సాయంత్రం 6 వరకు పీవీ స్మారక గ్రంథాలయం తెరిచి ఉంటుందని ఆమె తెలిపారు. సమావేశంలో సురభి సోలార్‌ ఎనర్జీ కేంద్రం డైరెక్టర్‌ శేఖర్‌ మారంరాజు తదితరులు పాల్గొన్నారు. 

డబ్లిన్‌: ఐర్లాండ్‌కు చెందిన క్రిస్‌ హార్కిన్‌ అనే నిరుద్యోగి.. తనకు ఉద్యోగం ఇవ్వాలంటూ వినూత్నంగా అభ్యర్ధించిన ఘటన ప్రస్తుతం సోషల్‌మీడియలో వైరలవుతోంది. వివరాల్లోకి వెళితే.. ఉత్తర ఐర్లాండ్‌కు చెందిన 24 ఏళ్ల క్రిస్‌ 2019 సెప్టెంబర్‌లో గ్రాడ్యుయేషన్‌ పూర్తి చేశాడు. నాటి నుంచి వందల సంఖ్యలో ఇంటర్వ్యూలకు వెళ్లిన క్రిస్‌కు అన్నీ చోట్ల మొండిచెయ్యే ఎదురైంది. దీంతో విసుగెత్తిపోయిన క్రిస్‌.. ఇలా అయితే కాదని వినూత్నంగా ఉద్యోగ ప్రయత్నాలను మొదలుపెట్టాడు. 400 డాలర్లు ఖర్చు పెట్టి ఓ ప్రాంతంలో హోర్డింగ్‌ ఏర్పాటు చేయించాడు. ఆ హోర్డింగ్‌పై ప్లీజ్‌ హైర్‌ మీ అని పెద్ద అక్షరాలతో రాయించి దాని కింద తన అర్హతలు, తన ఫోటో, వ్యక్తిగత వివరాలు, తాను ఏ రంగంలో ఉద్యోగం ఆశిస్తున్నాడో వాటి వివరాలు పొందుపరిచాడు. ఇంతటితో ఆగని క్రిస్‌.. ఎలాగైనా ఉద్యోగం రాకపోదా అని, ఈ తతంగం మొత్తాన్ని యూట్యూబ్‌లో కూడా పోస్ట్‌ చేశాడు. కానీ, ఇంత చేశాక కూడా క్రిస్‌కు ఉద్యోగం రాలేదు. ఇలా దాదాపు 2 వారాలు వేచి చూసిన క్రిస్‌.. ఏ ఉపయోగం లేకపోవడంతో తన వినూత్న ఉద్యోగ ప్రయత్నానికి స్వస్థి పలికాడు. బిల్‌ బోర్డు(హోర్డింగ్‌) ఖర్చు భరించే స్తోమత లేకే తాను ఈ నిర్ణయానికి వచ్చినట్లు చెప్పుకొచ్చాడు. కాగా, క్రిస్‌కు ఈ ఐడియాను సోషల్ మీడియా మేనేజర్‌గా పనిచేస్తున్న తన సోదరి ఇచ్చిందట. చదవండి: Afghanistan: తాలిబన్లకు కీలక సమాచారం చిక్కకూడదనే..

సాక్షి, అనంతపురం: జిల్లాలోని తాడిపత్రి మండలం ఊరుచింతలలో పెన్నా సిమెంట్స్ పరిశ్రమ ప్రజాభిప్రాయ సేకరణలో ఉద్రిక్తత నెలకొంది. తమకు ఉద్యోగాలు ఇవ్వలేదన్నకారణంతో మనస్తాపం చెందిన పెద్దిరాజు అనే యువకుడు ఆత్మహత్యాయత్నానికి పాల్పడగా  గ్రామస్తులు అడ్డుకున్నారు.

సాక్షి, సిటీబ్యూరో:  సింగపూర్‌లో ఉద్యోగం ఇప్పిస్తానని మోసగించిన కేసులో దంపతులను సైబరాబాద్‌ సైబర్‌ క్రైమ్‌ పోలీసులు శనివారం అరెస్టు చేశారు. వాట్సాప్‌ చాటింగ్‌ ద్వారా నిందితుల మాటలు నమ్మి రూ.7.65 లక్షలు బ్యాంక్‌ ఖాతాల్లో జమ చేసి మోసపోయానట్టు నగరానికి చెందిన రమ్య రశ్మీ ఫిర్యాదు మేరకు కేసు నమోదుచేసిన పోలీసులు మణికొండలో ఉంటున్న నిందితులు శృతి, నవీన్‌కుమార్‌లను అరెస్టు చేశారు. క్రైమ్స్‌ డీసీపీ జానకి షర్మిలా తెలిపిన మేరకు.. మిర్యాలగూడలో టైర్, లారీ రవాణా వ్యాపారంలో భార్యభర్తులు  శృతి, నవీన్‌కుమార్‌ ఆర్థికంగా చితికిపోయారు. దీంతో నగరానికి వచ్చారు.  భర్త నవీన్‌ కుమార్‌ ఓ దినపత్రికలో ప్రకటనలో విభాగంలో పనిచేసి ఇటీవలే మానేశాడు. భార్య శృతి ప్రైవేట్‌ టీచర్‌గా పనిచేసింది. నవీన్‌ కుమార్‌ గోవాకు వెళ్లిన సమయంలో బాధితురాలు రమ్య రశ్మీతో పరిచయం ఏర్పడింది. విదేశాల్లో ఉద్యోగాలుంటే చూడమని కోరింది. అప్పటికే గతేడాది జూన్‌లో శృతి నాయుడు స్టడీ వీసాపై సింగపూర్‌కు వెళ్లి ప్రైవేట్‌ ఉద్యోగం చేసి నవంబర్‌లో తిరిగి హైదరాబాద్‌కు వచ్చేసింది. అయితే ఆర్థికంగా అన్నివిధాలా చతికిలబడిన శ్రుతి నాయుడు ఈ ఏడాది మార్చిలో రమ్మ రశ్మీని ఫేస్‌బుక్‌ ద్వారా సంప్రదించింది.  సింగపూర్‌లో తన చిన్నాన్న కుమారుడు రెస్టారెంట్‌ నడుపుతున్నాడని శృతి మాటలతో నమ్మించింది. అక్కడ ఉద్యోగం కావాలనుకునేవారికి ఇప్పిస్తానని, ఒక్కొక్కరికి రూ.నాలుగు లక్షల ఖర్చు అవుతుందంటూ చెప్పింది. అయితే నాతో పాటు నా భర్తకి కూడా ఉద్యోగం కావాలంటూ చెప్పడంతో అందుకు సరేనన్న శృతి నాయుడు 20 రోజుల వ్యవధిలో ఇప్పిస్తానంటూ నమ్మించింది. నెలకు 2,500 సింగపూర్‌ డాలర్ల జీతం ఉంటుందని వాట్సాప్‌ నంబర్‌ ద్వారా చాట్‌చేసిన శృతి నాయుడు ఆ ఉద్యోగం కోసం డబ్బులివ్వాలంటూ నాలుగు బ్యాంక్‌ ఖాతాలను పంపించింది.  ఆ వెంటనే 20 రోజుల వ్యవధిలో సింగపూర్‌కు వీసాతో పాటు విమాన టికెట్లు కూడా పంపిస్తామని చెప్పింది. కొన్నిరోజులు కాగానే నకిలీ వీసా డాక్యుమెంట్లు, నకిలీ విమాన టికెట్లను బాధితురాలి మెయిల్‌కు పంపడంతో విచారణ చేయగా అవి నకిలీవని తేలింది. ఈ మేరకు బాధితురాలు రమ్య రశ్మీ సైబరాబాద్‌ సైబర్‌ క్రైమ్‌ పోలీసులకు ఈ నెల 2న  ఫిర్యాదుచేసింది. బాధితురాలిచ్చిన బ్యాంక్‌ ఖాతాలు. వాట్సాప్‌ నంబర్‌ సహకారంతో నిందితులు శృతి నాయుడు, నవీన్‌ కుమార్‌లు మణికొండలో ఉన్నట్టుగా గుర్తించి అరెస్టు చేశారు.


 
 గురుకుల నోటిఫికేషన్‌ వచ్చిందనే సంబరం కాసేపే
 
 నిబంధనలు చూసి బిత్తరపోతున్న నిరుద్యోగ, విద్యార్థిలోకం
 
 ఉమ్మడి రాష్ట్రంలో కూడా ఇలా లేదంటూ ఆవేదన
 
 అర్హతల విషయంలో ఆమోదయోగ్యంకాని ఆంక్షలు
 
 
 
 ఉద్యోగాల నోటిఫికేషన్‌ వస్తే సాధారణంగా ఎవరైనా ఎగిరి గంతేస్తారు. కానీ, తెలంగాణ నిరుద్యోగ విద్యార్థి లోకం పరిస్థితి మాత్రం అందుకు భిన్నంగా మారింది. ఇదేం నోటిఫికేషన్‌ దేవుడా అంటూ తాము తలలు పట్టుకునే పరిస్థితి ఎదురైంది. ప్రత్యేక రాష్ట్రం వచ్చిన తర్వాత ఉద్యోగాలొస్తాయని ఎంతో ఆశగా ఎదురుచూసిన తమకు టీఎస్‌పీఎస్‌ నోటిఫికేషన్‌ ఇచ్చి అందులో ఊహించని నిబంధనలు పెట్టి తమ ఆశలపై నీళ్లు చల్లే ప్రయత్నం చేసిందని గగ్గోలు పెడుతున్నారు.
 
 ఊరించి ఊరించి ఉసూరుమనిపించినట్లు తొలిసారి ఒక మోస్తరు నోటిఫికేషన్‌ను గురుకుల విద్యాలయాల్లో టీచర్ల కొలువుల పేరిట టీఎస్‌పీఎస్సీ నోటిఫికేషన్‌ విడుదల చేసిన విషయం తెలిసిందే. మొత్తం పోస్టుల సంఖ్య 7306. ఉద్యోగాల సంఖ్య సంగతి ఎట్లున్నా టీఎస్‌పీఎస్సీ పెట్టిన నిబంధనలు చూసి అభ్యర్థులు ఆగ్రహం వ్యక్తం చేస్తున్నారు. ఇంతకీ అభ్యర్థులు చెబుతున్న ఆందోళనకరమైన విషయాలేమిటంటే..
 
 గ్రామీణ సోయి మరిచారు
 ‘తెలంగాణ నగర తెలంగాణ కాదు.. గ్రామీణ తెలంగాణ. ఈ సోయి టీఎస్‌పీఎస్‌సీ పెద్దలు మరిచినట్లే కనిపిస్తోంది. గ్రామీణ ప్రాంతాల విద్యార్థులు మొన్నటి వరకు డిగ్రీ చేసే పరిస్థితులే అంతంతమాత్రం. అలాంటిది పాసవడం.. పైగా పెద్దపెద్ద పర్సెంటేజీలు తెచ్చుకోవడం ఇంకా కష్టం. సగం రోజులు కాలేజీల్లో.. సగం రోజులు కూలిపనుల్లో ఉంటూ చదివినవారు..  ఎట్లా పూర్తిగా చదువుతారు ఎట్లా మంచి పర్సెంటేజీ సాధ్యమైతది? ఇప్పుడు గురుకుల నోటిఫికేషన్‌లో టీజీటీ, పీజీటీ పోస్టులకు డిగ్రీకి 60శాతం ఓసీ, బీసీ అభ్యర్థులకు, 55శాతం ఎస్సీ, ఎస్టీ అభ్యర్థులకు అర్హతగా పెట్టారు. బహుశా ఈ నిబంధన దేశవ్యాప్తంగా ఏ పరీక్షకు నిర్ణయించలేదనే విషయం టీఎస్‌పీఎస్‌సీ తెలుసుకుంటే మంచిది’ అంటూ అభ్యర్థులు వేడుకుంటున్నారు.
 
 ఆంగ్ల మాధ్యమం
 ‘తెలంగాణలో టీచర్ కొలువుకు పోటీపడే వారిలో గ్రామీణ నేపథ్యం నుంచి వచ్చిన వారు అధికం. తెలుగు మాధ్యమంగా చదివినవారే దాదాపు 80 నుంచి 90% మంది ఉన్నారు. ప్రిలిమ్స్, మెయిన్స్ ప్రశ్నాపత్రం కేవలం ఆంగ్లంలోనే ఇస్తామని టీఎస్‌పీఎస్‌సీ చెప్పింది. ఇది ఎంతవరకు సమంజసం? ఒక తెలుగు రాష్ట్రంలో తెలుగును కాదని, ఆంగ్ల మాధ్యమంలో పేపర్‌ ఇవ్వడం ఎంతవరకు సబబు? అన్నింటికిమించి ఇక ఆంగ్లంపై పట్టుసరిగా లేనివాళ్లకు ఈ నిబంధన ఒక ఆశని పాతమేగా? ఆంగ్లాన్ని కాదనడం లేదు.. అదే సమయంలో తెలుగు మాధ్యమాల్లో కూడా ప్రశ్నలు ఇవ్వాలని విద్యార్థులు కోరుకుంటున్నారు.
 
 మూడేళ్ల  బోధనానుభవం
 ‘అన్నింటికిమించి పీజీటీ ఉద్యోగాలకు మూడేళ్ల బోధనానుభవం ఉండాలని నిబంధన పెట్టారు. అసలు ఈ నిబంధన పెట్టాలన్న ఆలోచన ఎలా వచ్చిందో అర్థం కావట్లేదు. డిగ్రీ అయ్యాక, బీఈడీ, టీపీటీ, పీజీ, పీహెచ్‌డీ ఇలా చదువుకుంటూ వెళతారు.. అలా వెళ్లడం కుదరని వారు కాంపిటేషన్‌ ఉద్యోగాలకు ప్రిపేర్‌ అవుతుంటారు. అంతేకానీ, ప్రైవేటు రంగంలో బోధనవైపు వెళ్లడం అరుదు? ఒక వేళ అలాంటి నిబంధన పెట్టే ఉద్దేశమే ఉంటే టీచర్‌ ఉద్యోగం చేయాలనుకునే వారు తమ బీఈడీ అయ్యాక మూడేళ్లు ఏదైనా పాఠశాలల్లో పనిచేయాలనే నిబంధన ముందే చెప్పి ఉండాలి.
 
 వారు తీసుకున్న ఈ నిర్ణయం ప్రైవేటు పాఠశాలల్లో పనిచేసేవారికి మాత్రమే లబ్ధి చేకూరుస్తుంది. వారికి ​మాత్రమే అర్హత వస్తుంది. అంతేకాకుండా కొంత డబ్బుగలవారు తాము ఆయా పాఠశాలల్లో బోధన చేశామని దొంగ సర్టిఫికెట్లు తెచ్చే అవకాశం లేకపోలేదు. ఈ లెక్కన మిగితా వారంతా నష్టపోవాల్సిందేనా? దీని ప్రకారం 2013, 2014, 2015, 2016లో పీజీలు అయిపోయిన వారు పీజీటీ ఉద్యోగాలకు అనర్హులా? ’ అంటూ వారంతా నిలదీస్తున్నారు.
  
 ఆన్‌లైన్‌ తలనొప్పి
 ‘ఇప్పటివరకు ఏ టీచర్‌ ఉద్యోగాన్ని కూడా ఆన్‌లైన్‌లో నిర్వహించలేదు. అలాంటిది తొలిసారి ఈ వ్యవస్థను తీసుకొచ్చారు. ఎలాంటి ముందస్తు పరిచయం లేకుండానే అందరికీ ఆన్‌లైన్‌లో పరీక్ష రాయడం ఎలా వస్తుంది? దీనిని టీఎస్‌పీఎస్‌సీ సభ్యులు ఏమేరకు సమర్థిస్తారు’ అని అభ్యర్థులు ప్రశ్నిస్తున్నారు.
 
 బాలికల పాఠశాలల్లో అమ్మాయిలకే
 ’గురుకులాల్లో మొత్తం టీజీటీ పోస్టులు 4362. ఇందులో అమ్మాయిలకు 3238. మిగిలిన 1124 పోస్టుల్లో అదనంగా 33శాతం రిజర్వేషన్‌. దీంతో టీజీటీలో పురుష అభ్యర్థులకు మిగిలేది దాదాపు 753 పోస్టులు. అలాగే, పీజీటీలో చూస్తే మొత్తం 921 పోస్టులు అందులో అమ్మాయిలకు 732. మిగిలినవి 189 పోస్టులు. ఇందులో కూడా వారికి 33శాతం రిజర్వేషన్‌ పేరిట 62 పోస్టులు మళ్లీ అమ్మాయిలకు తీస్తే అబ్బాయిలకు మిగిలేది 127 పోస్టులు. అసలు అమ్మాయిల గురుకులాల్లో అమ్మాయిలే చెప్పాలి.. అబ్బాయిలు చెప్పకూడదు అనేది వివక్షను టీఎస్‌పీఎస్‌సీ స్వయంగా తెరపైకి తెచ్చినట్లు ఎందుకు భావించకూడదు?’ అని పురుష అభ్యర్థులు అనుమానం వ్యక్తం చేస్తున్నారు.
 
 అంతేకాదు.. ‘బీకాం, టీచర్ ట్రైనింగ్ చేసి, టెట్ అర్హత సాధించిన వారి పరిస్థితి ఏంటి? ఓపెన్ వర్సిటీలో డిగ్రీ పూర్తి చేసిన వారికి టోటల్ మార్కులకు కలిపి ఫస్ట్, సెకండ్, థర్డ్ క్లాస్‌గా పరిగణిస్తున్నారు. అదే రెగ్యులర్‌గా డిగ్రీ చేసిన వారికి ఆప్షనల్స్ ప్రాతిపదికన తీసుకొని ఫస్ట్, సెకండ్, థర్డ్ క్లాస్ గా పరిగణిస్తున్నారు. పరిస్థితులు అనుకూలించక ఓపెన్ వర్సిటీల్లో చదువుకున్న వారికి ఈ నిర్ణయం ఆశని పాతమే కదా? అంతేకాకుండా అదేదో కక్ష సాధింపుచర్యలాగా కనీసం నోటిఫికేషన్‌కు పరీక్ష సమయానికి కనీసం 45 రోజులు గడువు ఇవ్వాల్సింది పోయి కేవలం 39 రోజులు మాత్రమే ఇచ్చారు.
 
 అలాగే, మెయిన్స్‌ పరీక్షకు ప్రిలిమ్స్‌ మధ్య కూడా 39 రోజుల నిడివి మాత్రమే ఉంది. ఇంత తక్కువ సమయంలో ప్రిపరేషన్‌ ఎలా చేయగలరు? ఇలా చెప్పుకుంటూ వెళితే ఈ నోటిఫికేషన్‌లో టీఎస్‌పీఎస్‌సీ చేసిన పొరపాట్లు నిర్లక్ష్యాలు కోకొల్లలు. ఒక ఉద్యోగ నోటిఫికేషన్‌పై ఇన్ని అనుమానాలు, ఇంత స్థాయి వివాదాలు బహుశా కేంద్రం నిర్వహించే సివిల్‌ సర్వీస​ పరీక్షకు కూడా రాలేదంటే ఆశ్చర్యం కాదేమో’ అంటూ ఇలా ఉస్మానియా విశ్వవిద్యాలయం, కాకతీయ, మహాత్మాగాంధీ, శాతివాహన, పాలమూరు, తెలంగాణ తదితర విశ్వవిద్యాలయాలకు చెందిన నిరుద్యోగ విద్యార్థిలోకం, పట్టణ ప్రాంత, గ్రామీణ ప్రాంత అభ్యర్థులు తీవ్ర ఆవేదన వ్యక్తం చేస్తున్నారు.
 
 నిరుద్యోగ, విద్యార్థిలోకం చేస్తున్న ప్రధాన డిమాండ్లు
 
 తెలుగు ఆంగ్లమాధ్యమాల్లో పరీక్ష నిర్వహించాలి
 
 పీజీటీకి పెట్టిన మూడేళ్ల బోధనానుభవం నిబంధన తొలగించాలి
 
 60%శాతంగా ఉన్న డిగ్రీ అర్హత ను మార్చాలి
 
 పరీక్షను ఆఫ్ లైన్ లో నిర్వహించాలి
 
 పురుష అభ్యర్థులకు కూడా వివక్ష లేకుండా అమ్మాయిలతోపాటు సమాన అవకాశాలు కల్పించాలి
 
 ప్రిపరేషన్ కు కనీసం నాలుగు నుంచి ఆరు నెలల సమయం ఇవ్వాలి
 
 టెట్ ను అర్హత గా భావించి ప్రిలిమ్స్ ను రద్దుచేయాలి.


 హైదరాబాద్: దేశంలోనే అతిపెద్ద ప్రభుత్వరంగ బ్యాంక్ అయిన స్టేట్ బ్యాంక్ ఆఫ్ ఇండియా(ఎస్బీఐ)లో ఉద్యోగానికి దరఖాస్తు చేసుకుంటున్నారా? మీరు కొన్ని విషయాలు గమనించాల్సిందే. అయితే దేశవ్యాప్తంగా ఉన్న ఎస్బీఐ బ్రాంచ్ బ్యాంకు లోన్లలో బాకీలు లేకుండా ఉండేలా చూసుకోండి... లేకపోతే మీ జాబ్ అప్లికేషన్ రిజెక్ట్ అయ్యే ప్రమాదం ఉంది. కస్టమర్ సపోర్ట్ అండ్ సేల్స్, జూనియర్ అగ్రికల్చర్ అసోసియేట్స్లో క్లరికల్ స్థాయి ఉద్యోగాలకు దరఖాస్తు చేసుకునే వారికి బ్యాంకుల్లో ఎటువంటి బాకీలు ఉండకూడదని ఎస్బీఐ తాజాగా ఇచ్చిన ప్రకటనలు ఈ విషయాన్ని స్పష్టం చేస్తున్నాయి.
 
 పోస్టులకు దరఖాస్తులు చేసే ముందు అభ్యర్ధుల తమ ఖాతాల్లో ఉన్న అప్పుల వివరాలను క్రెడిట్ ఇన్ఫర్మేషన్ బ్యూరో లిమిటెడ్(సీఐబీఐఎల్) ను పరిశీలించుకోవాలని బ్యాంకు సూచించింది. దీంతో విద్య కోసం బ్యాంకు లోన్లు తీసుకున్న విద్యార్ధులను దీని మినహాయింపు ఇవ్వాలంటూ బ్యాంక్ ఎంప్లాయిస్ యూనియన్ ఎస్బీఐని కోరింది.


 హైదరాబాద్: స్విట్జర్లాండ్‌లో ఉద్యోగాల పేరిట నిరుద్యోగును మోసం చేసిన బి.ఎస్.రావు గ్రూపు సంస్థలో పోలీసులు తనిఖీలు చేశారు. ఈ సందర్భంగా పలు పాస్‌పోర్టులను స్వాధీనం చేసుకున్నారు. గుంటూరు జిల్లాకు చెందిన దుర్గా పవన్‌కుమార్ రాజ్‌భవన రోడ్డులోని అమృతావిల్లా అపార్ట్‌మెంట్‌లో బి.ఎస్.రావు గ్రూప్ సంస్థను ఏర్పాటు చేసి, స్విట్జర్లాండ్‌లోని కొన్ని ఫార్మా సంస్థల్లో ఉద్యోగాలు ఇప్పిస్తానని మోసగించిన విషయం తెల్సిందే.
 
 శుక్రవారం 95 మందిని శంషాబాద్ ఎయిర్‌పోర్టుకు తీసుకొచ్చి.. తీరా ముఖం చాటేసిన కేసులో నిందితుడు పవన్‌కుమార్, బ్రోకర్ యూసుఫ్‌లను అరెస్టు చేసి విచారిస్తున్నారు. తనిఖీల్లో భాగంగా సంస్థ నుంచి కీలక పత్రాలు, పలు పాస్‌పోర్టులను స్వాధీనం చేసుకున్నారు.
  


 * స్విట్జర్లాండ్‌లో ఉద్యోగాలంటూ ఎర  
 * బీఎస్ రావు గ్రూప్ కన్సల్టెన్సీ దగా
  
 సాక్షి, హైదరాబాద్: స్విట్జర్లాండ్‌లో ఉద్యోగమన్నారు.. నెలకు లక్షా యాభై వేల రూపాయల జీతం వస్తుందని నిరుద్యోగులను ప్రలోభపెట్టారు.. దీంతో దారిద్య్రాన్ని దూరం చేసుకోవచ్చనుకుని ఇళ్లు, పొలాలు, భార్య ఒంటిపై నగలను అమ్ముకుని, అప్పులు చేసి మరీ డబ్బు తెచ్చి చేతిలో పోసిన అమాయకులను నిండా ముంచేశారు.. వారిని విమానాశ్రయం దాకా రప్పించారు. అప్పటికి అసలు విషయం తెలిసిన బాధితులు గొల్లుమన్నారు.
 
 గుంటూరుకు చెందిన దుర్గాపవన్ అనే వ్యక్తి హైదరాబాద్ సోమాజిగూడలోని అమృతా విల్లా అపార్టుమెంట్‌లో బీఎస్‌రావు గ్రూప్స్ పేరిట ఒక సంస్థను ఏర్పాటు చేశాడు. స్విట్జర్లాండ్‌లోని ఫార్మా కంపెనీల్లో ఉద్యోగాలు ఇప్పిస్తామని, రూ. లక్షా అరవై వేలు చెల్లిస్తే మూడేళ్ల పాటు అగ్రిమెంట్ కింద స్విట్జర్లాండ్ పంపిస్తామని ప్రచారం చేసుకున్నాడు. ప్రతి నెలా రూ. లక్షా యాభై వేలు జీతం వస్తుంద ని ఆశపెట్టాడు. వరంగల్ జిల్లాకు చెందిన యూసుఫ్‌తో పాటు కొంతమందిని బ్రోకర్లుగాను, ట్రావెల్ ఏజెంట్‌గా మహ్మద్ జావిద్‌ను నియమించుకున్నాడు. హంగూ ఆర్భాటాలతో కార్యాలయం ఏర్పాటు చేసుకున్నాడు.
 
 వరంగల్, నిజామాబాద్, హైదరాబాద్, ఇల్లందు ప్రాంతాలకు చెందిన 94 మంది వీరి ప్రచారాన్ని నమ్మి.. ఆస్తులను అమ్ముకుని మరీ డిసెంబర్, జనవరి నెలల్లో రూ. 76,000, జూన్‌లో మిగతా రూ. 84,000ను చెల్లించారు. వీరిలో వరంగల్‌కు చెందిన 54 మంది యూసుఫ్ స్థానికుడని నమ్మి డబ్బు కట్టారు. వీరందరినీ నమ్మించేందుకు వారి వివాహ ధ్రువపత్రం, పాన్ కార్డు, ఆధార్‌కార్డు, పాస్‌పోర్టులను దుర్గాపవన్, యూసుఫ్ తదితరులు తీసుకున్నారు.
 
 గత నెల 14న స్విట్జర్లాండ్ పంపిస్తామని చెప్పి అందరినీ ఎయిర్‌పోర్టు వరకు రప్పించారు. కానీ ఇంకా పని ఒప్పందం కుదరలేదని, కొంతకాలం ఆగాలని చెప్పి అందరినీ తిరిగి పంపించేశారు. బాధితుల నుంచి ఒత్తిడి పెరగడంతో గత నెల హైదరాబాద్‌లోని హోటల్ కత్రియాలో సమావేశం ఏర్పాటు చేసి, అందరిని తప్పకుండా పంపిస్తామని చెప్పారు. తర్వాత జూలై 4న స్విట్జర్లాండ్‌కు పంపిస్తామని, అందరూ సిద్ధం కావాలని సమాచారం ఇచ్చారు.
 
 అసలు పత్రాలే లేవు
 ట్రావెల్ కన్సల్టెన్సీ సమాచారం మేరకు డబ్బు కట్టినవారంతా బంధువులతో సహా శుక్రవారం తెల్లవారుజామున శంషాబాద్ విమానాశ్రయానికి చేరుకున్నారు. కానీ  కన్సల్టెన్సీ ఇచ్చిన పత్రాలు సరిగా లేక అధికారులు తిరస్కరించారు. దీంతో బాధితులు ఆందోళనకు గురై ఏజెంట్లలో ఒకరైన పవన్‌ను విమానాశ్రయానికి పిలిపించారు. కానీ అతను ఇంకా పని ఒప్పందం కుదరలేదని, మరికొన్ని రోజులు ఆగాలని చెప్పాడు. దీంతో బాధితులు మోసపోయినట్లు గ్రహించారు.
 
 పవన్‌ను పట్టుకుని శంషాబాద్ పోలీసులకు అప్పగించి, అక్కడే ఆందోళనకు దిగారు. కన్సల్టెన్సీని నమ్మి మోసపోయామంటూ కన్నీటి పర్యంతమయ్యారు. కేసు నమోదు చేసిన పోలీసులు పవన్, యూసుఫ్‌లను అదుపులోకి తీసుకున్నారు. కన్సల్టెన్సీ ఉన్న పంజగుట్ట పోలీస్‌స్టేషన్‌కు కేసును బదిలీ చేశారు. దీంతో బాధితులు పంజగుట్ట పోలీస్‌స్టేషన్ వద్దకు చేరుకుని అక్కడ కూడా ఆందోళనకు దిగారు. తాము చెల్లించిన డబ్బును తిరిగి ఇప్పించాలని డిమాండ్ చేఃశారు.
 
 కాగా కన్సల్టెన్సీ మోసం వెనుక ఇంకెవరైనా ఉన్నారా అనే కోణంలో పోలీసులు విచారిస్తున్నారు. మరోవైపు 14న తమను స్విట్జర్లాండ్ తీసుకెళతానంటూ ఇదే కన్సల్టెన్సీ డబ్బులు వసూలు చేసిందంటూ మరికొందరు పోలీసులను ఆశ్రయించారు.
  
 నగలమ్మి డబ్బులిచ్చా..
 గత నెల 13న నా దగ్గర 4,500 తీసుకుని యాభై స్విట్జర్లాండ్ ఫ్రాంకులు  ఇచ్చి నమ్మించాడు. నా భార్య నగలమ్మి డబ్బులు చెల్లించాను 
 - మహ్మద్ గౌస్
  
 మాకు న్యాయం చేయాలి
 స్విట్జర్లాండ్‌లో చలి మైనస్ డిగ్రీల్లో ఉంటుందని, అందరూ మంచి కంపెనీకి చెందిన జర్కిన్‌లు కొనుక్కోవాలని కన్సల్టెన్సీ వాళ్లు చెప్పారు. ఎయిర్‌పోర్టులో కేవలం వుడ్‌లాండ్ లెదర్ బూట్లను మాత్రమే అనుమతిస్తారని, అందరూ జీన్స్‌ప్యాంట్లు, టీషర్టు, ఉన్ని సాక్సు, టర్కీ టవల్ తెచ్చుకోవాలన్నారు. దాంతో అందరం మరో పది వేల చొప్పున ఖర్చుపెట్టి అవన్నీ కొన్నాం. నా సొంతిల్లు అమ్ముకుని మరీ కన్సల్టెన్సీకి డబ్బు కట్టాను. పోలీసులు మాకు న్యాయం చేయాలి.  
  - షేక్ సాజిద్, వరంగల్ జిల్లా
  
 మోసపోయాం
 ఆటో నడుపుకునే నేను విదేశాలకెళ్లి డబ్బు సంపాదించా లనుకున్నా.  మరో 15 మందినీ కన్సల్టెన్సీకి తీసుకొచ్చా. అందరం మోసపోయాం.
 - సాయిబాబు, బీఎస్ మక్తా