హైదరాబాద్: ఆంధ్రప్రదేశ్ రాష్ట్రంలో ఇంటర్మీడియేట్ ప్రాక్టికల్ పరీక్షలు జంబ్లింగ్ విధానంలోనే జరగనున్నాయి. ఈ మేరకు ఇంటర్మీడియేట్ విద్యా మండలి కార్యదర్శి ఎం.వీ. సత్యనారాయణ శనివారం ఓ ప్రకటన జారీ చేశారు. ఫిబ్రవరి 4 నుంచి 24వ తేది వరకు జంబ్లింగ్ విధానంలో ఈ ప్రాక్టికల్ పరీక్షలు జరగనున్నాయి. 723 పరీక్షా కేంద్రాలను ఇంటర్మీడియేట్ బోర్డు ఏర్పాటు చేసింది. ఇందులో 378 ప్రభుత్వ కళాశాలలు కాగా 345 ప్రైవేటు, ఆన్ ఎయిడెడ్ కాలేజీలు. ఈ పరీక్షలకు 2,99,476 మంది విద్యార్ధులు హాజరు కానున్నారు. విద్యార్ధులకు సంబంధించిన జవాబు పత్రాలు, ప్రశ్నాపత్రాలు, టైమ్ టేబుల్, ఓఎంఆర్ తదితర సామాగ్రిని ప్రాంతీయ కార్యాలయాలకు పంపారు. పరీక్షలు సజావుగా నిర్వహించేందుకు ఇంటర్మీడియేట్ బోర్డు చర్యలు చేపట్టింది.
 
 - విద్యార్ధులు తమ హాల్ టికెట్లు సంబంధిత కాలేజీ ప్రిన్సిపల్ నుంచి పొందాలి.
 - విద్యార్ధుల సౌకర్యార్ధం ప్రాక్టికల్ పరీక్షల కోసం ఆదివారం, సెలవు దినాల్లో కూడా ప్రయోగాలు చేపట్టడానికి కళాశాలలు తెరిచి ఉంచవలసిందిగా బోర్డు ఆదేశించింది.
 - పరీక్షలు నిర్వహించే ఎగ్జామినర్లను కంప్యూటర్, ర్యాడ్‌నైజేషన్ ద్వారా ఎంపిక చేసి నియమించారు.
 - ప్రతీ జిల్లాలకు బోర్డు నుంచి ఒక పరిశీలకుడ్ని పర్యవేక్షణాధికారిగా నియమించారు. దీంతో పాటు స్వ్కాడ్ సభ్యులు కూడా నియమితులయ్యారు.
 - జిల్లా పరీక్ష కమిటీ. హైపవర్ కమిటీలు శనివారం నుంచే తమ విధులను ప్రారంభించాయి.
 - ఈ పరీక్షలలో ఎటువంటి అవాంఛనీయ సంఘటనలు జరగకుండా చర్యలు తీసుకోవాలని జిల్లాల అధికారులకు ఇంటర్మీడియేట్ బోర్డు సూచనలు, ఆదేశాలు జారీ చేసింది.


 విజయవాడ: ఏపీ ప్రైవేటు కాలేజీ యాజమాన్యాలు మంగళవారం ఆంధ్రప్రదేశ్‌ రాష్ట్ర ముఖ్యమంత్రి చంద్రబాబు నాయుడును కలిశాయి. ఈ సందర్భంగా జంబ్లింగ్‌ విధానంపై ఆయనతో చర్చించారు. ప్రైవేటు కాలేజీలలో జంబ్లింగ్ విధానంలో ప్రాక్టికల్ పరీక్షలు నిర్వహించడం వల్ల ఇబ్బందులు ఉంటాయని వారు చంద్రబాబుకు వివరించారు.
 
 దానికి చంద్రబాబు మాట్లాడుతూ.. జంబ్లింగ్‌ విధానం కచ్చితంగా అమలు చేస్తుందని స్పష్టం చేశారు. అందుకు అనుగుణంగా ఏర్పాట్లు చేసుకోవాలని కాలేజీ యాజమాన్యాలకు చంద్రబాబు సూచించారు.