తమిళసినిమా: మలయాళ చిత్రం ప్రేమమ్‌తో బహుభాషా నటిగా పేరు తెచుకున్న యువ నటీమణుల్లో మడోనా సెబాస్టియన్‌ ఒకరు. ఇటీవల ఈ అమ్మడు తమిళంలో విజయ్‌సేతుపతితో నటించిన జుంగా చిత్రం మంచి విజయాన్ని అందుకుంది. సక్సెస్‌ఫుల్‌ నటి అనిపించుకున్నా మడోనాసెబాస్టియన్‌  చిత్రాల ఎంపికలో మాత్రం కాస్త ఎక్కువగా ఆలోచిస్తుందని, వచ్చిన అవకాశాలన్నీ అంగీకరించడంలేదనీ ప్రచారం వైరల్‌ అవుతోంది. ఇలాంటి విషయాల గురించి ఈ బ్యూటీ ఏమంటుందో చూద్దాం. అవును నేను చిత్రాల ఎంపికలో కాస్త ఎక్కువగానే ఆలోచిస్తాను. ఎందుకంటే నా వ్యక్తిగత జీవితానికి సమయం అవసరం. కుటుంబం, మనకు నచ్చిన విషయాల కోసం సమయాన్ని వెచ్చించకుండా శ్రమించి ఫలితం ఏమిటీ? ఎలాంటి కథా పాత్రలను ఎంచుకోవాలన్నది నాకు తెలుసు. ప్రస్తుతం కిచ్చా సుదీప్‌కు జంటగా ఒక కన్నడ చిత్రంలో నటిస్తున్నాను. తరువాత ఒక తెలుగు చిత్రంలో నటించనున్నాను. పలు విధాలుగా భావోద్వేగాలను ప్రదర్శించే పాత్రలను కోరుకుంటున్నాను. నాకు జిమ్‌లో వర్కౌట్స్‌ చేయడం అంటే ఇష్టం. అలాగని స్లిమ్‌గా మారడం నచ్చదు. ఆహారం విషయంలో బాగానే లాగించేస్తాను. సమయం దొరికితే కుటుంబ సభ్యులందరం ఇంట్లోనే ఉంటాం. పనిలేకుండా బయటకు వెళ్లడం ఇష్టం ఉండదు. నా స్నేహితుల్లో అధిక మంది సినిమా రంగానికి సంబంధం లేనివారే. సినిమా రంగంలో సన్నిహితుడు విజయ్‌సేతుపతినే. ప్రేమమ్‌ చిత్రంలో నాతో కలిసి నటించిన సాయిపల్లవి, అనుపమ పరమేశ్వరన్‌తో ఇంతకు ముందు టచ్‌లో ఉన్నాను. ప్రస్తుతం ముగ్గురం బిజీగా ఉండటంతో మాట్లాడుకోవడం కుదరడం లేదు. అయితే అనుపమ పరమేశ్వరన్‌తో అప్పుడప్పుడూ టచ్‌లో ఉన్నా. సాయిపల్లవి కూడా బాగుందనే భావిస్తున్నా. మరో విషయం ఏమిటంటే నేను ఆరేళ్ల వయసులోనే గాయనినయ్యాను. అయితే నటిగా బిజీగా ఉండడం వల్ల పాడటానికిప్పుడు  ప్రాముఖ్యత నివ్వడం లేదు. నాకు సంగీత బృందం ఉంది. త్వరలోనే ఒక తమిళ ఆల్బమ్‌ను విడుదల చేస్తాను అని పేర్కొంది ఈ జాన.

తమిళ సినిమా : విజయ్‌సేతుపతితో మూడోసారి జత కడుతోంది నటి మడోనా సెబాస్టియన్‌. కథానాయకుడిగా బిజీగా ఉన్న యువనటుల్లో విజయ్‌సేతుపతి ఒకరు. ఈయన మళ్లీ మళ్లీ సిఫార్సు చేసే హీరోయిన్లు చాలా తక్కువ మందే. వారిలో నటి గాయత్రి ఒకరైతే, రమ్యానంబీశన్‌ మరొకరు. తాజాగా ఈ పట్టికలో చేరిన నటి మడోనా సెబాస్టియన్‌. ప్రేమమ్‌ చిత్రంలో వెలుగు చూసిన హీరోయిన్లలో ఈ ముద్దుగుమ్మ ఒకరు. కోలీవుడ్‌కు విజయ్‌సేతుపతికి జంటగానే కాదలుమ్‌ కడందు పోగుమ్‌ చిత్రం ద్వారా పరిచయమైంది. ఆ చిత్రం సైలెంట్‌గా మంచి విజయాన్ని అందుకుంది. ఆ తరువాత కేవీ.ఆనంద్‌ దర్శకత్వం వహించిన కవన్‌ చిత్రంలో విజయ్‌సేతుపతితో రెండోసారి జత కట్టింది. ఆ చిత్రం సక్సెస్‌ అయ్యింది. అయినా ఎందుకనో పెద్దగా అవకాశాలను అందుకోలేకపోయింది. ఆ మధ్య ధనుష్‌కు జంటగా పవర్‌పాండిలో రొమాన్స్‌ చేసింది.ఆ చిత్రం హిట్టే. ఇలా సక్సెస్‌ గ్రాస్‌ బాగానే ఉన్నా మడోనా సెబాస్టియన్‌ క్రేజ్‌ను పెంచుకోలేకపోయ్యిందనే చెప్పాలి. చాలా గ్యాప్‌ తరువాత మళ్లీ విజయ్‌సేతుపతినే ఈ అమ్మడికి అవకాశం కల్పించారు.  ఆయన కథానాయకుడిగా నటిస్తూ, నిర్మిస్తున్న భారీ చిత్రం జుంగాలో మడోనా సెబాస్టియన్‌ను సిఫార్సు చేశారు. ఇందులో నటి అయేషా సైగల్‌ ఒక హీరోయిన్‌గా నటిస్తున్న విషయం తెలిసిందే. మరో హీరోయిన్‌గా మడోనా సెబాస్టియన్‌ నటిస్తున్న విషయం ఆలస్యంగా వెలుగు చూడడం విశేషం. కాగా జుంగా చిత్రం ఈ బ్యూటీ కెరీర్‌కు కీలకంగా మారనుంది. ఈ చిత్రంపై ఈ అమ్మడు చాలా ఆశలు పెట్టుకుంది. ఆమెకు ఈ చిత్రం మరిన్ని అవకాశాలు తెచ్చిపెడుతుందేమో చూడాలి. గోకుల్‌ దర్శకత్వం వహిస్తున్న ఈ చిత్రం నిర్మాతల మండలి సమ్మె కాలంలో కూడా విదేశాల్లో చిత్రీకరణ జరుపుకుంది. ఇదే ఇప్పుడు వివాదానికి తెరలేపుతోంది. మరి ఈ వివాదం నుంచి సినిమా ఎలా బయట పడుతుందో వేచి చూడాలి.

తమిళసినిమా: వివాదాలకు దూరంగా ఉండే నటుడు విజయ్‌సేతుపతి. అలాంటిదిప్పుడు ఆయన చిత్రం వివాదాల్లో చిక్కుకోవడం విశేషం. విజయ్‌సేతుపతి, షాయేషా సైగల్‌ జంటగా నటిస్తున్న చిత్రం జుంగా. ఇది ఆయన సొంతంగా నిర్మిస్తున్న చిత్రం అన్నది గమనార్హం. దీనికి గోకుల్‌ దర్శకుడు కొంత భాగం చిత్రీకరణను జరుపుకున్న ఈ చిత్రం ఇప్పుడు వివాదాల్లో చిక్కుకుంది. డిజిటల్‌ సర్వీస్‌ ప్రొవైడర్స్‌ చార్జీలు తగ్గించాలంటూ నిర్మాతల మండలి సమ్మెబాట పట్టిన విషయం తెలిసిందే. అందులో భాగంగా ఈ నెల 16వ తేదీ నుంచి చిత్ర షూటింగ్‌లతో పాటు సినిమాలకు సంబంధించిన అన్ని కార్యక్రమాలను నిలిపివేస్తున్నట్లు వెల్లడించారు. అయితే ఇతర రాష్ట్రాల్లో చిత్రీకరణ జరుపుకుంటున్న చిత్రాలకు ఈ నెల 23 వరకూ గడువు ఇచ్చారు. అయితే విజయ్‌ నటిస్తున్న తాజా చిత్రంతో పాటు మరో నాలుగు చిత్రాలకు సెట్‌ వేసి షూటింగ్‌ జరుపుతున్నందున వాటికి మాత్రం అనుమతి ఇచ్చినట్లు నిర్మాతల మండలి కార్యదర్శి ముత్తురాజ్‌ వివరణ ఇచ్చారు. అవి కూడా 23వ తేదీతో షూటింగ్‌ను నిలిపివేశారు. ఇలాంటి పరిస్థితుల్లో విజయ్‌సేతుపతి జుంగా చిత్ర యూనిట్‌ ఇటీవల పోర్చుగల్‌ దేశానికి షూటింగ్‌కు వెళ్లింది. దీంతో ఆ చిత్రం వివాదాల్లో చిక్కుకుంది. నిర్మాతల మండలి నిర్ణయాన్ని ధిక్కరించి జుంగా చిత్ర షూటింగ్‌ను నిర్వహిస్తుండడంతో తీవ్ర వ్యతిరేకత వ్యక్తం అవుతోంది. ఈ చిత్రంపై చర్యలు తీసుకోవాలనే డిమాండ్‌ వ్యక్తం అవుతోంది. అయితే ఈ వ్యవహారం గురించి జుంగా చిత్ర వర్గాలను విచారించగా తాము నిర్మాతల మండలి నుంచి అనుమతి తీసుకున్నట్లు చెబుతున్నారు. మండలి నిర్వాహకులు మాత్రం ఈ నెల 23వ తేదీ తరువాత ఎవరికీ షూటింగ్‌కు అనుమతి ఇవ్వలేదని అంటున్నారు. మరి ఈ వివాదం ఎలాంటి పరిణామాలకు దారి తీస్తుందో చూడాలి.

సెంటిమెంట్స్‌ లేని సెటిల్‌మెంట్స్‌ చేస్తూ సూట్‌కేసులు అందుకుంటూ దాదాగిరి చేసుకునే డాన్‌ అతను. మూడు గన్స్, ఆరు సూట్‌కేసుల్లా అతని లైఫ్‌ సాగుతుంది. కానీ సడన్‌గా గన్‌ పక్కన పెట్టి గులాబీ పట్టుకున్నాడు. ఎందుకలా అంటే.. డాన్‌ మనసులో ప్రేమ చిగురించింది. అది ఎంత స్ట్రాంగ్‌ అంటే.. ఆ అమ్మాయి కోసం ఏకంగా ఇండియా నుంచి ప్యారిస్‌ వెళ్లాడు. నెక్ట్స్‌ ఏమైంది అంటే.. ‘చెప్పమండి.. ఎలాగూ థియేటర్స్‌కి వస్తాంగా. చూసి, మా జుంగ లవ్‌ ఎలా ఉందో చెప్పండి’’ అంటున్నారు చిత్రబృందం. ‘కాష్మోరా’ ఫేమ్‌ గోకుల్‌ దర్శకత్వంలో ‘పిజ్జా’ ఫేమ్‌ విజయ్‌ సేతుపతి, సాయేషా, నేహా శర్మ ముఖ్య పాత్రల్లో రూపొందుతున్న సినిమా ‘జుంగ’. ఈ సినిమా ఫస్ట్‌ లుక్‌ను శుక్రవారం విడుదల చేశారు. టైటిల్‌ టీజర్‌ను శనివారం రిలీజ్‌ చేశారు. వేసవిలో సినిమాను విడుదల చేయాలనుకుంటున్నారు.

తమిళసినిమా: నటి నేహా శర్మ గుర్తుందా? ఇటీవల విడుదలైన సోలో చిత్రంలో నటుడు దుల్కర్‌సల్మాన్‌తో రొమాన్స్‌ చేసిన ఐదుగురు ముద్దుగుమ్మల్లో ఒకరీ భామ. తాజాగా మరో అవకాశాన్ని తన జేబులో వేసుకుంది. యువ నటుడు విజయ్‌సేతుపతి కథాయకుడిగా నటిస్తున్న తాజా చిత్రం జుంగా. తనే రూ.20 కోట్ల భారీ బడ్జెట్‌లో నిర్మిస్తున్న ఇందులో ఇప్పటికే ముంబై బ్యూటీ సాయేషాసైగల్‌ నాయకిగా నటిస్తోంది. ఈ చిత్రం షూటింగ్‌ ఫ్రాన్స్‌లో పాట చిత్రీకరించుకుంటోంది. రాజుసుందరం నృత్య దర్శకత్వంలో పాటను చిత్రీకరిస్తున్నారు. ఈ చిత్రంలో ఇద్దరు హీరోయిన్లు ఉంటారని చిత్రం యూనిట్‌ ఇప్పటికే ప్రకటించారు. రెండవ హీరోయిన్‌గా నటి నేహాశర్మను ఎంపిక చేయడానికి చర్చలు జరగుతున్నాయని చిత్ర దర్శకుడు గోకుల్‌ తెలిపారు. దీని గురించి ఆయన చెబుతూ రెండవ హీరోయిన్‌గా నటి నేహా శర్మను నటింపచేయడానికి చర్చలు జరగుతున్నాయని, అయితే ఇంకా ఆమె ఒప్పదంపై సంతకాలు చేయలేదని, తను కాల్‌షీట్స్‌ సర్దుబాటు చేసుకుని ఇస్తాననడంతో ఆమెకు సంబంధించిన సన్నివేశాలను డిసెంబర్, జనవరిలో గానీ చిత్రీకరించాలని భావిస్తున్నట్లు తెలిపారు. ఇందులో నేహాశర్మ పాత్రకు చాలా ప్రాధాన్యత ఉంటుందని, ఆమె లంగాఓణీ పాత్రలో చిన్నపాటి డాన్‌లా కనిపిస్తుందని అన్నారు. విజయ్‌సేతుపతితో నేహాకు ఒక డ్యూయెట్‌ కూడా ఉంటుందని చెప్పారు. విజయ్‌సేతుపతి, గోకుల్‌ కాంబినేషన్‌లో ఇంతకు ముందు ఇదర్కుదానే ఆశైపట్టాయ్‌ బాలకుమారా వంటి విజయవంతమైన చిత్రం వచ్చిన విషయం తెలిసిందే. జుంగా ఈ హిట్‌ కాంబినేషన్‌లో వస్తున్న రెండవ చిత్రం అవుతుంది.

తమిళసినిమా: జూంగా చిత్రం సేలౌట్‌ అయిపోయిందట. ఏమిటీ చిత్రం వ్యాపారం పూర్తి అయితే ఒక వార్తా అని అనుకుంటున్నారా? ఇవాళ ఎంత పెద్ద హీరో నటించిన చిత్రమైనా క్రయ విక్రయాలు అంత సులభం కాని పరిస్థితి నెలకొందన్నది వాస్తవం. ఇక వ్యాపారం కాక విడుదలకు నోచుకోని చిత్రాల సంఖ్య చాలానే ఉన్నాయి.అలాంటిది చిత్రం సెట్‌పైకి వెళ్లకుండానే సేలౌట్‌ అయ్యిందంటే కచ్చితంగా వార్తే అవుతుంది. ఇక జూంగా విషయానికి వస్తే ఈ చిత్రాన్ని నటుడు విజయ్‌సేతుపతి సొంతంగా నిర్మి స్తూ, కథానాయకుడిగా నటించనున్నారు. ఇందులో సాయేషాసైగల్‌ నాయకిగా నటించనుంది. 20 కోట్ల బడ్జెట్‌తో తెరకెక్కనున్న ఈ జూంగా చిత్రానికి గోకుల్‌ దర్శకత్వం వహించనున్నారు. చిత్ర షూటింగ్‌ ఈ నెలాఖరున ప్రారం భం కానుంది. ఇలాంటి పరిస్థితిలో జూంగా చిత్రాన్ని తొలి కాపీ ప్రాతిప్రదికన ఏ అండ్‌ బీ సంస్థ కొనుగోలు చేసిందట. ఈ విషయాన్ని చిత్ర వర్గాలు వెల్లడిస్తూ, విక్రమ్‌వేదా చిత్రం విజయంతో విజయ్‌సేతుపతి మార్కెట్‌ వ్యాల్యూ పెరిగిందనే టాక్‌ కోలీవుడ్‌ వర్గాల్లో వినిపిస్తోందన్నారు. ఇదర్కుదానే ఆశైపట్టాయ్‌ బాలకుమారా చిత్రం తరువాత విజయ్‌సేతుపతి, గోకుల్‌ కాంబినేషన్‌లో తెరకెక్కుతున్న చిత్రం కావడం కూడా జూంగా చిత్రంపై అంచనాలు పేరగడానికి ఒక కారణం అంటున్నారు. విజయ్‌సేతుపతి నటించిన తాజా చిత్రం కరుప్పన్‌ శుక్రవారం భారీ అంచనాల మధ్య విడుదల కానుందన్నది గమనార్హం.


 తమిళసినిమా:  వరుస విజయాలాతో దూసుకుపోతున్న యువ నటుడు విజయ్‌సేతుపతి. ఇటీవల విక్రమ్‌వేదా చిత్రంలో దాదాగా నటించి ఆ చిత్ర సంచలన విజయానికి కారణంగా నిలిచారు. ప్రస్తుతం ఏఎం.నిర్మిస్తున్న కరుప్పన్‌ చిత్రంలో గ్రామీణ యువకుడి పాత్రలో మరోసారి తన సత్తా చూపడానికి రెడీ అవుతున్నారు. తాజాగా జుంగా అనే మరో చిత్రంలో నటించడానికి సిద్ధం అవుతున్నారు.
 
 ఇంతకు ముందు ఇదర్కుదానే ఆశైపట్టాయ్‌ బాలకుమారా వంటి విజయవంతమైన చిత్రాన్ని తెరకెక్కించిన గోకుల్‌ ఈ చిత్రానికి దర్శకత్వం వహించనున్నారు.వరుస విజయాలాతో దూసుకుపోతున్న యువ నటుడు విజయ్‌సేతుపతి.బాలీవుడ్‌ బ్యూటీ సాయేషాసైగల్‌ విజయ్‌సేతుపతితో రొమాన్స్‌ చేయనుంది. మరో ముఖ్యపాత్రలో యోగిబాబు నటించనున్నారు. ఈ చిత్రం గురించి దర్శకుడు గోకుల్‌ తెలుపుతూ ఇది విజయ్‌సేతుపతిని యాక్షన్‌ హీరోగా చూపే కథా చిత్రం అని తెలిపారు. చిత్రం 60 శాతం ఫ్రాన్స్‌లోనూ మిగిలిన భాగాన్ని చెన్నై, తూత్తుకుడి, రామనాథపురంలోనూ చిత్రీకరించనున్నట్లు చెప్పారు.
 
 ఇదర్కుదానే ఆశైపట్టాయ్‌ చిత్రం తరువాత విజయ్‌సేతుపతి మరో చిత్రం కలిసి చేద్దాం అని అన్నారన్నారు. ఇటీవల ఈ జుంగా కథను విజయ్‌సేతుపతికి చెప్పగా పూర్తిగా విన్న తరువాత కొంచెం మౌనం వహించి ఈ చిత్రాన్ని తానే నిర్మిస్తానని అన్నారన్నారు. వేరే నిర్మాత రెడీగా ఉన్నారని చెప్పినా తానే చేస్తాననడంతో తనకు చాలా సంతోషం కలిగిందన్నారు. ఎందుకంటే ఈ చిత్రం బడ్జెట్‌ రూ.కోటి దాటుతుందని అన్నారు. ఇప్పుటి వరకూ విజయ్‌సేతుపతి నటించిన చిత్రాలన్నిటికంటే భారీ బడ్జెట్‌ చిత్రంగా జుంగా ఉంటుందని తెలిపారు. చిత్ర షూటింగ్‌ను ఆ నెల చివరిలో ప్రారంభించనున్నట్లు దర్శకుడు గోకుల్‌ వెల్లడించారు.