సాక్షి, హైదరాబాద్‌: తెలంగాణ రాష్ట్ర అండర్‌ –19 జూనియర్‌ చెస్‌ టోర్నమెంట్‌లో హైదరాబాద్‌ జిల్లాకు చెందిన ఆదిరెడ్డి అర్జున్‌ విజేతగా నిలిచాడు. ఆరు రౌండ్లపాటు నిర్వహించిన ఈ టోర్నీలో అర్జున్‌ 5.5 పాయింట్లతో అగ్రస్థానాన్ని సంపాదించాడు. చివరిదైన ఆరో రౌండ్‌లో చల్లా సహర్షపై అర్జున్‌ గెలుపొందాడు. ఈ టోర్నీలో అర్జున్‌ ఐదు గేముల్లో గెలిచి, మరో గేమ్‌ను ‘డ్రా’ చేసుకున్నాడు. మొహమ్మద్‌ బాషిక్‌ ఇమ్రోజ్‌ (నల్లగొండ) రన్నరప్‌గా, సీహెచ్‌ కార్తీక్‌సాయి (రంగారెడ్డి) మూడో స్థానంలో, విహాన్‌ కార్తికేయ (రంగారెడ్డి) నాలుగో స్థానంలో నిలిచారు. తెలంగాణ రాష్ట్ర చెస్‌ సంఘం అధ్యక్షుడు కేఎస్‌ ప్రసాద్‌ విజేతలకు ట్రోఫీలను అందజేశారు.


 సాక్షి, హైదరాబాద్: జాతీయ సబ్ జూనియర్ ఓపెన్ చెస్ టోర్నమెంట్‌లో తెలంగాణ క్రీడాకారులు అర్జున్, రాహుల్ శుభారంభం చేశారు. ఢిల్లీలోని ఇందిరా గాంధీ స్టేడియంలో జరుగుతోన్న ఈ టోర్నమెంట్‌లో ఆదివారం జరిగిన తొలిరౌండ్ గేమ్‌లో నాలుగో సీడ్ రాహుల్ శ్రీవాస్తవ (1, తెలంగాణ)... మయాంక్ దేవన్‌గన్ (ఛత్తీస్‌గఢ్)పై, తొమ్మిదో సీడ్ అర్జున్ ఎరిగైసి (1, తెలంగాణ)... గార్వ్ రాయ్ (ఢిల్లీ)పై,  గెలుపొందారు. ఇతర గేమ్‌ల్లో టాప్ సీడ్ రఘునందన్ (1, కర్ణాటక)... ఆదిత్య హిమాన్షు (గుజరాత్)పై గెలుపొందాడు. రెండో సీడ్ రత్నవేల్ (0.5, తమిళనాడు),  మనీశ్ కుమార్ (0.5, ఒడిశా)తో జరిగిన గేమ్‌ను డ్రా చేసుకున్నాడు.