న్యూఢిల్లీ: ఎల్‌టీఐ మైండ్‌ట్రీ, ఎల్‌అండ్‌టీ టెక్నాలజీ సర్వీసెస్‌ (ఎల్‌టీటీఎస్‌) చైర్మన్‌గా తప్పుకోవాలని ఏఎం నాయక్‌ నిర్ణయించుకున్నారు. ఆయన స్థానంలో ఈ రెండు సంస్థలకు చైర్మన్‌గా ఎస్‌ఎన్‌ సుబ్రమణియన్‌ 27న బాధ్యతలు చేపట్టనున్నారు. ఈ విషయాన్ని ఇరు కంపెనీలు ప్రకటించాయి. వ్యవస్థాపక చైర్మన్‌గా ఏఎం నాయక్‌ ఎల్‌టీఐ మైండ్‌ట్రీ కంపెనీని చురుకైన అంతర్జాతీయ కంపెనీగా తీర్చిదిద్దినట్టు సంస్థ పేర్కొంది. ఈ నెల 26నాటి ఎల్‌టీఐ మైండ్‌ట్రీ 28వ ఏజీఎంతో తన బాధ్యతలకు ముగింపు పలకాలని ఏఎం నాయక్‌ నిర్ణయించుకున్నారని, దీంతో ప్రస్తుతం వైస్‌ చైర్మన్‌ ఎస్‌ఎన్‌ సుబ్రమణియన్‌ను నూతన చైర్మన్‌గా బోర్డు ఎంపిక చేసినట్టు, ఇది 27 నుంచి అమల్లోకి వస్తుందని ఎల్‌టీఐ మైండ్‌ట్రీ ప్రకటించింది. కంపెనీ పురోగతికి నాయక్‌ అందించిన సేవలకు అభినందనలు తెలియజేసింది.సుబ్రమణియన్‌ సారథ్యంలో ఎల్‌టీఐ మైండ్‌ట్రీ తన వృద్ధి పథాన్ని కొనసాగిస్తుందని, కొత్త విజయశిఖరాలను చేరుకుంటుందని ఆశిస్తున్నట్టు నాయక్‌ ప్రకటించారు. అంతకుముందు ఈ సంస్థ ఎల్‌అండ్‌టీ ఇన్ఫోటెక్‌గా కొనసాగగా, 2019లో మైండ్‌ట్రీని విలీనం చేసుకున్న అనంతరం ఎల్‌టీఐ మైండ్‌ట్రీగా మారడం తెలిసిందే. మైండ్‌ట్రీని సొంతం చేసుకోవడంలో నాయక్, సుబ్రమణియన్‌ కీలక పాత్ర పోషించారు. ఎల్‌టీఐ మైండ్‌ట్రీ, ఎల్‌టీటీఎస్‌ రెండింటిలోనూ ఎల్‌అండ్‌టీకి మెజారిటీ వాటాలున్నాయి.

ఇంజనీరింగ్, నిర్మాణం, తయారీ, సాంకేతికత, సమాచార రంగాల్లో అగ్రగామిగా దూసుకెళ్తున్న 'లార్సెన్ అండ్ టుబ్రో' (Larsen & Toubro) గురించి చాలామందికి తెలుసు. కానీ ఈ సంస్థ పురోగతికి కారకుడైన ఏఎమ్ నాయక్ గురించి బహుశా విని ఉండక పోవచ్చు. కేవలం రూ. 760 తో మొదలైన ఈయన జీవితం.. వేలకోట్ల సామ్రాజ్యాన్ని నడిపించే స్థాయికి ఎదిగింది. ఈయన గురించి మరిన్ని వివరాలు ఈ కథనంలో చూసేద్దాం.. 2023 సెప్టెంబర్‌లో ఎల్‌ అండ్‌ టీ చైర్మన్‌గా పదవీవిరమణ చేసిన 'అనిల్‌ మణిభాయ్‌ నాయక్‌' జీవితం ఐదు దశాబ్దాల క్రితం కంకర రాళ్లు, సిమెంటు ధూళి మధ్యనే మొదలైంది. మధ్య తరగతికి చెందిన అనిల్‌ మణిభాయ్‌.. స్వాతంత్ర సమరయోధుడు, గాంధేయవాది అయిన మణిభాయ్ నిచ్చాభాయ్ నాయక్ కుమారుడు. ఈయన ఉపాధ్యాయ వృత్తిలో కూడా ఉండేవారని సమాచారం. ముంబైకి వలస.. ఉద్యోగరీత్యా వారి కుటుంబం మహారాష్ట్రలోని ఓ మారుమూల పల్లె నుంచి ముంబైకి వలస వచ్చింది. దీంతో మణిభాయ్ చదువు ముంబైలోనే సాగింది. విశ్వకర్మ యూనివర్సిటీలో సివిల్‌ ఇంజినీరింగ్‌ పూర్తి చేసిన ఈయన.. ప్రారంభంలో ఎల్ అండ్ టీ లో ఉద్యోగం పొందలేకపోయారు. నెస్టార్‌ బాయిలర్స్‌ అనే సంస్థలో ఉద్యోగం సంపాదించి ఇష్టం లేకపోయినా తండ్రి మాటకోసం చేరాడు. జూనియర్ ఇంజినీర్..  'ఎల్‌ అండ్‌ టీ' కంపెనీలో ఉద్యోగం చేయడం అంటే దేశానికి సేవ చేయడమే అభిప్రాయంతో ఉన్న 'నాయక్' అతి తక్కువ కాలంలోనే జూనియర్ ఇంజినీర్ హోదాలో ఎల్‌ అండ్‌ టీ కంపెనీలో అడుగుపెట్టాడు. కంపెనీ పట్ల అతనికున్న నిబద్దత 21 సంవత్సరాల్లో ఒక్క రోజు కూడా సెలవు తీసుకోకుండా చేసింది. అంకిత భావంతో పనిచేస్తున్న ఇతన్ని గుర్తించిన కంపెనీ అనేక ఉన్నత పదవులను అందించింది. ఛైర్మన్‌గా.. 1999లో కంపెనీకి సీఈవోగా.. 2017 జూలైలో గ్రూప్‌ ఛైర్మన్‌గా బాధ్యతలు చేపట్టిన ఈయన నాయకత్వంలో కంపెనీ ఆస్తులు 870 కోట్ల డాలర్లను పెరిగాయి. 2017 - 18లో కంపెనీ అతనికి వార్షిక వేతనంగా రూ. 137 కోట్లు చెల్లించింది. సెలవు తీసుకోకుండా పనిచేసిన పనిదినాలు కంపెనీ ఏకంగా రూ. 19 కోట్లు చెల్లించింది. మొత్తం మీద అతని మొత్తం ఆస్తి రూ. 400 కోట్లు అని సమాచారం. ఇదీ చదవండి: కలిసొచ్చిన చంద్రయాన్ 3 సక్సెస్ - బిలియనీర్ల జాబితాలోకి కొత్త వ్యక్తి.. ఎవరో తెలుసా? రూ. 142 కోట్లు దానం.. అనిల్‌ మణిభాయ్‌ నాయక్‌ ఎన్నెన్నో కష్టాలను ఎదుర్కొని అంచెలులంచెలుగా ఎదిగిన కష్టజీవి, కష్టం విలువ తెలిసిన వ్యక్తి కాబట్టి 2016లో తన మొత్తం ఆస్తిలో 75 శాతం (సుమారు రూ. 142 కోట్లు) విరాళంగా ఇచ్చేసాడు. భారతదేశంలో ఇప్పటి వరకు ఎక్కువ విరాళాలు అందించిన టాప్ 10 దాతల్లో నాయక్ ఒకరు కావడం విశేషం. ఈయన సేవను గుర్తించి భారత ప్రభుత్వం పద్మభూషణ్, పద్మ విభూషణ్ వంటి సత్కారాలను అందించింది. 2023 మర్చి 31న దాఖలు చేసిన కార్పొరేట్ షేర్‌హోల్డింగ్‌ల ప్రకారం, నాయక్ ఆస్తి మొత్తం రూ. 171.3 కోట్లు అని తెలుస్తోంది.


 - ఎస్.ఆర్.నగర్-మియాపూర్ మెట్రో ప్రాజెక్టుపై సమాలోచన
 
 హైదరాబాద్: ఎస్.ఆర్.నగర్-మియాపూర్(12 కి.మీ.) రూట్లో మెట్రో రైళ్ల ప్రయోగ పరీక్షల నిర్వహణ, రైళ్ల రాకపోకలను అధికారికంగా ఎప్పుడు ప్రారంభించాలన్న అంశంపై సీఎం కేసీఆర్‌తో ఎల్‌అండ్‌టీ సంస్థ చైర్మన్ ఏఎం నాయక్ మంగళవారం భేటీ అయినట్లు విశ్వసనీయంగా తెలిసింది. మూడు కారిడార్ల పరిధిలో ఆస్తుల సేకరణ ప్రక్రియను వేగవంతం చేయడంతోపాటు ట్రాఫిక్ అనుమతులు, అగ్నిమాపకశాఖ అనుమతుల మంజూరు వంటి విషయాల్లో ప్రభుత్వ పరంగా సహకారం అందజేస్తే ఎల్బీనగర్-మియాపూర్, నాగోల్-శిల్పారామం, జేబీఎస్-ఫలక్‌నుమా మార్గాల్లో మొత్తం 72 కి.మీ. మార్గంలో 2016 చివరినాటికి మెట్రో ప్రాజెక్టు పనులు పూర్తిచేసే అవకాశం ఉంటుందని ఆయన సీఎంకు వివరించినట్లు సమాచారం.
 
 మెట్రో కారిడార్లలో మరిన్ని ప్రభుత్వ స్థలాల లీజునిచ్చే అంశంతోపాటు వాణిజ్య ప్రకటనల పన్నులో కొంత మొత్తంలో రాయితీ ఇవ్వాలని సీఎంకు విన్నవించినట్లు తెలిసింది. మెట్రో రెండోదశ కింద నాగోల్-ఎల్బీనగర్, ఎల్బీనగర్-హయత్‌నగర్, ఉప్పల్-ఘట్‌కేసర్, మియాపూర్-పటాన్‌చెరు మార్గాల్లో మెట్రో ప్రాజెక్టును చేపట్టే అంశంపైనా చర్చించినట్లు సమాచారం. కాగా రాష్ట్ర ప్రభుత్వం ప్రతిష్టాత్మకంగా చేపడుతున్న భారీ ప్రాజెక్టు పనులను చేపట్టేందుకు తమకు అవకాశం ఇవ్వాలని నాయక్ సీఎంను కోరినట్లు తెలిసింది. ఈ భేటీ విషయమై ఎల్‌అండ్‌టీ వర్గాలను ‘సాక్షి’వివరణ కోరగా.. ఇది అధికారిక సమావేశం కాదని, సీఎం, ఎల్‌అండ్‌టీ చైర్మన్‌లు కలసి భోజనం చేశారని ఇందులో ప్రత్యేకతలేవీ లేవని తెలపడం గమనార్హం.