– గోవిందా నామస్మరణతో మారుమోగిన అహోబిలక్షేత్రం
 అహోబిలం(ఆళ్లగడ్డ): అహోబిల బ్రహ్మోత్సవాల చివరి రోజైన సోమవారం అర్ధ రాత్రి దిగువ అహోబిలంలో ప్రహ్లాదవరదస్వామి గరుడోత్సవ వేడుకలు ఘనంగా  నిర్వహించారు.  ఉత్సవమూర్తి  శ్రీ ప్రహ్లాదవరదస్వామికి ప్రత్యేక పూజలు నిర్వహించి నూతన పట్టు వస్త్రాలు, బంగారు ఆభరణాలతో అలంకరించారు. తర్వాత గరుడ వాహనము పై  కొలువుంచి  దిగువ అహోబిలంలోని మాడ వీధుల్లో  గ్రామోత్సవం నిర్వహించారు. ఈ  మహోత్సవం మంగళవారం తెల్లవారు జామున వరకు సాగింది.   స్వామిని దర్శించుకుని మొక్కులు చెల్లించుకునేందుకు తెలుగు రాష్ట్రాల నుంచే కాక పొరుగు రాష్ట్రాలైన తమిళనాడు, కర్ణాటక నుంచి సుమారు లక్ష మందికి పైగా భక్తులు తరలి వచ్చినట్లు అంచనా. దీంతో దిగువ అహోబిల క్షేత్రం గోవిందా నామస్మరణతో పులకించి పోయింది. 
  
 శాస్త్రోక్తంగా ధ్వజావరోహణం 
 బ్రహ్మోత్సవాలు ముగిసిన సందర్భంగా మంగళవారం తెల్లవారు జామున 4.30 గంటలకు ధ​‍్వజావరోహణం కార్యక్రమం శాస్త్రోక్తంగా నిర్వహించారు. బ్రహ్మోత్సవాలు ప్రారంభ దశలో సకలదేవతలను ఆహ్వానిస్తూ.. ముగింపు రోజు సకదేవతలను సాగనంపుతూ ధ​‍్వజావరోహణం చేయడం ఆనవాయితీ. ఇందులో భాగంగా అహోబిలం పీఠాధిపతి శ్రీమాన్‌ శఠకోప యతీంద్ర మహాదేశికన్, ముద్రకర్త «శ్రీమాన్‌ శఠకోపం వేణుగోపాలన్, కార్యనిర్వాహణాధికారి మల్లిఖార్జునప్రసాదుల ఆధ్వర్యంలో వేద పండితుల వేదమంత్రోచ్ఛారణల మధ్య ఈ కార్యక్రమం నిర్వహించారు.
  


  – వైభవంగా ద్వాదశారాధనం, పుష్పయాగం 
 ఆళ్లగడ్డ:  దిగువ అహోబిలంలో సోమవారం ఉత్సవమూర్తులకు శాస్త్రోక్తంగా తీర్థవారి చక్రస్నానం నిర్వహించారు. ఉదయం ఉత్సవమూర్తులు శ్రీదేవి, భూదేవి సహిత శ్రీ ప్రహ్లాదవరదస్వాములను ప్రత్యేకంగా అలంకరించి దిగువ అహోబింలోని కోనేరు వరకు ఊరేగింపుగా తీసుకెళ్లారు. అక్కడ స్వామి, అమ్మవార్లకు ప్రత్యేక పూజలు నిర్వహించిన అనంతరం వస్త్రాలు మార్చి పీఠాధిపతి శ్రీ రంగానాథ యతీంద్ర మహాదేశికన్, ముద్రకర్త శ్రీమాన్‌ శఠకోప వేణుగోపాలన్‌ ఆ«ధ్వర్యంలో వేద పండితులు, అర్చకులు స్వామి అమ్మవార్ల ఎదుట సుదర్శనమూర్తికి, నిత్య అభిషేకమూర్తులకు కలిపి పంచామృతాభిషేకం, అభిషేకం, తిరుమంజనం నిర్వహించారు. అనంతరం నవకలశ ప్థాపన, కుంకుమార్చనలు చేశారు. అనంతరం సుదర్శనమూర్తికి, నిత్య అభిషేక ఉత్సవమూర్తికి కోనేరులో చక్రస్నానం చేయించారు. 
  
 వైభవంగా ద్వాదశరాధనం, పుష్పయాగం 
 బ్రహ్మోత్సవాల ముగింపు కార్యక్రమాల్లో భాగంగా సోమవారం మధ్యాహ్నం ద్వాదశరాధనం, పుష్పయాగ కార్యక్రమాలు వేదపండితుల వేదమంత్రోచ్ఛారణల మధ్య భక్తి శ్రద్ధలతో నిర్వహించారు.  స్వామికి ఆరాధన దోషాలను నివృత్తి చేసుకోవడం కోసం 12 మార్లు తిరువారాధన చేసి 12 రకాల భక్షాలను 12 రకాల అన్నముతో నివేదించారు. అనంతరం శ్రీ ప్రహ్లాదవరదస్వామి కొలువై భక్తులకు దర్శన మిచ్చారు.  కార్యక్రమంలో మాజీ ఎంపీ గంగుల ప్రతాపరెడ్డి, ఈఓ మల్లిఖార్జున ప్రసాదులు పాల్గొన్నారు 
  


 అహోబిలం (ఆళ్లగడ్డ): దిగువ అహోబిల క్షేత్రంలో శుక్రవారం శ్రీ లక్ష్మీనరసింహస్వామి బ్రహ్మోత్సవాలకు అంకురార్పణ పూజలు నిర్వహించారు. మఠం పీఠాధిపతి శ్రీ రంగనాథ యతీంద్ర మహాదేశికన్ ఆధ్వర్యంలో బ్రహ్మోత్సవాలకు శ్రీకారం చుట్టారు. దిగువ అహోబిలంలోని శ్రీ ప్రహ్లాద వరదస్వామి ఆలయ ప్రాంగణంలో ఉదయం నుంచి వేద పండితులు ప్రత్యేక పూజలు జరిపారు. అనంతరం ఆలయ అర్చకులు.. విశ్వక్సేనుడికి పూలమాలలు వేసి తల పాగా చుట్టి పల్లకిలో కొలువుంచి మాడ వీధుల్లో ఊరేగించారు. బ్రహ్మోత్సవాల్లో ఎటువంటి ఆటంకాలు కలుగకుండా నిరంతరం పర్యవేక్షకుడిగా విశ్వక్సేనుడు వ్యవహరిస్తారని విశ్వాసం.
  
 ఆలయానికి ఈశాన్యం వైపున ఉన్న పుట్ట మన్ను తీసుకొని వచ్చి.. కుంకుమ, పసుపుతో బ్రహ్మోత్సవ మండపాన్ని సుందరంగా అలకంరించారు. అంకుర హోమం నిర్వహించి సోముడిని (చంద్రుడిని) మట్టిలోకి ఆవాహం చేశారు. పాత్రలో ఉన్న మట్టిలో నవగ్రహాలకు సూచికగా నవధాన్యాలు పోసి సోమ కుంభస్థాపన చేశారు. బ్రహ్మోత్సవాల నిర్వహణ సందర్భంగా శనివారం ఉదయం ధ్వజారోహణం, మధ్యాహ్నం అభిషేకం, సాయంత్రం భేరీపూజ నిర్వహించనున్నారు. రాత్రి సింహవాహనంపై స్వామి భక్తులకు దర్శనమివ్వనున్నారు.