అహోబిల బ్రహ్మోత్సవాలకు అంకురార్పణ

అహోబిలం (ఆళ్లగడ్డ): దిగువ అహోబిల క్షేత్రంలో శుక్రవారం శ్రీ లక్ష్మీనరసింహస్వామి బ్రహ్మోత్సవాలకు అంకురార్పణ పూజలు నిర్వహించారు. మఠం పీఠాధిపతి శ్రీ రంగనాథ యతీంద్ర మహాదేశికన్ ఆధ్వర్యంలో బ్రహ్మోత్సవాలకు శ్రీకారం చుట్టారు. దిగువ అహోబిలంలోని శ్రీ ప్రహ్లాద వరదస్వామి ఆలయ ప్రాంగణంలో ఉదయం నుంచి వేద పండితులు ప్రత్యేక పూజలు జరిపారు. అనంతరం ఆలయ అర్చకులు.. విశ్వక్సేనుడికి పూలమాలలు వేసి తల పాగా చుట్టి పల్లకిలో కొలువుంచి మాడ వీధుల్లో ఊరేగించారు. బ్రహ్మోత్సవాల్లో ఎటువంటి ఆటంకాలు కలుగకుండా నిరంతరం పర్యవేక్షకుడిగా విశ్వక్సేనుడు వ్యవహరిస్తారని విశ్వాసం.