కరాచీ: మసీదుల్లో మిలాదునబి వేడుకలే లక్ష్యంగా పాకిస్తాన్‌లో శుక్రవారం జరిగిన రెండు వేర్వేరు ఆత్మాహుతి దాడుల్లో 58 మంది మృత్యువాతపడగా మరో 100 మందికి పైగా గాయాలపాలయ్యారు. బలూచిస్తాన్‌ ప్రావిన్స్‌ మస్తుంగ్‌ జిల్లా కేంద్రంలోని ఓ మసీదులో ప్రార్థనల సమయంలో జరిగిన బాంబు దాడిలో 54 మంది చనిపోయారు. మరో 100 మంది గాయపడ్డారు. మృతుల్లో డీఎస్‌పీ నవాజ్‌ గషో్కరి కూడా ఉన్నారు. గుర్తు తెలియని దుండగుడు డీఎస్‌పీ నవాజ్‌ కారు పక్కనే నిలబడి తనను తాను పేల్చేసుకున్నాడని అధికారులు తెలిపారు. క్షతగాత్రుల్లో సుమారు 20 మంది పరిస్థితి విషమంగా ఉందని చెప్పారు. అదేవిధంగా, ఖైబర్‌ ఫంక్తున్వా ప్రావిన్స్‌ హంగు నగరంలోని దవోబా పోలీస్‌ ఠాణాలోకి అయిదుగురు ఉగ్రవాదులు ప్రవేశించారు. భద్రతా బలగాలతో జరిగిన ఎదురు కాల్పుల్లో ఒక ఉగ్రవాది హతం కాగా మరో నలుగురు పారిపోయారు. వారిలో ఒకరు పక్కనే ఉన్న మసీదులోకి చేరుకుని తనను పేల్చేసుకున్నాడు. ఈ దాడిలో మసీదులో ఉన్న నలుగురు ప్రాణాలు కోల్పోగా మరో 12 మంది గాయపడ్డారు. మిగతా ముగ్గురు ఉగ్రవాదుల కోసం వేట సాగుతోందని పోలీసులు చెప్పారు. ఈ దాడులకు తాము కారణం కాదంటూ తెహ్రీక్‌–ఇ–తాలిబన్‌ పాకిస్తాన్‌ తెలిపింది. ఉగ్ర సంస్థ ఇస్లామిక్‌ స్టేట్‌(ఐఎస్‌)కు చెందిన కీలక కమాండర్‌ను భద్రతా బలగాలు కాల్చి చంపిన మరునాడే ఈ ఘటన చోటుచేసుకోవడంతో ఐఎస్‌ పాత్రపై అనుమానాలు తలెత్తుతున్నాయి. 

సాక్షి, అమరావతి: ప్రపంచ శాంతి కోసం మానవాళికి విలువైన సందేశాలు ఇచ్చిన మహోన్నత వ్యక్తి మహ్మద్‌ ప్రవక్త అని సీఎం వైఎస్‌ జగన్‌ అన్నారు. ‘నేడు ఆయన జన్మదినం సందర్భంగా ఆ అల్లాహ్‌ దీవెనలు మన రాష్ట్రంపై ఉండి, అందరికీ మంచి జరగాలని మనస్ఫూర్తిగా కోరుకుంటున్నాను. ముస్లిం సోదర సోదరీమణులకు మిలాద్‌ ఉన్‌ నబీ శుభాకాంక్షలు’ అంటూ గురువారం ఆయన ఎక్స్‌లో పోస్ట్‌ చేశారు.

ద్వేషించిన వారిని ప్రేమించడం... తిట్టిన వారిని దీవించడం... ప్రాణశత్రువును సైతం క్షమించడం... ప్రేమించడం తప్ప ద్వేషించడం తెలియకపోవడం... మానవజాతిని సాఫల్యశిఖరాలకు చేర్చడానికి అహర్నిశలూ శ్రమించడం... ఇవి కేవలం ప్రవక్తల్లో మాత్రమే కనిపించే లక్షణాలు. అలాంటి ప్రవక్తల పరంపరలో చివరివారు, మానవ మహోపకారి ముహమ్మద్‌ ప్రవక్త సల్లల్లాహు అలైహివసల్లం.  ముహమ్మద్‌ ప్రవక్త చదవడం, రాయడం రాని నిరక్షరాసి. అయినా ఆయన బోధనలు యావత్‌ ప్రపంచాన్ని ప్రభావితం చేశాయి. మానవ సమాజం ఎదుర్కొంటున్న అన్ని సమస్యలకు, సవాళ్ళకు ఆయన పరిష్కారం చూపారు. ఒక కులానికో, మతానికో ఆయన బోధనలు పరిమితం కాలేదు. యావత్‌ మానవ సమాజానికే సంజీవని వంటివి.  రబ్బివుల్‌ అవ్వల్‌ మాసం 12 తేదీన ప్రవక్తవారు మక్కా నగరంలో జన్మించారు. ఆమినా, అబ్దుల్లాహ్‌ తల్లిదండ్రులు. జననానికి రెండునెలల ముందే తండ్రినీ, ఆరేళ్ళప్రాయంలో అమ్మనూ కోల్పోయారు. అనాథ అయిన ఆరేళ్ళ బాబును తాతయ్య పెంచారు. మక్కానగర ప్రజలు ముహమ్మద్‌ ప్రవక్తను, ఆయన సందేశాన్ని, ఉద్యమాన్ని వ్యతిరేకించారు, ఆయనపట్ల, ఆయన సహచరులపట్ల అమానుషంగా ప్రవర్తించారు. అయినా ఆయన వారిని క్షమించారు. నగరవాసులు కరువుకోరల్లో చిక్కుకున్నప్పుడు, వారికోసం ఆహార సామగ్రి పంపించారు. మక్కాలోని పేదలకు పంచడానికి ఐదువందల బంగారు నాణాలు పంపారు. యుద్ధంలో పట్టుబడిన ఖైదీలపట్ల ఆయన కరుణతో వ్యవహరించారు. మానవుల పట్ల ఆయనకున్న అపార ప్రేమను మక్కా విజయానంతరం మరింత స్పష్టంగా గమనించవచ్చు. ఆయన్ని తీవ్రంగా వ్యతిరేకించి, ద్వేషించిన ప్రాణశత్రువులు, ఇరవై సంవత్సరాల పాటు ఆయనతో యుధ్ధాలు చేసినవారు లొంగిపోయి తలలు దించుకొని, చేతులు కట్టుకొని ఆయన ముందు నిస్సహాయంగా నిలబడినప్పుడు ఆ మహనీయుడు వారందరినీ క్షమించి వదిలేశారు. సాధారణంగా ఇలాంటి సందర్భాల్లో విజేతలు ప్రత్యర్ధుల పట్ల క్రూరంగా ప్రవర్తిస్తారు. తలలు కోయండం, ఊచకోతలకు పాల్పడడం, హింసించడం, యావజ్జీవ శిక్షలు విధించడం లాంటి అమానుష చేష్టలకు పాల్పడిన సందర్భాలు చరిత్రలో చాలానే ఉన్నాయి. కాని ప్రాణ శత్రువును క్షమించి వదిలేసిన విజేత ఒక్క ముహమ్మద్‌ ప్రవక్తవారు తప్ప మరొకరు కనబడరు. ఆయన పట్ల శత్రుత్వం వహించినవారు, న్యాయపరంగా, నైతికపరంగా ఏవిధంగా చూసినా దోషులే, శిక్షార్హులే. వారిని శిక్షించడం సమంజసం, న్యాయం. కాని మానవాళిని అపారంగా ప్రేమించే ప్రవక్త మహనీయులు మాత్రం వారి నేరాలన్నిటినీ క్షమించి వదిలేశారు. అంతేకాదు, ఒక సాధారణ ప్రకటన చేస్తూ, ‘ఈరోజు మీకు ఎలాంటి శిక్షా విధించబడదు. మీరంతా సర్వ స్వతంత్రులు’ అని ప్రకటించారు. తాయెఫ్‌ అనే ఊరిలో కేవలం ధర్మం గురించి మాట్లాడినందుకు ఆయన్ని రక్తసిక్తమయ్యేలాకొట్టి, హింసించారు. అయినా ఆయన వారిని పల్లెత్తుమాట అనలేదు, దైవదూతలు వారిని, ఆఊరిని నాశనం చేస్తామంటే ఆయన అంగీకరించలేదు, ప్రతీకారం తీర్చుకోలేదు. క్షమించి వదిలేశారు. ఆయన ఏనాడూఎవరి మనసునూ నొప్పించలేదు, ఎవరి హృదయాన్నీ గాయ పరచలేదు. చివరికి ఆయన్ని హత్యచెయ్యాలని కుట్రపన్నిన వారిని, అన్నంలో విషం కలిపిన వారినీ క్షమించారు. ప్రవక్త మహనీయులు చాలా నిరాడంబరమైన జీవితం గడిపారు. అందరితో సమానంగా, నలుగురిలో ఒకడిగా ఉండేవారు. తనకోసం ప్రత్యేకహోదా, గౌరవం ఏనాడూ కోరుకోలేదు.ఆహారం, వస్త్రాల విషయంలోనూ ఎలాంటి ప్రత్యేకతలూ పాటించలేదు. తన దుస్తులు తానే ఉతుక్కున్నారు, తన చెప్పులు తానే కుట్టుకున్నారు. ఇంటిపనుల్లో, వంటపనుల్లో ఇంట్లోవాళ్ళకు సహకరించారు. బహిరంగసభల్లో ఆయన తనకోసం ప్రత్యేక స్థలాన్ని, ఆసనాన్ని కోరుకోలేదు. తనముందు ఇతరులు గౌరవసూచకంగా నిలబడడం, నాయకుడిగా సంబోధించడాన్ని కూడా ఆయన ఇష్టపడలేదు. అలాంటి సంస్కృతిని ప్రోత్సహించలేదు. బహిరంగ ప్రదేశాల్లో సైతం సహచరులతో సమానంగా పనిచేసేవారు. యుద్ధరంగంలో అయినా, ప్రయాణాల్లో అయినా, కందకాలు తవ్వుతున్నప్పుడైనా, మసీదులు నిర్మిస్తున్నప్పుడైనా సహచరులతో సమానంగా కష్టపడ్డారు. ఇటుకలు మోయడం, రాళ్ళు పగలగొట్టడం లాంటి పనులన్నీ చేశారు. మానవ సమానత్వాన్ని ఇంతగొప్పగా ఆవిష్కరించిన మహాప్రవక్త ఆదర్శాలివి. వారసత్వంగా మనకందిన ఈ ఆదర్శాలను, ఆయన అనుచర సమాజంగా మనం మన స్థాయిలో ఆరించవలసిన అవసరం ఉంది. మానవాళి సమస్యల సుడిగుండంలో చిక్కుకున్నప్పుడు, సమాజం సంక్షోభానికి గురైనప్పుడు పరిష్కారం కోసం ప్రయత్నించాల్సిన, ముహమ్మద్‌ ప్రవక్త బోధలు, ఉపదేశాలవైపు మరలాల్సిన అవసరం ఉంది. ఎందుకంటే, ఆ మహనీయులు గొప్ప దైవప్రవక్త అయి ఉండి కూడా ఒక సామాన్యుడిలా, సామాజిక కార్యకర్తలా సమాజానికి సేవ చేస్తూ, ప్రజల్ని సన్మార్గపథాన నడిపించారు. ఇహపర వైఫల్యాలనుండి రక్షించారు. సమాజంలోని సమస్త అసమానతలు, అమానవీయతలతో పాటు, అన్నిరకాల దుర్మార్గాలు, దౌర్జన్యాలను రూపుమాపారు. మానవులంతా ఒక్కటేనని, మనిషీ మనిషికి మధ్య ఎలాంటి వ్యత్యాసంగాని, ఆధిక్యతకాని లేదని చాటారు. అందరూ సమానమే, అంతా ఒక తల్లిదండ్రి బిడ్డలే అన్నది ఆయన సందేశం. ఆధిక్యతకు, గౌరవానికి అసలైన కొలమానం నీతి నిజాయితీ, సత్‌ ప్రవర్తనే అన్నది ఆ మహనీయుని నిర్వచనం. మానవ సమానత్వానికి, సామరస్యం, సోదరభావాలకు ఇది నిలువెత్తు నిదర్శనం. సాటి మానవుల ధన, ప్రాణాలను హరించడం, వారి గౌరవ మర్యాదలకు భంగం కలిగించడం, వారి మనో భావాలను గాయపరచడం, వారి హక్కులను కాలరాయడం ఆయన దృష్టిలో మహా పాతకం. క్షంతవ్యం కాని నేరం. ఆయన బోధనలు మాత్రమే నేటి మన సమాజానికి సంజీవిని.   – ముహమ్మద్‌ ఉస్మాన్‌ ఖాన్‌ 


 హైదరాబాద్: ‘నన్ను అంతమొం దించే కుట్ర జరుగుతోంది..ఎప్పటివరకు బతుకుతానో తెలియదు..భద్రతా సిబ్బంది ఉన్నా.. ప్రాణాలకు భరోసా లేదు..ఏక్షణమైనా ఎవరైనా మట్టుబెట్టొచ్చు’ అని మజ్లిస్‌పార్టీ శాసనసభాపక్ష నేత అక్బరుద్దీన్ ఓవైసీ సంచలన వ్యాఖ్య లు చేశారు. మహ్మద్‌ప్రవక్త జన్మదినమైన మిలాద్-ఉన్-నబీ సందర్భంగా మజ్లిస్‌పార్టీ ఆధ్యర్యంలో దారుస్సలాం మైదానంలో మంగళవారం తెల్లవారుజాము వరకు జరిగిన బహిరంగసభలో ఆయన సుదీర్ఘంగా ప్రసంగించారు.
 
 సంఘ్‌పరివార్,హిందుత్వశక్తులు తనను అంతమొందించడం జరిగితే..పాతబస్తీలో ప్రతిఇంట్లో ఒక అక్బరుద్దీన్ గా మారి ముస్లింల పక్షాన గళం విప్పాలని, పార్టీకి అండగా ఉండాలని పిలుపునిచ్చారు. దేశంలో ముస్లింలపై జరుగుతున్న అఘాత్యాలపై మౌనం వహించడం వల్లే ముజఫర్‌నగర్ లాంటి ఘటనలు పునరావృతమవుతున్నాయని పేర్కొన్నారు. ‘ముస్లింల పక్షాన గళం విప్పేవారిని జైళ్లలో పెడుతున్నారు. కాల్పులు జరుపుతున్నారు. మజిస్ల్ పా ర్టీని అంతమొందించే కుట్రలు చేశారు. తనను జైలులో ఉంచారు. కనీసం మంచినీళ్లు, దుప్పటి కూడా ఇవ్వలేదు.
 
  వాంతులు చేసుకున్నా కనీసం ఆస్పత్రికి తీసుకెళ్లకుండా ఇబ్బందులకు గురిచేశారని’ ఆయన వెల్లడించారు. చట్టంపై తనకు నమ్మకం ఉందంటూ..దేశవ్యాప్తంగా ముస్లింల పక్షాన గళం విప్పి తీరుతామని అక్బర్ ప్రకటించారు. కార్యక్రమంలో మజ్లిస్‌పార్టీ అధినేత, ఎంపీ అసదుద్దీన్  ఓవైసీ, పార్టీ ఎమ్మెల్యేలు, పలువురు మతగురువులు, అధిక సంఖ్యలో కార్యకర్తలు పాల్గొన్నారు.