Bali Mr Universe Tourism 2023- Sai Bharadwaja Reddy: తనుబుద్ధి సాయి భరద్వాజ రెడ్డి... 21 ఏళ్ల కుర్రాడు. బెంగళూరులో సాఫ్ట్‌వేర్‌ ఉద్యోగి. ఈ నెల ఒకటవ తేదీన ఒడిశా రాష్ట్రం, పూరి పట్టణంలో జరిగిన మిస్టర్‌ ఇండియా పోటీల్లో విజేత. వచ్చే ఏడాది మార్చి 12 నుంచి 21 వరకు ఇండోనేషియా, ‘బాలి’ దీవిలో జరిగే ‘మిస్టర్‌ యూనివర్స్‌ టూరిజమ్‌ –2023’ పోటీల్లో మనదేశానికి ప్రాతినిధ్యం వహించనున్నాడు. ఈ సందర్భంగా భరద్వాజ తన విజయరహస్యాన్ని సాక్షితో పంచుకున్నాడు.  ‘‘మాది ప్రకాశం జిల్లా మార్కాపురం. నాన్న వ్యాపార రీత్యా విజయవాడలో పెరిగాను. నాకు ఫ్యాషన్‌ ప్రపంచం మీద చిన్నప్పటి నుంచి ప్యాషన్‌ ఉంది. ఫొటోజెనిక్‌గా కనిపించాలనే కోరిక ఉండేది. మంచి దుస్తులు ధరించడం, ఫొటోలు తీసుకోవడం ఇష్టం. బిడియపడకుండా కెమెరాను ఫేస్‌ చేయడం నన్ను విజేతగా నిలవడానికి కలిసి వచ్చిన ఒక అంశం. ఈ విజయం వెనుక ఐదేళ్ల కఠోరశ్రమ ఉంది.    బీటెక్‌లో తొలి ప్రయత్నం  మిస్‌ ఇండియా పోటీలలాగానే మిస్టర్‌ ఇండియా పోటీలు కూడా ఉంటాయని ఇంటర్‌లో ఉండగా తెలిసింది. బీటెక్‌లో యూనివర్సిటీ వేడుకల సందర్భంగా ఫ్యాషన్‌ కాంపిటీషన్‌ పాల్గొనడం, గెలవకపోవడం జరిగిపోయాయి. అప్పటి వరకు పోటీలను లైట్‌గా తీసుకున్నాను. పోటీని తేలిగ్గా తీసుకోరాదని అవగాహన వచ్చిన సందర్భం అది. డిప్రెషన్‌కి లోనయ్యాను కూడా. ఓటమిని జీర్ణించుకోలేని మానసిక స్థితిలో ఉన్నాననే సంగతిని నేను గ్రహించిన సందర్భం కూడా అదే. ఆ ఓటమి నాకు చాలా మంచి చేసిందనే చెప్పాలి. అప్పటి నుంచి బాడీ లాంగ్వేజ్‌ని కూడా ఈ పోటీలకు అనుగుణంగా మార్చుకున్నాను. నడవడం, నిలబడడం అన్నింటికీ ఓ లాంగ్వేజ్‌ ఉంటుంది. ప్రాక్టీస్‌ చేసేకొద్దీ నాలో ఆత్మవిశ్వాసం మెరుగవడం కూడా నాకే స్పష్టంగా తెలిసింది. ఈ పోటీలకు బాడీ బిల్డింగ్‌ అవసరం లేదు, ఫిట్‌గా ఉండడమే ప్రధానం. బాడీ, మైండ్, స్కిన్‌ ఆరోగ్యంగా ఉండాలి.    ప్రకటన లేని రెండో ప్రయత్నం  సెకండ్‌ అటెంప్ట్‌కి చాలా పక్కాగా సిద్ధమయ్యాను. గెలిచాను కూడా. అయితే కోవిడ్‌ కారణంగా అకస్మాత్తుగా ఫలితాల ప్రకటన లేకుండా ఆ పోటీలు అర్ధంతరంగా ముగిసిపోయాయి. ఇక మూడవ ప్రయత్నంలో ’మిస్టర్‌ క్లూ’గా ఎంపికయ్యాను. అయితే అది ఆన్‌లైన్‌ పోటీ. నాలుగవ ప్రయత్నంలో ఫైనల్స్‌కి ఎంపికయ్యాను, కానీ ఆర్థికపరమైన అడ్డంకి కారణంగా ఫైనల్స్‌లో పాల్గొనలేకపోయాను. నా ఫ్యాషన్‌ పోటీల్లో ఐదవ ప్రయత్నం ఈ ‘మిస్టర్‌ ఇండియా’ పోటీలు’’ అని వివరించాడు భరద్వాజ.    విజేత బాధ్యత ఇది  ఈ పోటీలను గ్లోబల్‌ మోడల్‌ ఇండియా ఆర్గనైజేషన్‌ నిర్వహించింది. ఇప్పటి వరకు మిస్టర్‌ ఇండియా టైటిల్‌ గెలుచుకున్న విజేతల్లో చిన్నవాడు భరద్వాజ. వచ్చే ఏడాది బాలిలో మిస్టర్‌ యూనివర్స్‌ టైటిల్‌ కోసం పోటీ పడుతున్న అనేక దేశాల ‘మిస్టర్‌’లలో కూడా చిన్నవాడు. మిస్టర్‌ ఇండియా టూరిజమ్‌ టైటిల్‌ విజేతగా... అనేక ప్రాంతాల్లో పర్యటిస్తూ భారతీయ సంస్కృతి, పర్యాటకం పట్ల అవగాహన కల్పించడం అతడి బాధ్యత. ఈ సందర్భంగా దక్షిణాది పట్ల ఉత్తరాది వారికి ఉన్న చిన్నచూపును రూపుమాపడానికి కృషి చేయాలనే ఆకాంక్షను వ్యక్తం చేశాడు.  నాకు నేనే అన్నీ!  పోటీదారులు ఎప్పుడూ మరొకరిలాగా కనిపించాలని అనుకరించకూడదు. నేను నాలాగే ఉన్నాను కాబట్టి విజేతనయ్యాను. మరో విషయం... నిపుణులైన కోచ్‌ శిక్షణ, డైటీషియన్‌ సలహాలు ఏవీ లేవు. ఉద్యోగం చేసుకుంటూనే ప్రాక్టీస్‌ చేశాను. ఉదయం ఐదింటికి లేచి జిమ్‌ చేసేవాడిని. ఓట్స్, ఎగ్స్‌ ప్రధానంగా సొంతవంట. డ్యూటీ నుంచి వచ్చిన తర్వాత మళ్లీ ఎక్సర్‌సైజ్‌. మొత్తానికి నేను అనుకున్నది సాధించాను. ‘మిస్టర్‌ ఇంటర్నేషనల్‌’ టైటిల్‌ని మనదేశానికి తీసుకురావాలనేది ప్రస్తుత లక్ష్యం.  – టి. సాయిభరద్వాజ రెడ్డి, మిస్టర్‌ ఇండియా 2022. – వాకా మంజులారెడ్డి  చదవండి: Woolen Art: ఊలుతో అల్లిన చిత్రాలు.. మానస చేతిలో దిద్దుకున్న అమ్మ మనసు రూపాలు రేణు ది గ్రేట్‌

బాడీ బిల్డర్‌, మాజీ మిస్టర్‌ యూనివర్స్‌ కాలమ్‌ వాన్‌ మోగర్‌ ప్రాణాలతో పోరాడుతున్నారు. మోగర్‌ ప్రమాదం నుంచి బయటపడాలని, తర్వాగా కోలుకోవాలని ఆయన అభిమానులు దేవుడిని వేడుకుంటున్నారు. కోమాలో నుంచి బయటపడాలని ప్రార్థిస్తున్నారు. వివరాల ప్రకారం.. మాజీ మిస్టర్ యూనివర్స్ కాలమ్ వాన్ మోగర్ ఇటీవల రెండవ అంతస్థుల భవనంలోని కిటికీ నుండి కిందపడి తీవ్రంగా గాయపడ్డారు. ఈ ప్రమాదంలో ఆయన వెన్నుముకకు గాయమైంది. ప్రమాదం అనంతరం ఆసుపత్రిలో చికిత్స పొందుతూ మోగర్‌ కోమాలోకి వెళ్లిపోయాడని న్యూయార్క్‌ పోస్ట్‌ ఓ కథనంలో తెలిపింది. కాగా, ఈ ప్రమాదం జరిగిన సమయంలో ఆయన డ్రగ్స్‌ మత్తులో ఉన్నారని మోగర్‌ స్నేహితుడు యూట్యూబర్ నిక్ ట్రిగిల్లి చెప్పారు.  ఇదిలా ఉండగా.. మిస్టర్ వాన్ మోగర్ 2018లో ‘బిగ్గర్’ చిత్రంలో ఆర్నాల్డ్ స్క్వార్జెనెగర్ పాత్ర చేసి ఎంతో ఫేమస్‌ అ‍య్యాడు. దీంతో నటుడిగా కూడా మంచి గుర్తింపు తెచ్చుకున్నాడు. అయితే, దురదృష్టవశాత్తు ఇలా ప్రమాదంలో మోగర్‌ గాయపడటంతో ఆయన అభిమానులు ఆవేదన వ్యక్తం చేస్తున్నారు. ఆయనకు మద్దతుగా నిలవాలంటూ సోషల్‌ మీడియాలో పోస్టులు షేర్‌ చేస్తున్నారు. ఇది కూడా చదవండి: గుడ్‌బై ఐపాడ్‌.. బరువెక్కిన గుండెలతో వీడ్కోలు..


 మిస్టర్ యూనివర్స్ టైటిల్ గెలిచిన తొలి భారతీయుడు ఎవరు? మనోహర్ ఎయిచ్ పేరు ఎప్పుడైనా విన్నారా..? పోనీ తొలి మిస్టర్ యూనివర్స్ టైటిల్ తొలిసారి ఎప్పుడు గెలుచుకుందో తెలుసా..? కౌన్ బనేగా కరోడ్ పతీ ప్రశ్నలేంటనుకుంటున్నారా..? వీటికి సమాధానాలు తెలుసుకోవాలంటే.. ఈ స్టోరీ చదవాల్సిందే..
 
 ఈ ఫోటోలో ఉన్న 103ఏళ్ల పెద్దాయన పేరు మనోహర్ ఎయిచ్. మిస్టర్ యూనివర్స్ టైటిల్ గెలిచిన తొలి భారతీయుడు. 1952లో మిస్టర్ యూనివర్స్ టైటిల్ గెలుచుకున్నాడు. అంతేకాదు.. ఇప్పటికీ అంతే ఫిట్ గా ఉన్నాడు.
 
 సన్నిహితులు పాకెట్ హెర్కులస్ అని ముద్దుగా పిలుచుకునే మనోహర్ బెంగాల్ లోని చిన్నటౌన్ కొమిల్లాలో పుట్టాడు. చిన్నప్పటి నుంచే ఫిట్ సెస్ మీద ఇంట్రెస్ట్ ఉన్న మనోహర్ మొదట రెజ్లింగ్ చేసే వాడు. 1942లో అప్పటి బ్రిటీష్ రాయల్ ఎయిర్ ఫోర్స్ల్ లో చేరాక.. బాడీ బిల్డింగ్ పై మక్కువ పెంచుకోవడానికి బ్రిటీష్ ఆఫీసర్ రెబ్ మార్టీన్ కారణం. ఆయనే మనోహర్ కు వెయిట్ ట్రెయినింగ్ ఇచ్చారు. అయితే స్వాతంత్ర పోరాట కాలంలో బ్రిటీష్ వారికి వ్యతిరేకంగా పనిచేడంతో మనోహర్ జైలుకు వెళ్లాల్సి వచ్చింది. జైలుకు వెళ్లడం తన జీవితాన్ని మలుపు తిప్పిందంటాడు మనోహర్. జైల్లో ఉన్నకాలంలో తాను బాడీ బిల్డింగ్ ను చాలా సిరియస్ గా తీసుకున్నానని వివరించాడీ నాలుగు అడుగుల 11 అంగుళాల బాడీ బిల్డర్. జైల్లో స్వంతంగా రోజుకు 12 గంటల పాటు కసరత్తులు చేసే వాడినని గుర్తు చేసుకున్నాడు. మనోహర్ పట్టుదల చూసి జైలు అధికారులు అబ్బురపడి.. తనకు ప్రత్యేక ఆహారాన్ని అందించారని చెప్పుకొచ్చాడు.
 
 1950లో మిస్టర్ హెర్కులస్ టైటిల్ గెలిచాక.. మిస్టర్ యూనివర్స్ పోటీలపై నమ్మకం కలిగింది. తర్వాత ఏడాదే లండన్ లో జరిగిన మిస్టర్ యూనివర్స్ పోటీల్లో పాల్గొన్నాడు. అక్కడ రన్నరప్ స్థానంతోనే సరిపెట్టుకోవాల్సి వచ్చింది. తర్వాత ఏడాది మరింత పట్టుదలతో సాధన చేశాడు. దీంతో మిస్టర్ యూనివర్స్ గ్రూప్ 3 ఛాంపియన్ షిప్ టైటిల్ 'మన హెర్కులస్' వశమైంది. ఇక ఆసియా క్రీడల్లో 1951(ఢిల్లీ), 1954(మనీలా), 1958(టోక్యో)ల్లో వరసగా బంగారు పతకాలు సాధించాడు.
 
 ఇప్పటికీ తన 13ఏళ్ల క్రితం కసరత్తులు చేయడం మానేసినా.. కుమారులు ఏర్పాటు చేసిన జిమ్ లో యువకులకు మెలకువలు నేర్పిస్తూ చురుగ్గా ఉన్నాడు. ధూమ పానం, మద్యపానం దూరంగా ఉంచడమే తన ఆరోగ్య రహస్యం అంటాడీ బోసినవ్వుల మిస్టర్ యూనివర్స్.