విశాఖపట్నం: ఉత్తరకోస్తా, విదర్భ, ఛత్తీస్గఢ్ పరిసర ప్రాంతాల్లో అల్పపీడనం ఏర్పడిందని విశాఖపట్నంలోని వాతావరణ కేంద్రం ఆదివారం తెలిపింది. అల్పపీడన పరిసర ప్రాంతాలలో ఉపరితల అవర్తనం కొనసాగుతుందని వెల్లడించింది. దాంతో రాగల 24 గంటల్లో ఉత్తరకోస్తా, తెలంగాణల్లో భారీ వర్షాలు కురుస్తాయని చెప్పింది.
 దక్షిణ కోస్తాలో ఓ మోస్తరు భారీ వర్షాలు పడే అవకాశాలున్నాయని పేర్కొంది. తీరం వెంబడి గంటకు 40 నుంచి 50 కి.మీల వేగంతో ఈదురుగాలులు వీస్తాయని తెలిపింది. సముద్రంలో చేపల వేటకు వెళ్లే మత్స్యకారులు అప్రమత్తంగా ఉండాలని విశాఖపట్నంలోని వాతావరణ కేంద్రం హచ్చరించింది.


 దక్షిణ కోస్తా, రాయలసీమ ప్రాంతాల్లో అల్పపీడనం కేంద్రీకృతమైందని విశాఖపట్నంలోని వాతావరణ కేంద్రం శుక్రవారం వెల్లడించింది. దాంతో మరో 24 గంటలపాటు రాష్ట్రంలో భారీ వర్షాలు కురుస్తాయని తెలిపింది. కాగా ఆ అల్పపీడనం దారి మళ్లి వచ్చే 48 గంటల్లో వాయవ్యదిశగా పయనించే అవకాశం ఉందని పేర్కొంది. ఈశాన్య రుతుపవనాలు చాలా చురుగ్గా కదులుతున్నాయని, అలాగే  రుతుపవనాలు, అల్పపీడనం వల్ల పలు చోట్ల భారీ వర్షాలు పడతాయని వాతావరణ కేంద్రం పేర్కొంది.