శ్రీ పద్మావతి మహిళా విశ్వవిద్యాలయం తెలుగు రాష్ట్రాల్లో ఏకైక మహిళా వర్సిటీ. మహిళా సాధికారత కోసం ఏర్పాటైంది. ఇక్కడ పనిచేస్తున్న అధికారులు తమ స్వార్థానికి వర్సిటీ ప్రతిష్టను మంట గలుపుతున్నారు. అక్రమ పీహెచ్‌డీ అడ్మిషన్లకు తెరలేపారు. నిబంధలనకు విరుద్ధంగా ఫారిన్‌ అడ్మిషన్ల పేరిట ఫుల్‌టైం పీహెచ్‌డీ అడ్మిషన్లు ఇచ్చారు. తాజాగా ఈ తరహాలో మరిన్ని అడ్మిషన్లు ఇచ్చేం దుకు సన్నాహాలు చేస్తున్నారు. తాతాల్కి క అధ్యాపకులకు కూడా పీహెచ్‌డీ పర్యవేక్షించే అధికారాలు కట్టబెడుతున్నారు. సాక్షి, తిరుపతి : మహిళా వర్సిటీ అధికారులు నిబంధనలకు విరుద్ధంగా ఇష్టారాజ్యంగా నిర్ణయాలు తీసుకుంటున్నారు. విదేశాల్లో ఉన్న వారికి దొడ్డి దారిలో అడ్మిషన్లు ఇవ్వడంతో పాటు పీహెచ్‌డీ డిగ్రీలు అమ్మేస్తున్నారు. ఈనెల 17న నిర్వహించిన రీసెర్చ్‌ కమిటీ సమావేశంలో సంబంధిత సబ్జెక్ట్‌లో అర్హత లేని ఒక అధ్యాపకురాలికి ఇంజినీరింగ్‌లో పీహెచ్‌డీ రీసెర్చ్‌ గైడ్‌ చేసేందుకు అనుమతి ఇచ్చారు. తాజాగా పీహెచ్‌డీ డిగ్రీ కల్గిన తాత్కాలిక అధ్యాపకుల(అకడమిక్‌ కన్సల్టెంట్ల)కు పీహెచ్‌డీ గైడ్‌ చేసే అవకాశం కల్పించారు. త్వరలోనే నిర్వహించే పీహెచ్‌డీ అడ్మిషన్లలో తాతాల్కిక అధ్యాపకులకు కూడా పీహెచ్‌డీ పర్యవేక్షించే అధికా రాలు కట్టబెడుతున్నారు. వారికి కేటాయించే సీట్లతో పీహెచ్‌డీ ఖాళీ సీట్ల జాబితా రూపొం దిస్తున్నారు. 2017లో కూడా ఇలాంటి ప్రయత్నం చేసినప్పటికీ ప్రభుత్వం అడ్డు చెప్పడంతో ఆ ప్రయత్నం మానుకున్నారు. తాజాగా మరోసారి ఈ అంశాన్ని తెరపైకి తెస్తున్నారు. ఇలాంటి నిర్ణయాలు తీసుకోవాలంటే ముందుగా బోర్డు ఆఫ్‌ స్టడీస్‌లోను, అకడమిక్‌ సెనేట్‌లోను ఆమోదం పొందాలి. ఉన్నత విద్యామండలిలో అనుమతి తీసుకోవాలి. నిబంధనలు ఇవీ.. అధ్యాపకులు ఏదైనా సబ్జెక్ట్‌లో రీసెర్చ్‌ గైడ్‌ చేయాలంటే సంబంధిత సబ్జెక్ట్‌లో పీజీతో పాటు పీహెచ్‌డీ చేసి ఉండాలి. వర్సిటీ నిర్దేశించిన సంఖ్యలో పరిశోధన ప్రతాలు ప్రచురించి ఉండాలి. వర్సిటీలో పర్మినెంట్‌ సర్వీసులో ఉండాలి. అయితే బీటెక్‌ మెకానికల్‌ ఇంజినీరింగ్, ఎంటెక్‌ కంప్యూటర్‌ సైన్స్‌ (దూరవిద్య), మేనేజ్‌మెంట్‌ స్టడీస్‌లో పీహెచ్‌డీ చేసిన ఒక అధ్యాపకురాలికి ప్రొడక్షన్‌ అండ్‌ ఇండస్ట్రియల్‌ ఇంజినీరింగ్‌లో రీసెర్చ్‌ గైడ్‌ చేయడానికి అనుమతిస్తూ నిర్ణయం తీసుకున్నారు. ఈనెల 17న నిర్వహించిన బోర్డు ఆఫ్‌ రీసెర్చ్‌ స్టడీస్‌ (బీఓఆర్‌ఎస్‌)లో ఈ ప్రతిపాదనకు ఆమోదం లభిం చింది. అకడమిక్‌ కన్సల్టెంట్లకు కూడా ఇంట ర్నల్‌ రీసెర్చ్‌ సూపర్‌వైజర్‌గా అవకాశం కల్పిం చాలని తీర్మానం చేశారు. ఇంజినీరింగ్, ఫిజిక్స్, కెమిస్ట్రీలతో పాటు పర్మినెంట్‌ అధ్యాపకులు లేని సెల్ఫ్‌ సపోర్టింగ్‌ కోర్సుల్లో తాత్కాలిక అధ్యాపకులకు రీసెర్చ్‌ గైడెన్స్‌ ఇవ్వాలని నిర్ణయం తీసుకున్నారు. డబ్బు సంపాదనే లక్ష్యంగా ఇలాంటి నిర్ణయాలు, విధానాలు ప్రవేశపెడుతున్నారు. నిబంధనలకు విరుద్ధంగా అడ్మిషన్లు శ్రీ పద్మావతి మహిళా వర్సిటీలో ఇప్పటికే నిబంధనలకు విరుద్ధంగా సుమారు 30 మందికి పీహెచ్‌డీ అడ్మిషన్లు ఇచ్చారు. ఫారిన్‌ అడ్మిషన్ల పేరిట ఫీజులు భారీగా వసూలు చేస్తున్నారు. సైన్స్, ఇంజినీరింగ్‌లలో ఏడాదికి రూ.1.75 లక్షలు, ఆర్ట్స్‌ సబ్జెక్ట్‌లకు రూ.1.50 లక్షలు ఫీజు వసూలు చేస్తున్నారు. వీటిల్లో అడ్మిషన్‌ పొందిన వారు మూడేళ్ల పాటు ఫీజు చెల్లించాలి. అంటే దాదాపు 5 లక్షలు చెల్లిస్తే డాక్టరేట్‌ దర్జాగా పొందవచ్చు. ఇప్పటికే 30 మంది ఇలా అడ్మిషన్‌ పొందారు. వీరికి ఫుల్‌టైం రీసెర్చ్‌ స్కాలర్లుగా అడ్మిషన్లు ఇచ్చారు. ఫుల్‌టైంలో అడ్మిషన్‌ పొందిన వారు రెగ్యులర్‌గా యూనివర్సిటీలోని ఆయా విభాగాల్లో హాజరై పరిశోధనలు చేయాలి. అయితే విదేశాల్లో ఉన్న వారందరికీ దొడ్డి దారిలో అడ్మిషన్లు ఇవ్వడంతో పాటు పీహెచ్‌డీ డిగ్రీలు అమ్మేస్తున్నారు. అర్హత లేకపోయినా.. ఇంజినీరింగ్‌ స్ట్రీమ్‌లో పీహెచ్‌డీ గైడ్‌ చేయాలంటే ఆలిండియా కౌన్సిల్‌ ఫర్‌ టెక్నికల్‌ ఎడ్యుకేషన్‌ (ఏఐసీటీఈ) నిబంధనల ప్రకారం సంబంధిత సబ్జెక్ట్‌లో బీటెక్, ఎంటెక్, పీహెచ్‌డీ ఉండాలి. సంబంధిత సబ్జెక్ట్‌ల్లో బీటెక్, ఎంటెక్‌ లేకపోతే అధ్యాపకులుగా బోధించడానికి అర్హులు కారని ఏఐసీటీఈ నిబంధనలు చెబుతున్నాయి. అధ్యాపకులుగానే అర్హతలేని వారికి పీహెచ్‌డీ గైడ్‌ చేసే అవకాశమిచ్చారు. కంప్యూటర్‌ సైన్స్‌ అధ్యాపకులకు కంప్యూటర్‌ సైన్స్‌ ఇంజినీరింగ్‌లో గైడ్‌ చేసే అవకాశం ఇచ్చి 8 మందికి అడ్మిషన్లు ఇచ్చారు. తాజాగా మరిన్ని అడ్మిషన్లు ఇచ్చే ప్రయత్నం సాగుతోంది. తాతాల్కిక అధ్యాపకులకు పీహెచ్‌డీ గైడ్‌చేసే అర్హత లేదు. అయినా కూడా  పరిశోధనలు పర్యవేక్షించే అధికారం కల్పిస్తున్నారు. మరో ద్రవిడ వర్సిటీ కానుందా? 2010లో కుప్పంలోని ద్రవిడ వర్సిటీ, కర్నూలులోని రాయలసీమ వర్సిటీలు నిబంధనలకు విరుద్ధంగా  ఆఫ్‌లైన్‌ క్యాంపస్‌ పేరిట వేల సంఖ్యలో దూరవిద్యలో పీహెచ్‌డీ అడ్మిషన్లు ఇచ్చాయి. ఈ అంశాన్ని కోర్టులు సైతం తప్పుబట్టాయి. వీటిపై ఇప్పటికీ కేసులు నడుస్తున్నాయి. అయినా పాఠాలు నేర్వని మహిళా వర్సిటీ అధికారులు తమ స్వార్థానికి డాక్టరేట్‌ డిగ్రీలను అమ్మకానికి పెట్టారు. ప్రభుత్వం స్పందించి తగిన చర్యలు తీసుకోవాల్సి ఉంది. అనుమతి ఇచ్చాం శ్రీ పద్మావతి మహిళా వర్సిటీలో పనిచేస్తున్న అకడమిక్‌ కన్సల్టెంట్లకు పీహెచ్‌డీ గైడ్‌చేసే అవకాశం ఇచ్చాం. ఇంజినీరింగ్, ఫిజిక్స్, కెమిస్ట్రీ తదితర సెల్ఫ్‌ ఫైనాన్స్‌ కోర్సులకు ఈ సదుపాయం కల్పించాం. రెగ్యులర్‌ అధ్యాపకులు లేని ఈ విభాగాల్లో అకడమిక్‌ కన్సల్టెంట్‌లకు రీసెర్చ్‌ గైడ్‌చేసే అవకాశం ఇస్తున్నాం. – ప్రొఫెసర్‌ వీ.ఉమ, ఇన్‌చార్జి వీసీ, శ్రీ పద్మావతి మహిళా వర్సిటీ ఆరు నెలలకు ఒకసారి వస్తున్నారు ఇంటర్నేషనల్‌ పీహెచ్‌డీ అడ్మిషన్లు పొందిన వారు ఆరునెలలకొకసారి యూనివర్సిటీకి వచ్చి తమ పరిశోధనపై ప్రజెంటేషన్‌ చేస్తున్నారు. ప్రీ పీహెచ్‌డీ,  ప్రీ వైవా, థీసిస్‌ సమర్పణకు క్యాంపస్‌కు వస్తారు. పీహెచ్‌డీ వైవాకు హాజరవుతారు. చాలా దేశాల్లో ఇదే విధానం అమలులో ఉంది. –ప్రొఫెసర్‌ విజయలక్ష్మి, ఇంటర్నేషనల్‌ డీన్‌  

తిరుపతి శ్రీ పద్మావతి మహిళా వర్సిటీ మాజీ వీసీ తన పుత్రుడి ప్రయోగాల కోసం కోటి రూపాయలకుపైగా నిధులను దుర్వినియోగం చేస్తున్నారు. అంతేకాకుండా వర్సిటీకి సంబంధంలేని వీసీ కుమారుడి పేరును శిలాఫలకంలో వేశారు. మాజీ వీసీ భర్త ఇప్పటికీ పనులను పర్యవేక్షిస్తున్నారు. పనులన్నీ బినామీ కాంట్రాక్టర్‌ పేరుతో వారే చేయడమే కాకుండా కమీషన్ల రూపంలో భారీగా నొక్కేస్తున్నారని క్యాంపస్‌లో ప్రచారం జరుగుతోంది. మొత్తం మీద వర్సిటీలో వీరు చేపట్టిన అన్ని ప్రయోగాల ఖర్చు కోటి రూపాయలు దాటుతోందనే విషయం బాహాటంగా వినిపిస్తోంది.    సాక్షి, యూనివర్సిటీ క్యాంపస్‌ : శ్రీ పద్మావతి మహిళా వర్సిటీ తాజా మాజీ వీసీ ప్రొఫెసర్‌ దుర్గా భవాని కుమారుడు ఆర్కిటెక్చర్‌ పూర్తి చేశారు. అతని ప్రయోగాల కోసం మహిళా వర్సిటీని ఎంచుకున్నారు. ఇప్పటికే వీసీ బంగ్లా ప్రహరీ పేరిట మట్టిగోడ నిర్మించగా, అది పాడైపోయింది. 45 లక్షల అంచనా వ్యయంతో ప్రారంభమైన గాంధీ స్క్వయిర్‌( గార్డెన్‌) నిర్మాణ ఖర్చు కోటి రూపాయలను దాటింది. 10 నెలలుగా గార్డెన్‌ నిర్మాణ పనులు చేస్తున్నారు. విద్యార్థుల నుంచి ఫీజుల రూపంలో వసూలు చేసిన నిధులన్నీ వారికి ఏ మాత్రం ఉపయోగపడని గార్డెన్‌కు వినియోగిస్తున్నారు. క్యాంపస్‌లో ఇది హాట్‌ టాఫిక్‌గా మారింది. ఓ వైపు నిర్మాణం జరుగుతుండగానే ఎండిపోయిన  గాంధీ స్వ్కయిర్‌(గార్డెన్‌) బినామీ కాంట్రాక్టర్‌ పేరుతో పనులు  శ్రీ పద్మావతి మహిళా వర్సిటీకి ఇండియన్‌ అమెరికన్‌ ఫ్రెండ్‌ షిప్‌ కౌన్సిల్‌ అధ్యక్షుడు(ఎన్‌ఆర్‌ఐ) తోటకూర ప్రసాద్‌  గాంధీ విగ్రహాన్ని ఉచితంగా అందించారు. ఈ విగ్రహాన్ని క్యాంపస్‌లో ఎక్కడైనా ఏర్పాటు చేయవచ్చు. అయితే ఆ విగ్రహం ఏర్పాటు కోసం గార్డెన్‌ ఏర్పాటు చేసి అందులో పెట్టాలని నిర్ణయించారు. ఆర్కిటెక్చర్‌ చదివిన  కుమారుడి ప్రయోగానికి దాన్ని వినియోగించాలని తాజా మాజీ వీసీ దుర్గాభవాని నిర్ణయించారు. 45లక్షల అంచనా వ్యయ్యం తో గాంధీ స్వ్కయిర్‌ పేరిట గార్డెన్‌ రూపొందిం చేందుకు ప్రణాళిక రూపొందిం చారు. తమకు బాగా కావాల్సిన ఒక బినామీ కాంట్రాక్టర్‌కు పనులు అప్పగించారు.  కూలిన ప్రహరీ గోడ దుర్గాభవాని వీసీగా ఉన్న సమయంలో ఆమె బంగ్లాకు ప్రహరీ గోడను మట్టితో నిర్మించారు. ఆర్కిటెక్చర్‌ కోర్సులో కుమారుడు నేర్చుకున్న అంశాలపై ప్రయోగాలు చేయడానికి బంగ్లాను ఎంచుకున్నారు. మట్టితో ప్రహరీ గోడ నిర్మించడానికి సుమారు రూ.10 లక్షలు ఖర్చుచేశారు. ఈ ప్రయోగం విఫలమైంది.  బంగళా ఎంట్రెన్స్‌ దగ్గర ప్రహరీ గోడ పాడైపోయింది.   వీసీ బంగ్లా వద్ద దెబ్బతిన్న ప్రహరీ గోడ పాలన ఆమె కనుసన్నల్లోనే వీసీగా దుర్గాభవానీ పదవీ కాలం గత ఏడాది అక్టోబర్‌ 26కు పూర్తయింది. అప్పటి నుంచి రెక్టార్‌ వి.ఉమ ఇన్‌చార్జి వీసీగా పనిచేస్తున్నారు. దుర్గాభవాని హయాంలో ఆమె ఆశీస్సులతో నియమితులైన రెక్టార్‌ ఉమ, రిజిస్ట్రార్‌ ప్రొఫెసర్‌ మమత ఇప్పటికీ పదవుల్లో కొనసాగుతున్నారు. ఈ నేపథ్యంలో దుర్గాభవాని కనుసన్నల్లోనే వర్సిటీ పాలన సాగుతోంది. వర్సిటీకి చెందిన అధికార వాహనాన్ని కూడా వినియోగిస్తున్నారు. వీసీ బంగ్లాలో పనిచేసే ఉద్యోగులతో ఇంట్లో పనులు చేయించుకుంటున్నారు. ఈ అంశంపై ఇటీవల నాన్‌ టీచింగ్‌ సిబ్బంది రిజిస్ట్రార్‌కు ఫిర్యాదు చేశారు.  అంతేకాకుండా దుర్గాభవానికి  ప్రొఫెసర్‌గా ఇంకా సర్వీసు ఉంది. ఆమె పనిచేసే జర్నలిజం విభాగంలో ప్రత్యేక గది, రెడ్‌ కార్పెట్, ఇతర ఖరీదైన ఫర్నీచర్‌ను అధికారులు సమాకూర్చుతున్నారు. నీటి కొరత మహిళా వర్సిటీలో తీవ్రమైన నీటి కొరత ఉంది. హాస్టల్‌లో విద్యార్థులు నీటి కొరతతో ఇబ్బంది పడుతున్నా చర్యలు తీసుకోకుండా అధికారులు ఈ గార్డెన్‌లో వాటర్‌ ఫౌంటైన్‌ ఏర్పాటు చేస్తుండటం విశేషం. ఈ పనులన్నీ మాజీ వీసీ భర్త దగ్గరుండి పర్యవేక్షించడం కొసమెరుపు. విద్యార్థుల ఫీజుల నుంచే.. వివిధ సెల్ఫ్‌ ఫైనాన్స్‌ కోర్సులు చదివే విద్యార్థులు ఫీజుల రూపంలో చెల్లించిన నిధులను, హాస్టల్‌ విద్యార్థుల నుంచి అడ్మిషన్‌ రూపంలో చెల్లించే నిధులను దారి మళ్లించి గార్డెన్‌కు ఖర్చు చేస్తున్నారు. నెలల తరబడి పనులు జరుగుతూనే ఉన్నాయి. ఇప్పటిదాకా కోటి రూపాయలు ఖర్చు చేసినా పూర్తికాలేదు. పూర్తయ్యే సరికి ఇంకా ఎంత ఖర్చవుతుందో తెలియని పరిస్థితి. పైగా ఈ గార్డెన్‌లో ఏర్పాటు చేసిన పచ్చిక ఇప్పటికే ఎండిపోయింది.   ఫీజు లేకుండా డిజైన్‌ గాంధీ స్వ్కయిర్‌(గార్డెన్‌)కు దుర్గాభవాని కుమారుడు ఎలాంటి ఫీజు లేకుండా డిజైన్‌ సమకూర్చారు. అందుకే గాంధీ విగ్రహానికి ఏర్పాటు చేసిన శిలాఫలకంపై ఆమె కుమారుడు ఎన్‌.శ్రీహర్ష పేరు వేశాం.  దుర్గాభవాని వీసీ పదవి నుంచి రిలీవ్‌ అయ్యాక.. ఆమెను తెలుగు యూనివర్సిటీకి ఇన్‌చార్జిగా నియమించారు. దీంతో ఆమె కోరిక మేరకు మహిళా యూనివర్సిటీ వాహనాన్ని కేటాయించాం. ఇప్పుడు నిలిపివేశాం. మాజీ వీసీలకు వర్సిటీలో సౌకర్యాలు కల్పించాలి. అందుకే ఆమె చాంబర్‌కు తగిన ఫర్నీచర్, ఇతర సౌకర్యాలు కల్పిస్తున్నాం.    – ప్రొఫెసర్‌ వి.ఉమ, ఇన్‌చార్జి వీసీ, శ్రీ పద్మావతి మహిళా వర్సిటీ

సివిల్స్‌లో మంచి ర్యాంకు సాధించి ఐఏఎస్, ఐపీఎస్‌ కావాలని యువత ఎన్నో కలలు కంటుంది. సివిల్స్‌ సాధన ఎంతోమందికి జీవితాశయం. తమ ఎదురుగా ఉన్న కలెక్టర్, ఎస్పీ, ఇతర అధికారులను రోల్‌ మోడల్‌గా తీసుకుని సివిల్స్‌ సాధించినవారు ఎంతోమంది ఉన్నారు. అయితే తిరుపతి లాంటి చిన్న నగరంలో సివిల్స్‌కు శిక్షణ ఇచ్చేందుకు సరైన కేంద్రాలు లేవు. ఆశ ఉన్నా, ఆర్థిక వనరులు లేక చాలామంది ఈ కోర్సుల్లో శిక్షణ పొందేందుకు దూర ప్రాంతాలకు వెళ్లలేరు. యువత బలహీనతను ఉపయోగించుకుని దోపిడీకి తెరలేపింది మహిళా వర్సిటీ. సాక్షి, తిరుపతి : సివిల్స్‌కు యూనివర్సిటీలో శిక్షణ అనగానే చాలా ఉన్నత ప్రమాణాలు ఉంటాయని భావిస్తారు. అయితే అక్కడ సరిపడా అధ్యాపకులు లేరు. ఫీజులు మాత్రం కార్పొరేట్‌కు ఏమాత్రం తీసిపోవు. మహిళా విశ్వవిద్యాలయం ఉన్నతాధికారులు కమీషన్లకు కక్కుర్తిపడి కోర్సు నిర్వహణను ప్రయివేటు సంస్థకు అప్పజెప్పినట్టు ఆరోపణలున్నాయి. మహిళలకు ఉన్నత విద్యను అందించి వారిని ఉన్నత స్థానాల్లో నిలిపి మహిళా సాధికారత సాధించాలనే లక్ష్యంతో శ్రీ పద్మావతీ మహిళా విశ్వవిద్యాలయం ఏర్పాటైంది. కొంతమంది అధికారుల స్వార్థానికి లక్ష్యం నీరుగారుతోంది. గత ఏడాది ప్రైవేటు సంస్థతో వర్సిటీ అవగాహన ఒప్పందం (ఎంఓయూ) కుదుర్చుకుని బీఏ/ఎంఏ పబ్లిక్‌ పాలసీ అండ్‌ ఆంత్రోపాలజీ పేరిట కోర్సును ప్రారంభించింది. 60 సీట్లు పెట్టింది. ఎస్‌పీఎంవీవీ సెట్‌ద్వారా ఇందులో ప్రవేశం కల్పిస్తోంది. గత విద్యాసంవత్సరంలో ఈకోర్సును ప్రారంభించింది. 30 మంది అడ్మిషన్‌ పొందారు. ఈ ఏడాది నిర్వహించిన ప్రవేశ పరీక్షకు 80 మంది దరఖాస్తు చేయగా, 18 మంది అర్హత సాధించారు. దీంతో సీట్లు మిగిలిపోయాయి. మిగిలిన సీట్లను భర్తీ చేసేందుకు స్పాట్‌ అడ్మిషన్లు నిర్వహించాలని అధికారులు ప్రయత్నిస్తున్నారు. కోర్సు ఫీజు రూ.1.2లక్షలు బీఏ/ఎంఏ పబ్లిక్‌ పాలసీ అండ్‌ ఆంత్రోపాలజీ కోర్సులో భాగంగా యూనివర్సిటీతో పారా అసోసియేషన్‌ ఆఫ్‌ రూరల్‌ డెవలప్‌మెంట్‌(పీఏఆర్‌డీ) సంస్థ కుదుర్చుకున్న ఒప్పందం మేరకు ఉదయం డిగ్రీ కోర్సుకు తరగతులు నిర్వహిస్తారు. మధ్యాహ్నం సివిల్స్‌లో శిక్షణ ఇస్తారు. వారాంతాల్లో మోడల్‌ టెస్టులు నిర్వహిస్తారు. ఈకోర్సు ఫీజు చూస్తే దిమ్మతిరగాల్సిందే. సెమిస్టర్‌కు సుమారు రూ.58,950. ఇవీగా కుండా అడ్మిషన్‌ ఫీజు, ఇతర ఫీజులు కలిపితే ఏడాదికి రూ.1.2లక్షలు చెల్లించాల్సిందే. ఇంత ఫీజు చెల్లించినా నాణ్యమైన విద్యను అందిస్తున్నారంటే అదీలేదు. అధ్యాపకులు లేరు ఏదైనా కోర్సును యూనివర్సిటీలో ప్రారంభించాలంటే ముందుగా అధ్యాపకులను నియమించుకోవాలి. మహిళా వర్సిటీలో సివిల్స్‌ శిక్షణ కోర్సు నిర్వహణను పూర్తిగా ప్రైవేటు సంస్థకు అప్పగించారు. ఈసంస్థ ఎలాంటి సిలబస్‌ పెట్టిందో వర్సిటీకి తెలియదు. అధ్యాపకులకు ఎలాంటి అర్హతలున్నాయనే అంశాన్ని కూడా పరిగణించడంలేదు. ఈకోర్సు నిర్వహణపై ఎవరైనా ప్రశ్నిస్తే అధికారులు సరిగా స్పందించడంలేదు. కనీసం క్యాంపస్‌కు చెందిన ఒక అధ్యాకుడిని కూడా కోర్సు ఇన్‌చార్జిగా నియమించలేదు. అధ్యాపకులు, సిలబస్‌ వివరాలు వెల్లడించడం లేదు. ప్రైవేటు సంస్థ కూడా ఇంజినీరింగ్‌ బ్యాక్‌గ్రౌండ్‌లేని వ్యక్తిని కోర్సు ఇన్‌చార్జిగా నియమించడంతో కోర్సు నిర్వహణ అధ్వానంగా తయారైంది. ఉపకార వేతనాలు లేవు యూనివర్సిటీకి సంబంధం లేకుండా ప్రైవేటు సంస్థ పర్యవేక్షణలో సాగుతున్న ఈకోర్సులో చేరిన విద్యార్థులకు ఫీజు రీయింబర్స్‌మెంట్‌ గాని, ఉపకారవేతనాలు గానీ వచ్చే అవకాశం లేదు. కోర్సు ఫీజు చాలా ఎక్కువగా ఉంది. కార్పొరేట్‌ సంస్థల్లో కూడా ఈ స్థాయిలో ఫీజులు వసూలు చేయడంలేదు. ప్రభుత్వ రంగసంస్థ, మహిళలకు తక్కువ ఖర్చుతో ఉన్నత విద్యను అందించాల్సిన మహిళా వర్సిటీ విద్యార్థుల నుంచి దోపిడీకి ప్రైవేటు సంస్థకు లైసెన్స్‌ ఇవ్వడం విమర్శలకు తావి స్తోంది. ఎస్వీయూలో కూడా గ్రూప్స్, ఇతర పోటీ పరీక్షలకు ఎలాంటి ఫీజులు లేకుండా ఉచిత శిక్షణ ఇస్తున్నా రు. మహిళా వర్సిటీ కూడా తమ విద్యార్థులకు సామాజిక బాధ్యతతో నిపుణులను పిలిపించి సివిల్స్‌ శిక్షణ ఇప్పించవచ్చు. ఇందుకోసం యూజీసీ, ఇతర సంస్థలు అవసరమైన నిధులు కూడా సమకూర్చుతాయి. వర్సిటీ అధికారులు ఆ ప్రయత్నం చేయకుండా ప్రైవేటు సంస్థకు కట్టబెట్టి దగ్గరుండి దోపిడీ చేయిస్తున్నారు. ఈ వ్యవహారంలో అధికారులు భారీ ఎత్తున కమీషన్లు పొందినట్టు ఆరోపణలు ఉన్నాయి. రాయలసీమ విద్యార్థులంతా ఆర్థికంగా వెనుకబడినవారే. డబ్బున్న వారు మాత్రమే ప్రైవేటు వర్సిటీలు, ఇతర కార్పొరేట్‌ సంస్థల్లో చదువు కోవడానికి వెళుతారు. కానీ ఇక్కడ విభిన్నంగా దోపిడీ పర్వం సాగుతుండడం విశేషం. ఎంవోయూ మేరకే.. మహిళా వర్సిటీ, పీఏఆర్‌డీ సంస్థల మధ్య కుదుర్చుకున్న ఒప్పందంలో భాగంగానే ఈ కోర్సును నిర్వహిస్తున్నాం. ఈ కోర్సు నిర్వహణ మొత్తం ఆ సంస్థ చూస్తుంది. అధ్యాపకులు, బోధన, ఇతర అంశాలు పర్యవేక్షిస్తుంది. సిలబస్‌ మాత్రం యూనివర్సిటీ కొంతమంది నిపుణులతో కమిటీ వేసి రూపొందిం చింది. ప్రభుత్వం గతంలో ప్రభుత్వ, ప్రైవేటు భాగస్వామ్యం (పీపీపీ) విధానం అమలులోకి తెచ్చింది. దీనిని దృష్టిలో ఉంచుకుని విద్యార్థులకు సివిల్స్‌లో శిక్షణ ఇప్పించేందుకు ఆసంస్థతో ఒప్పదం కుదుర్చుకున్నాం. విద్యార్థులు చెల్లించిన ఫీజులో 70 శాతం పిఏఆర్‌డీ సంస్థకు, 30 శాతం వర్సిటీకి లభిస్తోంది. మహిళా వర్సిటీ కేవలం తరగతి గదులు, ఇతర సదుపాయాలు మాత్రమే కల్పిస్తుంది. –ప్రొఫెసర్‌ వి.ఉమ, ఇన్‌చార్జి వీసీ, శ్రీపద్మావతి మహిళా వర్సిటీ


  
 యూనివర్సిటీ క్యాపస్‌: స్వీడెన్‌లోని బ్లెకింగ్‌ ఇన్‌స్టిట్యూట్‌ ఆఫ్‌ టెక్నాలజీ(బీఐటీ)యూనివర్సిటీతో శ్రీపద్మావతి మహిళా యూనివర్సిటీ పరప్సర అవగాహన ఒప్పందం(ఎంఓయూ) కుదుర్చుకుంది. ఆ సంస్థ వీసీ ఏండర్స్‌ హిడిస్టిర్న్‌ సోమవారం మహిళా యూనివర్సిటీని సందర్శించారు. అధికారులతో సమావేశమై ఎంఓయూ కుదుర్చుకున్నారు. బీటీఐ స్వీడెన్‌ సంస్థ ఆంధ్రా యూనివర్సిటీ, జేఎన్‌టీయూ(కాకినాడ)ల్లో విద్యార్థులకు నైపుణ్యాభివృద్ధి శిక్షణ ఇస్తోంది. ఆదివారం ఎస్వీయూతోనూ ఎంఓయూ కుదుర్చుకుంది. విద్యార్థులు, అధ్యాపకులకు శిక్షణ ఇవ్వడం, ఇంజినీరింగ్‌ విద్యార్థుల్లో నైపుణ్యాభివద్ధి, ఉపాధి కల్పనలో రెండూ సంస్థలూ పరస్పరం సహకరించుకోనున్నాయి. సంయుక్తంగా పరిశోధనలు చేయనున్నాయి. ఈ కార్యక్రమంలో రెక్టార్‌ వి.ఉమ, డీన్లు పాల్గొన్నారు.