Indians in Canada: ఖలీస్తానీ ఉగ్రవాది హర్దీప్‌సింగ్‌ నిజ్జర్‌ హత్య నేపథ్యంలో భారత్‌, కెనడా దేశాల మధ్య దౌత్యసంబంధాలు దెబ్బతిన్నాయి. నిజ్జర్‌ హత్య కేసులో భారత్‌ ప్రమేయం ఉందని కెనడా ప్రధానమంత్రి జస్టిన్‌ ట్రూడో ఆరోపించి వివాదానికి తెరలేపారు. భారత హైకమిషనర్‌ సంజయ్‌ కుమార్‌ వర్మ పేరును నిజ్జర్‌ హత్య కేసు అనుమానితుల జాబితాలో కెనడా చేర్చడంతో వివాదం మరింత ముదిరింది. కెనడా చర్యలకు నిరసనగా ఆరుగురు కెనడా దౌత్యవేత్తలను భారత్‌ బహిష్కరించింది. కెనడా నుంచి తమ రాయబారి, దౌత్యాధికారులను కూడా వెనక్కి రప్పించింది భారత్‌. దీంతో రెండు దేశాల మధ్య విభేదాలు రోజురోజుకు ముదురుతున్నాయి.ఈ పరిణామాల నేపథ్యంలో కెనడాలో భారతీయుల పరిస్థితి ఏంటనేది చర్చనీయాంశంగా మారింది. ఎందుకంటే కెనడాలో భారతీయులు పెద్ద సంఖ్యలో ఉన్నారు. కెనడా ఇమ్మిగ్రెంట్స్‌లో భారతీయులు నాలుగో స్థానంలో ఉండడం గమనార్హం. ముఖ్యంగా అధిక సంఖ్యలో ఉన్న సిక్కులు అన్ని రంగాల్లో కీలకపాత్ర పోషిస్తున్నారు. అంతేకాదు కెనడాలోని భారతీయులు అక్కడి ఆర్థిక వ్యవస్థకు దన్నుగా నిలుస్తున్నారు. ఇరు దేశాల మధ్య ఆర్థిక, వాణిజ్య లావాదేవీలు కూడా చెప్పుకోదగ్గ స్థాయిలో జరుగుతున్నాయి. కాగా, తాజా పరిస్థితులు తమపై ఎలాంటి ప్రభావం చూపుతాయోనని కెనడాలోని భారతీయులు ఆందోళన చెందుతున్నారు. విద్య, ఉద్యోగాల కోసం కెనడా వెళ్లాలనుకునే వారు ఆలోచనలో పడ్డారు.మనోళ్లే ముందు2021 అధికారిక లెక్కల ప్రకారం.. కెనడాలో నివసిస్తున్న భారత వలసదారుల సంఖ్య 28 లక్షలు. వీరిలో భారత సంతతికి(పీఐఓ) చెందిన వారు 18 లక్షలు, ఎన్నారైలు 10 లక్షల మంది ఉన్నారు. కెనడా పౌరుల్లో 7.3 లక్షల మంది హిందువులు, 7.7 లక్షల మంది సిక్కులు ఉన్నారు. కెనడాలో ఉన్న విదేశీ విద్యార్థుల్లో భారతీయులే ఎక్కువగా (45 శాతం) ఉన్నారు. ప్రస్తుతం 4.27 లక్షల మంది విద్యార్థులు కెనడాలో విద్యనభ్యసిస్తున్నారు. తాత్కాలిక ఉపాధి పొందుతున్న విదేశీ కార్మికుల్లోనూ మనోళ్లే (22 శాతం) ముందున్నారు. శాశ్వత నివాసం ప్రకటించిన పీఆర్‌ పథకం కింద అత్యధికంగా 27 శాతం మంది భారతీయులు లబ్ది పొందారు. గత 20 ఏళ్లలో కెనడాలోని భారతీయుల సంఖ్య రెండింతలు పెరిగినట్టు గణాంకాలు వెల్లడిస్తున్నాయి.ఆ నగరాల్లోనే ఎక్కువకెనడా పౌరసత్వం తీసుకుంటున్న భారతీయుల సంఖ్య వేగంగా పెరుగుతోంది. 2017లో 44.3 శాతం మంది, 2018లో 49.2, 2019లో 55.8, 2020లో 58.4, 2021లో 61.1 శాతం మంది ఇండియన్స్‌ కెనడా పౌరసత్వం దక్కించుకున్నారు. వాంకోవర్‌, టొరంటో, ఒట్టావా, వినీపెగ్‌, కాల్గారి, మాంట్రియల్‌ నగరాల్లో భారతీయులు అధికంగా నివసిస్తున్నారు. కెనడాలో ఉన్న భారతీయుల్లో 50 శాతం ఉద్యోగాలు చేస్తున్నారు. వీరిలో మేనేజ్‌మెంట్‌ స్థాయి జాబుల్లో ఉన్నవారు కేవలం 19 శాతం మాత్రమే. కెనడాలోని వలస భారతీయుల్లో పన్నులు చెల్లిస్తున్నవారు 42 వేల మంది వ‌రకు ఉన్నారు.చ‌ద‌వండి: ఇండియన్‌ రైల్వే నుంచి స్పేస్‌ఎక్స్‌ వరకు.. భార‌త‌ ఇంజ‌నీర్ ఘ‌న‌త‌వాణిజ్యంపై ప్రభావంభారత్‌, కెనడా దేశాల మధ్య 2023-24 మధ్య కాలంలో 8.9 బిలియన్‌ డాలర్ల విలువ చేసే ఎగుమతులు, దిగుమతులు జరిగాయి. కెనడా భారత్‌ ఎగుమతులు 4.4 బిలియన్‌ డాలర్లు కాగా, కెనడా నుంచి ఇండియాకు దిగుమతులు 4.5 బిలియన్‌ డాలర్లుగా నమోదయ్యాయి. కెనడా నుంచి భారత్‌కు ఎక్కువగా పప్పులు ఎగుమతి అవుతుంటాయి. తాజాగా రెండు దేశాల మధ్య దౌత్య సంబంధాలు దెబ్బతినడంతో బయ్యర్లు ఆస్ట్రేలియా నుంచి దిగుమతులు పెంచారు. భారత్‌ నుంచి ఆభరణాలు, విలువైన రాళ్లు, రెడీమేడ్‌ దుస్తులు, ఫార్మా ఉత్పత్తులు కెనడాకు ఎగుమతి అవుతుంటాయి. కాఫీ చెయిన్‌ టిమ్‌ హార్టన్‌, ఫ్రోజోన్‌ ఫుడ్‌ కంపెనీ మెక్‌కెయిన్‌ సహా ఇండియాలో 600 పైగా కెనడా కంపెనీలు ఉన్నాయి. ఇండియాలో కెనడా పెన్షన్ ఫండ్స్ పెట్టుబడులు 75 బిలియన్‌ డాలర్లకు పైగా ఉంటాయని అంచనా.

ప్రత్యేక కోర్టు ఆదేశాల మేరకు తమిళనాడు దివంగత ముఖ్యమంత్రి జయలలిత ఆస్తుల వివరాలను వెల్లడించేందుకు నిరాకరించిన పబ్లిక్‌ ఇన్ఫర్మేషన్‌ ఆపీసర్‌(పీఓఐ) ఉత్తర్వును సివిల్‌ కోర్టు కొట్టేసింది. అలాగే ప్రత్యేక కోర్టు ఆదేశించిన ఉత్తర్వుల మేరకు దివగంత ముఖ్యమంత్రి జయలలిత ఆస్తుల వివరాలను వెల్లడించాల్సిందేనని పీఓ అధికారిని కోర్టు ఆదేశించింది. 1996 డిసెంబర్‌ 11న జప్తు చేసిన ఆస్తుల వేలానికి సంబంధించి ప్రత్యేక కోర్టు ఆదేశాలపై సమాచారం ఇవ్వాలని ఆర్టీఐ కార్యకర్త టీ నరసింహమూర్తి కోరారు. వాస్తవానికి జయలలిత ఆదాయనికి మించిన ఆస్తుల కేసును 2003లో సుప్రీం కోర్టు కర్ణాటకకు బదిలీ చేసింది. ఈ మేరకు జయలలిత చీరలు, శాలువాలు, పాదరక్షలతో సహా స్వాధీనం చేసుకుని బెంగళూరుకి తరలించారు. ఐతే 2014లో జయలలితతోపాటు, ఇతర నిందితులను ఇక్కడి ప్రత్యేక న్యాయస్థానం దోషులుగా నిర్ధారించింది. కానీ ఈకేసుకి సంబంధించిన భౌతిక ఆధారాలు కస్టడీలోనే ఉన్నాయి. ఆయా ఆస్తులను ఆర్టీఐ కార్యకర్త నరసింహమూర్తి వేలం వేయాలని కోరారు. ఈ క్రమంలో ప్రత్యేక కోర్టు ఆదేశాల మేరకు జయలలిత ఆస్తుల వివరాలను వెల్లడించేందుకు పబ్లిక్‌ ఇన్ఫర్మేషన్‌ ఆఫీసర్‌(పీఐఓ) నిరాకరించారు. పైగా ఆయన సిటీ సివిల్‌ కోర్టును ఆశ్రయించారు. ఐతే సివిల్‌ కోర్టు ప్రత్యేక కోర్టు తుది ఉత్తర్వుల తోపాటు కోర్టు నియమించిన ప్రత్యేక ప్రాసిక్యూటర్‌ ముందు ఆస్తుల వివరాలను వెల్లడించాలని అధికారులను ఆదేశించింది.  (చదవండి: లక్నో భవనం కూలిన ఘటన: సమాజ్‌వాద్‌ పార్టీ నేత భార్య, తల్లి దుర్మరణం)

గుజరాత్ లోని రాజ్ కోట్ లోక్ సభ సభ్యుడు, మాజీ కేంద్ర మంత్రి మోహన్ భాయి కళ్యాణ్ జీ కుందరియా (బీజేపీ) విదేశాల్లో ప్రవాస భారతీయుల జనాభా గురించి అడిగిన ప్రశ్నకు విదేశాంగ శాఖ సహాయ మంత్రి వీ మురళీధరన్ 2022 మార్చి 25న లోక్ సభలో లిఖితపూర్వక జవాబు ఇచ్చారు.  అందులో పేర్కొన్న వివరాల ప్రకారం నాన్‌ రెసిడెంట్‌ ఇండియన్‌, పర్సన్‌ ఆఫ్‌ ఇండియన్‌ ఆరిజిన్‌ విదేశీ పౌరసత్వం కలిగిన భారతీయుల జనాభా భారీగా ఉంది. మొత్తం 210 దేశాలలో 1,34,51,654 మంది ఎన్నారైలు (ప్రవాస భారతీయులు), 1,86,83,645 మంది పీఐవో (పర్సన్ ఆఫ్ ఇండియన్ ఆరిజిన్ - విదేశీ పౌరసత్వం కలిగిన భారతీయ సంతతి వారు) మొత్తం కలిపి 3,21,42,840 మంది ఓవర్సీస్ ఇండియన్స్ (భారత ప్రవాసీలు) ఉన్నట్టు తేలింది.   గల్ఫ్‌ దేశాల్లో మొత్తం ఆరు గల్ఫ్ దేశాలలో  కలిపి 88,88,733 మంది ఎన్నారైలు ఉన్నారు. వీరిలో అత్యధికంగా యూఏఈలో 34,19,875, సౌదీలో 25,92,166, కువైట్‌లో 10,28,274, ఓమాన్‌లో 7,79,351, ఖతార్‌లో 7,45,775, బహరేన్‌లో 3,23,292 మంది ప్రవాస భారతీయులు ఉన్నారు.  ఇసీఆర్‌ పాస్‌పోర్టుతో ఇసిఆర్ పాస్ పోర్ట్ అంటే.. ఎమిగ్రేషన్ క్లియరెన్స్ రిక్వయిర్డ్ (విదేశాలకు ఉద్యోగానికి వెళ్లేందుకు ప్రభుత్వ అనుమతి తీసుకోవాల్సిన). 10వ తరగతి కంటే తక్కువ విద్యార్హత కలిగిన వారికి ఇలాంటి పాస్ పోర్టు జారీ చేస్తారు. అమాయకులైన కార్మికుల రక్షణ కొరకు ఈ విధానం ప్రవేశపెట్టారు. ఇసిఆర్ పాస్ పోర్ట్ కలిగినవారు 18 ఇసిఆర్ (ముఖ్యంగా ఆరు గల్ఫ్) దేశాలకు ఉద్యోగానికి వలస వెళ్లిన ఇ-మైగ్రేట్ గణాంకాలను పార్లమెంటుకు తెలియజేశారు. ఇందులో ఇసిఎన్ఆర్ పాస్ పోర్ట్ కలిగిన వారికి సంబంధించి కచ్చితమైన వివరాలు లేవు. అలాగే విజిట్ వీసా పై వెళ్లిన వారి వివరాలు కూడా లెక్కలోకి తీసుకోలేదు. 2019 లో 3,68,048 మంది, 2020లో 94,145 మంది,  2021లో 1,32,673 మంది వలస వెళ్లినట్లు తెలిపారు.   ఇఈసీఎన్‌ఆర్‌ పాస్‌పోర్ట్‌తో..   ఇసిఎన్ఆర్ పాస్ పోర్ట్ అంటే.. ఎమిగ్రేషన్ క్లియరెన్స్ నాట్  రిక్వయిర్డ్ (విదేశాలకు ఉద్యోగానికి వెళ్లేందుకు ప్రభుత్వ అనుమతి అవసరం లేదు). 10వ తరగతి పాస్ అయిన వారికి లేదా విదేశాల్లో మూడేళ్ళ అనుభవం ఉన్నవారికి  లేదా ఆదాయపు పన్ను (ఐటి) చెల్లింపుదారులకు లేదా 50 సంవత్సరాల వయస్సు పైబడిన వారికి ఇలాంటి పాస్ పోర్ట్ జారీ చేస్తారు. అనగా వీరు తెలివైన వారు, ఏదైనా కష్టం వస్తే తమను తాము రక్షించుకోగలుగుతారని అర్థం.   - మంద భీంరెడ్డి (+91 98494 22622 )  

న్యూఢిల్లీ: కరోనా వైరస్‌ వ్యాప్తి, లాక్‌డౌన్‌ నేపథ్యంలో ఎనిమిది నెలల క్రితం రద్దు చేసిన వీసాలను మళ్లీ పునరుద్ధరించాలని కేంద్ర ప్రభుత్వం గురువారం నిర్ణయించింది. ఎలక్ట్రానిక్, టూరిస్టు, మెడికల్‌ కేటగిరీ మినహా మిగిలిన అన్ని రకాల వీసాలను పునరుద్ధరిస్తారు. ఇది తక్షణమే అమల్లోకి వస్తుందని ప్రభుత్వం వెల్లడించింది. భారత్‌ను సందర్శించేందుకు గాను ఓవర్సీస్‌ సిటిజెన్‌ ఆఫ్‌ ఇండియా(ఓసీఐ), పర్సన్‌ ఆఫ్‌ ఇండియన్‌ ఆరిజిన్‌(పీఐఓ) కార్డుదారులకు, ఇతర విదేశీయులకు టూరిస్టు వీసా మినహా ఇతర వీసాలు మంజూరు చేయనున్నట్లు కేంద్ర హోంశాఖ స్పష్టం చేసింది. దీని ద్వారా విదేశీయులు ఇండియాకు వచ్చేందుకు మార్గం సుగమమైంది. దేశ సందర్శనకు కాకుండా వారు వ్యాపారం, సదస్సులు, ఉద్యోగాలు, విద్యాభ్యాసం, పరిశోధనల కోసం ఇండియాకు రావొచ్చు. కరోనా వైరస్‌ బయటపడడంతో ఈ ఏడాది ఫిబ్రవరి నుంచి విదేశాల నుంచి జనం రాకపోకలను ప్రభుత్వం నిలిపివేసింది. అన్‌లాక్‌లో భాగంగా ఆంక్షలను క్రమంగా సడలిస్తోంది. అలాగే వీసాలు, విదేశీ ప్రయాణాలపై ఆంక్షలను ఎత్తివేస్తోంది. అందులో భాగంగా వీసాలను పునరుద్ధరించింది. ఒకవేళ వాటి గడువు తీరిపోతే మళ్లీ వీసాలు పొందవచ్చని కేంద్రం సూచించింది. విదేశీయులు భారత్‌లో వైద్య చికిత్స పొందాలని భావిస్తే మెడికల్‌ వీసా కోసం కొత్తగా దరఖాస్తు చేసుకోవాలని పేర్కొంది. విదేశాల నుంచి ఇండియాకు వచ్చేవారు కేంద్ర ఆరోగ్యశాఖ జారీ చేసిన కోవిడ్‌ మార్గదర్శకాలను తప్పనిసరిగా పాటించాలని తెలియజేసింది.

సెప్టెంబర్‌ ఏడో తేదీన మద్రాస్‌ హైకోర్టు ఒక మంచి తీర్పు ఇచ్చింది. యాంత్రికంగా ఆర్టీఐ దరఖాస్తులను తిరస్కరించే పీఐఓలను ఉద్యోగం నుంచి పంపించేయాలని సూచించింది. అటువంటి పీఐఓలు ఆ పదవుల్లో ఉండడానికి అర్హులు కాదని వ్యాఖ్యానించింది. తమిళనాడు పబ్లిక్‌ సర్వీస్‌ కమిషన్‌లో ఎన్ని ఖాళీలు ఉన్నాయి, 2006, 07, 08 సంవత్సరాలలో ఎన్ని ఖాళీలు, వాటిలో ఎన్ని వెనుకబడిన వర్గాలకు కేటాయించారు. అలాగే బీసీలకు, చాలా వెనుకబడిన వర్గాలకు కేటాయించిన స్థానాలలో ఎంపికైన వన్నియకుల శత్రియర్‌ జాబితా ఇవ్వండి అని ముత్యన్‌ ఒక ఆర్టీఐ దరఖాస్తు దాఖలుచేశారు.  పీఐఓ ఈ దరఖాస్తును తిరస్కరించారు. చివరి రెండు పాయింట్ల సమాచారం ఇవ్వడానికి వీలే లేదట. ఆ సమాచారం వెల్లడిస్తే ఆయా ఉద్యోగుల ప్రైవసీని భంగపరిచినట్టు అవుతుందని, అంతేగాకుండా విభిన్న కులాల మధ్య చిచ్చుపెట్టినవారమవుతామని వారు వాదించారు. దీన్ని సవాలుచేస్తూ రెండో అప్పీలు తమిళనాడు సమాచార కమిషన్‌ దాకా వెళ్లింది. కమిషన్‌ ఈ వివరాలు ఇవ్వాలని ఆదేశించింది. ఈ ఉత్తర్వును రద్దు చేయాలని కోరుతూ తమిళనాడు పబ్లిక్‌ సర్వీసు కమిషన్‌ రాష్ట్ర హైకోర్టులో రిట్‌ పిటిషన్‌ దాఖలు చేసింది. కులాల వారీగా విభజించి పట్టికలు ఇవ్వడం పబ్లిక్‌ యాక్టివిటీతో సంబంధం లేని పననీ, టీఎన్‌పీఎస్‌సీ రాజ్యాంగ విధులు నిర్వర్తించే సంస్థ అనీ, కులాల వివరాలు గోప్యంగా ఉంచాల్సిన బాధ్యత దీనిపై ఉందని, ఇందువల్ల కుల పోరాటాలు, అల్లర్లు కూడా జరగవచ్చునని నోటికి వచ్చిన కారణాలు అల్లి సమాచారం నిరాకరించారు. ‘‘చాలా ధైర్యంగా కమిషన్‌ తీసుకున్న అరుదైన నిర్ణయాలలో కెల్లా అరుదైన నిర్ణయం ఇది అయి ఉండాలి. ఈ కేసులో సమాచార కమిషన్‌ తీర్పును కాదనే అవకాశమే లేదు’’ అని హైకోర్టు న్యాయమూర్తి పేర్కొనడం విశేషం. రిట్‌ వేయతగిన తప్పేదీ కనిపించడం లేదని కూడా హైకోర్టు పేర్కొన్నది. కనీసం తాము పేర్కొంటున్న సెక్షన్‌ 8 క్లాజ్‌లు వర్తిస్తాయో లేదో ఆలోచించకుండా ఇష్టం వచ్చినట్టు సెక్షన్ల నంబర్లు రాసి దరఖాస్తులు తిరస్కరించే ఇటువంటి అధికారులకు గుణపాఠం చెప్పాలి. వారు ఈ పదవుల్లో ఉండేందుకు అర్హులు కాదు. వారిని బయటికి పంపించాల్సిందే. లేదా వారిపైన ఇంకా తీవ్రమైన చర్యలు తీసుకోవాలి అని హైకోర్టు న్యాయమూర్తి జస్టిస్‌ వైద్యనాథన్‌ సెప్టెంబర్‌ 7 నాటి తీర్పులో వ్యాఖ్యానించారు. ఈ తప్పు చేసిన అధికారులు ఇంకా సర్వీసులో ఉన్నారా? అని అడిగారు. దానికి వారు జవాబు ఇవ్వలేదు. నెలరోజుల్లోగా పూర్తి సమాచారం ఇవ్వాలని ఆదేశించింది. రిట్‌ పిటిషన్‌ని డిస్మిస్‌ చేసింది.   ఈ విధంగా అడిగిన సమాచారం ఇవ్వకపోగా, సమాచార కమిషన్‌ ఆదేశాలను కూడా తిరస్కరించింది తమిళనాడు పీఎస్సీ. చట్టం ప్రకారం సమాచార కమిషన్‌ తీర్పు తుది తీర్పు అవుతుంది. తీవ్రమైన ప్రక్రియలోపాలు, సంవి ధాన సంక్లిష్టమైన అంశాలు ఏవైనా ఉంటే రిట్‌ పిటిషన్‌ వేసుకోవచ్చు. మెరిట్‌ పైన మూడో అప్పీలు ఉండదు. పది రూపాయల ఫీజుతో సమాచారం అడిగే పేదవాడు సామాన్యుడు, సమాచార కమిషన్‌ దాకా రాగలుగుతాడు, నిలువగలుగుతాడు. హైకోర్టుకు వెళ్లే అవకాశాన్ని ప్రజలు వినియోగించుకోలేకపోతున్నారు. పబ్లిక్‌ అథారిటీలు మాత్రం ఈ అధికారాన్ని ప్రజాధనాన్ని దుర్వినియోగం చేస్తూ ఇష్టంవచ్చినట్టు రిట్లు వేస్తున్నాయి. సమాచార కమిషన్‌ దాకా వచ్చి గెలిచినా ప్రభుత్వ సంస్థలు డబ్బు, అధికారబలంతో, తమ అనుయాయులయిన లాయర్లకు జనం డబ్బు కట్టబెట్టవచ్చనే లక్ష్యంతో, సమాచార కమిషన్లపైన కోర్టు పోరాటం చేస్తున్నాయి. పగ బట్టిన లిటిగెంట్‌కు ప్రభుత్వానికి తేడాయే లేదా? రిట్‌ వేయవచ్చుననే రాజ్యాంగ అవకాశాన్ని నియమాల్ని దుర్విని యోగం చేస్తూ, సమాచార హక్కును సామాన్యుడికి నిరాకరించాలని తద్వారా రాజ్యాంగం ఇచ్చిన వాక్‌ స్వాతంత్య్రాన్ని కూడా నిర్లక్ష్యం చేస్తూ పేద దరఖాస్తుదారుడిని హైకోర్టుకు లాగుతున్నాయి ప్రభుత్వ సంస్థలు.  సమాచార కమిషనర్లు చాలామంది సమాచారం ఇప్పించే హక్కు చట్టానికి వ్యతిరేకంగా నిరాకరిస్తూ ఉంటారు. వారు అవినీతి యంత్రాంగానికి, రాజకీయ ప్రభుత్వాలకు అనుకూలంగా వ్యవహరిస్తూ సామాన్యుడి హక్కును మట్టిపాలు చేస్తుంటారు. ఆ సామాన్యుడు కమిషన్‌లో గెలిస్తే సంతోషిస్తాడు. కానీ పగబట్టిన ప్రభుత్వం అతన్ని హైకోర్టుకు కూడా లాగుతుంది. ఇంకా మొండి పట్టుదలతో సుప్రీంకోర్టుకు ఈడ్చుతుంది. సమాచార కమిషన్‌లో ఓడిపోతే సామాన్యులలో చాలామంది హైకోర్టులో రిట్‌ వేయరు. కానీ ప్రభుత్వం ఏమాత్రం వెనుకాడదు. ప్రభుత్వ సంస్థ వేసిన రిట్‌ను హైకోర్టులో వ్యతిరేకించే వారెవరూ ఉండరు. ఎందుకంటే సమాచారం కోరిన వ్యక్తి లాయర్‌ను నియమించుకోలేడు. సమాచార కమిషన్‌ వాదించడం జరగదు. సామాన్యుడి హక్కును నిలబెట్టే న్యాయమూర్తి ఎవరైనా సహృదయంతో స్పందిస్తే సమాచారం బయటకు వస్తుంది. చాలాకాలం తరువాత ఇటువంటి తీర్పురావడం సంతోషదాయకం. ఇలాంటి సమాచార కమిషనర్లు, హైకోర్టు న్యాయమూర్తులు ఉంటే పీఐఓ నిజాయితీతో సమాచారం ఇస్తే ఆర్టీఐ బతుకుతుంది. వ్యాసకర్త : మాడభూషి శ్రీధర్‌ , బెన్నెట్‌ యూనివర్సిటీ ప్రొఫెసర్, కేంద్ర సమాచార మాజీ కమిషనర్‌ madabhushi.sridhar@gmail.com

సాక్షి, న్యూఢిల్లీ: పార్లమెంటు సభ్యుడి స్థానిక ప్రాంత అభివృద్ధి నిధుల(ఎంపీల్యాడ్స్‌) పథకం అమలు స్థితి తెలుసుకునే హక్కు ప్రజలకు ఉందని, సంబంధిత సమాచారం ఇవ్వడంలో సదరు పార్లమెంటు సభ్యుడిని కూడా పబ్లిక్‌ ఇన్ఫర్మేషన్‌ అధికారి(పీఐవో)గా పరిగణించాల్సి ఉంటుందని కేంద్ర సమాచార కమిషన్‌(సీఐసీ) పేర్కొంది. ఈ మేరకు శుక్రవారం ఉత్తర్వులు జారీచేసింది. గ్వాలియర్‌ లోక్‌సభ నియోజకవర్గ పరిధిలోని ప్రశాంత్‌ జైన్‌ అనే వ్యక్తి తన నియోజకవర్గంలో 2015 జనవరి నుంచి 2017 ఆగస్టు వరకు ఎంపీల్యాడ్స్‌ నిధుల వినియోగం, ఏయే పథకాలకు వెచ్చించారు, ఏ ప్రాతిపదికన ఎంపిక చేశారు, పనుల స్థితి వివరాలను కోరుతూ సమాచార హక్కు చట్టం ద్వారా దరఖాస్తు చేసుకున్నారు. దీనిపై సెంట్రల్‌ పబ్లిక్‌ ఇన్ఫర్మేషన్‌ ఆఫీసర్‌ సమాధానం ఇస్తూ ఎంపీ ల్యాడ్స్‌ వెబ్‌సైట్‌లో సంబంధిత వివరాలు ఉంటాయని, జిల్లా యంత్రాంగం ఎంపీల్యాడ్స్‌ ద్వారా  వెచ్చించిన నిధులు ఉంటాయని పేర్కొన్నారు. అయితే, ఇందులో నిర్ధిష్ట సమాచారం లేదు. దీంతో దరఖాస్తుదారు దీనిని ప్రథమ అప్పిలేట్‌ అధికారి(ఎఫ్‌ఏఏ) వద్ద సవాలు చేయగా అక్కడా అదే సమాధానం ఎదురైంది. దీంతో దరఖాస్తుదారు కేంద్ర సమాచార కమిషన్‌ను ఆశ్రయించారు. ఈ నేపథ్యంలో కేంద్ర సమాచార కమిషనర్‌ మాడభూషి శ్రీధర్‌ ఆచార్యులు పలు కీలక అంశాలపై ఉత్తర్వులు జారీచేశారు. ఈ పథకం కింద పనుల వారీగా, పథకాల వారీగా, కాంట్రాక్టర్ల పేర్లు, పర్యవేక్షకుల పేర్లతో సహా పూర్తి వివరాలను అందుబాటులో ఉంచాలని ఆదేశించారు. అలాగే ఎంపీల్యాడ్స్‌ కోసం వచ్చిన ప్రతిపాదనలు, తిరస్కరించిన ప్రతిపాదనలు, కారణాలను కూడా వెబ్‌సైట్‌లో ఉంచాలన్నారు. ఇలాంటి వివరాలు మంత్రిత్వ శాఖ వద్ద లేనప్పుడు సదరు ఎంపీ ఐదేళ్ల తన పదవీ కాలంలో ఆయా నిధులను ఖర్చు చేయని, పనులు పూర్తవని సందర్భం ఉంటే వాటిని పర్యవేక్షించడం సాధ్యం కాదని సమాచార కమిషనర్‌ తన ఉత్తర్వుల్లో అభిప్రాయపడ్డారు. ఎంపీల్యాడ్స్‌ వివరాలు నియోజకవర్గ ప్రజలు తెలుసుకోగోరినప్పుడు సంబంధిత పార్లమెంటు సభ్యుడినే పీఐవోగా పరిగణనలోకి తీసుకోవాల్సి ఉంటుందని పేర్కొన్నారు


 న్యూఢిల్లీ: పాత పెద్ద నోట్లు మార్చుకునేందుకు ప్రవాస భారతీయులు, భారత సంతతి వ్యక్తులు భారీ సంఖ్యలో రిజర్వుబ్యాంకు కౌంటర్ల ముందు క్యూ కడుతున్నారు. ముంబై, న్యూఢిల్లీ, చెన్నై, కోల్‌కతా, నాగపూర్‌లలోని రిజర్వ్‌బ్యాంక్‌ బ్రాంచ్‌లలో  ఏర్పాటు చేసిన కౌంటర్ల వద్ద చాంతాడంత క్యూల్లో నిల్చోలేక అనేకమంది వెనుదిరుగుతున్నారు. మరికొందరిని సరైన డాక్యుమెంట్లు తేలేదనే కారణంతో సెక్యూరిటీ సిబ్బంది లోనికి అనుమతించడంలేదు.
 
 తరచూ భారత్‌ సందర్శించే కొందరు ప్రవాసులు కమిషన్‌ చెల్లించే అవసరం లేకుండా రూ. లక్ష వరకు భారత కరెన్సీని తమవద్ద ఉంచుకుంటారని, దీన్ని నల్లధనం అని ప్రభుత్వం నిరూపిస్తే దాన్ని వదులుకుంటామని  ధర్మవీర్‌ అనే ఎన్నారై సవాల్‌ చేశారు.


 పెట్టుబడులనగానే గుర్తొచ్చేది మ్యూచువల్ ఫండ్స్, స్థిరాస్తి, బంగారం వంటివే. అయితే ఇందులో స్థిరాస్తి రంగంలో పెట్టుబడులు ఎప్పుడూ లాభాలనే తీసుకొస్తాయనేది కాదనలేని వాస్తవం. అందుకే స్థానికులు గానీ ప్రవాస భారతీయులు గానీ స్థిరాస్తి రంగంలో పెట్టుబడులకు ఉత్సాహం చూపిస్తుంటారు. రూపాయి విలువ బలహీనపడటం, స్థిరాస్తి ధరలూ అందుబాటులో ఉండటం వంటి కారణాలతో దేశీ స్థిరాస్తి రంగం ఎన్నారై పెట్టుబడులను ఆకర్షిస్తోంది. వీటికి తోడు ఆర్‌బీఐ నిబంధనలు సరళంగా ఉండటం, స్థిరాస్తి కొనుగోళ్లకు ముందస్తు అనుమతులు అవసరం లేకపోవటం వంటివి ఎన్నారై పెట్టుబడులను మరింత పెంచుతున్నాయి.
 
 ఈ నేపథ్యంలో అసలు దేశంలోని స్థిరాస్తి రంగంలో పెట్టుబడులు పెట్టాలన్నా.. స్థిరాస్తులను కొనుగోలు చేయాలన్నా ప్రవాస భారతీయులకు (ఎన్నారై) ఉన్న నిబంధనలేంటి? అవకాశాలేంటి? రాయితీలు, పన్ను ప్రయోజనాల వంటివేమైనా ఉన్నాయా? ఇవన్నీ తెలియజేసేదే ఈ ప్రాఫిట్ కథనం...    
 - హైదరాబాద్, బిజినెస్ బ్యూరో
  
 * దేశీ రియల్టీలో పెరుగుతున్న పెట్టుబడులు
 * ప్రవాసులకూ స్థానికుల మాదిరే పన్ను ప్రయోజనాలు
 * డిగ్రీ ఉంటేనే గృహ రుణం; తొలి ప్రాపర్టీకి సంపద పన్ను నో
 * వ్యవసాయ భూమి, ప్లాంటేషన్, ఫాంహౌజ్‌లను కొనే వీలు లేదు
  
 ఎన్నారైల ప్రాపర్టీ లావాదేవీలు, నిబంధనలు విదేశీ మారకద్రవ్య నిర్వహణ చట్టం (ఫెమా) కిందికి వస్తాయి. ప్రవాస భారతీయుడు గానీ భారత సంతతి (పీఐఓ) వ్యక్తులు గానీ దేశంలోని నివాస, వాణిజ్య స్థిరాస్తులను కొనుగోలు చేయవచ్చు. అలాగే ఈ కొనుగోళ్లకు పరిమితి అంటూ కూడా ఏమీ లేదు. కాకపోతే వ్యవసాయ భూమి గానీ ఫాంహౌజ్, ప్లాంటేషన్ వంటి ప్రాపర్టీలను గానీ కొనుగోలు చేయటం మాత్రం కుదరదు. బహుమతి ద్వారా లేదా వారసత్వంగా పొందిన ప్రాపర్టీలకు మాత్రమే యాజమాన్య హక్కులుంటాయి.
  
 కొనేముందే పరిశీలించాలి..
 * యాజమాన్య హక్కులను, పత్రాలు, టైటిల్స్ సరిగా ఉన్నాయో లేదో నిపుణులు, న్యాయవాదులతో తనిఖీ చేయించాలి. యాజమాన్య హక్కులెక్కడి నుంచి వచ్చాయి? వారసత్వంగా వచ్చిందా? సంయుక్త భాగస్వామ్యంగా ఉందా? బ్యాంకులో తనఖా కింద ఉందా? వంటి కోణాల్లో ఆరా తీయాలి.
 * స్థిరాస్తిని కొనుగోలు చేసేముందు నిరభ్యంతర ధృవీకరణ పత్రం తీసుకోవాలి. నీరు, విద్యుత్ వంటి బిల్లులు పూర్తిగా చెల్లించారో లేదో పరిశీలించాలి.
 * కొత్త నిర్మాణాల్లో అయితే ల్యాండ్ టైటిల్స్ సరిగా ఉన్నాయో లేదో పరిశీలించుకోవాలి. స్థానిక సంస్థల నుంచి అన్ని రకాల నిర్మాణ అనుమతులు, ఎన్‌ఓసీలను తీసుకున్నారో లేదో గమనించాలి.
  
 ముఖ్య అర్హత ఇది..
 ఎన్నారైలకు గృహ రుణం మంజూరు చేయటంలో విద్యార్హతలు, నడవడిక కూడా ముఖ్యపాత్ర పోషిస్తాయి. ఎందుకంటే దేశంలో కేవలం పట్టభద్రులైన ఎన్నారైలకే గృహ రుణాలు ఇస్తారనేది మరిచిపోకూడదు. ఆర్‌బీఐ నిబంధనల ప్రకారం స్థిరాస్తి విలువలో 80 శాతం వరకూ గృహ రుణంగా పొందవచ్చు. మిగిలిన మొత్తాన్ని కొనుగోలుదారుడే భరించాలి. అయితే ప్రాపర్టీ లావాదేవీలు పూర్తిగా రూపాయిల్లోనే చెల్లించాల్సి ఉంటుంది. ఏ బ్యాంక్ నుంచైనా సరే కానీ ఎన్నారై ఖాతా ద్వారానే లావాదేవీలు జరపాల్సి ఉంటుంది. ఎన్‌ఆర్‌ఈ, ఎన్‌ఆర్‌ఓ లేదా ఎఫ్‌సీఎన్‌ఆర్ ఖాతాకు చెందిన లేదా పోస్ట్ డేట్ చెక్స్, ఎలక్ట్రానిక్ క్లియరెన్స్ సర్వీస్ (ఈసీఎస్) ద్వారా కూడా చెల్లించవచ్చు.
 
 ఒకవేళ విదేశాల్లో ఉంటూ.. అక్కడ సంపాదిస్తుంటే గనక స్థానిక బ్యాంకుల నుంచి నిధులను తీసుకొని ఇక్కడ స్థిరాస్తిని కొనుగోలు చేసే వీలు ఎన్నారైలకుంటుందని రైట్ హొరైజన్స్ ఫౌండర్ అండ్ సీఈఓ అనిల్ రెగో తెలియజేశారు. ఎందుకంటే మన దేశంతో పోల్చుకుంటే కొన్ని దేశాల్లో వడ్డీ రేట్లు తక్కువగా ఉంటాయి. అయితే ఒకవేళ ప్రాపర్టీని వినియోగించలేని పక్షంలో అద్దెకిచ్చేసి అద్దెను బ్యాంకు రుణ చెల్లింపులో వినియోగిస్తే మాత్రం... స్థానిక బంధువులు హామీ ఇవ్వాల్సి ఉంటుంది. పైగా వారి స్థానిక బ్యాంక్ ఖాతాకు చెందిన చెక్కులను కూడా జారీ చేయాల్సి ఉంటుంది.
  
 ప్రాపర్టీ నిర్మాణంలో ఉంటే..
 నిర్మాణంలో ఉన్న ప్రాపర్టీని కొనుగోలు చేస్తుంటే.. పవర్ ఆఫ్ అటార్నీ (పీఓఏ) ఇవ్వాల్సిందిగా డెవలపర్‌ను కోరాలి. దీన్ని డాక్యుమెంటేషన్ చేసుకోవటం మంచిది. సులభతరం కూడా. పీఓపీ పొందిన వ్యక్తి ద్వారా మీ ప్రాపర్టీ కాంట్రాక్ట్‌కు గానీ మార్ట్‌గేజ్‌కు గానీ లేదా అమ్మకానికి గానీ చేసుకునే వీలుంటుంది. అంతేకాకుండా సంబంధిత ప్రాపర్టీని విక్రయించాలని అనుకున్నప్పుడు ప్రాపర్టీ రిజిస్ట్రేషన్, స్వాధీనం, అగ్రిమెంట్ వంటి విషయాల్లో పీఓపీ ఎంతగానో ఉపయుక్తమవుతుందనేది గుర్తుంచుకోవాలి.
  
 విక్రయించాలనుకుంటే..
 ఫెమా నిబంధనల ప్రకారం ఎన్నారై తన సొంత ఆస్తిని గానీ వారసత్వంగా పొందిన నివాస, వాణిజ్య స్థిరాస్తిని గానీ దేైన్నైనా విక్రయించే వీలుంది. ఒకవేళ ఎన్నారైకు వారసత్వంగా పొందిన వ్యవసాయ భూమి గానీ ప్లాంటేషన్ గానీ ఫాంహౌస్ గానీ ఉంటే దాన్ని విక్రయించాలనుకున్నపుడు స్థానిక నివాసికి మాత్రమే విక్రయించాల్సి ఉంటుంది. అలాకాకుండా ఇతర ఎన్నారైకి గానీ భారత సంతతికి గానీ గిఫ్ట్‌గా అందించొచ్చు కూడా.
 
 విదేశీ ఖాతా నుంచి నిధులొస్తుంటే.. దాన్ని ఎన్‌ఆర్‌ఈ లేదా ఎఫ్‌సీఆర్ ఖాతాకు బదిలీ చేయాల్సి ఉంటుంది. అది కూడా స్థానిక బ్యాంకింగ్ చానళ్ల ద్వారా ఆస్తి కొనుగోలుకు చెల్లించిన విదేశీ మారక మొత్తం మాత్రం మించకూడదు. బయనా వావసు, రద్దు, రీఫండ్ వంటి వాటిలో పరిమితులుండవని టాక్స్‌పానర్.కామ్ కో-ఫౌండర్ అండ్ సీఎఫ్‌ఓ సుధీర్ కౌశిక్ చెప్పారు.
  
 పన్ను ప్రయోజనాలు..
 ఎవరికైనా సరే స్థిరాస్తి అనేది పన్ను ఆదా సాధనమనే చెప్పాలి. నివాస భారతీయుడికి ఎలాంటి పన్ను ప్రయోజనాలుంటాయో ఎన్నారైకు కూడా దాదాపు అవే ఉంటాయి. ప్రాపర్టీ కొనుగోలులో ఎన్నారై 80సీ కింద లక్ష రూపాయల మినహాయింపును పొందవచ్చు. ఒకవేళ రుణంపై ప్రాపర్టీని కొనుగోలు చేస్తే రుణంపై రూ.1.5 లక్షల వరకు మినహాయింపునూ పొందవచ్చు. స్టాంప్ డ్యూటీ, రిజిస్ట్రేషన్ చార్జీలు, మున్సిపల్ పన్నులు వంటి వాటిల్లో పరిమితులేం ఉండవు. అలాగే 30 శాతం అద్దె చెల్లింపులు, నిర్వహణలో తగ్గింపుల వంటివి ఉంటాయి. రూ.50 లక్షల కంటే విలువైన ప్రాపర్టీని కొనుగోలు చేస్తే.. 1 శాతం రేటుతో టీడీఎస్‌ను చెల్లించాల్సి ఉంటుంది.
  
 సంపద పన్ను తప్పాలంటే..
 ఒకవేళ ప్రాపర్టీ ఖాళీగా ఉన్నా లేదా సెల్ఫ్ ఆక్యుపైడ్ అయినా సంపద పన్ను నుంచి మినహాయింపు ఉంటుంది. ప్రాపర్టీని అద్దెకిస్తే మాత్రం సంపద పన్ను చెల్లించాల్సిందే. అయితే ఈ నిబంధన తొలి ప్రాపర్టీకి మాత్రమే వర్తిస్తుంది. ఒకవేళ మరిన్ని ప్రాపర్టీలను కొనుగోలు చేయాలనుకుంటే వాటిక్కూడా సంపద పన్ను నుంచి మినహాయింపును పొందవచ్చనుకోవటం కుదరదు. అందుకని రెండో ప్రాపర్టీని తల్లిదండ్రుల పేరు మీద గానీ, పిల్లల మీద గానీ కొనుగోలు చేయడం ఉత్తమమని సుధీర్ కౌశిక్ వివరించారు.
 
 సంపద పన్ను రూపేణా రూ.30 లక్షల పైచిలుకు విలువ గల ప్రాపర్టీ మీద 1 శాతం పన్నుగా చెల్లించాల్సి ఉంటుంది. ఖాళీగా ఉన్న ప్రాపర్టీలను స్వీయ ఆక్రమిత ప్రాపర్టీలు గానే పరిగణిస్తారు. కాబట్టి వాటి మీద ఎలాంటి పన్ను చెల్లించాల్సిన అవసరం లేదు. ఒకవేళ ఒకటి కంటే ఎక్కువ ప్రాపర్టీలు ఖాళీగా ఉంటే మాత్రం స్వీయ ఆక్రమిత ప్రాపర్టీ ఏదో.. మిగిలినవి ఎందుకు ఖాళీగా ఉన్నాయో చూపించాల్సి ఉంటుంది. అప్పుడే ఆ ప్రాపర్టీలను పన్ను పరిధిలోకి చేరుస్తారు.
  
 రిటర్న్ ఇక్కడే..
 ఒకవేళ ప్రాపర్టీపై అద్దె వస్తుంటే గనక ఆ ఆదాయం పన్ను పరిధిలోకి వస్తుంది. కాబట్టి పన్ను రిటర్న్‌ను కూడా ఇక్కడే దాఖలు చేయాల్సి ఉంటుంది. సంబంధిత ఆదాయానికి సంబంధించిన పన్ను లెక్కలను చూపించాల్సి ఉంటుంది అప్పుడే రెండు దేశాల్లోనూ పన్ను కట్టాల్సిన బాధ్యతల నుంచి తప్పించుకోవచ్చు.
  
 ప్రాపర్టీని విక్రయించాలనుకుంటే మాత్రం.. ఆదాయపు పన్ను చట్టం కింద మూలధన లాభాల పన్నును చెల్లించాల్సి ఉంటుంది. 36 నెలల కంటే ఎక్కువ ఆస్తిని కలిగి ఉంటే దీర్ఘకాల మూలధన లాభాల ప్రయోజనాలను పొందవచ్చు. 3 ఏళ్లకు పైగా ఆస్తిని కలిగి ఉంటే దీర్ఘకాల మూలధన లాభాల కింద పరిగణిస్తారు. ఇందుకు గాను 20 శాతం పన్ను ఉంటుంది. ఒకవేళ మూడేళ్ల కంటే తక్కువుంటే స్వల్వకాల లాభాలుగా పరిగణిస్తూ.. సాధారణ పన్నులను విధిస్తారు.


 బ్రిస్బేన్: అనవసరమైన చట్టాలు, నియంత్రణలను తొలగించడం ద్వారా పెట్టుబడుల ప్రక్రియను మరింత సులభతరంగా చేయడంపై ప్రభుత్వం ప్రధానంగా దృష్టి పెట్టిందని ప్రధాని నరేంద్ర మోదీ చెప్పారు. వ్యాపారాలకు అనుకూలంగా పారదర్శక విధానాలను అమల్లోకి తెస్తున్నామని, ఈ మేరకు భారత్‌లో మార్పును చూడొచ్చని ఆయన తెలిపారు. క్వీన్స్‌ల్యాండ్ రాష్ట్ర ప్రభుత్వం ఏర్పాటు చేసిన అల్పాహార విందు సమావేశంలో పాల్గొన్న సందర్భంగా భారత్‌లో పెట్టుబడులు పెట్టాల్సిందిగా ఆస్ట్రేలియా ఇన్వెస్టర్లను మోదీ ఆహ్వానించారు.
 
  ‘గుడ్ గవర్నెన్స్ అన్నది మార్పునకు నాంది. సాధారణ పౌరుల విషయంలోనే కాదు.. వ్యాపారాలకు కూడా ఇది చాలా ముఖ్యం. అనుకూల పరిస్థితులు ఉంటే అవకాశాలను ఉభయతారకమైన భాగస్వామ్యాలుగా మల్చుకోవచ్చు. ఈ దిశగా మేం వ్యాపారాలకు అనుకూలమైన పారదర్శక విధానాలను అమల్లోకి తెచ్చాం. మరిన్ని తెస్తున్నాం’ అని ఆయన చెప్పారు. ఇంధనం, ఖనిజ సంపద, వ్యవసాయం, ఆహార భద్రత తదితర అంశాల్లో భారత్ పురోగమించడంలో క్వీన్స్‌ల్యాండ్ కీలక భాగస్వామి కాగలదన్నారు.
 
  వ్యవసాయోత్పత్తిని మెరుగుపర్చేందుకు, ఫుడ్ ప్రాసెసింగ్ రంగానికి ఊతమిచ్చేందుకు అవసరమైన పరిశోధనలను ఇరు దేశాలు సంయుక్తంగా చేపట్టాల్సిన అవసరం ఉందని మోదీ చెప్పారు. అలాగే ఇన్ఫర్మేషన్, కమ్యూనికేషన్ టెక్నాలజీల విషయంలోనూ కలిసి పనిచేయాలని ఆయన తెలిపారు. పర్యాటక రంగంపరంగా కూడా ప్రత్యేకత ఉన్న క్వీన్స్‌ల్యాండ్‌లో ఇన్వెస్ట్ చేసేందుకు భారతీయ ఇన్వెస్టర్లు ఆసక్తిగా ఉన్నారని మోదీ పేర్కొన్నారు.
 
 భారత్‌లో తయారీకి ఊతమిచ్చే విధంగా ‘మేక్ ఇన్ ఇండియా’ కార్యక్రమాన్ని చేపట్టినట్లు మోదీ తెలిపారు. 100 స్మార్ట్ సిటీలు, 50 మెట్రో ప్రాజెక్టులు మొదలైన బృహత్తర ప్రాజెక్టులను తలపెట్టినట్లు వివరించారు. వీటిలో పాలుపంచుకోవాలని క్వీన్స్‌ల్యాండ్ ఇన్వెస్టర్లను మోదీ ఆహ్వానించారు. భారత్-ఆస్ట్రేలియా మధ్య ఆర్థికంగా, భద్రతాపరంగా సమగ్రమైన బంధం ఉందని, అంతర్జాతీయ వేదికల్లో రెండు దేశాలూ పరస్పరం సహకరించుకుంటున్నాయని ఆయన తెలిపారు.
 
 ప్రాంతీయంగా శాంతి, స్థిరత్వం నెలకొనడానికి ఇది చాలా కీలకమని మోదీ పేర్కొన్నారు. జీవీకే, అదానీ గ్రూప్‌లు చేపట్టిన భారీ మైనింగ్ ప్రాజెక్టులకు తోడ్పాటునిచ్చేలా రైలు రవాణాపరమైన మౌలిక సదుపాయాలు కల్పనపై దృష్టి పెట్టనున్నట్లు మోదీతో భేటీలో క్వీన్స్‌ల్యాండ్ ప్రీమియర్ క్యాంప్‌బెల్ న్యూమన్ హామీ ఇచ్చారు. ఆస్ట్రేలియాలోని గెలిలీ బేసిన్‌లో  భారతీయ కంపెనీలు భారీ ఇన్వెస్ట్‌మెంట్లు చేస్తున్నాయి. కార్‌మైఖేల్ గనిపై అదానీ గ్రూప్ 16.5 బిలియన్ డాలర్లు, అల్ఫా మైన్‌పై జీవీకే గ్రూప్ 6 బిలియన్ డాలర్లు వెచ్చిస్తున్నాయి.
 
  అదానీ ఆస్ట్రేలియా బొగ్గు ప్రాజెక్ట్‌కు గ్రీన్‌సిగ్నల్...
  మెల్‌బోర్న్: భారత ప్రైవేట్ రంగ దిగ్గజం అదానీ గ్రూప్ ప్రతిపాదించిన 7 బిలియన్ డాలర్ల బొగ్గు మైనింగ్ ప్రాజెక్ట్‌కు ఆస్ట్రేలియాకు చెందిన క్వీన్స్‌లాండ్ ప్రభుత్వం గ్రీన్‌సిగ్నల్ ఇచ్చింది. దీంతోపాటు ఈ ప్రాజెక్ట్‌కు మద్దతుగా నిలిచే రైల్వే మౌలికసదుపాయాల పెట్టుబడులకు సైతం ఓకే చెప్పింది.గెలిలీ బేసిన్‌లో తలపెట్టిన కార్‌మైఖేల్ మైనింగ్ ప్రాజెక్ట్‌కు అనుమతి లభించడాన్ని స్వాగతిస్తున్నట్లు అదానీ గ్రూప్ పేర్కొంది.
 
 ఈ అంశంపై అదానీ గ్రూప్ ఆస్ట్రేలియా కంట్రీ హెడ్ జయకుమార్ జనక్‌రాజ్ స్పందిస్తూ దీర్ఘకాలంగా కంపెనీ చేస్తున్న కృషికి ఇది తార్కాణమని వ్యాఖ్యానించారు. ప్రణాళికలో భాగంగా 2017కల్లా బొగ్గును వెలికితీయగలమన్న నమ్మకాన్ని వ్యక్తం చేశారు. గెలిలీ బేసిన్‌లో తలపెట్టిన మూడు ప్రాజెక్ట్‌ల ద్వారా 28,000 మందికి ఉపాధి లభించే అవకాశమున్నట్లు అంచనా. వీటిలో జీవీకే అల్ఫామైన్, క్లైవ్ పామర్ వారతా కోల్ ప్రాజెక్ట్‌లు ఉన్నాయి. ఇక్కడ 11 బిలియన్ టన్నుల థర్మల్ బొగ్గు నిల్వలున్నట్లు అంచానా. కాగా, కార్‌మైఖేల్ ప్రాజెక్ట్‌కు సంబంధించి  ఎస్‌బీఐతో అదానీ గ్రూప్ అవగాహన ఒప్పం దాన్ని(ఎంవోయూ) కుదుర్చుకుంది. దీనిలోభాగంగా ఎస్‌బీఐ  బిలియన్ డాలర్లవరకూ రుణాన్ని ఇవ్వనుంది. ఎస్‌బీఐతో ఎంవోయూ  ఒక మెలురాయికాగా,  క్వీన్స్‌లాండ్‌లో ఇది విలువైన పెట్టుబడని అదానీ గ్రూప్ చైర్మన్ గౌతమ్ అదానీ పేర్కొన్నారు.