ప్యాకేజ్డ్‌ ఫుడ్స్‌, కొన్ని రకాల ప్రిజర్వేటెడ్‌ డ్రింక్స్‌ తింటే మంచిదికాదని విన్నాం. వాటి వల్ల పలు రకాల ఆరోగ్య సమస్యలు వస్తాయని వైద్యులు సూచించడం జరిగిది. అయితే శాస్త్రవేత్తలు జరిపిన తాజా అధ్యయనంలో అదే నిజమని ధృవీకరించారు. అందుకోసం సుమారు 30 ఏళ్లు జరిపిన సుదీర్ఘ అధ్యయనంలో పలు ఆసక్తికర విషయాలు వెలుగులోకి వచ్చాయి. అవేంటంటే..బాగా ప్రాసెస్‌ చేసిన పిండులు(మైదా వంటివి)తో తయారు చేసే స్నాక్స్‌లు, డ్రింక్‌లు తీసుకుంటే ఆయుర్ధాయం తగ్గి, అకాల మరణాలు సంభవిస్తాయని వెల్లడయ్యింది. ప్యాకేజ్డ్‌ ఫుడ్స్‌ అయినా..ఆలు చిప్స్‌, బర్గర్‌, బేకరి పదార్థాల్లో ఎక్కువగా ఉప్పు, చక్కెర, సంతృప్త కొవ్వులు అధికంగా ఉంటాయని పరిశోధకులు తెలిపారు. వీటిలో శరీరానికి అవసరమయ్యే ఫైబర్‌, విటమిన్లు లేకపోవడం వల్ల అనారోగ్యానికి దారితీస్తుందని పేర్కొన్నారు. వీటిని ఎక్కువుగా తీసుకుంటే మధుమేహం, రక్తపోటు, హృదయ సంబంధ వ్యాధులు, కేన్సర్‌ వంటి దీర్ఘకాలిక వ్యాధులు వచ్చే ప్రమాదం ఎక్కువగా ఉంటుందని శాస్త్రవేత్తలు జరిపిన సుదీర్ఘ అధ్యయనంలో వెల్లడయ్యింది. అందుకోసం తాము 1984 నుంచి 2018 మధ్య సుమారు 11 యూఎస్‌ రాష్ట్రాల నుంచి70 వేల మంది మహిళా నర్సుల దీర్ఘాకాలిక ఆరోగ్యాన్ని ట్రాక్‌ చేయగా ఈ విషయాలు వెల్లడయ్యాయని చెప్పారు. బాగా శద్ధి చేసిన పిండులతో చేసిన బేకరి పదార్థాలను రోజుకు ఏడుసార్లకు పైగా తీసుకున్న వారిలో అకాల మరణాల ప్రమాదం 4% అని, ఇతర కారణాల వల్ల 9% అని వెల్లడించారు. వీటిని తీసుకోవడం వల్ల ముఖ్యంగా కేంద్ర నాడీవ్యవస్థకు సంబంధించిన సమస్యలతో మరణాలు సంభవించే ప్రమాదం 8%కి పైగా ఉందని చెప్పుకొచ్చారు పరిశోధకులు.ఇక మాంసం, పౌల్ట్రీ, సీఫుడ్‌ ఆధారిత ఉత్పత్తుల​ వల్ల కూడా అకాల మరణం సంభవించే ప్రమాదం ఎక్కువేనని చెప్పారు. ఇది పరిశీలనాత్మక అధ్యయనమే అయినప్పటికీ..ఇది ఎంతవరకు నిజం అనేందుకు కచ్చితమైన నిర్థారణలు లేవు. అయితే దీర్ఘకాలిక ఆరోగ్య కోసం శుద్ధి చేసిన పిండులతో చేసే పదార్థాల వినియోగాన్ని పరిమితం చేయాలనే విషయాన్ని మాత్రం అధ్యయనాలు నొక్కి చెబుతున్నాయని చెప్పారు. భవిష్యత్తులో పాసెస్డ్‌ ఫుడ్స్‌ వినియోగంపై మరిన్ని పరిశోధనలు చేసి వాస్తవాలను వెల్లడిస్తామని చెప్పారు పరిశోధకులు. (చదవండి: రౌడీ హీరో విజయ్‌ దేవరకొండ ఫిట్‌నెస్‌ సీక్రెట్‌ ఇదే..!)


 మనలో చాలా మంది రోజూ బేకరీలు, సూపర్ మార్కెట్లు, కిరాణా కొట్లలో సులభంగా లభించే ప్రాసెస్డ్ ఫుడ్‌ని ఇష్టపడతాం. ముఖ్యంగా బిస్కెట్లు, చిప్స్, కేకులు, చాక్లెట్లు, పేస్ట్రీలు, పాప్‌కార్న్, పిజ్జా, బర్గర్లు, పఫ్స్, శాండ్‌విచ్‌లాంటివి ఎక్కువగా తీసుకుంటుంటాం. ఇవి శరీరానికి చాలా హానికరం. ఎందుకంటే వీటిలో పరిమితికి మించి అసంతృప్త కొవ్వు పదార్థాలుంటాయి. వీటికి దూరంగా ఉండాలని నిపుణులు ఎంతగా హెచ్చరిస్తున్నా లెక్కచేయం. వినియోగదారులు వాటిని వదలలేక పోయినా ప్రభుత్వాలైనా చొరవ చూపాలి. ప్రజల ఆరోగ్యానికి హాని కలిగిస్తున్న ఇలాంటి ఆహార పదార్థాలపై ప్రభుత్వం నియంత్రణ విధించాల్సిన అవసరం ఉంది. అయితే ఈ విషయంలో అమెరికా చాలా ముందుంది. 2018లోగా తమ దేశంలో తయారయ్యే ఆహారోత్పత్తుల్లో అసంతృప్త కొవ్వు శాతాన్ని తగ్గించాలని తయారీదారులను అక్కడి ఫుడ్ అండ్ డ్రగ్స్ అడ్మినిస్ట్రేషన్ శాఖ హెచ్చరించింది. ఈ నేపథ్యంలో ఈ కొవ్వు ఉండే ఆహార పదార్థాలు, వాటి తయారీ, వీటిని తీసుకోవడం వల్ల తలెత్తే ఆరోగ్య సమస్యలేంటో తెలుసు కుందాం.
  
 అసంతృప్త కొవ్వు అంటే..
 రసాయనికంగా కొవ్వుల్లో మూడు రకాల ఫ్యాటీ ఆమ్లాలుంటాయి. మూడు కర్బన అణువులు ఇక గ్లిసరిన్ కలవడం వల్ల అసంతృప్త కొవ్వులు ఏర్పడతాయి. ఇవి శరీరంపై త్వరగా ప్రభావం చూపిస్తాయి. వీటిని అనేక ఆహార ఉత్పత్తుల తయారీలో వాడతారు. ఇతర నూనె పదార్థాలతో పోల్చితే ఇవి చాలా తక్కువ ధరలోనే లభిస్తాయి. ఈ కొవ్వు పదార్థాలతో ఆహార పదార్థాలను తయారు చేయడం చాలా సులభం. పైగా వీటితో తయారైన ఆహారం ఎక్కువ కాలం నిల్వ ఉంటుంది. అలాగే మంచి రుచిని కూడా కలిగి స్తాయి. పైగా వీటిని ఎక్కువ సార్లు వినియోగించే వీలుంది. ఇన్ని ఉపయోగాలు ఉన్నాయి కాబట్టి ప్యాకేజ్డ్ ఫుడ్ తయారీదారులు ఇతర నూనెలకు బదులుగా వీటిని వాడతారు.
 
 ఏయే పదార్థాలు తయారు చేస్తారు
 వీటితో ఆహారాన్ని తయారు చేయడానికి తక్కువ సమయం పడుతుంది. చిప్స్, పాప్‌కార్న్, బిస్కెట్లు, చాక్లెట్లు, పిజ్జాలు, బర్గర్స్, డోనట్స్, పఫ్స్, ఫ్రెంచ్‌ఫ్రైస్, గార్లిక్ బ్రెడ్, ఆనియన్ రింగ్స్, ఐస్‌క్రీమ్స్‌సహా అనేక ఆహార పదార్థాల్లో ఈ కొవ్వు నూనెలను వాడతారు.
 
 స్థూలకాయానికి కారణం..
 ఈ కొవ్వులతో తయారైన ఆహార పదార్థాలు తీసుకుంటే ఆరోగ్యానికి చాలా హాని కలుగుతుంది. ఈ ఆహార పదార్థాల్లో సోడియం, లవణాలు, చక్కెరలు మోతాదుకు మించి ఉంటాయి. ఈ పదార్థాల్ని అధికంగా తీసుకుంటే టైప్-2 మధుమేహం, గుండె జబ్బులు, శ్వాస సంబంధిత సమస్యలు తలెత్తే అవకాశం ఉంది. శరీరంలో కొవ్వులు పెరిగిపోయి స్థూల కాయం బారిన పడే వీలుంది. వీటిలో కేలరీలు అధికంగా ఉండడం వల్ల కూడా హాని కలుగుతుంది. ఇతర ఆరోగ్య సమస్యలు  కూడా తలెత్తుతాయి. అందువల్ల సాధ్యమైనంత వరకు వీటికి దూరంగా ఉండండి. అమెరికాలాంటి అభివృద్ధి చెందిన దేశాల్లో ఇంట్లో తయారయ్యే ఆహారం కన్నా బయటి పదార్థాలే ఎక్కువ తీసుకుంటుంటారు. అమెరికాలో గుండె జబ్బులకు కారణమయ్యే పదార్థాల్లో వీటిదే అగ్రస్థానం. అందువల్లే ప్రజల ఆరోగ్యం కోసం ఆ దేశం కీలక నిర్ణయం తీసుకుంది.