సాక్షి, రఘునాథపల్లి(జనగామ): శతాబ్దాల చరిత్ర కలిగిన సర్ధార్‌ సర్వాయి పాపన్న కోటలోని కొంత భాగం నేలకొరగడం విచారకరమని సినీ హీరో పంజాల జైహింద్‌గౌడ్‌ అన్నారు. బహుజనుల రాజ్యాన్ని స్థాపించి వీరోచిత పోరాటంతో మొగలుల ఆగడాలను ఎదిరించిన వీరుడైన పాపన్న కోటను పునరుద్ధరించి భావితరాలకు అందించాలని ఆయన డిమాండ్‌ చేశారు. జనగామ జిల్లా రఘునాథపల్లి మండలంలోని ఖిలాషాపూర్‌లో సర్వాయి పాపన్న కోటలోని ఓ వైపు రాతి గోడ కుప్పకూలిన నేపథ్యంలో మంగళవారం ఆయన గౌడ సంఘం నేతలతో కలిసి కోటను పరిశీలించారు. ఈ సందర్భంగా జైహింద్‌గౌడ్‌ మాట్లాడుతూ కోట పునర్నిర్మాణానికి సర్వాయి పాపన్న ట్రస్ట్‌ తరపున రూ.కోటి విరాళం అందజేయనున్నట్లు పేర్కొన్నారు. కోట పునరుద్ధరణ కోసం ఎమ్మెల్యే తాటికొండ రాజయ్య, ప్రభుత్వ అధికారులతో చర్చించి త్వరగా పనులు జరిగేలా చూస్తామని తెలిపారు. అలాగే, గౌడ కులస్తుల ఆరాధ్య దైవమైన శ్రీ రేణుక ఎల్లమ్మ దేవాలయాన్ని పాపన్న కోటలో నిర్మిస్తామని తెలిపారు. కోట రాతి గోడ కూలడంతో ఇళ్లు కోల్పోయిన బాధితులను ప్రభుత్వం ఆదుకోవాలని ఆయన కోరారు. ఈ కార్యక్రమంలో గౌడ సంఘం జిల్లా అధ్యక్షుడు కుమార్‌గౌడ్‌తో పాటు పరీదుల శ్రీను, మర్కాల వెంకట్‌రెడ్డి పాల్గొన్నారు.

జనగామ : జనగామ జిల్లాలో ఘోర రోడ్డు ప్రమాదం చోటు చేసుకుంది. మేడారం నుంచి హైదరాబాద్‌ వెళ్తున్న ఓ ప్రైవేటు మినీ బస్సు రఘనాథపల్లిలోని పోలీస్ స్టేషన్‌ సమీపంలో కారును ఢీకొంది. ఈ ప్రమాదంలో కారులో ప్రయాణిస్తున్న ఇద్దరు మృతిచెందారు. మినీ బస్సు బోల్తాపడటంతో అందులోని 15 మందికి గాయాలయ్యాయి. క్షతగాత్రులను ఆసుపత్రికి తరలించి చికిత్స అందిస్తున్నారు. సీపీ సుధీర్‌ బాబు సంఘటనా స్థలాన్ని పరిశీలించారు.


  హన్మకొండ, న్యూస్‌లైన్: జిల్లాలో భూగర్భ జలాలు రోజురోజుకూ అడుగంటిపోతున్నాయి. సగటున 10.59 మీటర్ల లోతుకు నీటిమట్టం పడిపోగా... పలు మండలాల్లో నీటి లభ్యత గగనంగా మారింది. వేసవిలో ఎండ వేడిమికి తోడు నీటి వినియోగం అధికం కావడంతో  24 మండలాల్లో భూగర్భ జలమట్టం 10 మీటర్ల నుంచి 24 మీటర్ల లోతుకు దిగజారినట్లు అధికారులు అంచనా వేస్తున్నారు. తాడ్వా యి, కొత్తగూడ, స్టేషన్ ఘన్‌పూర్, చిట్యాల, చేర్యాల, రఘునాథపల్లి, ములుగు ప్రాంతాల్లో  ప్రమాదకర పరిస్థితులు నెలకొన్నాయి. గత ఏడాది ఇదే సమయానికి 9.33 మీటర్ల లోతులో ఉన్న భూగర్భ జలాలు... ఈసారి ఏకంగా 10.59 మీటర్ల లోతుకు పడిపోయాయి.
  
  దాదాపు 310 గ్రామాల్లో తాగునీరు సరఫరా చేసే బావులు ఎండిపోయినట్లు అధికారులు గుర్తించారు. ఈ సారి వర్షాలు సమృద్ధిగా కురవడంతో మూడు నెలల క్రితం వరకు  నీటితో కళకళలాడిన వ్యవసాయ బావులు, చెరువులు సైతం ఎండిపోవడంతో గ్రామాలు, తండాల ప్రజలు అల్లాడుతున్నారు. వాస్తవంగా ఏప్రిల్ ఆఖరు వరకే జిల్లాలో సగటున  10.59 మీటర్లకు భూగర్భ జలాలు పడిపోయాయి. ఇప్పుడు ఎండల తీవ్రత పెరగనున్న నేపథ్యంలో భూగర్భ జలమట్టం మరింత లోతుకు పడిపోయే సూచనలు కనిపిస్తున్నారుు. ఇప్పటికే పాతాళంలోకి చేరిన నీళ్లు... మరింత లోతుల్లోకి వెళ్లితే జిల్లాలో ప్రమాదకర పరిస్థితులు నెలకొంటాయని అధికారులు భావిస్తున్నారు.
  
  పట్టణాల్లో సైతం మంచి నీటి ఇబ్బందులు తలెత్తే ప్రమాదం ఉందంటున్నారు. ఈ నేపథ్యంలో పలు రిజర్వాయర్ల కింద మూడో పంటకు సిద్ధమవుతున్న రైతులకు అధికారులు హెచ్చరికలు జారీ చేస్తున్నారు. భూగర్భజలాలు పడిపోతున్నాయని.. వాగులు, వంకలు ఎండిపోయాయని... భూములు నోళ్లు తెరుచుకుంటున్నాయని... ఇప్పుడు పంటలు సాగు చేస్తే... సాగునీరు ఎంత పారించినా, పంటలకు లాభం ఉండదని వారికి సూచిస్తున్నారు. అదేవిధంగా కొత్త బావుల తవ్వకానికి బ్రేక్ వేస్తున్నట్లు ఉత్తర్వులు జారీ చేశారు. బోర్లు వేసేందుకు కూడా అనుమతివ్వడం లేదు.
  
  ఇక్కడ మరీ అధ్వానం
 
 కొత్తగూడ మండలంలో గత ఏడాది ఏప్రిల్‌లో 20.16 మీటర్ల లోతులో జలం ఉండగా... ఈ సారి 24.63 మీటర్ల లోతుకు పడిపోయింది. గత ఏడాదికి అదనంగా 4.47 మీటర్ల లోతుకు జలమట్టం దిగజారిందన్న మాట.
 
 రఘునాథపల్లి మండలంలో 2013 ఏప్రిల్‌లో 13.23 మీటర్ల లోతులో ఉన్న జలమట్టం... ఈ ఏడాది అదే నెలలో 18.49 మీటర్లకు పడిపోయింది. గత ఏడాదితో పోలిస్తే అదనంగా 5.26 మీటర్ల లోతుకు పడిపోయింది.
 
 చిట్యాల మండలంలో గత ఏడాది ఏప్రిల్‌లో 16.32 మీటర్ల లోతులో జలం ఉండగా... ఈ సారి 19.75 మీటర్ల లోతుకు పడిపోయింది. గత ఏడాదికి అదనంగా 3.43 మీటర్ల లోతుకు జలమట్టం దిగజారింది.