మరమనిషి ప్రేమలో పడితే? అదేనండీ.. రోబో లవ్‌లో పడితే? హీరోయిన్‌తో ఓ డ్యూయెట్ వేసుకుంటే? భలే ఉంటుంది కదూ! ‘ఇనుములో హృదయం మొలిచెలే.. ముద్దిమ్మంటూ నిన్నే వలచెనే’ అని ‘రోబో’లో సూపర్‌స్టార్ రజనీకాంత్ చిట్టి రోబో రూపంలో ఐశ్వర్యారాయ్‌తో స్టెప్పులేస్తుంటే ఇండియన్ ఆడియన్స్ భలే ఎంజాయ్ చేశారు. ‘రోబో’ మాత్రమే కాదు, దర్శకుడు శంకర్ సినిమాలన్నిటిలోనూ పాటలు ఓ స్పెషల్ అట్రాక్షన్. ఇప్పుడు ‘రోబో’కి సీక్వెల్‌గా శంకర్ దర్శకత్వం వహిస్తున్న ‘2.0’లో అబ్బురపరిచే పాటలు చూద్దామని ఆశించిన ప్రేక్షకులకు నిరాశ తప్పదని సమాచారం.
 
 హీరో హీరోయిన్లు రజనీకాంత్, అమీ జాక్సన్  మధ్య ఒక్క డ్యూయెట్ మాత్రమే ఉంటుందట. ఆల్రెడీ ఉక్రెయిన్‌లోని అందమైన లొకేషన్లలో ఆ డ్యూయెట్‌ను చిత్రీకరించారట. ‘‘ఏ.ఆర్.రెహమాన్ సంగీతమందిస్తున్న ఈ సినిమా ఆల్బమ్‌లో ఐదారు పాటలు ఉంటాయి. కానీ, సినిమాలో ఒక్కటే ఉంటుంది’’ అని యూనిట్ సన్నిహిత వర్గాలు వెల్లడించాయి. మిగతా పాటలను సీడీకి పరిమితం చేస్తారో? ప్రమోషన్ కోసం ఉపయోగిస్తారో?.. శంకర్ మదిలో మరో ఆలోచన ఏమైనా ఉందో? చూడాలి. హిందీ హీరో అక్షయ్‌కుమార్ విలన్‌గా నటిస్తున్న ఈ సినిమా ఫస్ట్ లుక్‌ను ఈ నెల 20న ముంబైలో విడుదల చేయాలనుకుంటున్నారు.


 దక్షిణాది సూపర్‌స్టార్ రజనీకాంత్‌తో కలిసి రోబో సినిమా సీక్వెల్‌లో కలిసి నటించడం అద్భుతంగా అనిపిస్తోందని బాలీవుడ్ యాక్షన్ హీరో అక్షయ్ కుమార్ అంటున్నాడు. సీక్వెల్‌లో కూడా రజనీకాంత్ సైంటిస్టుగాను, ఆయన తయారుచేసే రోబో 'చిట్టి'గాను నటిస్తుండగా, విలన్ పాత్రను అక్షయ్ కుమార్ పోషిస్తున్నారు. ఇప్పటికే తన సినీజీవితంలో అనేక ఫైట్లు చేశానని, ఇప్పుడు రజనీకాంత్ లాంటి సూపర్ హీరోతో పంచ్‌లు తినడం చాలా గొప్పగా అనిపిస్తోందని అక్షయ్ చెప్పాడు. నెగెటివ్ పాత్ర పోషించాలని ఎంతో ఆతృతగా ఎదురు చూస్తున్నానన్నాడు. అయితే ఈ పాత్ర కోసం ప్రత్యేకంగా ఏమీ సిద్ధం కావడం లేదు. దానికి ఎలాంటి ట్రైనింగు తీసుకోవట్లేదని అక్షయ్ చెప్పాడు.
 
 నన్నెవరూ చూడలేదు
 తాను ఇంతకుముందు రజనీకాంత్‌ను కలిసిన సందర్భాన్ని అక్షయ్ గుర్తుచేసుకున్నాడు. తాను ఆయన వద్దకు వెళ్లేసరికి 15 మంది ఆయన కోసం వేచి చూస్తున్నారని, అందరూ ఆయనవైపే చూస్తున్నారని అన్నాడు. ఆయన టీ తాగుతూ.. ప్యాంటుమీద దుమ్ము ఉంటే దులుపుకొన్నారని, అందరూ ఒక్కసారిగా ఊపిరి భారంగా పీల్చుకున్నారని చెప్పాడు. తాను కూడా తన ప్యాంటు మీద దుమ్ము ఉంటే దులుపుకొన్నానని, కానీ అయితే అక్కడ ఎవరూ తనవైపు చూడలేదని తెలిపాడు. రోబో మొదటి భాగంలో ఐశ్వర్యారాయ్ నటించగా.. సీక్వెల్‌లో మాత్రం అమీ జాక్సన్ నటిస్తోంది. అలాగే డేనీ స్థానంలో అక్షయ్ వస్తున్నాడు.


 దర్శకుడు శంకర్ ప్రతిష్ఠాత్మకంగా రూపొందించాలని చూస్తున్న రోబో-2 (రోబోకు సీక్వెల్) సినిమాలో బాలీవుడ్ మెగాస్టార్ అమితాబ్ బచ్చన్ కూడా నటిస్తారంటూ ఇంతకుముందు వినిపించింది. అయితే, అసలు ఆ సినిమాలో నటించాలంటూ ఆయనను ఇంతవరకు ఎవరూ అడగలేదట. రజనీకాంత్, అమితాబ్ మంచి మిత్రులు కావడం, వాళ్ల తొలి రోజుల్లో ఇద్దరూ కలిసి కొన్ని హిందీ సినిమాల్లో కూడా చేసి ఉండటంతో రోబో సీక్వెల్‌లో బిగ్ బీ కూడా ఉంటారని ఇంతకుముందు అన్నారు. అసలు తననెవరూ దాని గురించి అడగలేదని, ఈ విషయం తనకు తెలియనే తెలియదని.. ఇదంతా తప్పుడు వార్తేనని అమితాబ్ స్వయంగా వెల్లడించినట్లు తెలుస్తోంది.
 
 2010లో విడుదలైన రోబో సినిమాలో రజనీకాంత్, ఐశ్వర్యా రాయ్ జంటగా నటించిన విషయం, ఆ సినిమా భారీస్థాయిలో కలెక్షన్లను కొల్లగొట్టిన విషయం తెలిసిందే. రోబోగా కూడా రజనీయే నటించిన ఈ సినిమా భారతదేశంతో పాటు విదేశాల్లో కూడా అద్భుతమైన వసూళ్లు రాబట్టింది. తాజాగా బిగ్ బీ మాత్రం.. ఫర్హాన్ అఖ్తర్‌తో పాటు వజీర్ సినిమాలో నటిస్తున్నారు.