సాక్షి,హైదరాబాద్‌: బండి ఎక్కాల్సిన పనిలేదు. గేర్లు వేయాల్సిన అవసరం అంతకన్నా లేదు. ఎక్కడో ఒకచోట డ్రైవింగ్‌ స్కల్లో చేరితే చాలు నెల రోజుల్లో లైసెన్సు చేతికొచ్చేస్తుంది. ఇందుకోసం సదరు డ్రైవింగ్‌ స్కూల్‌ డివండ్‌ మేరకు ఫీజు చెల్లిస్తే సరి. కోవిడ్‌ సాకుతో అన్ని వ్యవస్థలూ నిబంధనలకు తిలోదకాలిచ్చేశాయి. ఏడాది కాలంగా అన్ని  చోట్లా అక్రమాల దందా యథేచ్ఛగా సాగుతోంది. ఈ క్రమంలోనే నగరంలోని వివిధ ప్రాంతాల్లో ఎలాంటి గుర్తింపు లేని కొన్ని డ్రైవింగ్‌ స్కళ్లు సైతం దళారులకు అడ్డాలుగా వరాయి. ఎలాంటి శిక్షణ, నైపుణ్యం లేకుండానే ఎడాపెడా లైసెన్సులు  ఇప్పించేస్తున్నాయి. కొంతమంది ఆర్టీఏ అధికారులు, సిబ్బంది సైతం వీటికి అండగా నిలుస్తున్నారు. దీంతో  రవాణా శాఖ  పౌరసేవల్లోని  పాదర్శకత హాస్యాస్పదంగా మారింది.   కొరవడిన శిక్షణ..  కారు డ్రైవింగ్‌లో శిక్షణ పొందేందుకు కనీసం 30 రోజుల పాటు శిక్షణ అవసరం. అప్పటికి డ్రైవింగ్‌లో ప్రాథమిక అనుభవం మాత్రమే వస్తుంది. నైపుణ్యం పెంచుకోవాల్సి ఉంటుంది. ఇందుకోసం రవాణాశాఖ  డ్రైవింగ్‌ నేర్చుకొనేవాళ్లకు లెర్నింగ్‌ లైసెన్సు ఇస్తుంది. ఈ లైసెన్సు తీసుకున్నవాళ్లు 30 రోజుల తర్వాత 6 నెలల్లోపు ఎప్పుడైనా డ్రైవింగ్‌ లైసెన్సు తీసుకోవచ్చు.  డ్రైవింగ్‌లో శిక్షణ, నైపుణ్యం, మెలకువలు నేర్చుకొనేందుకే ఈ ఆరు నెలల వెసులుబాటు కల్పించారు. కానీ చాలా స్కూళ్లు 30 రోజుల శిక్షణలోనే అన్ని పనులు పూర్తి చేస్తున్నాయి. ఈ  వ్యవధిలో  పట్టుమని 10 క్లాసులు కూడా ఇవ్వడం లేదు. డ్రైవింగ్‌లో ప్రాథమికమైన అవగాహన కూడా కల్పించడం లేదు. ఆర్టీఏ అధికారులు, సిబ్బందితో ఉన్న అవగాహన మేరకు మొక్కుబడి డ్రైవింగ్‌ పరీక్షలతో లైసెన్సులు ఇప్పించేస్తున్నారు. కొన్ని చోట్ల కనీసం పరీక్షలు లేకుండానే డ్రైవింగ్‌ లైసెన్సులు ఇచ్చేస్తున్నట్లు ఆరోపణలున్నాయి.  కోవిడ్‌ ముసుగులో ఉల్లంఘన.. సాధారణంగా  డ్రైవింగ్‌లో  శిక్షణ రెండు విధాలుగా ఉంటుంది. మొదట సాంకేతిక అంశాలపైన తరగతిగది శిక్షణనిస్తారు.  ఆ తర్వాత స్టిమ్యులేటర్‌పై  స్టీరింగ్‌ శిక్షణ ఉంటుంది. ఈ రెండు కార్యక్రమాలతో పాటు రోడ్డుపై శిక్షణనిస్తారు. కనీసం 3 నెలల వ్యవధిలో అభ్యర్థి అన్ని అంశాలపై అవగాహన, శిక్షణ పెంచుకొనేలా ఈ  కార్యక్రమం ఉండాలి. అనేక దశాబ్దాలుగా శిక్షణనిస్తున్న కొన్ని ప్రముఖ డ్రైవింగ్‌ స్కూళ్లు మినహాయించి చాలా వరకు ఎలాంటి శిక్షణను ఇవ్వడం లేదు. కరోనా ముసుగులో ఏడాది కాలంగా ఈ దందా సాగుతోంది.  గ్రేటర్‌లో  రవాణా శాఖ గుర్తింపు ఉన్న స్కళ్లు 150 వరకు ఉంటే  ఎలాంటి గుర్తింపు, ఆమోదం, కనీస నిబంధనలు పాటించనివి 500  పైగానే ఉంటాయి. ఇలాంటి వాటిని నియంత్రించాల్సిన అధికార యంత్రాంగమే నేరుగా ప్రోత్సహించడం గమనార్హం.    

సాక్షి, తాడిపత్రి: జేసీ బద్రర్స్‌కు చెందిన మోటార్‌ వాహనాల అక్రమ రిజిస్ట్రేషన్‌ వ్యవహారంలో పలు దిగ్భ్రాంతి గొలిపే విషయాలు వెలుగులోకి వస్తున్నాయి. అశోక్‌ లేలాండ్‌ కంపెనీ తుక్కు కింద విక్రయించిన వాహనాలను సేకరించిన తాడిపత్రికి చెందిన జఠాధర ఇండస్ట్రీస్‌ ప్రైవేటు లిమిటెడ్, సి.గోపాల్‌రెడ్డి అండ్‌ కంపెనీ వాటికి నకిలీ పత్రాలు సృష్టించి 2018లో వాటిని నాగాలాండ్‌లో రిజిస్ట్రేషన్‌ చేయించుకుని రాష్ట్రంలో, ముఖ్యంగా అనంతపురం జిల్లాలో తిప్పుతున్నట్లు విశ్వసనీయ సమాచారం అందడంతో ఆ 68 వాహనాలకు సంబంధించిన సమాచారం ఇవ్వాలని ఈ ఏడాది జనవరి 10న అశోక్‌ లీలాండ్‌ కంపెనీకి మెయిల్‌ చేయగా, అన్ని అంశాలను పరిశీలించిన కంపెనీ అదే నెల 23న అంటే, ఈ ఏడాది జనవరి 23వ తేదీన పూర్తి వివరాలు పంపించింది. కాలం చెల్లిన 66 వాహనాలలో 40 వాహనాలను తాడిపత్రికి చెందిన సి.గోపాల్‌రెడ్డి అండ్‌ కంపెనీకి, మరో 26 వాహనాలను జఠాధర ఇండస్ట్రీస్‌ ప్రైవేటు లిమిటెడ్‌కు తుక్కు కింద విక్రయించినట్లు అశోక్‌ లీలాండ్‌ కంపెనీ తెలిపింది. (మాజీ ఎమ్మెల్యే జేసీ ప్రభాకర్‌ రెడ్డి అరెస్ట్‌) ఆ కంపెనీలు ఎవరివి?: జఠాధర ఇండస్ట్రీస్‌ జేసీ ప్రభాకర్‌రెడ్డి భార్య జేసీ ఉమారెడ్డి, ఆయన కుమారుడు జేసీ అస్మిత్‌రెడ్డికి చెందింది కాగా, సి.గోపాల్‌రెడ్డి అండ్‌ కంపెనీ జేసీ ప్రభాకర్‌రెడ్డికి అత్యంత సన్నిహితుడైన గోపాల్‌రెడ్డికి చెందింది. పలు అశ్చర్యకరమైన విషయాలు వెలుగులోకి.. ఆ సమాచారం అందుకున్న తర్వాత రవాణా కార్యాలయంలోని రికార్డులను పరిశీలించగా, ఆ వాహనాలన్నింటినీ నాగాలాండ్‌ రాజధాని కోహిమాలో రిజిస్ట్రేషన్‌ చేయించిన తర్వాత ఎన్‌ఓసీ తీసుకుని అనంతపురం జిల్లాకు తరలించినట్లు తేలింది. అనంతరం రవాణా శాఖ, అనంతపురం జిల్లా పోలీసు శాఖకు చెందిన అధికారుల బృందం నాగాలాండ్‌ రాజధాని కోహిమాలో రవాణా శాఖ రిజిస్ట్రేషన్‌ కార్యాలయానికి వెళ్లి పూర్తి సంబంధిత వాహనాల రిజిస్ట్రేషన్‌ డాక్యుమెంట్ల వివరాలు సేకరించగా పలు ఆశ్చర్యకరమైన విషయాలు వెలుగులోకి వచ్చాయి. (జేసీ బ్రదర్స్‌ చాతుర్యం: స్క్రాప్‌లోనూ స్కాం) అక్రమాలు ఎలా?: తమ వాహనాల రిజిస్ట్రేషన్‌ కోరుతూ, సి.గోపాల్‌రెడ్డి అండ్‌ కంపెనీ తరపున జఠాధర ఇండస్ట్రీస్‌ ప్రైవేటు లిమిటెడ్‌కు చెందిన జేసీ ఉమాదేవి దరఖాస్తుపై సంతకం చేశారు. ఆ వాహనాల రిజిస్ట్రేషన్‌ కోసం ఈ రెండు కంపెనీలు ఇచ్చిన అశోక్‌ లీలాండ్‌ కంపెనీ ఇన్‌వాయిస్‌లలో ఎక్కడా ఒకదానితో మరొక దానికి పోలిక లేకుండా వేర్వేరు తేదీలతో ఉన్నాయి. అంతే కాకుండా అశోక్‌ లీలాండ్‌ కంపెనీ ఇచ్చిన ఇన్‌వాయిస్‌లను అసంపూర్తిగా సమర్పించిన ఈ రెండు కంపెనీలు తమ వాహనాలన్నింటికీ రిజిస్ట్రేషన్‌ పొందాయి. ఉత్తరాఖండ్‌లోని కళ్యాణ్‌పూర్, తమిళనాడు హోసూరులో ఉన్న అశోక్‌ లీలాండ్‌ కంపెనీలు ఆ ఇన్‌వాయిస్‌లు ఇచ్చాయి. ఆ వాహనాలను తుక్కు కింద కొనుగోలు చేసినప్పటికీ, అవి రహదారులపై తిరగడానికి ఫిట్‌గా ఉన్నట్లు రికార్డులు సృష్టించి వాటిని యథేచ్ఛగా నడిపారు. బీఎస్‌–4 ప్రమాణాలకు అనువుగా లేని వాహనాలను ఏప్రిల్‌ 1, 2017 నుంచి విక్రయించరాదని, అదే విధంగా ఆరోజు నుంచి వాటికి ఎక్కడా రిజిస్ట్రేషన్‌ చేయొద్దని సుప్రీంకోర్టు మార్చి 29, 2017న ఆదేశాలు జారీ చేసింది. బీఎస్‌–4 ప్రమాణాలకు అనువుగా లేని వాహనాలు ఒకవేళ మార్చి 31, 2017 నాటికి విక్రయించి ఉంటే, వాటి రిజిస్ట్రేషన్‌కు మాత్రం కోర్టు మినహాయింపు ఇచ్చింది. అంతులేని అక్రమాలు: ఈ నేపథ్యంలో పై రెండు కంపెనీలు యథేచ్ఛగా మోటారు వాహనాల చట్టాన్ని ఉల్లంఘించాయని తేలింది. తుక్కు కింద కొనుగోలు చేసిన వాహనాలకు నకిలీ డాక్యుమెంట్లు సృష్టించి, అవి రహదారులపై తిరగడానికి ఫిట్‌గా ఉన్నట్లు చూపి, ఎక్కడో సుదూరంలో ఉన్న నాగాలాండ్‌లో రిజిస్ట్రేషన్‌ చేయించారు. అంతే కాకుండా కేవలం కొద్ది రోజుల్లోనే వాటికి ఎన్‌ఓసీ సంపాదించి, ఇక్కడ అనంతపురం జిల్లాలో రిజిస్ట్రేషన్‌ చేయించుకున్నారు. సొంత జిల్లా కావడంతో యథేచ్ఛగా ఆ వాహనాలు తిప్పారు. ఆ విధంగా వారు చీటింగ్‌కు పాల్పడ్డారు. సుప్రీం కోర్టు ఆదేశాలను సైతం బేఖాతరు చేస్తూ, రహదారులపై తిరగడానికి ఏ మాత్రం అనువుగా లేని, తుక్కు కింద కొనుగోలు చేసిన వాహనాలకు తప్పుడు రిజిస్ట్రేషన్‌ చేయించి జిల్లాలో తిప్పారు. రహదారి భద్రత లేకపోవడమే కాకుండా, వాతావరణ కాలుష్యానికి కూడా కారకులయ్యారు. ఇంకా ప్రజల ప్రాణాలను కూడా పణంగా పెట్టారు. పోలీసులకు ఫిర్యాదు: వీటన్నింటి నేపథ్యంలో అనంతపురం 1వ టౌన్‌ పోలీసు స్టేషన్‌లో క్రిమినల్‌ కేసు ఫైల్‌ చేశారు. జఠాధర ఇండస్ట్రీస్‌ ప్రైవేటు లిమిటెడ్, సి.గోపాల్‌రెడ్డి అండ్‌ కంపెనీ యజమానులు, వారి భాగస్వాములతో పాటు, ఆయా సంస్థల ప్రతినిధులపై చర్య తీసుకోవాలని ఆ ఫిర్యాదులో కోరారు. తుక్కు కింద కొనుగోలు చేసిన వాహనాలను నకిలీ, తప్పుడు ధృవపత్రాలతో రిజిస్ట్రేషన్‌ చేయించడం, వాటికి ఎన్‌ఓసి పొంది 2 రోజుల నుంచి 2 వారాల్లోనే అనంతపురంలో తిరిగి రిజిస్ట్రేషన్‌ చేయించుకోవడం ఇంకా వాటిని యథేచ్ఛగా జిల్లాలోనూ, దేశంలోనూ తిప్పడం కచ్చితంగా చీటింగ్‌కు పాల్పడడమే. రాష్ట్ర ప్రభుత్వాన్ని మోసం చేయడమే. ఇంకా ఏమేం చేశారు?: అంతే కాకుండా వాటిలో పలు వాహనాలను ఈ రెండు కంపెనీలు రాష్ట్రంలో వేర్వేరు చోట్ల విక్రయించాయి. జఠాధర ఇండస్ట్రీస్‌ ప్రైవేటు లిమిటెడ్, తాడిపత్రికి చెందిన సి.గోపాల్‌రెడ్డి అండ్‌ కంపెనీలపై మరింత లోతుగా దర్యాప్తు చేయగా దిగ్భ్రాంతి గొలిపే విషయాలు వెలుగులోకి వచ్చాయి. అదే తుక్కు కింద బీఎస్‌–3 ప్రమాణాలతో కూడిన 154 వాహనాలను ఈ రెండు కంపెనీలు కొనుగోలు చేశాయి. జఠాధర ఇండస్ట్రీస్‌ ప్రైవేటు లిమిటెడ్‌ 50 వాహనాలు కొనుగోలు చేయగా, సి.గోపాల్‌రెడ్డి అండ్‌ కంపెనీ మరో 104 వాహనాలను తుక్కు కింద కొనుగోలు చేసింది. వాటికి కూడా నకిలీ పత్రాలు, డాక్యుమెంట్లు సృష్టించి రహదారులపై తిరగడానికి ఫిట్‌గా ఉన్నాయంటూ, బీఎస్‌–4 ప్రమాణాలతో కూడి ఉన్నాయంటూ దేశంలో పలు చోట్ల రిజిస్ట్రేషన్‌ చేయించుకున్నారు. వాటిలో అత్యధికం అనంతపురం జిల్లాలోనే జరిగాయి. జఠాధర ఇండస్ట్రీస్‌ ప్రైవేటు లిమిటెడ్, సి.గోపాల్‌రెడ్డి అండ్‌ కంపెనీ పేర్ల మీదే కాకుండా, కొన్ని వాహనాలను వ్యక్తిగత పేర్లతోనూ రిజిస్ట్రేషన్‌ చేయించారు. ఆయా వాహనాల ఛాసిస్‌ నెంబర్లను పరిశీలించగా, అన్నీ బీఎస్‌–3కు చెందినవే తప్ప, బీఎస్‌–4 ప్రమాణాలతో కూడినవి కావని తేలింది. ఇదే విషయాన్ని అశోక్‌ లీలాండ్‌ కంపెనీ ప్రతినిధులు కూడా నిర్ధారించారు.  వాటన్నింటినీ బీఎస్‌–4 ప్రమాణాల వాహనాలుగా చూపడానికి నకిలీ పత్రాలు, డాక్యుమెంట్లు సృష్టించారు. 154 వాహనాల లావాదేవీల నిషేధం: రాష్ట్రంలో 101 వాహనాలు రిజిస్టర్‌ అయి ఉండగా, వాటికి సంబంధించి మరే లావాదేవీ జరగకుండా డేటా బేస్‌ బ్లాక్‌ చేశారు. 28 వాహనాలను ఇప్పటికే ఎన్‌ఓసీపై వేరే రాష్ట్రాలకు తరలించారు. వాటికి సంబంధించి ఆయా రాష్ట్రాల రవాణా శాఖ అధికారులకు సమాచారం పంపించారు. ఆ వాహనాలపై ఇంకా ఎలాంటి లావాదేవీలు జరగకుండా బ్లాక్‌ చేయాలని అధికారులు కోరారు. ఇంకా మిగిలిన వాహనాలను ఇతర రాష్ట్రాలలో రిజిస్ట్రేషన్‌ చేయించారు.  రిజిస్ట్రేషన్ల రద్దు: రాష్ట్రంలో నమోదై ఉన్న 101 వాహనాల్లో 89 వాహనాల రిజిస్ట్రేషన్లు రద్దు చేశారు. వాటిలో అనంతపురం జిల్లాలో 77 వాహనాలు, కర్నూలు, చిత్తూరు జిల్లాలలో 5 చొప్పున, గుంటూరు జిల్లాలో మరో 2 వాహనాలు ఉన్నాయి. మిగిలిన వాహనాలకు సంబంధించి ఆర్‌సీ రద్దు ప్రక్రియ కొనసాగుతోంది. నెల్లూరు జిల్లాలో 6 వాహనాల యజమానులు హైకోర్టును ఆశ్రయించారు. అందువల్ల వాటి ఆర్‌సీ రద్దు చేయాలంటే హైకోర్టు అనుమతి కావాలి. అందుకే అధికారులు వేచి చూస్తున్నారు. ఇంకా కడప జిల్లాలో 3 వాహనాలు, అనంతపురం జిల్లాలో మరో 3 వాహనాల ఆర్‌సీలు రద్దు చేయాల్సి ఉంది. మొత్తం 154 వాహనాలకు సంబంధించి ఇంకా ఎలాంటి లావాదేవీలు జరగకుండా ‘వాహన్‌’ డేటాబేస్‌లో వాటిని బ్లాక్‌ చేయమని కోరుతూ రవాణా శాఖ జాయింట్‌ సెక్రటరీకి లేఖ రాశారు. ఇతర రాష్ట్రాలలో రిజిస్టర్‌ అయిన ఆ వాహనాల ఆర్‌సీల రద్దు కోసం ఆయా రాష్ట్రాలను కోరాలని అధికారులు నిర్ణయించారు. ఆ వాహనాలు రహదారులపై కనిపిస్తే వెంటనే స్వాధీనం చేసుకోవాలని ఆయా రాష్ట్రాల అధికారులను ఏపీ అధికారులు కోరారు. వాహనాల స్వాధీనం: రాష్ట్రంలో నమోదై ఉన్న 101 వాహనాల్లో ఇప్పటికే 60 వాహనాలను స్వాధీనం చేసుకున్నాం. ఇంకా మిగిలిన 41 వాహనాల ఆచూకీ తెలియాల్సి ఉంది. ఒక్క అనంతపురం జిల్లాలోనే 46 వాహనాలను స్వాధీనం చేసుకోగా, కడప, గుంటూరు, నెల్లూరు, కర్నూలు, చిత్తూరు జిల్లాలలో 14 వాహనాలు స్వాధీనం చేసుకున్నారు.  క్రిమినల్‌ కేసుల నమోదు: ఈ వ్యవహారానికి సంబంధించి అనంతపురం జిల్లాలో రవాణా అధికారి (డీటీసీ) 24 క్రిమినల్‌ కేసులు నమోదు చేశారు. అదే విధంగా కర్నూలు డీటీసీ మరో 3 క్రిమినల్‌ కేసులు నమోదు చేశారు. జఠాధర ఇండస్ట్రీస్‌ ప్రైవేటు లిమిటెడ్‌కు చెందిన జేసీ ఉమారెడ్డి, సి.గోపాల్‌రెడ్డి అండ్‌ కంపెనీకి చెందిన గోపాల్‌రెడ్డిపై క్రిమినల్‌ కేసులు నమోదు చేశారు. జేసీ ప్రభాకర్‌రెడ్డి మంతనాలు: తమ నుంచి వాహనాలు కొనుగోలు చేసిన పలువురితో జేసీ ప్రభాకర్‌రెడ్డి మంతనాలు జరిపి, వారితో ఒక అవగాహనకు వచ్చినట్లు తెలిసింది. ఒక్కో వాహనానికి రూ.12 లక్షల నుంచి రూ.14 లక్షల వరకు తిరిగి ఇస్తానని, అందువల్ల తమపై ఫిర్యాదు చేయవద్దని 35 వాహనాల యజమానులను ఆయన కోరినట్లు సమాచారం. అందువల్లనే ఆయా వాహనాలకు సంబంధించి ఇప్పటికీ ఎలాంటి ఫిర్యాదులు అందలేదు. నకిలీ ఇన్సూరెన్సు పాలసీలు: నకిలీ పత్రాలు, డాక్యుమెంట్లతో వాహనాల రిజిస్ట్రేషన్‌తోనే వారి అక్రమాలకు తెర పడలేదు. వాహనాల రిజిస్ట్రేషన్‌కు అవసరమైన ఇన్సూరెన్సు పత్రాలను కూడా వారు నకిలీవి ఆర్‌టీఏ అధికారులకు సమర్పించారు. ఇంకా కేసులు ఫైల్‌ చేయాల్సి ఉంది!: ఆ విధంగా నకిలీ పత్రాలు, డాక్యుమెంట్లతో వాహనాల రిజిస్ట్రేషన్, సుప్రీంకోర్టు ఆదేశాలు యథేచ్ఛగా బేఖాతరు చేయడం, ఫిట్‌నెస్, రోడ్‌ సేఫ్టీ లేకున్నా ప్రజల ప్రాణాలు ఫణంగా పెట్టి వాహనాలను యథేచ్ఛగా రహదారులపై తిప్పడమే కాకుండా, చివరకు ఇన్సూరెన్సు పత్రాలు కూడా నకిలీవి సమర్పించిన ఈ రెండు కంపెనీలపై ఇంకా క్రిమినల్‌ కేసులు నమోదు చేయాల్సి ఉంది. 

సాక్షి, అనంతపురం‌: బీఎస్‌–3 వాహనాలను బీఎస్‌–4 వాహనాలుగా రిజిస్ట్రేషన్‌లు చేయించి అతి పెద్ద కుంభకోణానికి జేసీ సోదరులు పాల్పడ్డారు. ఈ అవినీతి బాగోతం రాష్ట్ర ఉన్నతాధికారులు బయటపెట్టారు. అయితే సదరు వాహనాలను సీజ్‌ చేయాల్సిన అధికారులు యజమానులతో కుమ్మక్కయ్యారు. విడిభాగాలు తొలగించుకున్న తర్వాత సీజ్‌ చేసి ఆర్టీఏ కార్యాలయానికి తీసుకొస్తుండడంపై సర్వత్రా విమర్శలు వ్యక్తమవుతున్నాయి. వివరాల్లోకి వెళితే... గత టీడీపీ ప్రభుత్వ హయాంలో మాజీ ఎంపీ జేసీ దివాకర్‌రెడ్డి, ఎమ్మెల్యే జేసీ ప్రభాకర్‌రెడ్డిలు అతి పెద్ద కుంభకోణానికి పాల్పడ్డారు. అప్పటికే ట్రావెల్స్‌ రంగంలో ఆరితేరిన జేసీ సోదరులు అతి తక్కువ రేటుకు వస్తున్నాయని చెప్పి బీఎస్‌ 3 వాహనాలను కొనుగోలు చేశారు. సుప్రీంకోర్టు బీఎస్‌3 వాహనాల విక్రయాలు రద్దు చేయాలని ఉత్తర్వులు వెలువడించిన తర్వాత షోరూంలలో నిలిచిపోయిన వాహనాలను కొనుగోలు చేశారు. అదికూడా నాగాలాండ్‌ రాష్ట్రంలో అశోక్‌లైలాండ్‌ కంపెనీ చెందిన దాదాపు 160 వాహనాలు కొనుగోలు చేశారు. ఈ తంతంగమంతా ఆలస్యంగా రాష్ట్ర రవాణాశాఖ ఉన్నతాధికారులు గుర్తించారు. నాగాలాండ్‌లో రిజిస్ట్రేషన్‌ అయిన తర్వాత రోజుల వ్యవధిలోనే రాష్ట్రంలో వివిధ ప్రాంతాలకు ట్రాన్స్‌ఫర్‌ కావడంతో ఈ అక్రమ బాగోతం వెలుగులోకి వచ్చింది. ఆరా తీస్తే అసలు విషయం బయటపడింది. సదరు వాహనాలన్నీ బీఎస్‌3 కాగా నకిలీ ధ్రువపత్రాలతో బీఎస్‌4గా రిజిస్ట్రేషన్‌ చేయించుకున్నట్లు తేలింది. ఈ విషయాన్ని ఆర్టీఏ జాయింట్‌ కమిషనర్‌ జిల్లాకు వచ్చి మీడియా సమావేశంలో ధ్రువీకరించారు. ఇలా జిల్లాలో దాదాపు 80 వాహనాలున్నాయని గుర్తించారు. మిగిలినవి వివిధ జిల్లాలో తిరుగుతున్నట్లు తెలిపారు.  చదవండి: ‘ఆ వాహనాలు ఎక్కడున్నా సీజ్‌ చేయాలి’ యజమానులకు సహకరిస్తున్న ఆర్టీఏ ఉద్యోగులు   దాదాపు నాలుగు నెలల క్రితం ఆర్టీఏ జాయింట్‌ కమిషనర్‌ జిల్లాకు వచ్చి జేసీ బ్రదర్స్‌ అవినీతి వ్యవహారం బయటపెట్టారు. సదరు వాహనాలను జప్తు చేయడానికి ప్రత్యేక టీం ఏర్పాటు చేస్తున్నట్లు వెల్లడించారు. కానీ జిల్లాలో అధికారులు మాత్రం ఆ దిశగా పనిచేయడం లేదు. ఇప్పటి వరకూ 50 వాహనాలు సీజ్‌ చేశారు. మిగిలిన 30 వాహనాలను గుర్తించాల్సి ఉంది. అయితే నాలుగు నెలల క్రితమే వాహనం నెంబర్‌తో సహా ఏఏ వాహనాలు అక్రమంగా రిజిస్ట్రర్‌ అయ్యాయో అధికారులు బహిర్గతపర్చారు. దాని ఆధారంగా యజమానులను సులభంగా గుర్తించవచ్చు. కానీ ఇక్కడి అధికారులు ఆదిశగా చర్యలు తీసుకోలేదు. పైగా యజమానులకు సహకరిస్తున్నారనే ఆరోపణలు వ్యక్తమవుతున్నాయి.   వాహనాలను పట్టుకోవడంలో జాప్యం..  నాగాలాండ్‌లో కొనుగోలు చేసిన వాహనాలను కొన్నింటిని జేసీ ఉమారెడ్డి పేరుతో ఉండగా మరికొన్ని జఠాధర కంపెనీకి సి. గోపాల్‌రెడ్డితో ఉన్నాయి. వాహనాలను పట్టుకోవడంలో జాప్యం చేయడంతో అక్రమార్కులు ముందు జాగ్రత్తలు పడుతున్నారు. కొన్ని వాహనాలను ప్రైవేటు వ్యక్తులకు అంటగట్టారు. మరికొన్నింటికి విడిబాగాలు తొలగించి విక్రయించేశారు. ఏకంగా టైర్ల వద్ద నుంచి బ్యాటరీలు, ఇంజన్, బాడీ మొత్తం తొలగించిన వాహనాలు కూడా ఉన్నాయి. కేవలం ఛాసీలు మాత్రమే ఉంటుండడంతో అవే వాహనాలను తీసుకొచ్చి ఆర్టీఏ కార్యాలయంలో ఉంచుతున్నారు. నిబంధనల ప్రకారం ఇలా తొలగించడానికి వీల్లేదు. అలాంటి వారిపై చర్యలు తీసుకోవచ్చు. కానీ ఆర్టీఏ ఉన్నతాధికారులు సదరు యజమానులపై సానుభూతి చూపిస్తుండడం తీవ్ర విమర్శలు వ్యక్తమవుతున్నాయి. చదవండి: జేసీ ట్రావెల్స్ ఫోర్జరీ కేసులో కొత్త ట్విస్ట్

సాక్షి, విజయవాడ: జేసీ ట్రావెల్స్ 154 బీఎస్‌-3 వాహనాలను అక్రమంగా రిజిస్ట్రేషన్ చేయించిందని ఆర్టీఏ జాయింట్ కమిషనర్ ప్రసాదరావు మంగళవారం వెల్లడించారు. జటాధర ఇండస్ట్రీస్‌ పేరు మీద 50 వాహనాలు, సి.గోపాల్‌రెడ్డి పేరుతో 104 వాహనాలు రిజిస్ట్రేషన్ చేయించారని పేర్కొన్నారు. కర్ణాటకలో 33, తెలంగాణలో 15 వాహనాలు రిజిస్ట్రేషన్ చేయించినట్లు, ఆంధ్రప్రదేశ్‌లో 101 వాహనాలు రిజిస్ట్రేషన్ అయ్యాయని ఆర్టీఏ జాయింట్ కమిషనర్ తెలిపారు. అనంతపురంలో 27, కర్నూలులో 3 ఎఫ్‌ఐఆర్‌లు నమోదు చేశామన్నారు. డేటా బేస్‌లో ఈ వాహనాలను బ్లాక్‌ లిస్ట్‌ చేయాలని కేంద్రానికి లేఖ రాసినట్లు తెలిపారు. దేశంలో ఈ వాహనాలు ఎక్కడ తిరుగుతున్నా.. సీజ్ చేసేలా ఆయా రాష్ట్రాలకు ఆదేశాలు ఇవ్వాలని కేంద్రాన్ని కోరినట్లు వెల్లడించారు. (కరోనా: కేంద్రం కొత్త మార్గదర్శకాలు) ఇన్సూరెన్స్ కంపెనీలు కూడా నేషనల్ డేటాబేస్‌లో అప్‌డేట్ చేయాలని కోరినట్లు ప్రసాదరావు తెలిపారు. అనంతపురంలో 80, కర్నూలులో 5, చిత్తూరులో 5, కడపలో 3 వాహనాలు రిజిస్ట్రేషన్లు రద్దు చేశామన్నారు. నెల్లూరులో ఉన్న 6 వాహనాలపై కోర్టు కేసులు ఉన్నందున.. రిజిస్ట్రేషన్ల రద్దు వాయిదా వేసినట్లు తెలిపారు. ఇప్పటివరకు 62 వాహనాలు సీజ్ చేశామని, మరో 39 వాహనాలు సీజ్ చేయాల్సి ఉందన్నారు. తెలంగాణలో 12 వాహనాలు గుర్తించి ఆ రాష్ట్రానికి సమాచారం ఇచ్చామన్నారు. జేసీ ట్రావెల్స్ వాహనాలను కొనుగోలు చేసిన వారిని ముందే హెచ్చరించామని, 71 నకిలీ ఇన్సూరెన్స్ పాలసీలను కూడా గుర్తించామని పేర్కొన్నారు. జేసీ ఉమారెడ్డి, జేసీ అశ్మిత్‌రెడ్డి జటాధర ఇండస్ట్రీస్ డైరెక్టర్లుగా ఉన్నారని ఆర్టీఏ జాయింట్‌ కమిషనర్‌ ప్రసాదరావు తెలిపారు. (యజమాని ఆత్మహత్య చేసుకున్న చోటే శునకం..) (జేసీ ట్రావెల్స్ ఫోర్జరీ కేసులో కొత్త ట్విస్ట్)

సామర్లకోట: అరుణాచల్‌ప్రదేశ్ రాష్ట్ర రిజిస్ట్రేషన్‌తో ఒకే నెంబరుతో రెండు బస్సులు నడుపుతున్న సిరి ట్రావెల్స్‌కు చెందిన ఎఆర్‌ 01 1166 నెంబరు బస్సును తూర్పుగోదావరి జిల్లా కాకినాడ ఆర్టీఏ అధికారులు అర్ధరాత్రి సీజ్‌ చేశారు. బస్సు కాకినాడ నుండి హైదరాబాద్ వెళ్తున్నది. అధికారులు ప్రత్యామ్నాయ ఏర్పాట్లు చేసి బస్సులోని ప్రయాణికులను వేరే బస్సులో వారి వారి గమ్యస్థానాలకు పంపారు. 


 ► పర్యవేక్షణ చేస్తున్న ఆర్టీఏ అధికారులు
 ►నెలరోజుల్లో నివేదికలు తయారు
 సిరిసిల్ల క్రైం : జిల్లాలోని 13 మండలాల ద్వారా ఇతర జిల్లాలను కలిపే మార్గాల్లో గల డేంజర్‌ జోన్స్ ను గుర్తించడానికి జిల్లా రవాణాశాఖ అధికారులు పర్యవేక్షణ చేస్తున్నారు. ఉమ్మడి జిల్లాలో అనేక ప్రమాదాలు చోటుచేసుకున్నాయి. ప్రమాదాలను నిర్మూలించాలనే కోణంలో డేంజర్‌ జోన్స్పై కచ్చితమైన నివేదిక కోసం ఆర్టీఏ అధికారులు తనిఖీలు నిర్వహిస్తున్నారు.
 
 రూట్‌ మ్యాప్‌లతో తనిఖీలు...
 జిల్లా కేంద్రంగా సిరిసిల్ల నుంచి కామారెడ్డి, సిరిసిల్ల నుంచి సిద్దిపేట, సిరిసిల్ల నుంచి రుద్రంగి, సిరిసిల్ల నుంచి సిరికొండ, సిరిసిల్ల నుంచి కొదురుపాక వరకు ఉన్న రహదారులపై ప్రమాద స్థలాలను గుర్తించేందుకు అధికారులు కసరత్తు చేస్తున్నారు. ఈ రూట్స్‌లో ఉన్న వివిధ రకాల పాత బావులు, ప్రమాద మలుపులు, ఇరుకైన రోడ్లు వంటి అంశాలను నిర్ణీత నమూనాలో పొందుపరుస్తున్నారు. వీటన్నింటినీ కలెక్టర్, జాయింట్‌ కలెక్టర్‌కు నెల రోజుల వ్యవధిలో అందించేందుకు ప్రణాళిక రూపొందిస్తున్నట్లు రవాణాశాకాధికారులు తెలిపారు. దీని ఆధారంగా ప్రమాదాల నివారణకు చెక్‌ పెట్టడానికి కావాల్సిన చర్యలను జిల్లా ఉన్నతాధికారులు ఆయా శాఖలకు ఆదేశాలిస్తారని వివరించారు. జిల్లా పునర్‌ విభజన అనంతరం ప్రమాదాలకు జిల్లాలో తావులేకుండా చూడాలన్న స్థాయిలో పర్యవేక్షణ చేయడంతోపాటు స్థానికులతో అక్కడ ఉన్న సమస్యలను తెలుసుకుంటునట్లు విశ్వసనీయంగా తెలిసింది.
 
 విద్యాలయాల వద్ద ప్రత్యేక ఫోకస్‌..
 భావిభారత పౌరులుగా ఎదిగే విద్యార్థులుంటే ప్రాంతాల్లో ప్రమాదాల నివారణకు చేపట్టాల్సిన చర్యలను తీసుకోవాలని జిల్లా అధికారులు ప్రత్యేక చొరవతో ముందుకు సాగుతున్నట్లు పర్యవేక్షణలోని అధికారులు చెబుతున్నారు. విద్యాలయాల ఎదుట హెచ్చరికల బోర్డులు, జీబ్రా క్రాసింగ్‌ లైన్లు, స్టాపర్లు ఏర్పాటు చేసుకోవాలన్న కోణంలో సలహాలిస్తున్నట్లు తెలిసింది. దీని విషయంలో విస్తృతంగా ఆయా విద్యాలయాల యాజమాన్యాలతోను మాట్లాడాలని మౌళిక అదేశాలలో ఉన్నట్లు తెలిసింది