ముంబై: ఐసీఐసీఐ బ్యాంక్‌ సేవింగ్స్‌ డిపాజిట్‌ (సేవింగ్స్‌ ఖాతాల్లోని బ్యాలెన్స్‌)పై వడ్డీ రేటును పావు శాతం మేర తగ్గించింది. సేవింగ్స్‌ ఖాతాల్లో బ్యాలెన్స్‌ రూ.50 లక్షల వరకు ఉన్న వారికి ఇక మీదట 2.75 శాతం రేటు అమలవుతుంది. అదే మాదిరి రూ.50 లక్షలకు పైన బ్యాలెన్స్‌ ఉన్న వారికి 3.25 శాతం రేటు లభిస్తుంది.బుధవారం నుంచే కొత్త రేటు అమల్లోకి వచ్చింది. ఎస్‌బీఐ సైతం సేవింగ్స్‌ డిపాజిట్లపై 2.70 శాతం రేటు అమలు చేస్తుండడం గమనార్హం. హెచ్‌డీఎఫ్‌సీ బ్యాంక్‌ కూడా తాజాగా సేవింగ్స్‌ డిపాజిట్లపై వడ్డీ రేటును 0.25% తగ్గించి 2.75% చేసింది. రూ.50 లక్షలకు మించిన మొత్తంపై వడ్డీ రేటు 3.5% ఉండగా 3.25 శాతానికి తగ్గించింది.


 ముంబై: సేవింగ్‌ అకౌంట్‌ డిపాజిట్‌పై వడ్డీరేటు తగ్గింపు వల్ల స్టేట్‌ బ్యాంక్‌ ఆఫ్‌ ఇండియా (ఎస్‌బీఐ)  నికర వడ్డీ మార్జిన్‌ (ఎన్‌ఐఎం) 14 బేసిస్‌ పాయింట్ల (100 బేసిస్‌ పాయింట్లు ఒక శాతం) మేర పెరిగే అవకాశం కనబడుతోందని ఆంతర్జాతీయ ఆర్థిక విశ్లేషణా సంస్థ– మోర్గాన్‌ స్టాన్లీ మంగళవారం తన తాజా నివేదికలో అంచనావేసింది.
 
  ఇతర బ్యాంకులూ ఎస్‌బీఐ బాటను అనుసరించే అవకాశం ఉందనీ, దీనివల్ల నికర వడ్డీ మార్జిన్లు 0.05 శాతం నుంచి 0.15 శాతం శ్రేణిలో పెరిగే వీలుందని నివేదిక విశ్లేషించింది. ఆరేళ్లలో మొట్టమొదటిసారి తన పొదుపు ఖాతాలపై లభించే వడ్డీరేటును ఎస్‌బీఐ అరశాతం తగ్గించింది. దీనితో ఈ రేటు 3.5 శాతానికి తగ్గింది.